ກອງປະຊຸມຄະນະຮັບຜິດຊອບ ການຈັດຕັ້ງປະຕິບັດໂຄງການ ສະຖາບັນ ລາວ-ອົດສະຕຣາລີ ໄລຍະທີ III ປະຈໍາປີ 2026 ຈັດຂຶ້ນເມື່ອວັນທີ 20 ພຶດສະພາ 2026, ທີ່ໂຮງແຮມລາວພຣາຊາ

ພາຍໃຕ້ການເປັນປະທານຮ່ວມມີທ່ານ ປອ ຕຸດາວັນ ໜໍ່ເມືອງເສດ ຫົວໜ້າກົມຈັດຕັ້ງ ແລະ ພະນັກງານ ກະຊວງສຶກສາທິການ ແລະ ກິລາ, ທ່ານ ນາງ ເຄດ ກູດຟຣຸດ (Kate Goodfruit) ເລຂາໂທ ສະຖານທູດອົດສະຕຣາລີ ປະຈໍາ ສປປ ລາວ ແລະ ທ່ານ ຣັອບ ກຣີນ (Rob Green) ຜູ້ອໍານວຍການສະຖາບັນລາວອົດສະຕຣາລີ, ມີບັນດາຫົວກົມ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ ໃນນາມຕາງໜ້າຄະນະຮັບຜິດຊອບການຈັດຕັ້ງປະຕິບັດໂຄງການສະຖາບັນລາວ-ອົດສະຕຣາລີ ໄລຍະ III ແລະ ພະນັກງານທີ່ກ່ຽວຂ້ອງເຂົ້າຮ່ວມ.

ໂອກາດນີ້, ທ່ານ ປອ ຕຸດາວັນ ໜໍ່ເມືອງເສດ ກ່າວວ່າ: ກອງປະຊຸມໃນມື້ນີ້ ມີຄວາມສໍາຄັນເປັນຢ່າງຍິ່ງ ເພາະເປັນໂອກາດດີທີ່ພວກເຮົາຈະໄດ້ຮ່ວມກັນທົບທວນ, ປຶກສາຫາລື, ວາງແຜນການເຄື່ອນໄຫວ ແລະ ກໍານົດທິດທາງໃນການຈັດຕັ້ງປະຕິບັດ ເພື່ອຮັບປະກັນໃຫ້ໂຄງການໄລຍະ 3 ນີ້ ດໍາເນີນໄປຢ່າງມີປະສິດທິພາບ, ໂປ່ງໃສ ແລະ ບັນລຸຄາດໝາຍທີ່ວາງໄວ້. ເຊິ່ງໃນເດືອນພະຈິກ ທີ່ຈະມາເຖິງນີ້ ເຮົາກໍຈະໄດ້ມີການສະຫຼຸບຄືນຜົນການຈັດຕັ້ງປະຕິບັດ ທີ່ຜ່ານມາ. ຂ້າພະເຈົ້າເຊື່ອໝັ້ນວ່າ ຜົນງານທີ່ພວກເຮົາຍາດມາໄດ້ ແມ່ນມີຜົນສຳເລັດສູງ ພ້ອມກັນຊຸກຍູ້ໂຄງການໃຫ້ກ້າວໄປຂ້າງໜ້າຢ່າງມີໝາກຜົນ ໃນບັ້ນທ້າຍຂອງໄລຍະ 3 ນີ້.

ໂຄງການ ສະຖາບັນລາວ-ອົດສະຕຣາລີ ໄລຍະຜ່ານມາ ໄດ້ມີສ່ວນຮ່ວມໃນການປະຕິບັດແຜນພັດທະນາຊັບພະຍາກອນມະນຸດຂອງຂະແໜງ ສຶກສາທິການ ແລະ ກິລາ ຕິດພັນກັບການນໍາໃຊ້ ເຄື່ອງມືໃນການປະເມີນຂີດຄວາມສາມາດ ແລະ ຄວາມພ້ອມພາຍໃນຂອງຂະແໜງການ ຕໍ່ການຜັນຂະຫຍາຍຍຸດທະສາດ ຂອງກົມຈັດຕັ້ງ, ການຄົ້ນຄ້ວາມອບໝາຍໃຫ້ພະນັກງານ ເຂົ້າຮ່ວມຝຶກອົບຮົມຕ່າງໆ ພາຍໃຕ້ໂຄງການ.

