ຫສອ ຕີລາຄາຄືນການປະຕິບັດບົດບັນທຶກກອງປະຊຸມສະພາທີ່ປຶກສາການສຶກສາພາກເອກະຊົນ ຄັ້ງທີ VIII

ຫ້ອງການສົ່ງເສີມການສຶກສາພາກເອກະຊົນ (ຫສອ) ກະຊວງສຶກສາທິການ ແລະ ກິລາ    ໄດ້ຈັດກອງປະຊຸມສະພາທີ່ປຶກສາການສຶກສາພາກເອກະຊົນ ສະໄຫມທີ IX ເພື່ອເປັນການຕີລາຄາຄືນຜົນການຈັດຕັ້ງປະຕິບັດບົດບັທຶກກອງປະຊຸມສະພາທີ່ປຶກສາການສຶກສາພາກເອກະຊົນ ຄັ້ງທີ VIII ລະຫວ່າງວັນທີ 12-16 ກຸມພາ 2019 ທີ່ໄດ້ຮັບການແກ້ໄຂ ແລະ ຂໍ້ຄົງຄ້າງ.

      ກອງປະຊຸມສະພາທີ່ປຶກສາການສຶກສາພາກເອກະຊົນ ສະໄຫມທີ IX ໄດ້ຈັດຂຶ້ນໃນວັນທີ 27 ສິງຫາ ຜ່ານມາ ທີ່ສະໂມສອນເຂື່ອນໄຟຟ້ານ້ຳງື່ມ I (ທ່າລາດ) ເມືອງແກ້ວອຸດົມ ແຂວງວຽງຈັນ, ໂດຍພາຍໃຕ້ການເປັນປະທານຂອງທ່ານ ຮສ.ປອ ກອງສີ ແສງມະນີ ຮອງລັດຖະມົນຕີ ກະຊວງສຶກສາທິການ ແລະ ກິລາ, ມີທ່ານ ຄຳພອນ ໄຊສົມພູ ຫົວໜ້າຫ້ອງການສົ່ງເສີມການສຶກສາພາກເອກະຊົນ ກະຊວງສຶກສາທິການ ແລະ ກິລາ, ພ້ອມດ້ວຍບັນດາຫົວຫນ້າ-ຮອງຫົວຫນ້າກົມ, ສູນ ຈາກກະຊວງສຶກສາທິການ ແລະ ກິລາ, ປະທານສະມາຄົມການສຶກສາພາກເອກະຊົນ, ຄະນະບໍລິຫານງານສະມາຄົມການສຶກສາພາກເອກະຊົນປະຈຳນະຄອນຫຼວງ/ແຂວງ ແລະ ຜູ້ຕາງຫນ້າຈາກວິທະຍາໄລ ແລະ ໂຮງຮຽນສາຍສາມັນເຂົ້າຮ່ວມຢ່າງພ້ອມພຽງ.

     ໂອກາດນີ້, ທ່ານ ຮສ.ປອ ກອງສີ ແສງມະນີ ໄດ້ກ່າວສະແດງຄວາມຊົມເຊີຍຕໍ່ບັນດາຜູ້ແທນທີເຂົ້າຮ່ວມກອງປະຊຸມຢ່າງຄົບຖ້ວນ, ຊຶ່ງກອງປະຊຸມຄັ້ງນີ້ ແມ່ນມີຄວາມສຳຄັນຫລາຍ ເພາະມັນຈະເປັນການສັງລວມການຈັດຕັ້ງປະຕິບັດວຽກງານສົ່ງເສີມການສຶກສາໃນໄລຍະ 1 ປີຜ່ານມາ ພ້ອມທັງເປັນການຜັນ​ຂະ​ຫ​ຍາຍ​ການ​ຊີ້​ນຳ​ຈາກກອງ​ປະ​ຊຸ​ມ​ຜູ້​ບໍ​ລິ​ຫານ​ການ​ສຶກ​ສາ ແລະ ກິ​ລາ​ທົ່ວ​ປະ​ເທດ​ກ່ຽວ​ກັບ​ການ​ສຶກ​ສາ​ພາກ​ເອ​ກະ​ຊົນ ເພື່ອ​ເປັນ​ພື້ນ​ຖານ​ໃຫ້​ແກ່​ການ​ຄົ້ນ​ຄວ້າ​ແລກ​ປ່ຽນ​ໃນ​ກອງ​ປະ​ຊຸມ ນອກ​ຈາກ​ບັນ​ຫາ​ທີ່​ທາງກອງ​ເລ​ຂາ​ໄດ້​ນຳ​ສະ​ເໜີ​ໃນ​ວາ​ລະ​ແລ້ວ ຢາກ​ໃຫ້​ມີ​ການ​ຄົ້ນ​ຄິດ​ຫາ​ວິ​ທີ​ປະ​ສານ​ງານ​ກັນ​ລະ​ຫວ່າງ​ກົມ​ວິ​ຊາ​ການ​ທີ່​ກ່ຽວ​ຂ້ອງ​ກັບ​ກອງ​ເລ​ຂາ​ສະ​ພາ ກໍ​ຄື ຫ້ອງ​ການ​ສົ່ງ​ເສີມ​ການ​ສຶກ​ສາ​ພາກ​ເອ​ກະ​ຊົນ ເພື່ອ​ສັງ​ລວມ​ຜົນ​ງານ ແລະ ສະ​ພາບ​ບັນ​ຫາ​ເຂົ້າ​ໃນ​ກອງ​ປະ​ຊຸ​ມ​ສະ​ພາ​ໃຫ້​ທັນ​ການ ແລະ ຖືກ​ຕ້ອງ​ຕາມ​ພາ​ລະ​ບົດ​ບາດ.

      ຂະ​ນະ​ດຽວ​ກັນ​ນັ້ນ, ທ່ານ ຄຳພອນ ໄຊສົມພູ ໄດ້ຜ່ານຮ່າງບົດສະຫຼູບຜົນການ​ຈັດຕັ້ງປະຕິບັດບົດບັນທຶນກອງປະຊຸມສະພາທີ່ປຶກສາການສຶກສາພາກເອກະຊົນ ຄັ້ງທີ VIII ທີ່ໄດ້ຮັບການແກ້ໄຂ ແລະ ຂໍ້ຄົງຄ້າງ, ຊຶ່ງຜ່ານການຈັດຕັ້ງປະຕິບັດໄລຍະ 6 ເດືອນຜ່ານມາ ແມ່ນສາມາດສຳເລັດການສ້າງນິຕິກຳ ເພື່ອຄຸ້ມຄອງການເກັບຄ່າຮຽນ-ຄ່າບໍລິການຕ່າງໆຂອງການສຶກສາພາກເອກະຊົນ ແລະ ເປີດກອງປະຊຸມຜ່ານຮ່າງດັ່ງກ່າວ ໃນລະຫວ່າງວັນທີ 13-16 ສິງຫາ 2019, ກົມການສຶກສາຊັ້ນສູງ ໄດ້ຄົ້ນຄວ້າ-ພິຈາລະນາ ນຳສະເໜີລັດຖະມົນຕີກະຊວງສຶກສາທິການ ແລະ ກິລາ ອອກຂໍ້ຕົກລົງການຂໍຍົກຖານະວິທະຍາໄລເປັນສະຖາບັນ 2 ແຫ່ງຄື: ສະຖາບັນ ທຸລະກິດ ແສງສະຫວັນ, ສະບັບເລກທີ 437/ສສກ, ລົງວັນທີ 6 ກຸມພາ 2019, ສະຖາບັນ ຣັຕນະ ບໍລິຫານທຸລະກິດ ສະບັບເລກທີ 439/ສສກ, ລົງວັນທີ 6 ກຸມພາ 2019, ລົງກວດກາຄືນຄວາມພ້ອມການຂໍຍົກຖານະວິທະຍາໄລເປັນສະຖາບັນ 4 ແຫ່ງຄື: ວິທະຍາໄລ ສຸສະກະ, ວິທະຍາໄລ ສຸກສະຫວັດ, ວິທະຍາໄລ ໂລໂກສ ແລະ ວິທະຍາໄລ ໄຊສົມບັດ ເຕັກໂນໂລຊີ. ພ້ອມກັນນີ້, ກົມພະລະ ແລະ ສີລະປະສຶກສາ ໄດ້ຄົ້ນຄວ້າ ແລະ ພິຈາລະນາ ນຳສະເໜີລັດຖະມົນຕີກະຊວງສຶກສາທິການ ແລະ ກິລາ ກ່ຽວກັບການຈັດຕັ້ງການຮຽນວິຊາກິລາປ້ອງກັນຊາດ-ປ້ອງກັນຄວາມສະຫງົບ, ຊຶ່ງໄດ້ກຳນົດຫຼັກການ, ຂອບເຂດ, ການຂຶ້ນແຜນງົບປະມານ, ການຈັດຕັ້ງປະຕິບັດຫຼັກສູດ, ການປະເມີນການຮຽນ ແລະ ນະໂຍບາຍຄະນະຮັບຜິດຊອບ ແລະ ຄູສອນ ປະກອບມີ 2 ເອກະສານຄື: ຂໍ້ຕົກລົງວ່າດ້ວຍ ການຂຶ້ນງົບປະມານຮັບໃຊ້ການຮຽນການສອນສຶກສາວິຊາພື້ນຖານປ້ອງກັນຕົວ ແລະ ວິຊາສຶກສາປ້ອງກັນຊາດ-ປ້ອງກັນຄວາມສະຫງົບ ສະບັບເລກທີ 500/ສສກ, ລົງວັນທີ 12 ກຸມພາ 2019, ແຈ້ງການແນະນຳຂອງລັດຖະມົນຕີ ວ່າດ້ວຍການປະຕິບັດຫຼັກສູດສຶກສາວິຊາພື້ນຖານປ້ອງກັນຕົວໃນຊັ້ນມັດທະຍົມສຶກສາ ແລະ ວິຊາສຶກສາປ້ອງກັນຊາດ-ປ້ອງກັນຄວາມສະຫງົບ ສາຍອາຊີວະສຶກສາ ແລະ ການສຶກສາຊັ້ນສູງ, ສະບັບເລກທີ 318/ສສກ, ລົງວັນທີ 13 ກຸມພາ 2019, ຫ້ອງການສົ່ງເສີມການສຶກສາພາກເອກະຊົນ ປະສານສົມທົບກັບສະມາຄົມການສຶກສາພາກເອກະຊົນໃນການປຸກລະດົມ, ຊຸກຍູ້ ໃຫ້ບັນດາໂຮງຮຽນທີ່ບໍ່ໄດ້ເຂົ້າເປັນສະມາຊິກສະມາຄົມການສຶກສາພາກເອກະຊົນ ຊຶ່ງໃນທົ່ວປະເທດມີຈຳນວນໂຮງຮຽນ 800 ກວ່າແຫ່ງ, ປະຈຸບັນເຂົ້າເປັນສະມາຊິກແລ້ວ 400 ກວ່າແຫ່ງ, ໄດ້ປະສານສົມທົບກັບກົມວິຊາການທີ່ກ່ຽວຂ້ອງ ໃນການລາຍງານລັດຖະມົນຕີ ກະຊວງສຶກສາທິການ ແລະ ກິລາ ກ່ຽວກັບການຂໍຈັດຕັ້ງເຄື່ອນໄຫວເປັນຫ້ອງການຜູ້ຕາງໜ້າຮັບລົງທະບຽນນັກສຶກສາ ເຂົ້າຮຽນໃນລະບົບອອນລາຍ ໃຫ້ແກ່ວິທະຍາໄລ Universal Ministries of the King’s College ລັດຟໍລິດາ, ປະເທດສະຫະລັດອາເມຣິກາ ຢູ່ໂຮງຮຽນ ບຸນເກີດສຶກສາ, ຊຶ່ງນຳໃຊ້ຫຼັກສູດທາງໄກ (ຫຼັກສູດຮຽນອອນລາຍ, ຮ່ວມກັບສະມາຄົມການສຶກສາພາກເອກະຊົນ ແລະ ຫ້ອງການສຶກສາ ແລະ ກິລາ ລົງຊຸກຍູ້, ຕິດຕາມການຈັດຕັ້ງປະຕິບັດວຽກງານການສຶກສາພາກເອກະຊົນສາຍສາມັນສຶກສາເຂດເມືອງຫາດຊາຍຟອງ ເຫັນວ່າ: ສະພາບໂຮງຮຽນກະແຈກກະຈາຍ ແລະ ບໍ່ໄດ້ຮັບໃບອະນຸຍາດການຈັດຕັ້ງການຮຽນການສອນ, ​ຫ້ອງການສົ່ງເສີມການສຶກສາພາກເອກະຊົນ ປະສານສົມທົບກັບຄະນະສະມາຄົມການສຶກສາພາກເອກະຊົນຂັ້ນນະຄອນຫຼວງ/ແຂວງ ໃນການລົງເກັບກຳຂໍ້ມູນ, ລົງຊຸກຍູ້, ຕິດຕາມການຈັດຕັ້ງປະຕິບັດວຽກງານການສຶກສາພາກເອກະຊົນໃນທ້າຍປີ 2018 ແລະ ສາມາດສັງລວມໄດ້ໃນສາຍສາມັນສຶກສາ: ໂຮງຮຽນຈ່າຍເງິນຄ່າຊຸດຄູ 2 ຊຸດ/ປີ, ເກີດລູກລາພັກ 2 ເດືອນ ໂດຍບໍ່ຕັດເງິນເດືອນ, ສ້າງກອງທຶນ ແລະ ເຂົ້າປະກັນສັງຄົມໃຫ້ຄູສອນປະຈຳ, ລູກຄູບໍ່ໄດ້ຈ່າຍຄ່າຮຽນ, ຄ່າສອນເພີ່ມຍາມພັກສິ້ນປີຮຽນ ໂຮງຮຽນບໍ່ເອົາເງິນຄ່າສອນ (ມອບໃຫ້ຄູໝົດ), ພາໄປທັດສະນະສຶກສາ, ມີເງິນໃຫ້ໃນວັນບຸນສຳຄັນຕ່າງໆ, ຄູອອກການດ້ວຍຄວາມຈໍາເປັນມີເງິນຕອບແທນ, ຄູທີ່ຮອດອາຍຸການ ໂຮງຮຽນມີເງິນບຳເນັດ, ສາຍອາຊີວະສຶກສາ ແລະ ການສຶກສາຊັ້ນສູງ: ໃຫ້ທຶນການສຶກສາລູກຫຼານພະນັກງານລັດ, ພະນັກງານ-ຄູສອນໃນໂຮງຮຽນ, ມີເງິນປົວສຸຂະພາບໃຫ້ຜູ້ອຳນວຍການ, ຜູ້ບໍລິຫານ ແລະ ພະນັກງານຄູອາຈານ, ນະໂຍບາຍຄູເກີດລູກ, ແຕ່ງງານ ແລະ ອື່ນໆ.

