ກະຊວງສຶກສາທິການ ແລະ ກິລາ ຕາງໜ້າລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ (ສປປ ລາວ) ແລະ ກະຊວງວັດທະນະທຳ, ກິລາ ແລະ ທ່ອງທ່ຽວ ສາທາລະນະລັດ ສັງຄົມນິຍົມ (ສສ) ຫວຽດນາມ ພົບປະປຶກສາຫາລືແລກປ່ຽນການຮ່ວມມືຫຼາຍວຽກງານ ໃນໄລຍະຜ່ານມາ ພ້ອມສືບຕໍ່ເສີມຂະຫຍາຍສາຍພົວພັນໄມຕີຈິດມິດຕະພາບອັນດິງາມໃນການຊ່ວຍເຫຼືອເຊິ່ງກັນ ແລະ ກັນ ແນໃສ່ກຽມຄວາມພ້ອມຮອບດ້ານໃຫ້ສປປ ລາວ ກຽມຮັບກຽດເປັນເຈົ້າພາບ ງານມະຫາກໍາກິລາຊີເກມ ຄັ້ງທີ 36 ໃນປີ 2031.

ເມື່ອວັນທີ 13 ພຶດສະພາ 2026 ທີ່ສຳນັກງານກະຊວງສຶກສາທິການ ແລະ ກິລາ (ສສກ), ທ່ານ ນາງ ເລີມ ທິ ເຟືອງ ແທງ, ລັດຖະມົນຕີ ກະຊວງວັດທະນະທຳ, ກິລາ ແລະ ທ່ອງທ່ຽວ ແຫ່ງ ສສ ຫວຽດນາມ ພ້ອມດ້ວຍຄະນະ ໄດ້ເຂົ້າຢ້ຽມພົບປະ ທ່ານ ຮສ.ປອ ທອງສະລິດ ມັງໜໍເມກ ຮອງນາຍົກລັດຖະມົນຕີ, ລັດຖະມົນຕີກະຊວງສຶກສາທິການ ແລະ ກິລາ ພ້ອມດ້ວຍຄະນະໃຫ້ການຕ້ອນຮັບຢ່າງອົບອຸ່ນ ເນື່ອງໃນໂອກາດທີ່ໄດ້ມາຢ້ຽມຢາມ ແລະ ເຄື່ອນໄຫວວຽກງານ ຢູ່ ສປປ ລາວ.

ໃນການພົບປະຄັ້ງນີ້ ທັງສອງຝ່າຍກໍໄດ້ມີການຕີລາຄາສູງກ່ຽວກັບການຮ່ວມມືໃຫ້ການຊ່ວຍເຫຼືອເຊິ່ງກັນ ແລະ ກັນ ຫຼາຍວຽກງານ ໃນໄລຍະຜ່ານມາ ກ່ຽວກັບວຽກງານຂະແໜງການສຶກສາ ແລະ ກິລາໂດຍສະເພາະ ທາງລັດຖະບານ ສປປ ລາວ ສະເໜີໃຫ້ລັດຖະບານ ສສ ຫວຽດນາມ ສືບຕໍ່ຊ່ວຍເຫຼືອປັບປຸງສູນຝຶກກິລາແຫ່ງຊາດ ທີ່ເປັນໂຄງການຊ່ວຍເຫຼືອຈາກ ສສ ຫວຽດນາມ ເຊິ່ງກໍ່ສ້າງຂຶ້ນໃນປີ 2009 ເນື່ອງຈາກປະຈຸບັນ ມີສະພາບທີ່ຊຸດໂຊມ ແລະ ບໍ່ສາມາດນຳໃຊ້ໄດ້ເປັນປົກກະຕິແລ້ວ.

ສືບຕໍ່ຊຸກຍູ້, ຊ່ວຍເຫຼືອໂຄງການກໍ່ສ້າງສູນວິທະຍາສາດການກິລາ ເພື່ອນໍາໃຊ້ເຂົ້າໃນການກະກຽມນັກກິລາທີມຊາດລາວ ເຂົ້າຮ່ວມແຂ່ງຂັນງານມະຫາກໍາກິລາຊີເກມ ຄັ້ງທີ 36 ໃນປີ 2031 ທີ່ ສປປ ລາວ ເປັນເຈົ້າພາບ.

ສືບຕໍ່ສະໜອງທຶນການສຶກສາໄລຍະຍາວໃນສາຂາການກິລາ ແລະ ທຶນຝຶກອົບຮົມໄລຍະສັ້ນ-ກາງ ໃຫ້ແກ່ ບຸກຄະລາກອນກິລາ ແລະ ນັກກິລາທີມຊາດ ທັງໃນຮູບແບບ ນຳສົ່ງນັກວິທະຍາກອນມາຈັດຝຶກອົບຮົມໃຫ້ຢູ່ ສປປ ລາວ ແລະ ທຶນເກັບຕົວຝຶກຊ້ອມໄລຍະ 3-6 ເດືອນ ທີ່ ສສ ຫວຽດນາມ ຈຳນວນ 35-60 ທຶນຕໍ່ປີ ແລະ ໃນຊ່ວງໄລຍະ ປີ 2029-2030 ທີ່ກະກຽມເປັນເຈົ້າພາບຊີເກມ ປີ 2031 ຈໍານວນ 70-100 ທຶນຕໍ່ປີ.

ສືບຕໍ່ສະໜອງອຸປະກອນຝຶກຊ້ອມ ແລະ ເເຂ່ງຂັນທີ່ຈຳເປັນ ແລະ ໄດ້ມາດຕະຖານ ໃຫ້ແກ່ປະເພດກິລາຄວາມຫວັງຫຼຽນລາງວັນ ໂດຍສະເພາະປະກອບໃຫ້ແກ່ ສູນຝຶກກິລາແຫ່ງຊາດ, ສະຖາບັນກິລາ-ກາຍະກຳແຫ່ງຊາດ ເພື່ອກະກຽມນັກກິລາທີມຊາດ ເຂົ້າຮ່ວມເເຂ່ງຂັນງານມະຫາກຳກິລາຊີເກມ ປີ 2031 ທີ່ ສປປ ລາວ ເປັນເຈົ້າພາບ.

ພ້ອມທັງສະເໜີຝ່າຍຫວຽດນາມ ສະໜອງທຶນຝຶກອົບຮົມການບໍລິຫານຄຸ້ມຄອງກິລາຄົນພິການໃຫ້ຜູ້ບໍລິຫານ; ການຈັດກິດຈະກຳການແຂ່ງຂັນກິລາບານເຕະນັກຮຽນມັດທະຍົມສຶກສາ ລະຫວ່າງ ລາວ ແລະ ຫວຽດນາມ ສືບຕໍ່ຊ່ວຍເຫຼືອຝຶກຊ້ອມໃຫ້ແກ່ນັກກິລາຄົນພິການທີມຊາດລາວ ປະເພດກິລາແລ່ນ-ລານ ແລະ ຍົກນ້ຳໜັກ ພ້ອມທັງແລກປ່ຽນການສົ່ງເສີມມວນຊົນ ທຸກເພດໄວ ເຂົ້າຮ່ວມຂະບວນການອອກກຳລັງກາຍເພື່ອສຸຂະພາບ ແລະ ສົ່ງເສີມກິລາພື້ນເມືອງ.

ພາບ-ຂ່າວ ໂດຍ ສົງການ ພັນແພງດີ