ກະຊວງສຶກສາທິການ ແລະ ກິລາ (ສສກ) ໄດ້ຈັດພິທີສະເຫຼີມສະຫຼອງ 30 ປີ ຫ້ອງຮຽນ 2 ພາສາລາວ-ຝຣັ່ງ ເມື່ອບໍ່ດົນມານີ້ ທີ່ ມສ ວຽງຈັນ ໂດຍໃຫ້ກຽດເຂົ້າຮ່ວມຂອງທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ,

ທ່ານ ຊິວ-ແລັງ ຊູອອກ ເອກອັກຄະລັດຖະທູດຝຣັ່ງ ປະຈໍາ ສປປ ລາວ, ທ່ານ ນາງ ນວມຄໍາ ຈັນທະບູລີ ຫົວໜ້າກົມສາມັນສຶກສາ ກະຊວງສຶກສາທິການ ແລະ ກິລາ, ພ້ອມດ້ວຍຫົວໜ້າ-ຮອງຫົວໜ້າກົມ, ພະແນກສຶກສາທິການ ແລະ ກິລາແຂວງກ່ຽວຂ້ອງ, ຜູ້ຕາງໜ້າຈາກກະຊວງກ່ຽວຂ້ອງ, ຜູ້ຮັບຜິດຊອບວຽກງານວັດທະນະທໍາ ແລະ ການຮ່ວມມື ສະຖານທູດຝຣັ່ງ ປະຈໍາ ສປປ ລາວ, ຕະຫຼອດຄູອາຈານ, ແຂກທີ່ຖືກເຊີນ ແລະ ນ້ອງນັກຮຽນເຂົ້າຮ່ວມ.

          ໂອກາດດັ່ງກ່າວ, ທ່ານ ຮສ.ປອ ພຸດ ສິມມາລາວົງ ໄດ້ກ່າວຕີລາຄາສູງຕໍ່ກັບການຮ່ວມມື 2 ຝ່າຍ ລະຫວ່າງ ສປປ ລາວ ແລະ ປະເທດຝຣັ່ງ ຊຶ່ງສ່ວນຫຼາຍແມ່ນເປັນການຮ່ວມມືທີ່ມີລັກສະນະມູນເຊື້ອ ແລະ ຍຸດທະສາດ ໂດຍມີຈຸດປະສົງເພື່ອກໍ່ສ້າງ ແລະ ພັດທະນາຊັບພະຍາກອນມະນຸດ, ພັດທະນາເສດຖະກິດ-ສັງຄົມ ຕະຫຼອດຮອດການພັດທະນາແບບຍືນຍົງໃນຂົງເຂດຕ່າງໆເຊັ່ນ: ການສຶກສາ, ການທູດ, ວັດທະນະນະທໍາ, ມໍລະດົກ, ສາທາລະນະສຸກ, ການຄ້າ, ການລົງທຶນ, ການກະສິກຳ, ພະລັງງານ, ການທ່ອງທ່ຽວ ແລະ ອື່ນໆ. ນອກຈາກນີ້ ໃນເດືອນຕຸລາ 2024 ການນໍາຂັ້ນສູງຂອງສອງປະເທດເຮົາຍັງໄດ້ພົບກັນ ການພົບປະດັ່ງກ່າວເປັນຂີດໝາຍ ແລະ ເປັນສັນຍະລັກອັນດີງາມໃນການເພີ່ມທະວີການຮ່ວມມືສອງຝ່າຍໃນດ້ານຕ່າງໆ ໃນອະນາຄົດ. ສະເພາະວຽກງານສຶກສາ ການຮຽນການສອນພາສາຝຣັ່ງໃນ ສປປ ລາວ ແມ່ນມີມາຕັ້ງແຕ່ກ່ອນປະເທດຊາດໄດ້ຮັບການປົດປ່ອຍ, ໃນນັ້ນ ລັດຖະບານຝຣັ່ງ ໄດ້ເອົາໃຈໃສ່ກໍ່ສ້າງ ແລະ ພັດທະນາຊັບພະຍາກອນມະນຸດໃຫ້ແກ່ ສປປ ລາວ ຈໍານວນຫຼວງຫຼາຍ ຊຶ່ງບຸກຂະລາກອນດັ່ງກ່າວໄດ້ປະກອບສ່ວນເຂົ້າວຽກງານປົກປັກຮັກສາ ແລະ ສ້າງສາປະເທດຊາດ ແລະ ເປັນທ່າແຮງການໃນພັດທະນາເສດຖະກິດ-ສັງຄົມ, ໂດຍເຫັນໄດ້ຄວາມສໍາຄັນ ແລະ ເປັນການເສີມຂະຫຍາຍວຽກງານດັ່ງກ່າວ, ສະນັ້ນ ໃນປີ 1995 ກະຊວງສຶກສາທິການ ແລະ ກິລາ ຈຶ່ງໄດ້ຮັບເອົາໂຄງການຫ້ອງຮຽນສອງພາສາລາວ-ຝຣັ່ງ ຊຶ່ງໃນເບື້ອງຕົ້ນໄດ້ຈັດຕັ້ງການຮຽນ ການສອນຢູ່ນະຄອນຫຼວງວຽງຈັນ (ກຳແພງນະຄອນໃນເວລານັ້ນ) ຕໍ່ມາຈຶ່ງໄດ້ຂະຫຍາຍໄປແຂວງຫຼວງພະບາງ, ສະຫວັນນະເຂດ ແລະ ຈໍາປາສັກ ຈົນເທົ່າທຸກວັນນີ້.