     ຄຽງຄູ່ກັນນີ້, ຍັງມີບັນຫາ ແລະ ຂໍ້ຄົງຄ້າງ ເປັນຕົ້ນແມ່ນການຍົກເວັ້ນການເກັບພັນທະອາກອນປະເພດຕ່າງໆຢູ່ສະຖານການສຶກສາພາກເອກະຊົນ ຍັງບໍ່ທັນໄດ້ຮັບຄຳຕອບຈາກກະຊວງການເງິນ ກໍຄື ລັດຖະບານ, ໄດ້ປະສານສົມທົບກັບວິທະຍາໄລ ແລະ ພາກສ່ວນທີ່ກ່ຽວຂ້ອງໃນການສ້າງໜ່ວຍພັກຢູ່ສະຖານການສຶກສາພາກເອກະຊົນ ແມ່ນບໍ່ທັນມີຄວາມພ້ອມ ແລະ ການທົບທວນຄືນບັນດານິຕິກຳທີ່ມີແລ້ວ ກ່ຽວກັບການຄຸ້ມຄອງການສຶກສາພາກເອກະຊົນໂດຍສະເພາະແມ່ນການສ້າງ-ຍຸບເລີກ, ການຕໍ່ໃບອະນຸຍາດເປີດສອນຫຼັກສູດ, ການເຊັນສັນຍາການຮ່ວມມືໃນແຕ່ລະຂັ້ນ ແລະ ແຕ່ລະລະດັບ ຍັງຈະໄດ້ສືບຕໍ່ປະສານສົມທົບກັບພາກສ່ວນທີ່ກ່ຽວຂ້ອງ ໃນການຈັດຕັ້ງປະຕິບັດ.

    ສຳລັບກອງປະຊຸມຄັ້ງນີ້, ແມ່ນຈະດຳເນີນໄປເປັນເວລາ 4 ວັນ (27-30 ສິງຫາ 2019), ຊຶ່ງນອກຈາກຈະມີການຜ່ານຮ່າງບົດສະຫຼູບຜົນການ​ຈັດຕັ້ງປະຕິບັດບົດບັນທຶນກອງປະຊຸມສະພາທີ່ປຶກສາການສຶກສາພາກເອກະຊົນ ຄັ້ງທີ VIII ທີ່ໄດ້ຮັບການແກ້ໄຂ ແລະ ຂໍ້ຄົງຄ້າງແລ້ວ, ຍັງໄດ້ນຳສະເຫນີແຈ້ງການກ່ຽວກັບການນຳໃຊ້ກາຈຳ້ໂຮງຮຽນເອກະຊົນ, ລາຍງານຜົນກອງປະຊຸມສ້າງນິຕິກຳວ່າດ້ວຍການເກັບຄ່າຮຽນ-ຄ່າບໍລິການຂອງໂຮງຮຽນເອກະຊົນ, ລາຍງານສະພາບການສຶກສາພາກເອກະຊົນ, ປະກອບຄຳເຫັນໃສ່ບົດລາຍງານຜົນການຈັດຕັ້ງປະຕິບັດບົດບັນທຶກກອງປະຊຸມສະພາທີ່ປຶກສາການສຶກສາພາກເອກະຊົນ ຄັ້ງທີ VIII, ປະກອບຄຳເຫັນໃສ່ບົດລາຍງານສະພາບການຂອງການສຶກສາພາກເອກະຊົນ, ລາຍງານວຽກງານການຄຸ້ມຄອງໂຮງຮຽນເອກະຊົນ (ການສຶກສາກ່ອນໄວຮຽນ-ອະນຸບານ), ລາຍງານວຽກງານການຄຸ້ມຄອງໂຮງຮຽນພາກເອກະຊົນ ສາຍສາມັນສຶກສາ, ລາຍງານວຽກງານການຄຸ້ມຄອງການສຶກສາ ສາຍອາຊີວະສຶກສາ ພາກເອກະຊົນ, ລາຍງານວຽກງານການຄຸ້ມຄອງການສຶກສາຊັ້ນສູງ ພາກເອກະຊົນ, ລາຍງານການຄຸ້ມຄອງວຽກງານກວດກາຂອງການສຶກສາພາກເອກະຊົນ, ລາຍງານການຄຸ້ມຄອງການຈັດຕັ້ງ ແລະ ພະນັກງານຂອງການສຶກສາພາກເອກພຊົນ, ລາຍງານວຽກງານສ້າງຄູ, ລາຍງານວຽກງານປະກັນຄຸນນະພາບຂອງການສຶກສາພາກເອກະຊົນ.

(ໂດຍ ດາວຫວຽດ

ຮຮ ປະຖົມ-ມັດທະຍົມ 11 ແຫ່ງ ໃນ ນວ ໄດ້ຮັບຄອມພິວເຕີ 33 ຊຸດ ຈາກທະນາຄານ ໄອຊີບີຊີ

ໂຮງຮຽນປະຖົມ ແລະ ມັດທະຍົມສຶກສາ ຈຳນວນ 11 ແຫ່ງ ໃນນະຄອນຫຼວງວຽງຈັນ (ນວ) ໄດ້ຮັບການຊ່ວຍເຫຼືອຄອມພິວເຕີ ຈຳນວນ 33 ຊຸດ. ​ໃນ​ນັ້ນ, ຄອມ​ຕັ້ງ​ໂຕະ ຈໍານວນ 30 ຊຸດ ​ແລະ ​ໂນ​ດບຸດ ຈໍານວນ 3 ​ເຄື່ອງ ຈາກທະນາຄານ ອຸດສາຫະກໍາ ​ແລະ ການ​ຄ້າ​ຈີນ ຈໍາກັດ ສາຂາ ນະຄອນຫຼວງ​ວຽງ​ຈັນ (ICBC) ເພື່ອ​ເປັນ​ການ​ປະກອບສ່ວນ​ເຂົ້າ​ໃນ​ວຽກງານການສຶກສາ ຢູ່ ສປປ ລາວ ກໍຄືການຮຽນການສອນຢູ່ໃນໂຮງຮຽນໃຫ້ມີຄຸນນະພາບສູງຂຶ້ນ​​ເລື້ອຍໆ.

