ທ່ານຮອງນາຍົກລັດຖະມົນຕີ, ລັດຖະມົນຕີກະຊວງ ສສກ ພ້ອມຄະນະ ລົງຊຸກຍູ້ການຮຽນ-ການສອນ ແລະ ມອບອຸປະກອນການສຶກສາ-ກິລາ ຢູ່ໂຮງຮຽນປະຖົມສົມບູນສະຜ່າຍ
ໃນຕອນເຊົ້າວັນທີ 7 ກັນຍາ 2026, ທ່ານ ຮສ.ປອ ທອງສະລິດ ມັງໜໍ່ເມກ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງສຶກສາທິການ ແລະ ກິລາ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ, ຕິດຕາມ ແລະ ຊຸກຍູ້ການຮຽນ-ການສອນ ເນື່ອງໃນໂອກາດເປີດສົກຮຽນໃໝ່ 2026–2027 ພ້ອມທັງມອບອຸປະກອນການສຶກສາ ແລະ ອຸປະກອນກິລາ ໃຫ້ແກ່ໂຮງຮຽນປະຖົມສົມບູນສະຜ່າຍ, ເມືອງຊະນະສົມບູນ, ແຂວງຈຳປາສັກ.
ໃຫ້ການຕ້ອນຮັບຢ່າງອົບອຸ່ນໃນຄັ້ງນີ້ມີ ທ່ານ ສຸພາບ ທຳມະຮັກສາ
ຮອງເລຂາຄະນະບໍລິຫານງານພັກແຂວງ; ທ່ານ ສົມບູນ ເຮືອງວົງສາ ຄະນະປະຈຳພັກແຂວງ, ຮອງປະທານຄະນະກຳມະການປົກຄອງແຂວງຈຳປາສັກ; ທ່ານ ປອ ພູວົງ ອະໄພ ກຳມະການພັກແຂວງ, ຫົວໜ້າແຜນກສຶກສາທິການ ແລະ ກິລາແຂວງຈຳປາສັກ; ທ່ານ ສຳລານ ອ່ອນໄຊວຽງ ຮອງເລຂາຄະນະບໍລິຫານງານພັກເມືອງຊະນະສົມບູນ ພ້ອມດ້ວຍຄະນະພັກ-ຄະນະນຳ ຂັ້ນແຂວງ, ຂັ້ນເມືອງ, ຜູ້ບໍລິຫານການສຶກສາ, ຄູ-ອາຈານ, ອຳນາດການປົກຄອງທ້ອງຖິ່ນ ແລະ ນ້ອງໆນັກຮຽນ ເຂົ້າຮ່ວມຢ່າງພ້ອມພຽງ.
ໃນພິທີ, ທ່ານ ນີວອນ ວົງສັກດາ ຜູ້ອຳນວຍການໂຮງຮຽນປະຖົມສົມບູນສະຜ່າຍ ໄດ້ລາຍງານສະພາບຈຸດພິເສດ ແລະ ການເຄື່ອນໄຫວວຽກງານຂອງໂຮງຮຽນໃຫ້ຮູ້ວ່າ: ໂຮງຮຽນປະຖົມສົມບູນສະຜ່າຍ ສ້າງຕັ້ງຂຶ້ນມາແຕ່ປີ 1902, ຕັ້ງຢູ່ບ້ານສະຜ່າຍ, ເມືອງຊະນະສົມບູນ, ແຂວງຈຳປາສັກ. ມີຂອບເຂດບໍລິການຮັບນັກຮຽນຈາກ 3 ຄຸ້ມບ້ານ ຄື: ຄຸ້ມສະຜ່າຍທາງ, ຄຸ້ມບ້ານເໜືອ ແລະ ຄຸ້ມບ້ານໂພນໄຊ. ປັດຈຸບັນ ມີອາຄານ 4 ຫຼັງ, ສູນຊັບພະຍາກອນ 1 ຫຼັງ; ໃນນັ້ນ ນຳໃຊ້ເຂົ້າໃນການຮຽນ-ການສອນ 2 ຫຼັງ ຄື: ອາຄານອະນຸບານ 1 ຫຼັງ ແລະ ອາຄານປະຖົມ 1 ຫຼັງ, ເປີດການຮຽນ-ການສອນທັງໝົດ 7 ຫ້ອງ (ຊັ້ນອະນຸບານ 2 ຫ້ອງ ແລະ ຊັ້ນປະຖົມ ປ.1-ປ.5 ທັງໝົດ 5 ຫ້ອງ).
