ພິມ
ລາຍລະອຽດ: ໝວດ: ຂ່າວເດັ່ນ | ເຜີຍແຜ່ເມື່ອ 17 ພະຈິກ 2016 | ກົດເບິ່ງ: 1483

ກະຊວງ​ສຶກສາ​ທິການ ​ແລະ ກິລາ (ສສກ) ຍິນດີສືບຕໍ່ການຮ່ວມມື​ກັບ ທະນາຄານ​ໂລກ​ ຫຼື ເວິລແບັງຊຸກຍູ້​ການຈັດ​ຕັ້ງ​ປະຕິບັດ​ດ້ານ​ວິຊາ​ການຂອງ​​ໂຄງການ​ການ​ສຶກສາກ່ອນ​ໄວ​ຮຽນ (ECE) ​ແລະ ​ໂຄງການ​ກອງ​ທຶນ​ຮ່ວມ​ມື​ສາກົນ​ເພື່ອ​ການ​ສຶກສາ​ໄລຍະ 2 (GPE II) ​ແນ​ໃສ່ສ້າງ​ຂີດ​ຄວາມ​ສາມາດ​ໃຫ້​ແກ່​ຜູ້​ບໍລິຫານ​ການ​ສຶກສາ​ໂຮງຮຽນ​ໃນ​ຊັ້ນ​ປະຖົມ​ທົ່ວ​ປະ​ເທດ ​ເພື່ອ

​ນຳ​ໄປ​ຈັດ​ຕັ້ງ​ປະຕິບັດ​ເຂົ້າ​ໃນ​ການ​ຮຽນ​-ການ​ສອນ ຢ່າງ​ມີ​ຄຸ​ນະພາ​ບ.

ເມື່ອ​ວັນ​ທີ 7 ກໍລະກົດ ຜ່ານ​ມາ ທີ່​ກະຊວງ​ສຶກສາ​ທິການ ​ແລະ ກິລາ, ທ່ານ ລີ​ຕູ້ ບົວ​ປາວ ຮອງ​ລັດຖະມົນຕີ ກະຊວງ​ສຶກສາ​ທິການ ​ແລະ ກິລາ ​ໄດ້​ໃຫ້​ກຽດ​ຕ້ອນຮັບ​ການ​ເຂົ້າ​ຢ້ຽມ​ຄຳນັບ​ຂອງ​ທ່ານ ນາງ ອາ​ຢາ ກີ​ເບ​ຊາ​ກິ ຜູ້​ຊີ້​ນຳ​ໂຄງການ​ກອງ​ທຶນ​ຮ່ວມ​ມື​ສາກົນ​ເພື່ອ​ການ​ສຶກສາ ສປປ ລາວ ​ແລະ ທ່ານ ປຣາມິນ ນິ​ໂກ​ໂລ ​ເດນ​ເຊັບ ຫົວໜ້າ​ຊີ້​ນຳ​-ຄຸ້ມຄອງທະນາຄານ​ໂລກ​ຂອງ​ໂຄງການ​ ການສຶກສາກ່ອນ​ໄວ​ຮຽນ, ເຂົ້າຮ່ວມມີ​ຫົວໜ້າ-​ຮອງ​ຫົວໜ້າ​ກົມ ພ້ອມ​ດ້ວຍ​ບັນດາຄູ່ຮ່ວມພັດທະນາ ແລະ ພາກສ່ວນ​ທີ່​ກ່ຽວຂ້ອງ​ທັງ 2 ຝ່າຍ​ເຂົ້າ​ຮ່ວມ.