ພິທີມອບ-ຮັບຄອມຄັ້ງນີ້ ໄດ້ມີຂຶ້ນເມື່ອວັນທີ 27 ສິງຫາ ຜ່ານມາ ທີ່ພະແນກສຶກສາທິການ ແລະ ກິລາ ນະຄອນຫຼວງວຽງຈັນ, ໂດຍ​ໃຫ້​ກຽດ​ມອບຂອງ ທ່ານ ຊຸນ ເຟີ້ງ ເລິ ຜູ້ອຳນວຍການທະນາຄານ ອຸດສາຫະກໍາ ​ແລະ ການ​ຄ້າ​ຈີນ ຈໍາກັດ ສາຂາ ນະຄອນຫຼວງ​ວຽງ​ຈັນ ແລະ ຕາງໜ້າ​ຮັບແມ່ນ ທ່ານ ບົວລານ ສິລິປັນຍາ ຮອງລັດຖະມົນຕີ ກະຊວງສຶກສາທິການ ແລະ ກິລາ, ​ມີ​ທ່ານ ​ແພງ​ມາ ​ໄຊ​ຍະ​ວົງ ຮອງ​ຫົວໜ້າ​ຫ້ອງການ ກະຊວງ​ສຶກສາ​ທິການ ​ແລະ ກິລາ ແລະ ທ່ານ ຊົມພູ ແກ້ວປັນຍາ ຫົວໜ້າພະແນກສຶກສາທິການ ແລະ ກິລານະຄອນຫຼວງ​ວຽງ​ຈັນ ພ້ອມດ້ວຍຜູ້ຕາງໜ້າຈາກໂຮງຮຽນ 11 ແຫ່ງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

      ການ​ຊ່ວຍ​ເຫຼືອ​ຄອມ​ພິວ​ເຕີ​​ໃນ​ຄັ້ງ​ນີ້, ກໍເພື່ອຕອບສະໜອງຕາມການສະເໜີຂອງບັນດາໂຮງຮຽນທີ່ຍັງຂາດເຂີນ ທາງດ້ານຄອມພິວເຕີ ຮັບໃຊ້ເຂົ້າໃນການຮຽນການສອນ, ເພື່ອສ້າງໃຫ້ເປັນໂຮງຮຽນຕົວແບບຄຸນນະພາບ, ເພື່ອສ້າງແຮງຊຸກດັນເປັນສ່ວນໜຶ່ງປະກອບສ່ວນສ້າງໃຫ້ເງື່ອນໄຂດ້ານການສຶກສາຂອງໂຮງຮຽນແຕ່ລະແຫ່ງໄດ້ມີການປ່ຽນແປງທີ່ດີຂຶ້ນອີກເປັນບາດກ້າວໜຶ່ງ. ພ້ອມ​ທັງ​ເປັນ​ການ​ປະກອບສ່ວນ​ຊຸກຍູ້​, ສົ່ງ​ເສີມ​ ​ແລະ ພັດທະນາວຽກ​ງານຕ່າງໆ ໃນ​ຂະ​ແໜງ​ການ​ສຶກສາ ​ແລະ ກິລາ ​​ໂດຍ​ສະ​ເພາະ​ປະກອບສ່ວນ​ຊຸກຍູ້​ວຽກ​ງານ​ການ​ຮຽນ​ການ​ສອນ ກໍ​ຄືໂຮງຮຽນປະຖົມ ແລະ ມັດທະຍົມສຶກສາ ຈຳນວນ 11 ແຫ່ງ ໃນນະຄອນຫຼວງ​ວຽງ​ຈັນ ທີ່​ຍັງ​ບໍ່​ພຽງ​ພໍ​ທາງ​ດ້ານ​ອຸປະ​ກອນຄອມ​ພິວ​ເຕີ​ ທີ່​ຈໍາ​ເປັນ​ໃນ​ວຽກ​ງານ​ດັ່ງກ່າວ. ສໍາລັບ​ຄອມ​ພິວ​ເຕີ ຈໍານວນ 33 ຊຸດ ທີ່ນຳມາ​ມອບໃຫ້​ກະຊວງ​ສຶກສາ​ທິການ ​ແລະ ກິລາຄັ້ງນີ້ ແມ່ນ​ເພື່ອ​ມອບຕໍ່​ໃຫ້​ພະ​ແນ​ກສຶກສາ​ທິການ ​ແລະ ກິລາ​ ນະຄອນຫຼວງ​ວຽງ​ຈັນ ນໍາໄປມອບ​ຕໍ່​ໃຫ້ 11 ​ໂຮງຮຽນ​ ​ໃນ​ກຸ່ມ​ເປົ້າ​ໝາຍ  ຄື: ​ໂຮງຮຽນ​ມັດທະຍົມ​ສົມບູນໂພນ​ທອງ, ພວງ​ໄຊ, ບ້ານ​ໂດນ, ໝາກ​ນາວ, ທ່າ​ດິນ​ແດງ, ນາ​ຂ່າ, ມັດທະຍົມ​ສຶກສາຕອນ​ຕົ້ນບ້ານ​ພ້າວ, ດອນ​ສ້າງ​ໄຜ່, ໜອງ​ຍາວ, ຫົວ​ນາ ​ແລະ ​ໂຮງຮຽນ ປະຖົມ​ສົມບູນສີ​ບຸນ​ເຮືອງ.

      ສໍາລັບທະນາຄານດັ່ງກ່າວ ໄດ້ສ້າງຕັ້ງຂຶ້ນໃນປີ 2011 ບົນພື້ນຖານການໃຫ້ຄວາມຊ່ວຍເຫຼືອ ແລະ ສະໜັບສະໜູນຈາກສັງຄົມລາວໃນທຸກຂົງເຂດ, ທຸລະກຳຫຼາຍໆປະເພດຂອງທະນາຄານ ໄດ້ຂະຫຍາຍຕົວຢ່າງຕໍ່ເນື່ອງ, ເພື່ອເປັນສ່ວນໜຶ່ງໃນການໃນການປະກອບສ່ວນເຂົ້າໃນວຽກງານສ້າງສາເສດຖະກິດຂອງປະເທດລາວໃຫ້ເຕີບໃຫ່ຍຂະຫຍາຍຕົວ, ທະນາຄານ ໄອຊີບີຊີ ຍັງໄດ້ຮັບກຽດເປັນຢ່າງສູງໃນການຮັບຫຼຽນໄຊແຮງງານຊັ້ນ III ແລະ ໃບຍ້ອງຍໍ ຈາກ ພະນະທ່ານ ບຸນຍັງ ວໍລະຈິດ ປະທານປະເທດແຫ່ງສປປ ລາວ, ນັບແຕ່ທະນາຄານ ໄອຊີບີຊີ ສ້າງຕັ້ງຂຶ້ນຈົນເຖິງປະຈຸບັນ ກໍໄດ້ໃຫ້ຄວາມສຳຄັນເປັນຢ່າງຍິ່ງຕໍ່ວຽກງານການຊ່ວຍເຫຼືອສັງຄົມ, ບໍ່ວ່າຈະເປັນການຊ່ວຍເຫຼືອຜູ້ເຖົ້າ, ເດັກກໍ່າພ້າ, ຊ່ວຍເຫຼືອດ້ານການສຶກສາ, ຊ່ວຍເຫຼືອແກ້ໄຂຄວາມຫຍຸ້ງຍາກທາງດ້ານເສດຖະກິດ ແລະ ດ້ານອຸທຸກະໄພຕ່າງໆ ທີ່ເກີດຂຶ້ນ, ໃນເດືອນມັງກອນ 2019, ຍັງໄດ້ມີພິທີມອບ-ຮັບອາຄານຮຽນຫຼັງໃໝ່ 1 ຫຼັງ, ພ້ອມທັງປະກອບອຸປະກອນເຄື່ອງຮຽນ, ໂຕະ, ຕັ່ງ, ກະດານດຳ, ໂຕະຫ້ອງການຄູອາຈານ ໃຫ້ແກ່ໂຮງຮຽນປະຖົມສົມບູນບ້ານຫົວຊຽງ ເມືອງໄຊທານີ ພ້ອມດ້ວຍຖົງປຶ້ມ, ບິກ, ສໍ ໃຫ້ແກ່ນ້ອງນັກຮຽນໝົດທຸກຄົນ.

ໂດຍ: ຈັນທະລາ

ກອງປະຊຸມຜູ້ບໍລິຫານການສຶກສາ ແລະ ກິລາ ທົ່ວແຂວງສະຫວັນນະເຂດ ສົກ 2018-2019 ອັດລົງດ້ວຍຜົນສຳເລັດ

ກອງປະຊຸມຜູ້ບໍລິຫານການສຶກສາ ແລະ ກິລາ ທົ່ວແຂວງສະຫວັນນະເຂດ ປະຈຳສົກຮຽນ 2018-2019 ອັດລົງດ້ວຍຜົນສຳເລັດຢ່າງຈົບງາມ ຫຼັງດຳເນີນມາເປັນເວລາ 3 ວັນ ລະຫວ່າງ 20-22 ສິງຫາ ຜ່ານມາ ທີ່ຫ້ອງປະຊຸມພະແນກສຶກສາທິການ ແລະ ກິລາແຂວງ, ໂດຍພາຍໃຕ້ການເປັນປະທານຂອງ ທ່ານ ນາງ ຫຼິງທອງ ແສງຕາວັນ ກຳມະການພັກແຂວງ, ຫົວໜ້າພະແນກສຶກສາທິການ ແລະ ກິລາແຂວງ, ມີທ່ານ ປອ ມີທອງ ສຸວັນວິໄຊ ຄະນະພັກ, ຫົວໜ້າກົມການສຶກສາກ່ອນໄວຮຽນ ກະຊວງສຶກສາທິການ ແລະ ກິລາ ພ້ອມດ້ວຍຄະນະພະແນກ, ຜູ້ບໍລິຫານການສຶກສາທັງພາກລັດ ແລະ ເອກະຊົນພາຍໃນແຂວງ ຕະຫຼອດຮອດພະແນກການທີ່ກ່ຽວຂ້ອງເຂົ້າຮ່ວມ.

       ໃນພິທີ, ໄດ້ຜ່ານບົດສະຫຼຸບການຈັດຕັ້ງປະຕິບັດແຜນພັດທະນາການສຶກສາ ແລະ ກິລາ ສົກຮຽນ 2018-2019 ແລະ ແຜນພັດທະນາການສຶກສາ ແລະ ກິລາ ສົກຮຽນ 2019 ໃຫ້ຮູ້ວ່າ: ໂດຍລວມແລ້ວການຈັດຕັ້ງປະຕິບັດແຜນພັດທະນາການສຶກສາ ແລະ ກິລາ ເຫັນວ່າມີທ່ວງທ່າດີຂຶິ້ນ ເມື່ອທຽບໃສ່ປີຜ່ານມາ ເວົ້າສະເພາະຢູ່ໃນ 15 ຄາດໝາຍ ທີ່ສະພາຮອງຮັບນັ້ນ ພວກເຮົາສາມາດປະຕິບັດໄດ້ຫຼາຍຄາດໝາຍ ຈາກປີຜ່ານມາທີ່ປະຕິບັດໄດ້ພຽງ 4 ຄາດ  ໝາຍເທົ່ານັ້ນ ນອກຈາກການປະຕິບັດບັນດາຄາດໝາຍນັ້ນແລ້ວ, ຂະແໜງການສຶກສາຂອງພວກເຮົາ ຍັງໄດ້ກໍ່ສ້າງ ແລະ ພັດທະນາຊັບພະຍາກອນມະນຸດ ໂດຍສະເພາະແມ່ນກໍ່ສ້າງນັກຮຽນໃນສາຍສາມັນສຶກສາ, ການບຳລຸງຍົກລະດັບການສຶກສາຈົບຊັ້ນ ມ.ຕົ້ນ ໃຫ້ແກ່ປະຊາຊົນ, ການບຳລຸງຈົບ ມ.ປາຍ ໃຫ້ແກ່ພະນັກງານ, ຊາວໜຸ່ມ ທີ່ບໍ່ຈົບ ມ.ປາຍ ໃຫ້ສາມາດໄປຮຽນຕໍ່ໃນສາຍອາຊີວະສຶກສາ ແລະ ການສຶກສາຊັ້ນສູງ.