ໃນສົກຮຽນ 2026–2027 ນີ້, ມີນັກຮຽນຊັ້ນອະນຸບານ 36 ຄົນ (ຍິງ 17 ຄົນ), ນັກຮຽນຊັ້ນປະຖົມ 133 ຄົນ (ຍິງ 76 ຄົນ) ແລະ ມີຄູ-ອາຈານ ທັງໝົດ 8 ທ່ານ (ຍິງ 6 ທ່ານ). ທັງນີ້, ກ່ອນການເປີດສົກຮຽນໃໝ່, ທາງໂຮງຮຽນໄດ້ປະສານສົມທົບກັບອຳນາດການປົກຄອງບ້ານສະຜ່າຍກາງ ແລະ ພໍ່ແມ່ຜູ້ປົກຄອງ ອະນາໄມ ປັບປຸງເດີ່ນ, ອາຄານຮຽນ ແລະ ຫ້ອງນ້ຳ ໃຫ້ມີຄວາມສະອາດ, ປອດໄພ. ພ້ອມດຽວກັນນັ້ນ, ກໍໄດ້ເປີດຮັບລົງທະບຽນນັກຮຽນໃນລະຫວ່າງວັນທີ 24–31 ສິງຫາ 2026 ເພື່ອຮັບປະກັນໃຫ້ເດັກນ້ອຍໃນເຂດບໍລິການ 3 ບ້ານ ໄດ້ເຂົ້າຮຽນ 100%.
ສຳລັບສົກຮຽນໃໝ່ນີ້, ໂຮງຮຽນໄດ້ຕັ້ງເປົ້າມຸ່ງເນັ້ນປັບປຸງຄຸນນະພາບການສິດສອນ ໂດຍນຳໃຊ້ວິທີການສອນແບບໃໝ່, ສົ່ງເສີມໃຫ້ນັກຮຽນມີສ່ວນຮ່ວມໃນກິດຈະກຳຕົວຈິງ, ສ້າງໂຮງຮຽນໃຫ້ເປັນ "ໂຮງຮຽນສີຂຽວ-ສະອາດ" ແລະ ສູ້ຊົນຫຼຸດຜ່ອນອັດຕາການປະລະການຮຽນ ເພື່ອສ້າງໂຮງຮຽນປະຖົມສົມບູນສະຜ່າຍ ໃຫ້ເປັນໂຮງຮຽນຕົວແບບດ້ານການສຶກສາໃນອະນາຄົດ.
ໃນໂອກາດນີ້, ທ່ານ ຮສ.ປອ ທອງສະລິດ ມັງໜໍ່ເມກ ໄດ້ໃຫ້ກຽດໂອ້ລົມຕໍ່ຄະນະພັກ, ຄະນະນຳແຂວງ-ເມືອງ, ຜູ້ບໍລິຫານໂຮງຮຽນ ຕະຫຼອດເຖິງພະນັກງານຄູ-ອາຈານ ບາງຕອນວ່າ: ການລົງເຄື່ອນໄຫວຄັ້ງນີ້ ເປັນການຕິດຕາມ ແລະ ຊຸກຍູ້ການເປີດສົກຮຽນໃໝ່ຢູ່ 3 ແຂວງ (ຈຳປາສັກ, ສະຫວັນນະເຂດ ແລະ ຄຳມ່ວນ) ເພື່ອຜັນຂະຫຍາຍ ແລະ ຈັດຕັ້ງປະຕິບັດຕາມທິດຊີ້ນຳ ກໍຄື ສານຂອງທ່ານນາຍົກລັດຖະມົນຕີ ແຫ່ງ ສປປ ລາວ ທີ່ສົ່ງເຖິງຜູ້ບໍລິຫານການສຶກສາ, ຄູ-ອາຈານ ແລະ ນັກຮຽນ-ນັກສຶກສາ ທົ່ວປະເທດ ໃຫ້ປະກົດຜົນເປັນຮູບປະທຳ.
ພ້ອມນັ້ນ, ທ່ານ ຮອງນາຍົກລັດຖະມົນຕີ ຍັງໄດ້ສະແດງຄວາມຊົມເຊີຍຢ່າງຍິ່ງຕໍ່ໂຮງຮຽນປະຖົມສົມບູນສະຜ່າຍ ທີ່ມີຄວາມພ້ອມດ້ານອາຄານສະຖານທີ່, ມີການວາງຮາກຖານການສຶກສາອະນຸບານຮ່ວມນຳ ໂດຍສະເພາະແມ່ນຜົນງານອັນໂດດເດັ່ນ "ບໍ່ມີນັກຮຽນປະລະການຮຽນ" ໃນສົກຮຽນນີ້ ເຊິ່ງຖືເປັນບາດກ້າວທຳອິດທີ່ສຳຄັນ ທີ່ຄວນຂະຫຍາຍຜົນໃຫ້ກວ້າງຂວາງທົ່ວແຂວງ. ນອກຈາກນີ້, ຍັງໄດ້ຊົມເຊີຍຄວາມເປັນລະບຽບຮຽບຮ້ອຍ ແລະ ວິໄນຄວາມສະອາດ ເຊັ່ນ: ການຝຶກໃຫ້ເດັກນ້ອຍປົດເກີບກ່ອນເຂົ້າຫ້ອງຮຽນ ເຊິ່ງເປັນຕົວແບບທີ່ດີ.
