ວັນຊາດ 2 ທັນວາ ເປັນວັນທີ່ມີຄວາມໝາຍສຳຄັນຢ່າງຫຼວງຫຼາຍ ຕໍ່ປະເທດຊາດຂອງພວກເຮົາ ເປັນ ວັນທີ່ປະຊາຊົນລາວ ທັງຊາດຫວນຄືນ ແລະ ລະລຶກເຖິງມູນເຊື້ອນໍ້າໃຈການຕໍ່ສູ້ເດັດດ່ຽວບໍ່ຍອມຈໍານົນ ຢ່າງພິລະອາດຫານຂອງບັນພະບູລຸດລາວຜູ້ອົງອາດ ແລະ ປະຊາຊົນລາວບັນດາເຜົ່າ, ເປັນການຫວນຄືນໄຊຊະນະອັນຍິ່ງໃຫຍ່ຂອງການ ປະຕິວັດລາວ ໂດຍພາຍໃຕ້ການນໍາພາອັນສະຫຼາດສ່ອງໃສຂອງພັກ ປະຊາຊົນປະຕິວັດລາວ ຈົນສາມາດປົດປ່ອຍປະເທດຊາດ ໄດ້ຢ່າງສົມບູນ ແລະ ສະຖາປະນາ ສປປ ລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975.
ຕະຫຼອດໄລຍະ 50 ປີ ພາຍໃຕ້ການນໍາພາຂອງພັກປະຊາຊົນປະຕິວັດລາວ ໄດ້ນໍາພາປະເທດຊາດເດີນຕາມເສັ້ນທາງສັງຄົມນິຍົມ ແລະ ປະຕິບັດ 2 ໜ້າທີ່ຍຸດທະສາດ ຄື: ປົກປັກຮັກສາ ແລະ ສ້າງສາພັດທະນາປະເທດຊາດ. ປະເທດຊາດຂອງພວກເຮົາໄດ້ຮັບການພັດທະນາຢ່າງຕໍ່ເນື່ອງ ໃນຫຼາຍດ້ານ, ປະເທດຊາດມີສະຖຽນລະພາບທາງດ້ານການເມືອງຢ່າງໜັກແໜ້ນ, ຂົງເຂດປ້ອງກັນຊາດ-ປ້ອງກັນຄວາມສະຫງົບ ໄດ້ຮັບການຈັດຕັ້ງປະຕິບັດຢ່າງຕັ້ງໜ້າ ໃນການປົກປັກຮັກສາອະທິປະໄຕ ແລະ ຜືນແຜ່ນດິນອັນຄົບຖ້ວນ, ສັງຄົມມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍ, ເສດຖະກິດ ໄດ້ຮັບການພັດທະນາເຕີບໂຕຢ່າງຕໍ່ເນື່ອງ, ພື້ນຖານໂຄງລ່າງໄດ້ສືບຕໍ່ພັດທະນາຢ່າງຕັ້ງໜ້າ, ຂົງເຂດການສຶກສາ-ສາທາລະນະສຸກ ໄດ້ຮັບການພັດທະນາຢ່າງບໍ່ຢຸດຢັ້ງ, ຊີວິດການເປັນຢູ່ຂອງປະຊາຊົນ ໄດ້ຮັບການບັບປຸງ ແລະ ຍົກລະດັບໃຫ້ດີຂຶ້ນເປັນກ້າວໆ, ຂົງເຂດວັດທະນະທໍາໄດ້ຮັບການປົກປັກຮັກສາ ແລະ ສົ່ງເສີມວັດທະນະທໍາທີ່ເປັນມູນເຊື້ອເອກະລັກອັນດີງາມຂອງຊາດ, ຂອງປະຊາຊົນລາວບັນດາເຜົ່າ ສືບສານສິລະປະວັດທະນະທໍາອັນດີງາມຂອງຊາດໄວ້ໃຫ້ຍືນຍົງວັດທະນະທໍາລາວນັບມື້ນັບໄດ້ຮັບການພັດທະນາເປັນທີ່ຮັບຮູ້ ແລະ ຍ້ອງຍໍຊົມເຊີຍຈາກບັນດາປະເທດໃນພາກພື້ນ ແລະ ສາກົນ.