ສຳລັບໃນສົກຮຽນ 2018-2019 ຜ່ານມາ ທົ່ວແຂວງສະຫວັນນະເຂດ ມີໂຮງຮຽນອະນຸບານ ແລະຫ້ອງກຽມປະຖົມ 544 ແຫ່ງ, ເພີ່ມຂຶ້ນ 18 ແຫ່ງ ຈາກປີຜ່ານມາ, ມີໂຮງຮຽນປະຖົມ 1.237 ແຫ່ງ, ເພີ່ມຂຶ້ນ 3 ແຫ່ງ, ໂຮງຮຽນມັດທະຍົມສຶກສາຕອນຕົ້ນ ແລະ ຕອນປາຍ ທັງໝົດ 234 ແຫ່ງ, ໄດ້ຈັດສົ່ງນັກ ຮຽນເກັ່ງລະດັບແຂວງ ຊັ້ນ ມ.4 ແລະ ມ.7 ເຂົ້າຮ່ວມສອບເສັງນັກຮຽນເກັ່ງລະດັບປະເທດ ໃນ 4 ວິຊາຫຼັກ, ມີ 8 ຄົນ, ຍິງ 4 ຄົນ. ຜົນຂອງການແຂ່ງຂັນ ຊັ້ນມ.ປາຍ ສາມາດຍາດໄດ້ອັນດັບທີ 3 ວິຊາພາສາລາວ ແລະ ວິຊາເຄມີສາດ, ໄດ້ອັນດັບ 2 ໃນການແຂ່ງຂັນຖາມ-ຕອບວິທະຍາສາດ ແລະ ຄວາມຮູ້ຮອບຕົວ, ສຳເລັດການສອບເສັງຈົບຊັ້ນມັດທະຍົມສຶກສາຕອນຕົ້ນ ທີ່ມີນັກສອບທັງໝົດ 10 ພັນກວ່າຄົນ ສອບເສັງໄດ້ເທົ່າກັບ 99,76%, ສຳເລັດການສອບເສັງຈົບ ມ.7 ທີ່ລວມມີນັກສອບເສັງທັງໝົດ 6.899 ຄົນ ປະຕິບັດການສອບເສັງໄດ້ 99,94% ໃນນັ້ນໄດ້ມີນັກຮຽນເກັ່ງທີ່ໄດ້ຮັບປະກາສະນີຍະບັດແດງຈຳນວນ 3 ຄົນ, ຍິງ 1 ຄົນ. ພ້ອມນັ້ນ, ໃນປີ 2019 ຈຳນວນເມືອງທີ່ປະກາດຈົບຊັ້ນມັດທະຍົມສຶກສາຕອນຕົ້ນບຳລຸງຂັ້ນເມືອງ ໄດ້ເພີ່ມຂຶ້ນຈາກ 11 ເມືອງ ເປັນ 13 ເມືອງ ແລະ ຈະສືບຕໍ່ໃຫ້ບັນລຸຄາດໝາຍໃນປີ 2020, ໄດ້ສຳເລັດການສອບເສັງບຳລຸງຊັ້ນປະຖົມ ແລະ ມັດທະຍົມສຶກສາຕອນຕົ້ນ ໃຫ້ປະຊາຊົນທົ່ວແຂວງ.

       ດ້ານການພັດທະນາຄູ ໄດ້ລົງເປີດກອງປະຊຸມຝຶກອົບຮົມຄູສອນວິຊາພາສາລາວຊັ້ນປ.1, ປ.2, ປ.3 ທີ່ເມືອງຈຳພອນ ແລະ ເມືອງຊົນນະບູລີ ມີຄູສອນເຂົ້າຮ່ວມ 46 ຄົນ, ສຳເລັດການຝຶກອົບຮົມຄູສອນ ປ.1, ຜູ້ອຳນວຍການໂຮງຮຽນ, ຄູສຶກສານິເທດກ່ຽວກັບການນຳໃຊ້ຫຼັກສູດໃໝ່ໃນ 6 ວິຊາ ມີຈຳນວນ 2 ພັນກວ່າຄົນ ພາຍໃຕ້ແຜນງານບີຄວາ, ຝຶກອົບຮົມສູສອນວິຊາຄະນິດສາດ ປ.2 ໃນທົ່ວແຂວງ ຈຳນວນ 1 ພັນກວ່າຄົນ ໂດຍການສະໜັບສະໜູນຂອງອົງການໄຈກາ ປະເທດຍີ່ປຸ່ນ, ຈຳນວນນັກຮຽນໄປຮຽນຕໍ່ວິຊາສະເພາະພາຍໃນ ແລະ ຕ່າງປະເທດ ມີ 3.499 ຄົນ, ເທົ່າກັບ 47,50% ຕາມແຜນຍຸດທະສາດຮອດປີ 2020 ແມ່ນໃຫ້ບັນລຸ 60% ຂຶ້ນໄປ.

      ກອງປະຊຸມຄັ້ງນີ້ ຍັງໄດ້ຮັບຟັງການລາຍງານຄວາມຄືບໜ້າໃນການລົງປັບປຸງຄຸນນະພາບການສຶກສາຢູ່ 5 ເມືອງ ທີ່ຕິດພັນກັບການຫັນເອົາພະນັກງານລົງກໍ່ສ້າງຮາກຖານວຽກສາມສ້າງ, ລາຍງານຫຍໍ້ການພັດທະນາຊັບພະຍາກອນມະນຸດຂັ້ນແຂວງ, ຜ່ານມະຕິກອງປະຊຸມສະພາແຫ່ງຊາດ ວ່າດ້ວຍການພັດທະນາຊັບພະຍາກອນມະນຸດ ຕາມຂະແໜງບຸລິມະສິດໃນສາຂາວິຊາກະສິກຳ, ຄູ ແລະ ພະຍາບານ, ຈາກນີ້ ໃນພິທີຍັງໄດ້ມອບໃບຍ້ອງຍໍໃຫ້ນັກຮຽນເກັ່ງຂັ້ນແຂວງ ໄປສອບເສັງລະດັບຊາດ ແລະ ຍ້ອງຍໍຄູອາຈານ, ກົມກອງ ແລະ ໂຮງຮຽນດີເດັ່ນຂັັ້ນແຂວງ, ຂັ້ນພະແນກ ພ້ອມທັງຍັງໄດ້ມີການປະກອບຄຳຄິດຄຳເຫັນໃນບັນຫາຕ່າງໆ ທັງນີ້ກໍເພື່ອເຮັດໃຫ້ການຈັດຕັ້ງປະຕິບັດແຜນພັດທະນາການສຶກສາຂອງແຂວງສະຫວັນນະເຂດ ໄດ້ຮັບຜົນສຳເລັດຕາມແຜນການທີ່ວາງໄວ້.

ມວຍລາວ ກຽມສົ່ງ 5 ນັກກິລາ ຮ່ວມຊີງແຊ໋ມໂລກ 2019 ທີ່ ສ ເກົາຫຼີ

ສະຫະພັນກິລາມວຍລາວແຫ່ງຊາດ ກຽມສົ່ງ 5 ນັກກິລາມວຍລາຍລາວ ປະ​ເພດ​ຟ້ອນ ຈາກທີມ Lao Action Star ​ເປັນ​ຕົວ​ແທນ​ ສປປ ລາວ ເຂົ້າຮ່ວມສະແດງສັກກາຍະພາບຂອງສິລະ​ປະ​ແມ່​ໄມ້ມວຍ​ລາວ ອອກ​ສູ່​ສາຍຕາ​ມົນ​ຊົນຊາວ​ໂລກ ພ້ອມຕັ້ງເປົ້າຈະ​ສູ້​ຊົນ​ຕິດອັນ​ດັບ​ທີ 1-2 ​​ໃນການ​ແຂ່ງຂັນຟ້ອນ​ມວຍ ຊີງ​ແຊ໋ມ​ໂລກ 2019 ລາຍການ “Chungju World Martial Arts Park 2019” ທີ່ສ ເກົາຫຼີ​ເປັນ​ເຈົ້າພາບ ລະຫວ່າງວັນທີ 30 ສິງຫາ ຫາ 6 ກັນຍາ 2019  ​ໂດຍ​ມີ 46 ປະ​ເທດ​ເຂົ້າ​ຮ່ວມ​ຊີງ​ໄຊ.

​ເມື່ອວັນທີ 26 ສິງຫາ ຜ່ານມາ ທີ່​ຫ້ອງການສະຫະພັນມວຍແຫ່ງຊາດລາວ (ສະໜາມກິລາເຈົ້າອານຸວົງ) ​ນະຄອນຫຼວງ​ວຽງ​ຈັນ ​ໄດ້​ມີ​ພິທີ​ຖະ​ແຫຼ​ງຂ່າວ​ການ​ກຽມຄວາມ​ພ້ອມຂອງ​ທັບ​ນັກ​ກິລາ​ຟ້ອນ​ມວຍ​ລາຍ​ລາວ ກ່ອນ​ຈະອອກ​ເດີນທາງ​​ໃນມື້​ນີ້ (28 ສິງຫາ​) ເຂົ້າ​ຮ່ວມ​ແຂ່ງຂັນລາຍການ​ດັ່ງກ່າວ,​ ​ໃຫ້​ກຽດ​ເຂົ້າ​ຮ່ວມ​ຂອງ ທ່ານ ສາຍສະໝອນ ໄຊຍະສອນ ປະທານສະຫະພັນມວຍລາວແຫ່ງຊາດ ທັງເປັນປະທານສະຫະພັນມວຍໂລກ ພ້ອມ​ດ້ວຍ​ຜູ້​ໃຫ້ການ​ສະໜັບສະໜູນ, ຄູ​ຝຶກ ​ແລະ ນັກກິລາ ​ຕະຫຼອດ​ຮອດ​ບັນດາ​ສື່​ມວນ​ຊົນ​​ເຂົ້າຮ່ວມ​.