ການ​ພົບ​ປະ​ໃນ​ຄັ້ງ​ນີ້, ກໍ່​ເພື່ອ​ເປັນການລາຍ​ງານ​ຄວາມ​ຄືບ​ໜ້າ​ໃນ​ການ​ລົງ​ຕິດຕາມ​ເລື່ອງ​​ການ​ຊຸກຍູ້​ຈັດ​ຕັ້ງ​ປະຕິບັດ​ດ້ານ​ວິຊາ​ການ​ຂອງ​ໂຄງການໆ​ສຶກສາກ່ອນ​ໄວ​ຮຽນ (ECE) ​ແລະ ​ໂຄງການ​ກອງ​ທຶນ​ຮ່ວມ​ມື​ສາກົນ​ເພື່ອ​ການ​ສຶກສາ​ໄລຍະ 2 (GPE II) ​ແຕ່​ວັນ​ທີ29 ມິຖຸນາ ຫາ ວັນ​ທີ 8 ກໍລະກົດ ​ຜ່ານມາ, ເຊິ່ງ​ໂຄງການດັ່ງກ່າວ ແມ່ນແນໃສ່ການ​ປັບປຸງ ​ແລະ ຊ່ວຍ​ໃນ​ການ​ເຝິກອົບຮົມ​​ໃນການສ້າງ​ຂີດ​ຄວາມ​ສາມາດ​ໃຫ້​ຜູ້ບໍລິຫານ​ຂັ້ນ​ໂຮງຮຽນ​ຖົມທົ່ວ​ປະ​ເທດ ແລະ ​​ໃຫ້ສາມາດ​ວາງ​ແຜນ​ເຂົ້າ​ໃນ​ການ​ບໍລິຫານ​ໃນ​ຮງນຮຽນ,​ນຳ​ເອົາ​ຄວາມ​ຮູ້​ດັ່ງກ່າວ​ເ​ຂົ້າ​ໃນ​ການ​ປັບປຸງ​ເລື່ອງ​ການ​ຮຽນ-​ການ​ສອນ ​ໂດຍ​ສະ​ເພາະ​ທາງ​ດ້ານ​ຄຸນະພາບ​ຂອງ​ການ​ສຶກສາເປັນຫຼັກ.

ສຳລັບ​ໂຄງການ​ດ່ັງກ່າວ, ພາກສ່ວນ​ທີ່​ກ່ຽວ ​ແລະ ບັນດາ​ຄູ່​ຮ່ວມ​ພັດທະນາ​ຈະ​ໄດ້​ພ້ອມ​ກັນ​ທົບ​ທວນ​ການ​ຄິ​​ດ​ໄລ່​ຄືນ​ການໃຊ້​ຈ່າຍ​ຂອງ​ໂຄງການ​ ການ​ສຶກສາກ່ອນ​ໄວ​ຮຽນ ​ແລະ ການ​ປັບ​ໂຄງ​ສ້າງ​ຂອງ​ຕົວ​ກຳນົດ​ໝາຍ​ຂອງ​ໂຄງການ; ທົບ​ທວນ​ການ​ໃຊ້​ຈ່າຍ​ຂອງ​ໂຄງການ​ກອງ​ທຶນ​ຮ່ວມ​ມື​ສາກົນ​ເພື່ອ​ການ​ສຶກສາ​ໄລຍະ 2, ຂອບ​ຜົນ​ໄດ້​ຮັບ ​ແລະ ການ​ປັບປຸງ​ໂຄງ​ສ້າງ​ຂອງ​ຕົວ​ກຳນົດ​ໝາຍ​ຂອງ​ໂຄງການ​ທີ່​ມີ​ຜົນ​ຕໍ່​ເນື່ອງ​ກັບ​ການ​ປຶກສາ​ຫາລື​ກັບ​ກົມ​ການ​ເງິນ​​ໃນ 2 ໜ້າ​ວຽກ​ຄື: ໜ້າ​ວຽກ​ສຳລັບ​ບໍລິສັດ​ສຳ​ຫຼວດທີ່​ຈະ​ໄດ້​ຮັບ​ການ​ບັນຈຸ​ໂດຍ ກະຊວງ​ສຶກສາ​ທິການ ​ແລະ ກິລາ ພາຍ​ໃຕ້​ແຜນການ​ຈັດ​ຊື້-​ຈັດ​ຈ້າງ​ຂອງ​ໂຄງການ​ກອງ​ທຶນ​ຮ່ວມ​ມື​ສາກົນ ​ເພື່ອ​ການ​ສຶກສາ​ໄລຍະ 2; ຄວາມ​ຄືບ​ໜ້າ​ຂອງ​ວຽກ​ງານ​ການຈັດ​ຊື້-​ຈັດ​ຈ້າງ​ຂອງ​ໂຄງການໆ​ສຶກສາກ່ອນ​ໄວ​ຮຽນ ​ແລະ ​ໂຄງການ​ກອງ​ທຶນ​ຮ່ວມ​ມື​ສາກົນ​ເພື່ອ​ການ​ສຶກສາ​ໄລ​ຍະ 2; ຄຳ​ສັ່ງ​ແນະນຳ​ຂອງ​ການຈັດ​ຕັ້ງ​ປະຕິບັດ​ເງິນ​ບໍລິຫານ​ປົກກະຕິ​ຂອງ​ສະ​ຖາ​ບັນ​ການ​ສຶກສາ (SBG) ​ໂດຍ​ມີ​ຈຸດປະສົງ​ໃຊ້​ສຳລັບ​ທຸກ​ໂຮງຮຽນ​ປະຖົມ​ສຶກສາ ​ແລະ ຫ້ອງ​ກຽມ​ປະຖົມ-​ອະນຸບານ ​ໃນ​ໄລຍະເວລາ​ທີ່​ໂຄງການ​ກອງ​ທຶນ​ຮ່ວມ​ມື​ສາກົນ ​ເພື່ອ​ການ​ສຶກສາ​ໄລຍະ 2 ຈະ​ສະໜອງ​ເງິນ​​ເພີ່ມ​ຕື່ມໃຫ້ SBG ດັ່ງກ່າວ; ກຳນົດ​ເວລາ​ຂອງ​ການ​ເບີກ​ຈ່າຍ​ເງິນ​ບໍລິຫານ​ໃນ​ໂຮງຮຽນ (SBG) ​ແລ​ະ ຂະຫຍາຍ​ການ​ໃຫ້​ເງິນ SBG ​ໄປ​ໃນ 148 ​ເມືອງ ຈາກ 1 ປີ ຂອງ​ໂຄງການ (ຫຼຸດ​ໄລຍະ​ຂັ້ນ​ຕອນ​ລົງ ​ແລະ ​ເພີ່ມ​ການ​ສະໜອງ​ເງິນ​ໃຫ້​ແກ່​ໂຮງຮຽນ​ໄລ​ຍະ​ເລີ່​ມຕົ້ນ) ​ໂດຍ​ນຳ​ໃຊ້​ຄຳ​ສັ່ງ​ແນະນຳ​ຂອງ​ການຈັດ​ຕັ້ງ​ປະຕິບັດ​ເງິນ SBG ​ເຂົ້າ​ໃນ​ວຽກ​ງານ​ຂອງການ​ເຝິກອົບຮົມ SBM ​ແລະ ການ​ພັດທະນາ​ຮູບ​ແບບ​ເຝິກອບົຮມ 60ນາທີ ກ່ຽວ​ກັບ​ການ​ນຳ​ໃຊ້ ​ແລະ ການ​ລາຍ​ງານ​ຂອງ​ເງິນ​ບໍລິຫານ​ປົກກະຕິ​ຂອງ​ສະຖານ​ການ​ສຶກສາ (SBG).

