ການກະກຽມຄວາມພ້ອມດ້ານພິທີການທູດ ຮັບໃຊ້ກອງປະຊຸມລັດຖະມົນຕີວິທະຍາສາດ ເຕັກໂນໂລຊີ ແລະ ນະວັດຕະກຳອາຊຽນ ຄັ້ງທີ 22

ເພື່ອເປັນການກະກຽມຄວາມພ້ອມໃຫ້ແກ່ການເປັນເຈົ້າພາບຈັດກອງປະຊຸມລັດຖະມົນຕີ ວິທະຍາສາດ ເຕັກໂນໂລຊີ ແລະ ນະວັດຕະກຳອາຊຽນ ຄັ້ງທີ 22 ທີ່ຈະຈັດຂຶ້ນຢູ່ນະຄອນຫຼວງວຽງຈັນ ແຕ່ວັນທີ 22 -26 ມິຖຸນາ 2026 ນີ້, ຄະນະອະນຸກຳມະການຕິດຕາມຜູ້ແທນ ໄດ້ຈັດຕັ້ງການຝຶກອົບຮົມດ້ານຄວາມຮູ້ພື້ນຖານກ່ຽວກັບວຽກງານພິທີການທູດຂຶ້ນຢ່າງເປັນທາງການ ທີ່ສະຖາບັນພັດທະນາຊັບພະຍາກອນມະນຸດ ລາວ-ຍີ່ປຸ່ນ ມະຫາວິທະຍາໄລແຫ່ງຊາດ (ມຊ), ໂດຍການເປັນປະທານຂອງ ທ່ານ ພິມມະສອນ ສີສະອາດ ຮອງຫົວໜ້າຫ້ອງການ ກະຊວງສຶກສາທິການ ແລະ ກິລາ (ສສກ) ທັງເປັນຫົວໜ້າຄະນະອະນຸກຳມະການຕິດຕາມຜູ້ແທນ, ມີບັນດາແຂກຖືກເຊີນ, ນັກວິທະຍາກອນ ແລະພະນັກງານ, ຄູ-ອາຈານ ແລະ ນັກສຶກສາ (LO ແລະ VO) ເຂົ້າຮ່ວມ.

ຈຸດປະສົງຫຼັກຂອງການຝຶກອົບຮົມໃນຄັ້ງນີ້ ແມ່ນເພື່ອສ້າງຄວາມເຂົ້າໃຈ ແລະ ໃຫ້ຄວາມຮູ້ພື້ນຖານດ້ານວຽກງານພິທີການທູດແກ່ພະນັກງານ, ຄູອາຈານ ແລະ ນັກສຶກສາ ທີ່ເຮັດໜ້າທີ່ໃນຄະນະອະນຸກຳມະການຕິດຕາມຜູ້ແທນ (LO ແລະ VO). ທັງນີ້ ກໍເພື່ອແນໃສ່ເຮັດໃຫ້ການຈັດຕັ້ງປະຕິບັດວຽກງານຕ້ອນຮັບຄະນະຜູ້ແທນທີ່ເດີນທາງມາເຂົ້າຮ່ວມກອງປະຊຸມດັ່ງກ່າວໄດ້ຮັບຜົນດີ ແລະ ມີປະສິດທິພາບສູງສຸດ.

ກອງປະຊຸມຄັ້ງນີ້ ດໍາເນີນລາຍການໂດຍ ທ່ານ ອຈ.ປອ ນາງ ໃບສີ ວາເນັງຈື ຮອງຫົວໜ້າຫ້ອງການສັງລວມ ແລະ ພົວພັນຕ່າງປະເທດ ມຊ. ໃນກອງປະຊຸມ, ຜູ້ເຂົ້າຮ່ວມຍັງໄດ້ຮັບຟັງການນຳສະເໜີ ແລະ ບັນຍາຍກ່ຽວກັບຄວາມຮູ້ພື້ນຖານຂອງວຽກງານພິທີການທູດ ໂດຍໃຫ້ກຽດເປັນວິທະຍາກອນ ຂອງ ທ່ານ ນາງ ຕະນາວິລັດ ແກ້ວດວງດີ, ຮອງຫົວໜ້າພະແນກ ກົມພິທີການທູດ ກະຊວງການຕ່າງປະເທດ. ເນື້ອໃນການບັນຍາຍໄດ້ກາຍເປັນບົດຮຽນອັນລ້ຳຄ່າ ທີ່ຜູ້ເຂົ້າຮ່ວມຈະສາມາດນຳໄປຈັດຕັ້ງປະຕິບັດໃນວຽກງານຮັບໃຊ້ກອງປະຊຸມ ທີ່ກຳລັງຈະມາເຖິງ ແລະ ກອງປະຊຸມອື່ນໆໃນອະນາຄົດໄດ້ເປັນຢ່າງດີ.

ນອກຈາກການຮຽນຮູ້ ພາກທິດສະດີແລ້ວ, ໃນຕອນບ່າຍຂອງມື້ດຽວກັນ ຄະນະຜູ້ເຂົ້າຮ່ວມການຝຶກອົບຮົມທຸກຄົນ ຍັງໄດ້ລົງພື້ນທີ່ເພື່ອຖອດຖອນບົດຮຽນຢູ່ສະຖານທີ່ຕົວຈິງ ທີ່ສະໜາມບິນສາກົນວັດໄຕ. ການລົງພື້ນທີ່ແມ່ນເນັ້ນໜັກໃສ່ 3 ຈຸດສຳຄັນ ຄື: ຫ້ອງຮັບຮອງແຂກພິເສດ (VIP), ຈຸດຮັບເອົາກະເປົາສຳພາລະ, ຈຸດຜ່ານເອກະສານກັບເຈົ້າໜ້າທີ່ກວດຄົນເຂົ້າເມືອງ (ຕມ) ລວມເຖິງຈຸດບໍລິການອື່ນໆຕາມຄວາມເໝາະສົມ.

: ກະດານຂ່າວ ມຊ