​      ທ່ານ ສາຍສະໝອນ ໄຊຍະສອນ ກ່າວ​ວ່າ: ສະຫະພັນມວຍລາວແຫ່ງຊາດ ​ໄດ້​ສືບ​ຕໍ່ສົ່ງນັກກິລາມວຍລາຍລາວ (ປະ​ເພດ​ຟ້ອນ) ຈໍານວນ 5 ຄົນ ​ເຂົ້າຮ່ວມແຂ່ງຂັນການສະ​ແດງ​ສິລະ​ປະການ​ຟ້ອນມວຍ​ຊີງ​ແຊ໋ມໂລກ 2019 ທີ່​ເມືອງ Chungju ສ ເກົາຫຼີ ໂດຍມີ 46 ປະເທດເຂົ້າຮ່ວມຊີງ​ໄຊ ການ​ແຂ່ງຂັນລາຍການ​ດັ່ງກ່າວ​ຈັດ​ມາ​ແລ້ວ 3 ຄັ້ງ ​ແລະ ສປປ ລາວ ສົ່ງ​ໄປ​ຮ່ວມ​ຄັ້ງ​ທໍາ​ອິດ​ ​ເມື່ອປີ 2018 ​ໃນ​ຄັ້ງ​ນັ້ນ​ໄດ້ສົ່ງເຂົ້າພຽງ 1 ລາຍການ ກໍຄືປະ​ເພດຟ້ອນດ່ຽວຊາຍ ຜົນງານ​ກໍ​ສາມາດ​ແຈ້ງ​ເກີດຍາດມາໄດ້ອັນດັບທີ 3. ​ແນວ​ໃດ​ກໍ​ດີ, ປີນີ້ ​ເພື່ອ​ເປັນການ​ປະກອບສ່ວນ​ສ້າງ​ຜົນງານ​ເປັນ​ກຽດ​ຊື່​ສຽງ ​ແລະ ສັກ​ສີ​ໃຫ້​ແກ່​ປະ​ເທດ​ຊາດ ສະຫະພັນ​ມວຍ​ລາວແຫ່ງ​ຊາດ ຈຶ່ງ​ໄດ້​ຕັດສິນ​ໃຈສົ່ງນັກ​ກິລາ ຈຳນວນ 5 ຄົນ ເຂົ້າຮ່ວມຊີງ​ໄຊ 3 ລາຍການ ຄື ປະ​ເພດຟ້ອນມວຍ​ລາຍ​ລາວດ່ຽວຊາຍ,​ ຄູ່ຊາຍ ແລະ ປະ​ເພດທີ​ມ 5 ຄົນ ​ສ່ວນ​ເປົ້າໝາຍ​ ​ແມ່ນ​ຈະ​ສູ້​ຊົນ​ເຮັດ​ໃຫ້ດີກວ່າປີທີ່ຜ່ານມາ ດ້ວຍການຕິດອັນດັບ 1​ ໃນ 2 ​ຂອງລາຍການ​.

       ປະທານສະຫະພັນມວຍລາວແຫ່ງຊາດ ບອກ​ຕື່ມ​ອີກ​ວ່າ: ການ​ແຂ່ງຂັນຄັ້ງ​ນີ້​ເປັນ​ຄັ້ງ​ຍິ່ງໃຫຍ່​ທີ່​ສຸດ ທີ່ມວຍ​ລາຍ​ລາວ ຈະ​​ໄດ້ນຳ​ເອົາ​ຄວາມ​ຮູ້​ຄວາມ​ສາມາດ​ຂອງ​ຕົນ​ທີ່​ສຶກສາ​ຮຽນ​ຮູ້​ມູນ​ເຊື້ອ​ກິລາ​ມວ​ຍລາຍ​ລາວມາ​ຫຼາຍ​ປີ ​​ເຜີຍ​ແຜ່ສະ​ແດງ​ຄວາມ​ສາມາດ​ຂອງ​ຕົນອອກ​ສູ່​ສາຍຕາ​ຊາວ​ໂລກ ​ແບບ​ຄົບ​ທຸກ​ລາຍການ ​​​ແລະ ​ຊາວ​ໂລກ​​ເມື່ອ​ໄດ້​ຊົມ​ການສະ​ແດງ​ສິລະ​ປະ​ແມ່​ໄມ້ມວຍ​ລາວ ຈະ​ຕ້ອງ​ຕະລຶງຢ່າງ​ແນ່ນອນ ທັງນີ້, ​ພວກ​ເຮົາ​ຂໍ​ສະ​ແດງ​ຄວາມ​ຮູ້​ບຸນຄຸນ​ມາ​ຍັງ​ບັນດາ​ຜູ້​ໃຫ້ການ​ສະໜັບສະໜູນທີ່​ສົ່ງ​ເສີມ​ສິລະປະມວຍ​ລາວ​ໃຫ້​ກ້າວ​ໄກ ​ແລະ ອອກ​ສູ່​ສາຍຕາ​ຊາວ​ໂລກ ຂໍ​ໃຫ້​ເຊື່ອ​ໝັ້ນ​ວ່າ​ພວກ​ເຮົາ​ຈະ​ສູ້​ຊົນ​ຢ່າງ​ສຸດ​ຄວາມ​ສາມາດ ​ເພື່ອ​ນຳ​ເອົາ​ຄວາ​ມສຸກ ​ແລະ ກຽດ​ຊື່​ສຽງ​ມາ​ຕ້ອນ​ພໍ່​ແມ່​ປະຊາຊົນ​ຊາວ​ລາວ​ ໄດ້​ພາກພູມ​ໃຈ​ຢ່າງ​ແນ່ນອນ. ຫຼັງ​ຈາກ​ນັ້ນ, ​ທ່ານປະທານສະຫະພັນມວຍແຫ່ງຊາດລາວ ກໍ​ຍັງ​ໄດ້​ເຜີ​ຍ​ແຜນການ​ຫ້າງ​ຫາ​ກະກຽມ​ຄວາມ​ພ້ອມ​ໃຫ້​ແກ່ ສປປ ລາວ ຮັບ​ກຽດ​ເປັນ​ເຈົ້າພາບ ຈະ​ຈັດການ​​ແຂ່ງຂັນລາຍການ​ຊີງ​ແຊ໋ມມວຍ​​ໂລກ ​ໃນ​ຕົ້ນ​ປີ 2020.

       ສ່ວນ​ ທ້າວ ພິລາ​ວັນ ຈັນທະ​ກາລີ ນັກ​ກິລາ​ຟ້ອນ​ມວຍ​ລາຍ​ລາວ 1 ດຽວ​ທີ່​ສ້າງ​ຜົນງານ​ຄັ້ງ​ທຳ​ອິດ​ໃຫ້​ສປປ ລາວ ​ໃນ​ເວທີ​ສາກົນ ​ເມື່ອ​ປີຜ່ານມາ ​ໃຫ້​ສຳພາດວ່າ: ປີ​ກາຍ​ນ້ອງສາມາດ​ຍາດ​ໄດ້​ອັນ​ດັບ​ທີ 3 ​ໃນ​ລາຍການ​ຟ້ອນ​ດ່ຽວ ສ່ວນ​ປີ​ນີ້​ຈະ​ມາ​ແກ້​ທ່າ​ໂຕ​ເກົ່າ​ ດ້ວຍ​ການ​ເສີມ​ທ່າ​ຍາກ​ເພີ່ມ​ຂຶ້ນ​ອີກ ​ໂດຍ​ຈະ​ໃຊ້​ເວລາ​ໃນ​ການສະ​ແດງ​ພຽງ​ 1 ນາ​ທີ ​ການສະ​ແດງ​​ເນັ້ນ​ຈຸດທ່າ​ທີ່​ເປັນ​ເອກະລັກ​ຂອງຊາດລາວ​ເຮົາ​ສະ​ເພາະ ນັບ​ຕັ້ງ​ແຕ່​ຂັ້ນ​ພື້ນຖານ​ຈົນ​ຮອດ​ຂັ້ນ​ສູງ​ສຸດ ​ມາປະສົມ​ປະສານ​ກັບທ່າ​ທີ່​ເປັນ​ຂອງ​ສາກົນ​ ສະ​ແດງ​ໃນ​ງານ​ດັ່ງກ່າວ. ​ແນວ​ໃດ​ກໍ​ຕາມ, ​ລາຍການ​ນີ້ ​ຄູ່​ແຂ່ງ​ທີ່​ສໍາຄັນ​​ແມ່ນນັກ​ກິລາ​ຈາກ​ເຈົ້າພາບ​ ສ ເກົາຫຼີ ​ແລະ ສປ ຈີນ ລວມເຖິງ ກໍາປູເຈຍ ແລະ ໄທ ທີ່ມີ​ການສະ​ແດງ​ສິລະ​ປະວັດ​ທະນະ​ທຳ​ຄ້າຍຄື​ກັນ​ໃນແຕ່ລະທ່າ ​ແຕ່ພວກເຮົາຈະບໍ່​ປະ​ໝາດ​ເດັດຂາດ ຈະ​ສູ້​ຢ່າງ​ສຸດ​ຄວາມ​ສາມາດ ​ເພື່ອ​ສ້າງ​ຄວາມ​ຫວັງ​ຂອງ​ສະຫະພັນ ກໍ​ຄື ​ເປັນ​ປະ​ເທດ​ຊາດ​ໃຫ້ປະກົດ​ຜົນ​ເປັນ​ຈິງ ​ເພື່ອ​ຮັບປະກັນ​ໃຫ້​ໄດ້​ຄື​ແນວ​ນັ້ນ ພວກ​ເຮົາ​ໄດ້​ຄັດ​ເອົາ​ນັກ​ກິລາຈາກທີມ Lao Action Star ​ຊຶ່ງ​ເປັນທີມສະແດງການຕໍ່ສູ້ໂດຍສະເພາະມີ​ປະສົບ​ການ​ສູ​ງ ​ໄດ້​ພ້ອມ​ກັນ​ເກັບ​ຕົວຝຶກຊ້ອມມາ​ໄດ້ 1 ເດືອນ​ເຕັມ ນັບ​ມາ​ຮອດ​ປັດຈຸບັນ​ພວກ​ພ້ອມ​​ແລ້ວ​ທີ່​ຈະ​ລ່າ​ຜົນງານ​ມາສູ່​ປະ​ເທດ​ຊາດ.