           ຕະຫຼອດໄລຍະເວລາ 30 ປີຂອງການສ້າງຕັ້ງລະບົບການຮຽນການສອນດັ່ງກ່າວ ຄູ່ຮ່ວມພັດທະນາໄດ້ມີການຜັດປ່ຽນກັນຮັບຜິດຊອບຫຼາຍຫຼົບຫຼາຍຕ່າວເຊັ່ນ: ອົງການຈັດຕັ້ງສາກົນຝຣັ່ງໂກໂຟນີ່, ອົງການມະຫາວິທະຍາໄລແຫ່ງຊາດ, ສະຖານທູດຝຣັ່ງປະຈໍາ ສປປ ລາວ ແລະ ເລີ່ມແຕ່ປີ 2015 ຈົນເຖິງ, ລະບົບການຮຽນການສອນດັ່ງກ່າວ ໄດ້ຢູ່ໃນຄວາມຮັບຜິດຊອບຂອງກະຊວງສຶກສາທິການ ແລະ ກິລາ ໂດຍແມ່ນກົມສາມັນສຶກສາເປັນຜູ້ຮັບຜິດຊອບໃນການຈັດຕັ້ງປະຕິບັດ. ໃນປັດຈຸບັນໄດ້ຈັດຕັ້ງການຮຽນການສອນ ໃນ 13 ໂຮງຮຽນ ໃນນັ້ນ ໂຮງຮຽນ ປະຖົມ 9 ແຫ່ງ ແລະ ມັດທະຍົມ 4 ແຫ່ງ (ຫຼວງພະບາງ ປະຖົມ 3 ແຫ່ງ ແລະ ມັດທະຍົມ 1, ສະຫວັນນະເຂດ ປະຖົມ 2 ແຫ່ງ ແລະ ມັດທະຍົມ 1, ຈໍາປາສັກ ປະຖົມ 2 ແຫ່ງ ແລະ ມັດທະຍົມ 1 ແຫ່ງ ແລະ ນະຄອນຫຼວງວຽງຈັນ ປະຖົມ 2 ແຫ່ງ ມັດທະຍົມ 1 ແຫ່ງ). ໃນແຕ່ລະປີສະຖິຕິນັກຮຽນ ແລະ ຄູສອນແມ່ນມີລັກສະນະສະຖຽນຄື: ຄູສອນ ປະມານ 100 ຄົນ ແລະ ນັກຮຽນປະມານ 3000 ຄົນ (ປະຖົມ ປະມານ 1700 ຄົນ ແລະ ມັດທະຍົມ ປະມານ 1300 ຄົນ). ຕາມການລາຍງານເຫັນວ່າ ນັກຮຽນທີ່ຮຽນຈົບຈາກຫ້ອງຮຽນສອງພາສາລາວ-ຝຣັ່ງ ສ່ວນຫຼາຍມີຄວາມຮູ້ພື້ນຖານທີ່ຄົບຖ້ວນ ຊຶ່ງໄດ້ສະແດງອອກວ່າ ນັກຮຽນທີ່ຮຽນຈົບຊັ້ນມັດທະຍົມສຶກສາຕອນປາຍ ສາມາດເຂົ້າຮຽນຕໍ່ການສຶກສາລະດັບສູງທັງພາຍໃນ ແລະ ຕ່າງປະເທດ ແລະ ຈໍານວນໜຶ່ງກໍ່ສາມາດສະໝັກເອົາທຶນການສຶກສາລະດັບພາກພື້ນ ແລະ ສາກົນໄດ້.