ສຳລັບແຜນການປັບປຸງຫຼັກສູດການສຶກສາ, ທາງກະຊວງສຶກສາທິການ ແລະ ກິລາ ມີແຜນປັບປຸງຫຼັກສູດຊັ້ນປະຖົມໃຫ້ແລ້ວໃນຕົ້ນປີ 2027 ເພື່ອແກ້ໄຂບັນຫາເຄັ່ງຮ້ອນ ເປັນຕົ້ນແມ່ນ ເດັກນ້ອຍອ່ານບໍ່ອອກ, ຄິດໄລ່ບໍ່ໄດ້ ແລະ ບໍ່ກ້າສະແດງອອກ ຫຼື ນຳສະເໜີບັນຫາ. ຫຼັງຈາກນັ້ນ, ຈະຈັດຝຶກອົບຮົມຄູ-ອາຈານ ເລີ່ມຈາກຊັ້ນ ປ.1-ປ.3 ແລະ ຂະຫຍາຍໃສ່ ປ.4-ປ.5.
ສ່ວນການແກ້ໄຂໂຮງຮຽນບໍ່ໄດ້ມາດຕະຖານນັ້ນ, ປັດຈຸບັນ ທົ່ວປະເທດມີໂຮງຮຽນປະຖົມບໍ່ໄດ້ມາດຕະຖານ ຈຳນວນ 1,059 ແຫ່ງ; ໃນນີ້ ແຂວງຈຳປາສັກມີ 50 ກວ່າແຫ່ງ. ກະຊວງສຶກສາ ແມ່ນຈະສຸມໃສ່ 4 ແຫຼ່ງທຶນ ຄື: ງົບປະມານລັດ, ງົບປະມານທ້ອງຖິ່ນ, ການລະດົມທຶນຈາກສັງຄົມ/ພາກສ່ວນເອກະຊົນ ແລະ ທຶນກູ້ຢືມ/ຊ່ວຍເຫຼືອຈາກຕ່າງປະເທດ ເພື່ອລຶບລ້າງບັນຫາດັ່ງກ່າວ. ສະນັ້ນ, ເພື່ອເຮັດໃຫ້ວຽກງານພັດທະນາການສຶກສາຂອງພວກເຮົາໄດ້ຮັບການຍົກລະດັບຂຶ້ນຢ່າງມີຄຸນນະພາບ, ຂ້າພະເຈົ້າຂໍຮຽກຮ້ອງໃຫ້ຄະນະພັກ-ຄະນະນຳແຂວງຈຳປາສັກ ສືບຕໍ່ເປັນຕົວແບບໃນການແກ້ໄຂບັນຫາຄູອາສາສະໝັກ, ສຸມໃສ່ລຶບລ້າງໂຮງຮຽນ 50 ກວ່າແຫ່ງທີ່ບໍ່ໄດ້ມາດຕະຖານໃຫ້ໝົດໄປ ແລະ ພັດທະນາໂຮງຮຽນປະຖົມສົມບູນສະຜ່າຍ ໃຫ້ເປັນໂຮງຮຽນຕົວແບບດ້ານການສຶກສາ ເພື່ອເປັນບ່ອນຖອກຖອນບົດຮຽນຂອງໂຮງຮຽນອື່ນໆ ທົ່ວປະເທດ.
ໃນຕອນທ້າຍ, ທ່ານ ຮອງນາຍົກລັດຖະມົນຕີ ພ້ອມຄະນະ ໄດ້ໃຫ້ກຽດມອບອຸປະກອນການຮຽນ ແລະ ອຸປະກອນກິລາ ຈຳນວນໜຶ່ງໃຫ້ແກ່ໂຮງຮຽນປະຖົມສົມບູນສະຜ່າຍ ເພື່ອຮັບໃຊ້ເຂົ້າໃນການຮຽນ-ການສອນ ແລະ ກິດຈະກຳຂອງໂຮງຮຽນ ໃນສົກຮຽນໃໝ່ 2026-2027 ນີ້ຕື່ມອີກ.