     ສໍາລັບ ຄະນະນໍາ ແລະ ກິລາ ສົ່ງ​ເຂົ້າ​ຮ່ວມ​ແຂ່ງຂັນ​ລາຍການ​ດັ່ງກ່າວ​ ປະກອບ​ມີ​ທັງ​ໝົດ 7 ຄົນ ​ນຳ​ທີ​ມ​ໂດຍ ທ່ານ ສາຍສະໝອນ ​ໄຊ​ຍະ​ສອນ ​​ແລະ ທ່ານ ຂັນ​ທະ​ລີ ສ່ວນ​ນັກ​ກິລາມີ ​ທ້າວ ພິລາວັນ ຈັນທະກາລີ, ທ້າວ ຈື້ເນັ້ງ ຄົວປາວຊົ່ງ ຫຼື ບູດລີລາວ, ທ້າວ ໄພລັດ ທໍາມະວົງສາ ນັກ​ກິລາ​ວໍ​ວີນາ​ມ ​ເຈົ້າ​ຂອງຕຳ​ແໜງ​ມື 1 ປະເພດຟ້ອນ​ລະດັບ ອາ​ຊຽນ, ທ້າວ ກອງເງິນ ອິນທິສານ ແລະ ທ້າວ ຄໍາຮັກ ສີວົງໄຊ.ໃນ​ໂອກາດນີ້ ກໍ​ຍັງ​ໄດ້​ມີ​ການສະ​ແດງ​ຄວາມ​ສາມາດ​ໃນ​ການ​ຟ້ອນສິລະ​ປະ​ແມ່​ໄມ້ມວຍ​ລາຍ​ລາວຂອງ​ 5 ທັບ​ນັກ​ກິລາ ທີ່​ໄດ້​ຝຶກ​ຊ້ອມ 1 ​ເດືອນ​​ເຕັມ ​ໄດ້ສ້າງ​ຄວາມ​ປະ​ທັບ​ໃຈ ​​ໃຫ້​ແກ່​ຄະນະ​ນຳ, ຜູ້​ອຸປະຖຳ ​ແລະ ສື່​ມວນ​ຊົນ​ໄດ້​ຊົມ​ຢ່າງ​ຕື່ນ​ເຕັ້ນ ​ແລະ ລະ​ທຶກ​ໃຈ​ເປັນ​ຢ່າງ​ຍິ່ງ. ​

​ໂດຍ: ສົງການ

ເຮືອຍາວ 31 ລໍາ ແຈ້ງເຈດຈຳນົງຮ່ວມ ງານບຸນຊ່ວງເຮືອຫຼວງພະບາງ 2019

ບັນ​ດາ​ເຮືອ​ຊ່ວງ ທົ່ວ​ແຂວງ​ຫຼວງ​ພະ​ບາງ ​ແລະ ອ້ອມ​ຂ້າງນະຄອນຫຼວງພະບາງ ພິ​ເສດມີ​ເຮືອ​ຈາກ ​ແຂວງ​ໄຊ​ຍະ​ບູລີ 1 ລໍາ ລວມທັງ​ໝົດ 31 ລໍາ ​ແຈ້ງ​ເຈດ​ຈຳນົງ​ເຂົ້າ​ຮ່ວມ​ແຂ່ງຂັນ ​ເພື່ອຊີງ​ຄວາມ​ເປັນ​ໜຶ່ງ ​ໃນ​ການ​ແຂ່ງຂັນ​ຊ່ວງ​ເຮືອ​ຍາວ​ປະ​ເພນີ ປະຈໍາປີ 2019 ​ເພື່ອ​ສ້າງ​ຂະ​ບວນການສະ​ເຫຼີ​ມສະຫຼອງບຸນຫໍ່ເຂົ້າປະດັບດິນ ຫຼື ບຸນເດືອນເກົ້າ ​ຊຶ່ງ​ເປັນ​ບຸນ​ປະ​ເພນີ​ຂອງ​ແຂວງ​ດັ່ງກ່າວ ຈະ​ຈັດ​ຂຶ້ນ​ໃນ​ວັນ​ທີ 29 ສິງຫາ​ນີ້. 

 ອີງ​ຕາມ​ຂໍ້​ມູນ​ຈາກໜັງສືພິມ​ເສດຖະກິດ​-ການ​ຄ້າ ​ແຈ້ງ​ໃຫ້​ຮູ້​ວ່າ:  ປີ​ນີ້ ​ແຂວງ​ຫຼວງ​ພະ​ບາງ ​ໄດ້ສືບ​ຕໍ່ປະຕິບັດ​ຕາມ​ຮີດຄອງ​ປະ​ເພນີ​ ທີ່​ພໍ່​ແມ່​ປະຊາຊົນ​ຊາວ​ແຂວງ​ຫຼວງ​ພະ​ບາງ ​ໄດ້​ປະຕິບັດ​ກັນ​ມາ​ຢ່າງ​ຍາວ​ນານ ຈະຈັດການແຂ່ງຂັນຊ່ວງເຮືອປະຈໍາປີ 2019 ມີເຮືອຊ່ວງເຂົ້າຮ່ວມຊີງໄຊທັງໝົດ ຈໍານວນ 31 ລໍາ​ ໃນ​ບັນຍາ​ກາດການແຂ່ງຂັນ​ງານ​ດັ່ງກ່າວ ແມ່ນ​ເລີ່​ມ​ໃຫ້​ມີ​ການ​ຄົບງັນ​ເພື່ອສະ​ເຫຼີ​ມສະຫຼອງງານ​ດັ່ງກ່າວ​ໃຫ້​ມີ​ບັນຍາກ​າດຟົດ​ຟື້ນ ແຕ່ວັນທີ 23 ສິງຫາ ຜ່ານມາ ທີ່ບ້ານຫາດຮ່ຽນ ແລະ ໃນວັນອັງຄານທີ 27 ສິງຫາ 2019 ແຮມ 12 ຄ່ຳ ເດືອນ 9 ປີ 2562 ແມ່ນການຊ່ວງເຮືອທີ່ບ້ານສັງຄະໂລກ; ສ່ວນວັນພຸດ ທີ 28 ສິງຫາ 2019 ແຮມ 13 ຄ່ຳ ເດືອນ 9 ປີ 2562 ເລີ່ມເວລາ 07:00-12:00 ໂມງ ແມ່ນມີພິທີໂລະລາດ (ຕະຫຼາດນັດມວນຊົນ) ຕາມເສັ້ນທາງສີສະຫວ່າງວົງ ເລີ່ມແຕ່ສາມແຍກບ້ານຈຸມຄ້ອງ (ຫໍພະບາງ) ຫາ ສາມແຍກ ພະແນກໂຍທາທິການ ແລະ ຂົນສົ່ງແຂວງ ສໍາລັບວັນພະຫັດທີ 29 ສິງຫາ 2019 ແຮມ 14 ຄ່ຳ ເດືອນ 9 ປີ 2562 ເປັນມື້ບຸນເຂົ້າປະດັບດິນ ຊຶ່ງໃນຕອນເຊົ້າຈະມີການໃສ່ບາດ ຫຼັງຈາກນັ້ນກໍຊົມການແຂ່ງຂັນຊ່ວງເຮືອງຫຼວງພະບາງ ທີ່ນ້ຳຄານ ນັບແຕ່ເວລາ 09:00 ໂມງເປັນຕົ້ນໄປ ຄູ່ເປີດການແຂ່ງຂັນຢ່າງເປັນທາງການ ​ແມ່ນເຮືອນາງດຳ-ນາງດ່ອນ (ຈາກບ້ານຊຽງແມນ ຫຼື ວັດຊຽງຍືນ) ຊ່ວງລົງມາເປັນຄູ່ເປີດໜ້ານ້ຳ ຈາກນັ້ນ ຈຶ່ງດໍາເນີນການແຂ່ງຂັນຢ່າງ​ເປັນ​ທາງ​ການ

      ທ່ານ ບຸນຄົງ ສຸກສະຫວັດ ຮອງຫົວໜ້າພະແນກໂຍທາທິການ ແລະ ຂົນສົ່ງ ແຂວງຫຼວງພະບາງທັງເປັນອະນຸກໍາມະການຈັດການແຂ່ງຂັນຊ່ວງເຮືອປະຈໍາປີ 2019 ໃຫ້ສໍາພາດວ່າ: ມາຮອດປັດຈຸບັນ ການກະກຽມຈັດການແຂ່ງຂັນຖືວ່າພ້ອມໃນທຸກໆດ້ານ ສາມາດອໍານວຍຄວາມສະດວກໃຫ້ແກ່ມວນຊົນທັງພາຍໃນ ຫຼື ຕ່າງປະເທດເຂົ້າມາທ່ຽວໃນໄລຍະອາທິດນີ້ຢ່າງເຕັມທີ່ ລວມທັງການຮັກສາຄວາມສະຫງົບປອດໄພຮ້ອຍສ່ວນຮ້ອຍ. ຕາມການສັງເກດເຫັນວ່າປີນີ້ນໍ້າຄານຫຼຸດລົງເລັກນ້ອຍຫາກທຽບໃສ່ກັບປີ 2018 ຜ່ານມາ, ແຕ່ກໍຖືວ່າສາມາດຈັດການແຂ່ງຂັນໄດ້ປົກກະຕິ ໂດຍມີເຮືອຊ່ວງເຂົ້າຮ່ວມຊີງໄຊທັງໝົດ 31 ລຳ ແບ່ງອອກເປັນ 2 ສາຍຄື: ສາຍ ກ ມີ ເຮືອພະແນກ ຖວທ (​ໃຊ້​ສີພາຍບ້ານພັນຫຼວງ), ເຮືອຮ້ານຂາຍລົດ-ບ້ານດອນແຊ້ມ, ເຮືອພະແນກສາທາລະນະສຸກ (ບ້ານອາໂພ), ເຮືອບ້ານດອນຫົງຟ້າ, ເຮືອລາວແກ໊ສ-ບ້ານສັງຄະໂລກ2, ເຮືອບ້ານປາກເຊືອງ, ເຮືອບ້ານປາກຫຼວງ-ຮ້ານໂລອອນອິນເຕີເນັດ, ເຮືອວັດໃໝ່ສຸວັນນະພູມຮາຣາມ-ບ້ານປ່າຂາມ, ເຮືອສະໜາມບິນສາກົນຫຼວງພະບາງ-ບ້ານຫາດຮ່ຽນ, ເຮືອບ້ານສາມສ້າງເມືອງຂາຍ-ຮ້ານເກດປ້າຍ (ບ້ານນາວຽງຄຳ), ເຮືອບ້ານຄົກມັນ, ເຮືອເມືອງປາກອູ-ບ້ານຊ່າງໄຫ, ເຮືອຮ່ວມມືລາວ-ຈີນ ບ້ານຊຽງລ້ອມ, ເຮືອຊາວໜຸ່ມກຸ່ມຊຽງທອງ ແລະ ເຮືອເມືອງໂພນໄຊ.