ການທີ່ຫ້ອງຮຽນສອງພາສາລາວ-ຝຣັ່ງ ມີຄວາມຢືນຍົງ ແລະ ມີຜົນງານໃນການກໍ່ສ້າງບຸກຂະລາກອນຢ່າງຕໍ່ນັ້ນ ກໍ່ຍ້ອນການຮ່ວມມື ແລະ ການສະໜັບສະໜູນຢ່າງຕັ້ງໜ້າຂອງລັດຖະບານຝຣັ່ງ ກໍ່ຄືສະຖານທູດຝຣັ່ງ ປະຈໍາ ສປປ ລາວ ແລະ ຄູ່ຮ່ວມພັດທະນາ ເຊັ່ນ: ລຸກຊໍາບວກ, ການາດາ, ອົງການຈັດຕັ້ງສາກົນຝຣັ່ງໂກໂຟນີ, ອົງການມະຫາວິທະຍາໄລແຫ່ງຊາດ ແລະ ຄູ່ຮ່ວມພັດທະນາອື່ນໆທັງພາຍໃນ ແລະ ຕ່າງປະເທດ. ຕໍ່ກັບຜົນສໍາເລັດຂອງການຮ່ວມມືໃນດ້ານດັ່ງກ່າວ ຂ້າພະເຈົ້າຂໍສະແດງຄວາມຍ້ອງຍໍ ຊົມເຊີຍມາຍັງທຸກພາກສ່ວນ ລວມທັງພະແນກສຶກສາທິການ ແລະ ກິລາແຂວງ, ນະຄອນຫຼວງ, ຫ້ອງການສຶກສາທິການ ແລະ ກິລາເມືອງ, ນະຄອນ; ຄະນະພັກ ຄະນະນໍາໂຮງຮຽນ, ຄູສອນ ແລະ ນ້ອງນັກຮຽນ ຕະຫຼອດຮອດຜູ້ປົກຄອງທີ່ໄດ້ຕັດສິນໃຈ, ເອົາໃຈໃສ່ວຽກງານດັ່ງກ່າວ ຈົນເຮັດໃຫ້ພວກເຮົາມີຜົນສໍາເລັດ, ສໍາລັບທິດທາງຕໍ່ໜ້າ ແມ່ນພ້ອມກັນເອົາໃຈໃສ່ປະກອບສ່ວນເຂົ້າໃນວຽກງານການສຶກສາ, ຕີຖອຍທຸກປະກົດການຫຍໍ້ທໍ້ທີ່ເກີດຂຶ້ນ ຕັດສິນໃຈຜ່ານຜ່າຂໍ້ຫຍຸ້ງຍາກ, ສາມັກຄີກັນເປັນຈິດໜຶ່ງໃຈດຽວ ເພື່ອສຸມໃສ່ການສຶກສາ ໃຫ້ນັບມື້ນັບມີຄຸນນະພາບ, ສໍາລັບຄູ່ຮ່ວມພັດທະນາ ສະເໜີໃຫ້ສືບຕໍ່ຊ່ວຍເຫຼືອທາງດ້ານວິຊາການ, ວິທີການ, ສ້າງແຮງຈຸງໃຈເຊັ່ນ: ກິດຈະກຳໃນລະດັບຕ່າງໆທັງໃນ ແລະ ນອກໂຮງຮຽນ, ປັບປຸງສະພາບແວດລ້ອມທີ່ເອື້ອອໍານວຍຕໍ່ການຮຽນ ການສອນ, ໃຫ້ທຶນການສຶກ, ຝຶກອົບຮົມຄູສອນ ແລະ ຄະນະຮັບຜິດຊອບ ໃຫ້ມີຄວາມເຂັ້ມແຂງ ບໍ່ວ່າຈະເປັນການຮຽນ ການສອນ ຫ້ອງຮຽນສອງພາສາ ແລະ ການສອນພາສາຝຣັ່ງທີ່ເປັນພາສາທີ 2.