ການຈັດ​ຕັ້ງ​ປະຕິບັດ​ການ​ເຝິກອົບຮົມ​ຄູ​ເຝິກສຳລັບ​ວຽກ​ງານ​ສ້າງ​ຂີດ​ຄວາມ​ສາມາດ​ຂອງ SBM ​ແລະ ການຈັດ​ຕັ້ງ​ເຝິກອົບຮົມ​ດ້ານ​ການ​ປະສານ​ງານ ​ແລະ ການ​ຄຸ້ມ​ຄອງ​ບໍລິຫານ​ຂອງ​ໜ່ວຍ​ງານ​ທີ່​ກ່ຽວຂ້ອງ​ເຖິງ​ການຖ່າຍ​ທອດ, ການ​ໃຫ້ການ​ເຝິກອົບຮົມ​ທີ່​ໄດ້​ຄຸ​ນະພາ​ບຂອງ​ການ​ສ້າງ​ຂີດ​ຄວາມ​ສາ ມ​າດ​ໃນ​ການ​ຄຸ້ມ​ຄອງ​ທີ່​ເນັ້ນ​ໜັກ​ໂຮງຮຽນ​ເປັນ​ຫຼັກ (SBM) ພາຍ​ໃຕ້ອົງ​ປະກອບ​ທີ 1 ຂອງ​ກອງ​ທຶນ​ຮ່ວມ​ມື​ສາກົນ​ເພື່ອ​ການ​ສຶກສາ​ໄລຍະ 2; ການ​ຮັບຮອງ​ເອົາ​ການ​ປັບ​ຫຼັກສູດ​ທີ່​ຈະ​ນຳ​ມາ​ໃຊ້​ໃນ​ການ​ສຳ​ຫຼວດການຈັດ​ຕັ້ງ​ປະຕິບັດ​ຄຸ້ມ​ຄອງ​ທີ່​ເນັ້ນ​ໂຮງຮຽນ​ປັນ​ຫຼັກ (SBM) ທີ່​ຈະ​ດຳ​ເນີນ​ການ​ຈາກ​ການ​ສຳ​ຫຼວດ​ໂດຍ​ບໍລິສັດ​ທີ່​ຈະ​
ໄດ້​ຮັບ​ການ​ຄັດ​ເລືອກ​ຈາກ ກະຊວງ ຕາມ​ແຜນ​ຈັດ​ຊື້-​ຈັດ​ຈ້າງ​ສຳລັບ​ໂຄງການ GPE II.