      ສ່ວນ ສາຍ ຂ ມີ ເຮືອແຂວງໄຊຍະບູລີ, ເຮືອນາວາປາກຕານ-ບ້ານໂພນສະອາດ, ເຮືອນະຄອນຫຼວງວຽງຈັນ (ຣີສອດປາກນໍ້າຄານ), ເຮືອວັດຊຽງທອງ1, ເຮືອພະແນກສຶກສາທິການ ແລະ ກິລາ​ແຂວງ (ສີພາຍບ້ານນູນສະຫວາດ), ເຮືອບ້ານຖິ່ນຊົມ, ເຮືອເມືອງນໍ້າບາກ, ເຮືອບໍລິສັດຮຸ່ງວິໄລ (ບ້ານຫາດຮ່ຽນ), ເຮືອສະຖາບັນການເງິນຈໍາປາລາວ (ບ້ານຄອຍ), ເຮືອລາວແກ໊ສ-ບ້ານສັງຄະໂລກ1, ເຮືອວັດຊຽງທອງ2, ເຮືອເມືອງຊຽງເງິນ, ເຮືອບ້ານສະເລື່ອນ, ເຮືອຊາວໜຸ່ມຈານເໜືອ (ເມືອງຈອມເພັດ), ເຮືອກຸ່ມທຸລະກິດຊ້າງເພັດ ແລະ ເຮືອທະນາຄານ (ນາວາຜານາກ).

​ໂດຍ ສົງການ

ອີໂວ ມອບເຄື່ອງກິລາ 80 ຊຸດ ໃຫ້ຊາວໜຸ່ມ ມຊ ສ້າງຂະບວນການກິລາ ຕ້ອນກອງປະຊຸມໃຫຍ່ ຄັ້ງທີ V

ສູນຈຳໜ່າຍ ແລະ ຜະລິດເຄື່ອງກິລາ ອີ​ໂວ (EVO) ​ໃຫ້ການ​ຊຸກຍູ້ເຄື່ອງ​ກິລາ​ ຈຳນວນ 80 ຊຸດ ລວມມູນຄ່າ 6,4 ລ້ານກີບ ​ໃຫ້​ແກ່​ຄະນະ​ບໍລິຫານ​ງານ​​ຊາວ​ໜຸ່ມ​ປະຊາຊົນ ປະຕິວັດ​ລາວ ມະຫາວິທະຍາ​ໄລ​ແຫ່ງ​ຊາດ (ມຊ) ເພື່ອເປັນການສ້າງຂະບວນການແຂ່ງຂັນກິລາ ຕ້ອນຮັບກອງປະຊຸມໃຫຍ່ ຄັ້ງທີ V ຂອງ ຄະນະ​ບໍລິຫານ​ງານ​​ຊາວ​ໜຸ່ມ​ປະຊາຊົນ ປະຕິວັດ​ລາວ ທີ່ຈະໄຂຂຶ້ນໃນຕົ້ນເດືອນກັນຍາ 2019. ຂະນະ​ທີ່​ແຊ໋ມຕົກ​ເປັນ​ຂອງ ສະຫະພັນກຳມະບານ ມຊ. 

     ພິທີມອບ-ຮັບການ​ຊຸກຍູ້​ໃນ​ຄັ້ງ​ນີ້ ​ໄດ້​ມີ​ຂຶ້ນ​ເມື່ອ​ວັນ​ທີ 24 ສິງຫາ ຜ່ານ​ມາ ທີ່ສະໜາມກິລາບານເຕະຫຍ້າທຽມ ມຊ, ໃຫ້ກຽດມອບໂດຍ ທ່ານ ອານຸພົງ ທຳສາລີ ຜູ້ຈັດການຝ່າຍການຕະຫຼາດ ສູນຈຳໜ່າຍ ແລະ ຜະລິດເຄື່ອງກິລາ EVO ແລະ ຕາງໜ້າຮັບຂອງ ສະຫາຍ ທອງອູ້ມ ອິນທະພອນ ຮອງເລຂາ ຄຊປປລ ກະຊວງສຶກສາທິການ ແລະ ກິລາ ທັງເປັນຮອງເລຂາ ຄຊປປລ ມຊ ມີ​ທ່ານ ຮສ ໂພສີ ທິບດາວັນ ຄະນະພັກ, ຜູ້ຊີ້ນຳວຽກງານຊາວໜຸ່ມ ມຊ ພ້ອມດ້ວຍຄະນະບໍລິຫານງານຊາວໜຸ່ມແຕ່ລະຮາກຖານ, ພະນັກງານ, ຄູ​ອາຈານ ​ແລະ ນັກ​ສຶກສາ​ທົ່ວ ມຊ ​ເຂົ້າ​ຮ່ວມ​ເປັນ​ສັກຂີ​ພິຍານ​ 200 ກວ່າ​ຄົນ. ​ໃນ​ໂອກາດດັ່ງກ່າວ, ສະຫາຍ ທອງອູ້ມ ອິນທະພອນ ກໍໄດ້ມອບໃບຍ້ອງຍໍຂອງ ຄຊປປລ ມຊ ໃຫ້ແກ່ສູນຈຳໜ່າຍ ແລະ ຜະລິດເຄື່ອງກິລາ EVO ເພື່ອ​ເປັນ​ການສະແດງຄວາມຂອບໃຈ ແລະ ຄວາມຮູ້ບຸນຄຸນ ມາຍັງສູນ​ດັ່ງກ່າວ ທີ່ເຫັນ​ໄດ້ຄວາມສໍາຄັນ ແລະ ຮ່ວມສົ່ງເສີມການເຄື່ອນໄຫວ​ແຂ່ງຂັນ​ກິດຈະກຳຂອງ ຄຊປປລ ມຊ ໃນຄັ້ງນີ້.

      ​ການ​ແຂ່ງຂັນ​ກິລາເຕະບານ ຊີງຂັນສະຫາຍເລຂາ ຄຊປປລ ມຊ ປະຈຳ​ປີ 2019 ມີນັກກິລາຕາງໜ້າ ຮາກຖານຕ່າງໆອ້ອມ​ຂ້າງ ມຊ ຈຳນວນ 16 ຮາກຖານ, ພ້ອມກັບທີມແຂກທີ່ຖືກເຊີນ ຄື ສະຫະພັນກຳມະບານ ມຊ ເຂົ້າຮ່ວມແຂ່ງຂັນ ທັງໝົດ 80 ຄົນ ໄດ້ແບ່ງທີມແຂ່ງຂັນອອກເປັນ 4 ທີມ ໃຊ້ລະບົບຈັດການແຂ່ງຂັນແບບຈົກສະຫຼະປະກົບຄູ່, ທີມຊະນະໃນນັດທຳອິດ ຜ່ານເຂົ້າໄປຊີງຊະນະເລີດ, ​ໃນ​ຈຳນວນ 80 ຄົນ​ ​ແມ່ນ​ມາຈາກ 16 ຮາກຖານ ຊາວໜຸ່ມ ມຊ ແບ່ງອອກເປັນ 3 ທີມ ຄືທີມ A, C ແລະ D ​ແລະ ອີກ 1 ທີມ ​ແມ່ນສະຫະພັນກຳມະບານ ມຊ ຈັດ​ໃຫ້ເປັນທີມ B ຜ່ານການແຂ່ງຂັນນັດທຳອິດຜົນປະກົດວ່າ ທີມສະຫະພັນກຳມະບານ ມຊ ສາມາດເອົາຊະນະ ທີມປະສົມ ຄຊປປລ ມຊ A ໄປແບບຂາດຮອຍ 6-2 ປະຕູ ແລະ ທີມປະສົມ ຄຊປປລ ມຊ C ເສຍໃຫ້ ທີມປະສົມ ຄຊປປລ ມຊ D 5-8 ປະຕູ ສົ່ງຜົນໃຫ້ທີມສະຫະພັນກໍາມະບານ ມຊ ຜ່ານເຂົ້າໄປຊີງຊະນະເລີດ ພົບກັບ ທີມປະສົມ ຄຊປປລ ມຊ D ກ່ອນ​ທີ​ມສະຫະພັນກຳມະບານ ມຊ ​ໄລ່ເອົາຊະນະ ທີມປະສົມ ຄຊປປລ ມຊ D ໄປ​ແບບ​ສຸດ​ມ່ວນ 5-3 ສົ່ງຜົນໃຫ້ ທີມສະຫະພັນກຳມະບານ ມຊ ຄວ້າ​ຂັນຊີງຂັນສະຫາຍ ເລຂາ ຄຊປປລ ມຊ ໄປຄອງ.

 ໂດຍ ນັກຂ່າວເງົາ, ຮຽບຮຽງ​ໂດຍ ສົງການ

ຮອງເຈົ້າແຂວງເຊກອງ ເນັ້ນສະຫະພັນກິລາ ເລັ່ງຝຶກຊ້ອມໃຫ້ເປັນລະບົບຕໍ່ເນື່ອງ ຫວັງສ້າງຜົນງານດີ ໃນກິລາແຫ່ງຊາດ

ທ່ານຮອງເຈົ້າແຂວງເຊກອງ ໄດ້ຮຽກຮ້ອງໃຫ້ຄະນະນຳພະແນກສຶກສາທິການ ແລະ ກິລາແຂວງ ແລະ ສະຫະພັນກິລາແຂວງ ເອົາໃຈໃສ່ເຄື່ອນໄຫວຊຸກຍູ້ປະເພດກິລາທີ່ຕົນເອງຮັບຜິດຊອບ ພ້ອມທັງຄັດເລືອກເອົານັກກິລາທີ່ມີຄວາມສາມາດ ແລະ ພອນສະຫວັນດີເດັ່ນຢ່າງແທ້ຈິງ ມາເປັນຕົວແທນຂອງແຂວງ ແລະ ຈັດການຝຶກຊ້ອມຢ່າງເປັນລະບົບຕໍ່ເນື່ອງ ຫວັງສ້າງຜົນງານໃຫ້ອອກມາດີທີ່ສຸດ ໃນການເຂົ້າຮ່ວມງານມະຫາກຳກິລາແຫ່ງຊາດ ຄັ້ງທີ XI ແລະ ງານແຂ່ງຂັນກິລາຄົນພິການແຫ່ງຊາດ ຄັ້ງທີ III ທີ່ແຂວງຊຽງຂວາງ ເປັນເຈົ້າພາບ ໃນປີ 2020.

ສະມາຄົມກິລາ-ກາຍຍະກຳແຂວງເຊກອງ ຈັດກອງປະຊຸມທົບທວນຄືນວຽກງານຄະນະກໍາມະການສະມາຄົມ ປະຈຳສົກປີ 2018-2019 ແລະ ຜ່ານທິດທາງແຜນການຕໍ່ໜ້າ ເມື່ອວັນທີ 14 ສິງຫາ ຜ່ານມາ ທີ່ຫ້ອງປະຊຸມພະແນກສຶກສາທິການ ແລະ ກິລາແຂວງເຊກອງ, ໂດຍພາຍໃຕ້ການເປັນປະທານຂອງ ທ່ານ ຖາວອນ ພົມມະໄລລຸນ ຄະນະປະຈໍາພັກແຂວງ, ຮອງເຈົ້າແຂວງເຊກອງ, ມີທ່ານ ຄໍາໄພ ສິມມາວັດ ຮັກສາການຫົວໜ້າພະແນກສຶກສາທິການ ແລະ ກິລາແຂວງ ພ້ອມດ້ວຍບັນດາປະທານ-ຮອງປະທານສະຫະພັນກິລາແຂວງ, ຫົວໜ້າ-ຮອງຫົວໜ້າຂະແໜງ ແລະ ພະນັກງານວິຊາການເຂົ້າຮ່ວມຢ່າງພ້ອມພຽງ.