ໂດຍສະເພາະການສະໜອງທຶນການສຶກສາ ໃຫ້ນັກຮຽນໄປຮຽນຢູ່ປະເທດອົດສະຕາລີ ທີ່ເຂົ້າເຖິງນັກຮຽນກວ້າງຂວາງ ທົ່ວປະເທດ, ການສະໜັບສະໜູນທີ່ເຂັ້ມແຂງດ້ານການ ຊຸກຍູ້ການຈັດຕັ້ງປະຕິບັດຍຸດທະສາດການພັດທະນາຊັບພະຍາກອນມະນຸດແຫ່ງຊາດ (2016-2025) ເປັນຕົ້ນການສ້າງຂີດຄວາມສາມາດໃຫ້ແກ່ຄະນະກຳມະການພັດທະນາຊັບພະຍາກອນມະນຸດ ແລະ ກອງເລຂາຂອງບັນດາກະຊວງ ຂັ້ນສູນກາງ ແລະ ແຂວງ/ນະຄອນຫຼວງ, ການສ້າງເຄື່ອງມືໃນການປະເມີນຂີດຄວາມສາມາດ ແລະ ຄວາມພ້ອມພາຍໃນຂອງຂະແໜງການ ຕໍ່ການຜັນຂະຫຍາຍຍຸດທະສາດ ແລະ ສ້າງເຄື່ອງມືຝຶກອົບຮົມສ້າງຂີດຄວາມສາມາດໃນ ການສ້າງຍຸດທະສາດພັດທະນາຊັບພະຍາ ກອນມະນຸດ 6 ໂມດູນ ແລະ ກຽມບຸກຄະລາກອນໃນການເປັນຄູຝຶກສືບຕໍ່.

ພ້ອມດຽວກັນນີ້, ໂຄງການ ຍັງໄດ້ໃຫ້ການສະໜັບສະໜູນ ທາງດ້ານວິຊາການ ແລະ ງົບປະມານ ໃນຂະບວນການຄົ້ນຄວ້າ ປຶກສາຫາລື ຮ່ວມກັບຂະແໜງການ ໃນການປະກອບຂໍ້ມູນ ແລະ ເນື້ອໃນເຂົ້າໃນ ຮ່າງຍຸດທະສາດການພັດທະນາຊັບພະຍາກອນມະນຸດແຫ່ງຊາດ (2026-2035) ໂດຍພື້ນຖານ ແລະ ມີການລິເລີ່ມສ້າງເວທີສົນທະນາປຶກສາຫາລືຮ່ວມຫຼາຍພາກສ່ວນກ່ຽວຂ້ອງ ທັງພາກລັດ, ເອກະຊົນ, ຄູ່ຮ່ວມພັດທະນາ ກ່ຽວກັບວຽກງານການພັດທະນາຊັບພະຍາກອນມະນຸດປະຈໍາປີ. ນອກນັ້ນ, ຍັງມີວຽກທີ່ຕິດພັນກັບການສົ່ງເສີມບົດບາດຍິງ-ຊາຍ ແລະ ການມີສ່ວນຮ່ວມ, ການສ້າງຄວາມເຂັ້ມແຂງຂອງເຄືອຂ່າຍນັກສຶກສາ, ຝຶກອົບຮົມໄລຍະສັ້ນຢູ່ອົດສະຕຣາລີ, ຝຶກອົບຮົມພາສາອັງກິດ ແລະ ອື່ນໆ ທີ່ສໍາຄັນ.

ໂຄງການສະຖາບັນລາວ-ອົດສະຕຣາລີ (LAI) ຖືເປັນໜຶ່ງໃນໂຄງການຮ່ວມມືຍຸດທະສາດທີ່ສໍາຄັນ ລະຫວ່າງ ລັດຖະບານ ສປປ ລາວ ແລະ ລັດຖະບານ ອົດສະຕຣາລີ ໃນການພັດທະນາຊັບພະຍາກອນມະນຸດ ຊຶ່ງເປັນປັດໄຈຕັດສິນຄວາມສໍາເລັດຂອງການພັດທະນາເສດຖະກິດ-ສັງຄົມ ແລະ ການຫັນເປັນທັນສະໄໝຂອງປະເທດຊາດ.

ຂ່າວໂດຍ: ສົງການ ພັນແພງດີ