          ສໍາລັບຜູ້ບໍລິຫານການສຶກສາຂັ້ນແຂວງ, ຂັ້ນເມືອງ ແມ່ນໃຫ້ເອົາໃຈໃສ່ ຊ່ວຍເຫຼືອ, ສະໜັບສະໜູນ, ຕິດຕາມ, ສົ່ງເສີມຢ່າງຕັ້ງໜ້າ ເພື່ອກຳໄດ້ສະພາບຂໍ້ສະດວກ ແລະ ຂໍ້ຫຍຸ້ງຍາກ ເພື່ອເປັນບ່ອນອີງໃນການພັດທະນາໃນອະນາຄົດ; ສໍາລັບຂັ້ນໂຮງຮຽນ ແມ່ນໃຫ້ເອົາໃຈໃສ່ປົກປ້ອງຄວາມສາມັກຄີປຶກແຜ່ນ ກຳໄດ້ສະພາບການຈັດການຮຽນການສອນ ລວມທັງການປະຕິບັດໜ້າວຽກຂອງຄູ, ຂອງໂຮງຮຽນ, ຫ້ອງຮຽນ ຕະຫຼອດຮອດນັກຮຽນ ໂດຍສະເພາະແມ່ນນັກຮຽນທີ່ມີຄວາມຫຍຸ້ງຍາກ ມີຄວາມຕ້ອງການພິເສດ; ສໍາລັບຄູສອນ ແມ່ນໃຫ້ເອົາໃຈໃສ່ປະຕິບັດໜ້າທີ່ສິດສອນ, ກະກຽມບົດສອນ, ແຜນການສອນ, ປະດິດສ້າງສື່ການຮຽນ ການສອນ ແລະ ຂຶ້ນຫ້ອງສອນຢ່າງເປັນປົກກະຕິ, ປະຕິບັດລະບຽບລັດຖະກອນ, ປະຕິບັດຈັນຍາບັນ-ຈັນຍາທໍາຂອງຢ່າງເຄັ່ງຄັດ ຫຼີກລ້ຽງການຂຶ້ນຫ້ອງແບບບໍ່ມີຄວາມຮັບຜິດຊອບ, ຂຶ້ນຊ້າ ລົງໄວ ສອນພໍແລ້ວມື້ແລ້ວວັນ, ມີຄວາມສາມັກຄີຮັກແຮງ, ມີຄວາມຕື່ນຕົວໃນການພັດທະນາຕົນເອງທາງດ້ານວິຊາສະເພາະ, ພາສາ, ວິທີສິດສອນ ແລະ ໄອຊີທີ; ສໍາລັບນັກຮຽນ ແມ່ນໃຫ້ເອົາໃສ່ຄົ້ນຄ້ວາຮໍ່າຮຽນ, ປະຕິບັດກົດລະບຽບຂອງໂຮງຮຽນ, ປະຕິບັດໜ້າທີ່ຂອງນັກຮຽນ, ເປັນລູກສິດທີ່ດີຂອງຄູອາຈານ ແລະ ເປັນລູກທີ່ດີຂອງພໍ່ແມ່ ແລະ ສັງຄົມ; ສໍາລັບຜູ້ປົກຄອງ ແມ່ນສະເໜີຊ່ວຍຕິດຕາມ ຊຸກຍູ້ ສົ່ງເສີມບຸດ ຫຼານ, ຊາວໜຸ່ມພາຍໃນບ້ານ, ຊຸມຊົນໃຫ້ມາໂຮງຮຽນປົກກະຕິ.
         ນອກນັ້ນ, ໃນພິທີພິທີຍັງໄດ້ມີການມອບລາງວັນການແຂ່ງຂັນກ່ຽວກັບຮູບພາບ ຊັ້ນປະຖົມສຶກສາ, ມອບລາງວັນການແຂ່ງຂັນກ່ຽວກັບຮ້ອງເພງ ຊັ້ນມັດທະຍົມສຶກສາ, ມອບປະກາສະນິຍະບັດພາສາຝຣັ່ງ 2025 A2 ແລະ ພິທີມອບປະກາສະນິຍະບັດພາສາຝຣັ່ງ 2025 B1 ອີກດ້ວຍ.