ທ່ານ ວິລະພັນ ຊາພູວົງ ໄດ້ກ່າວໃຫ້ຮູ້ຕື່ມວ່າ: ວສຊ ເອົາໃຈໃສ່ຊີ້ນໍາ-ນໍາພາ ສຶກສາອົບຮົມການເມືອງ-ແນວຄິດໃຫ້ແກ່ ສະມາຊິກພັກ, ພະນັກງານ, ຄູ-ອາຈານ ດ້ວຍຫຼາຍຮູບແບບວິທີການ ແລະ ຖືເປັນວຽກງານສໍາຄັນຕົ້ນຕໍ ສອດຫ້ອຍ ເຂົ້າໃນທຸກຂົງເຂດໜ້າທີ່ວຽກງານ, ເພື່ອເຮັດໃຫ້ພະນັກງານ-ສະມາຊິກພັກຍົກສູງຄວາມຮັບຜິດຊອບເອົາ ໃຈໃສ່ປະຕິບັດໜ້າທີ່ການເມືອງຂອງຕົນ ທີ່ໄດ້ຮັບມອບໝາຍໃຫ້ມີຜົນສໍາເລັດ. ຊຶ່ງໃນໄລຍະຜ່ານມາ ວສຊ ໄດ້ພັດທະນາຫຼັກສູດການຮຽນການສອນ ໃຫ້ທັນສະໄໝ ໄດ້ມີການປັບປຸງພື້ນຖານໂຄງລ່າງ, ຕຶກອາຄານຮຽນ ແລະ ສິ່ງອໍານວຍຄວາມສະດວກ. ໃນສົກຮຽນປີ 2022-2023 ໄດ້ຮັບການອະນຸມັດຕົກລົງ ຍົກຖານະຈາກໂຮງຮຽນສິລະປະແຫ່ງຊາດ ຂຶ້ນເປັນວິທະຍາໄລສິລະປະແຫ່ງຊາດ, ສົກຮຽນປີ 2023-2024 ໄດ້ນໍາພາປັບປຸງລະບົບການຮຽນການສອນຊັ້ນກາງໃຫ້ມີຄຸນນະພາບສູງຂຶ້ນ ແລະ ສ້າງຫຼັກສູດຊັ້ນສູງ (ອະນຸປະລິນຍາ); ປີ 2024 ໄດ້ຮັບອະນຸມັດຕົກລົງຮັບຮອງຈາກກະຊວງສຶກສາທິການ ແລະ ກິລາ ໃນການທົດລອງນໍາໃຊ້ຫຼັກສູດຝຶກອົບຮົມໄລຍະສັ້ນ ແລະ ເປີດນໍາໃຊ້ຫຼັກສູດລະດັບຊັ້ນຕົ້ນ ຫາ ຊັ້ນສູງ ຂອງ ວສຊ ແລະໃນຕົ້ນປີ 2025 ສາມາດເປີດການຮຽນການສອນ ໃນລະບົບຊັ້ນສູງ (ອະນຸປະລິນຍາ) ຂຶ້ນ. ຊຶ່ງເປັນລະບົບຮຽນຊັ້ນສູງຊຸດທໍາອິດຂອງ ວສຊ ແລະ ສືບຕໍ່ປັບປຸງຫຼັກສູດໄປພ້ອມໆກັນເພື່ອໃຫ້ມີຄຸນນະພາບສູງຂຶ້ນ.
ໄລຍະ 5 ປີຜ່ານມາ ວສຊ ໄດ້ສຸມໃສ່ພັດທະນາຕົນເອງຢ່າງຮອບດ້ານ ເພື່ອເຮັດໃຫ້ ວສຊ ກາຍເປັນສູນກາງແຫ່ງການກໍ່ສ້າງບຸກຄະລາກອນທາງດ້ານສິລະປະວັດທະນະທໍາ, ຜະລິດນັກສະແດງ, ນັກສິລະປິນອາຊີບ ເພື່ອຕອບຄວາມຮຽກຮ້ອງຕ້ອງການດ້ານນັກສິລະປິນ, ນັກສະແດງ, ນັກປະພັນ, ນັກປະດິດຄິດແຕ່ງຮັບໃຊ້ໃຫ້ແກ່ສັງຄົມທັງຢູ່ສູນກາງ ແລະ ທ້ອງຖິ່ນໃນຂອບເຂດທົ່ວປະເທດ. ສໍາລັບການຮຽນການສອນ ວສຊ ມີລະບົບການສອນແບບຄວບຄູ່, ລະຫວ່າງການຮຽນວິຊາຊີບ (ວິຊາສະເພາະ) ດ້ານສິລະປະການສະແດງ ແລະ ການຮຽນ ສາຍສາມັນສຶກສາ ຊຶ່ງຈັດຢູ່ໃນການສຶກສານອກໂຮງຮຽນ (ກສນ) ຂຶ້ນກັບກົມການສຶກສານອກໂຮງຮຽນຂອງກະຊວງສຶກສາທິການ ແລະ ກິລາ. ສ່ວນດ້ານວິຊາສະເພາະສິລະປະການສະແດງແມ່ນຂຶ້ນກັບກົມສິລະປະ-ວັດທະນະທໍາ, ສາມາດສ້າງນັກສຶກສາຈົບວິຊາສະເພາະລະດັບຊັ້ນກາງ ດ້ານສາຂາສິລະປະການສະແດງໄດ້ 154 ຄົນ, ຍິງ 101ຄົນ; ການຮຽນການສອນ ສາຍສາມັນນອກລະບົບ ມີນັກຮຽນຈົບຊັ້ນມັດທະຍົມຕົ້ນ (ມ.4) ທັງໝົດ 281 ຄົນ, ຍິງ 168 ຄົນ; ຈົບຊັ້ນມັດທະຍົມປາຍ (ມ.7) ມີ 282 ຄົນ, ຍິງ 166 ຄົນ. ໄດ້ປະກອບສ່ວນເຄື່ອນໄຫວກິດຈະກໍາດ້ານຕ່າງໆ, ພະນັກງານ, ຄູ-ອາຈານ ໄດ້ເປັນວິທະຍາກອນໃນເຜີຍເເຜ່ດ້ານວຽກງານສິລະປະການສະແດງ, ການຟ້ອນລໍາວົງລາວ, ການຫຼິ້ນດົນຕີພື້ນເມືອງໃຫ້ແກ່ບັນດາສະຖາບັນ ການສຶກສາ ແລະ ບັນດາກະຊວງອົງການ, ອັນພົ້ນເດັ່ນແມ່ນງານມະຫະກໍາກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງເປັນເຈົ້າພາບ, ງານມະຫະກໍາກິລາແຫ່ງຊາດ ຄັ້ງທີ XII ທີ່ນະຄອນຫຼວງວຽງຈັນ ເປັນເຈົ້າພາບ, ການສະແດງຮັບໃຊ້ໃນງານຕ່າງໆປິ່ນອ້ອມກອງປະຊຸມສຸດຍອດອາຊຽນ ຄັ້ງທີ 44 ແລະ 45 ທີ່ສປປ ລາວ ເປັນເຈົ້າພາບ ແລະ ການສະແດງໃນງານຕ່າງໆ ເພື່ອສະເຫຼີມສະຫຼອງ 3 ວັນປະຫວັດສາດຂອງຊາດ.
ໂອກາດດັ່ງກ່າວ, ທ່ານ ວິລະພັນ ຊາພູວົງ ຕາງໜ້າໃຫ້ຄະນະພັກຄະນະອໍານວຍການ ວສຊ ໄດ້ສະແດງຄວາມຂອບໃຈຄວາມຮູ້ບຸນຄຸນເປັນຢ່າງສູງມາຍັງການນໍາພັກ-ລັດ, ພະນັກງານປະຕິວັດອາວຸໂສບຳນານ, ການນໍາກະຊວງ ວທ ທີ່ໄດ້ນໍາພາ-ຊີ້ນໍາ ວສຊ ໃຫ້ນັບມື້ນັບເຕີບໃຫຍ່ຂະຫຍາຍຕົວ, ອວຍພອນໄຊອັນປະເສີດ ມາຍັງການນໍາພັກ-ລັດ, ພະນັກງານປະຕິວັດອາວຸໂສບຳນານ, ພະນັກງານ-ລັດຖະກອນ, ທະຫານ-ຫຼວດ ຕະຫຼອດຮອດທັງປະຊາຊົນລາວບັນດາເຜົ່າ, ຈົ່ງມີພະລານາໄມທີ່ເຂັ້ມແຂງ, ມີຄວາມສຸກຄວາມຈະເລີນໃນຊີວິດສ່ວນຕົວ ແລະ ຄອບຄົວ, ພ້ອມກັນເຮັດສໍາເລັດໜ້າທີ່ໃນການປົກປັກຮັກສາ ແລະ ສ້າງສາພັດທະນະປະເທດຊາດໄວ້ໃຫ້ໝັ້ນຄົງ, ພ້ອມກັນສະເຫຼີມສະຫຼອງວັນຊາດ ທີ 2 ທັນວາ ຄົບຮອບ 50 ປີ ແລະ ວັນເກີດປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກ ຄົບຮອບ 105 ປີ ໃຫ້ເປັນຂະບວນການຟົດຟື້ນກວ້າງຂວາງ.
ສາທາລະນະລັດ ປະຊາທິປະໄຕ ປະຊາຊົນລາວ ໝັ້ນຍືນ
ນໍ້າໃຈວັນຊາດ ທີ 2 ທັນວາ ໝັ້ນຍືນ
ປະທານ ໄກສອນ ພົມວິຫານ, ຍືນຍົງໃນພາລະກິດປະຕິວັດລາວ ຕະຫຼອດໄປ