ກະຊວງສຶກສາທິການ ແລະ ກິລາ (ສສກ) ແລະ ສໍານັກພິມສຶກສາຫວຽດນາມ ປຶກສາຫາລືການຮ່ວມມືດ້ານວຽກງານການພິມ ເພື່ອຮັດແໜ້ນສາຍພົວພັນການຮ່ວມມືລະຫວ່າງສອງຝ່າຍໃຫ້ແໜ້ນແຟ້ນ ພ້ອມທັງເສີມຂະຫຍາຍວຽກງານດັ່ງກ່າວໃຫ້ນັບມື້ດີຂຶ້ນ.

ເມື່ອວັນທີ 10 ມີນາ 2026 ທີ່ສໍານັກກະຊວງສຶກສາທິການ ແລະ ກິລາ, ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີກະຊວງສຶກສາທິການ ແລະ ກິລາ ໃຫ້ກຽດຕ້ອນຮັບການເຂົ້າພົບປະຂອງທ່ານ ຟາມວັນຖັງ ປະທານສະພາບໍລິຫານ ສໍານັກພິມສຶກສາຫວຽດນາມ ພ້ອມດ້ວຍຄະນະ, ມີວ່າການຜູ້ອໍານວຍການສໍານັກພິມສຶກສາ ແລະ ກິລາ, ຄະນະລັດວິສະຫະກິດ ໂຮງພິມສຶກສາ ແລະ ລັດວິສະຫະກິດ ອຸປະກອນການສຶກສາ ແລະ ຄະນະຮັບຜິດຊອບວຽກງານກ່ຽວຂ້ອງເຂົ້າຮ່ວມ.

ໃນການພົບປະຄັ້ງນີ້, ແມ່ນເພື່ອລາຍງານກ່ຽວກັບການມາເຄື່ອນໄຫວເຮັດວຽກຢູ່ ສປປ ລາວ ເປັນຕົ້ນແມ່ນ ເຂົ້າຮ່ວມງານມະຫະກໍາ ເທດສະການປຶ້ມ ຢູ່ທີ່ມະຫາວິທະຍາໄລແຫ່ງຊາດ; ພົບປະກັບ ສໍານັກພິມສຶກສາ ແລະ ກິລາ, ລັດວິສະຫະກິດ ໂຮງພິມສຶກສາ ແລະ ລັດວິສະຫະກິດ ອຸປະກອນການສຶກສາ ເພື່ອແລກປ່ຽນປະສົບການ, ທົບທວນຜົນການຮ່ວມມືໃນ ໄລຍະຜ່ານມາ ແລະ ພ້ອມກັນກຳນົດທິດທາງການຮ່ວມມືໃນໄລຍະຕໍ່ໜ້າ ໃນວຽກງານການພິມ, ການຈັດພິມປຶ້ມ ແບບຮຽນ, ການພັດທະນາສື່ການສຶກສາ ແລະ ອຸປະກອນການສຶກສາ ໃຫ້ມີຄຸນນະພາບ ແລະ ທັນສະໄໝ. ສຳລັບໄລຍະຜ່ານມາ ການຮ່ວມມືລະຫວ່າງ ສຳນັກພິມສຶກສາ ສສ ຫວຽດນາມ ແລະ ພາກສ່ວນການພິມ ແລະ ການພິມຈັດຈຳໜ່າຍຂອງ ສປປ ລາວ ໄດ້ຮັບການດໍາເນີນຢ່າງໃກ້ຊິດ ແລະ ມີຜົນສຳເລັດຫຼາຍດ້ານ ຊຶ່ງໄດ້ປະກອບສ່ວນສໍາຄັນ ໃນການຍົກລະດັບວຽກງານການພິມປຶ້ມແບບຮຽນ ແລະ ການຜະລິດສື່ການສຶກສາ ເພື່ອຮັບໃຊ້ ການສຶກສາຂອງຊາດ.

ພາບ-ຂ່າວ: ບົວລະພາ