      ໃນພິທີ, ທ່ານ ເນົາ ພົມມະວົງສາ ໄດ້ລາຍງານໃຫ້ຮູ້ວ່າ: ສໍາລັບໂຄງຮ່າງການຈັດຕັ້ງຂອງຄະນະກໍາມະການສະມາຄົມກິລາ-ກາຍຍະກໍາແຂວງເຊກອງ ໂດຍໄດ້ແຕ່ງຕັ້ງເອົາທ່ານຮອງເຈົ້າແຂວງ ເປັນປະທານສະມາຄົມ, ທ່ານຫົວໜ້າພະແນກສຶກສາທິການ ແລະ ກິລາແຂວງ, ຫົວໜ້າຫ້ອງວ່າການປົກຄອງແຂວງ, ເຈົ້າເມືອງໃນເທດສະບານແຂວງເປັນຮອງ ແລະ ບັນດາທ່ານຫົວໜ້າພະແນກການຕ່າງໆ ທີ່ເປັນກໍາມະການພັກແຂວງ ເປັນຄະນະກໍາມະການສະມະຄົມ ລວມມີ 41 ທ່ານ, ຍິງ 2 ທ່ານ ເພື່ອສ້າງເງື່ອນໄຂໃນການພັດທະນາກິລາ-ກາຍຍະກຳຂອງແຂວງ ໃຫ້ໄປຕາມແຜນຍຸທະສາດ ການພັດທະນາກິລາ-ກາຍຍະກໍາຂອງກະຊວງສຶກສາທິການ ແລະ ກິລາ, ໄດ້ມີການສ້າງຕັ້ງສະຫະພັນກິລາປະເພດຕ່າງໆຂອງແຂວງ ລວມມີ 19 ສະຫະພັນກິລາ, ມອບໃຫ້ຄະນະກໍມະການສະມະຄົມກິລາ-ກາຍຍະກໍາແຂວງ, ປະທານບໍລິສັດ, ຫ້າງຮ້ານທີ່ມີທ່າແຮງດ້ານຕ່າງໆເປັນປະທານຮອງປະທານ. ສ່ວນວຽກງານຈັດຕັ້ງ ແລະ ຜັນຂະຫຍາຍໂດຍແມ່ນທ່ານຫົວໜ້າພະແນກສຶກສາທິການ ແລະ ກິລາແຂວງ ຊຶ່ງແມ່ນຮອງປະທານສະມະຄົມກິລາ-ກາຍຍະກໍາ ເປັນຫົວໜ້າ, ທ່ານ ຮອງຫົວໜ້າພະແນກສຶກສາທິການ ແລະ ກິລາ, ຜູ້ຊີ້ນໍາວຽກງານກິລາ-ກາຍຍະກໍາ ແລະ ທ່ານເຈົ້າເມືອງ 4 ເມືອງເປັນຮອງ ແລະ ບັນດາທ່ານຫົວໜ້າ-ຮອງຫົວໜ້າຂະແໜງທີ່ກ່ຽວຂ້ອງເປັນກຳມະການ.

        ສຳລັບທິດທາງແຜນການເຄື່ອນໄຫວໃນຕໍ່ໜ້າ ແມ່ນຈະສືບຕໍ່ຈັດການແຂ່ງຂັນກິລາແຕ່ລະຮຸ່ນອາຍຸ ຊີງຂັນປະທານສະມະຄົມ, ກຽມຄັດເລືອກນັກກິລາເຂົ້າຮ່ວມແຂ່ງຂັນງານມະຫາກໍາກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງ ໃນຕົ້ນປີ 2020, ກຽມບຸກຄະລາກອນ, ແຜນການ, ແຜນງົບປະງານ ເພື່ອເຂົ້າຮ່ວມງານມະຫາກໍາກິລາແຫ່ງຊາດ ຄັ້ງທີ XI ແລະ ງານແຂ່ງຂັນກິລາຄົນພິການແຫ່ງຊາດ ຄັ້ງທີ III ທີ່ແຂວງຊຽງຂວາງ ເປັນເຈົ້າພາບ ໃນປີ 2020 ແລະ ປັບປຸງຄະນະກໍາມະການ ສະມາຄົມກິລາ-ກາຍຍະກໍາຂອງແຂວງ ຊຸດໃໝ່.

       ໃນໂອກາດນີ້, ທ່ານ  ຖາວອນ ພົມມະໄລລຸນ ໄດ້ໃຫ້ກຽດໂອ້ລົມ ແລະ ຍ້ອງຍໍຊົມເຊີຍຕໍ່ຜົນງານຂອງບັນດາຄະນະກໍາມະການສະມາຄົມກິລາ-ກາຍກໍາຂອງແຂວງ ໃນໄລຍະຜ່ານມາ ພ້ອມທັງໄດ້ເນັ້ນໃຫ້ແຕ່ລະພາກສ່ວນທີ່ກ່ຽວຂ້ອງເປັນຕົ້ນແມ່ນພະແນກສຶກສາທິການ ແລະ ກິລາແຂວງ, ຂະແໜງທີ່ກ່ຽວຂ້ອງ ຄະນະກໍາມະການສະມາຄົມກິລາ-ກາຍຍະກຳແຂວງ, ສະຫະພັນກິລາທີ່ເຂົ້າຮ່ວມແຂ່ງຂັນ ເອົາໃຈໃສ່ເຄື່ອນໄຫວຊຸກຍູ້ປະເພດກິລາດັ່ງກ່າວ ທີ່ຢູ່ໃນຄວາມຮັບຜິດຊອບຂອງຕົນ ໃຫ້ໄດ້ເຄື່ອນໄຫວ ພ້ອມທັງຄັດເລືອກເອົານັກກິລາທີ່ເກັ່ງຢ່າງແທ້ຈິງ ມາຝຶກຊ້ອມໃຫ້ເປັນລະບົບຕໍ່ເນື່ອງ ກ່ອນສົ່ງເຂົ້າຮ່ວມແຂ່ງຂັນ ແນໃສ່ສ້າງໄດ້ຜົນງານທີ່ພົ້ນເດັ່ນ ສ້າງກຽດ ແລະ ຊື່ສຽງໃຫ້ກັບແຂວງ ໃນເວທີລະດັບຊາດ.

       ໂດຍ: ພູຜ່ານ (ຂ. ເຊກອງ)                                                                             

ຫຼວງນໍ້າທາ ທົບທວນຄືນວຽກງານຜູ້ບໍລິຫານການສຶກສາ-ກິລາທົ່ວແຂວງ

ພະແນກສຶກສາທິການ ແລະ ກິລາແຂວງ (ສກຂ) ຫຼວງນໍ້າທາ ໄດ້ຈັດກອງປະຊຸມຜູ້ບໍລິການສຶກສາ ແລະ ກິລາທົ່ວແຂວງ ປະຈໍາສົກຮຽນ 2018-2019 ແລະ ວາງແຜນພັດທະນາການສຶກສາ ແລະ ກິລາ ໃນສົກຮຽນ 2019-2020 ​​ໃນທ້າຍອາທິດຜ່ານມາ ທີ່​ສະ​ໂມ​ສອນແຂວງ, ພາຍ​ໃຕ້​ການ​ເປັນ​ປະທານ​ຂອງ​ທ່ານ ບຸນ​ຈັນ ຫຼວງ​ລື​ໄຊ ຫົວໜ້າ​ພະ​ແນ​ກສຶກສາ​ທິການ ​ແລະ ກິລາ​ແຂວງ, ໂດຍໃຫ້ກຽດເຂົ້າຮ່ວມຂອງ​ທ່ານ ບຸນ​ຍີ່ ​ແກ້ວ​ຄູນ​ເມືອງ ຮອງ​ເຈົ້າ​ແຂວງຫຼວງ​ນ້ຳ​ທາ, ທ່ານ ປອ ມີທອງ ສຸວັນວິໄຊ ​ຫົວໜ້າກົມການສຶກສາກ່ອນໄວຮຽນ ​ກະຊວງ​ສຶກສາ​ທິການ ​ແລະ ກິລາ, ພ້ອມດ້ວຍຄະນະພັດທະນາການສຶກສາຂັ້ນແຂວງ, ສະພາປະຊາຊົນແຂວງ, ເຈົ້າ​ເມືອງ-ຮອງ​ເຈົ້າ​ເມືອງ, ຫົວໜ້າ-ຮອງ​ຫົວໜ້າ​ພະ​ແນ​ກການ​ອ້ອມ​ຂ້າງ​ແຂວງ, ຫົວໜ້າ​ຫ້ອງການ​ສຶກສາ​ທິການ ​ແລະ ກິລາ​ເມືອງ, ຜູ້ອຳນວຍ​ການ-ຮອງ​ອຳນວຍ​ການ​ ວິທະຍາ​ໄລ​ພາກ​ລັດ ​ແລະ ເອກະ​ຊົນ, ບັນດາໂຮງຮຽນ, ສູນອ້ອມຂ້າງ ແລະ ພາກສ່ວນທີ່ກ່ຽວຂ້ອງ.

      ໃນກອງປະຊຸມ, ໄດ້ຮັບຟັງການຜ່ານບັນດາເອກະສານທີ່ສໍາຄັນສໍາລັບການຈັດຕັ້ງປະຕິບັດວຽກງານການສຶກສາ-ກິລາ ສົກຮຽນ 2018-2019 ​ແລະ ​ແຜນ​ພັດທະນາ​ການ​ສຶກສາ ​ແລະ ກິລາ ສົກຮຽນ2019-2020, 15 ຄາດໝາຍ​ຫຼັກ​ຂອງ​ຂະ​ແໜງ​ການ​ສຶກສາ​ທິການ ​ແລະ ກິລາ​ແຂວງ ທີ່​ສະພາ​ຮັບຮອງ. ພ້ອມດຽວກັນນີ້, ຜູ້ແທນກອງປະຊຸມໄດ້ພ້ອມກັນປະກອບ​ຄຳຄິດ​ເຫັນ​ຢ່າງ​ເປີດ​ກວ້າງ ເຫັນ​ດີເປັນ​ເອກະ​ພາບ,​ ຕົກລົງ, ​ຮັບຮອງ​​ເອົາ​ເປັນ​ມະຕິກອງ​ປະຊຸມ ​ຄື: ຮັບຮອງ​ເອົາ​ຜົນ​ການ​ຈັດຕັ້ງປະຕິບັດ​ວຽກ​ງານ​ການ​ສຶກສາ ​ແລະ ກິລາ ສົກ​ຮຽນ 2018-2019 ​ແລະ ​ແຜນພັດທະນາ​ການ​ສຶກສາ ​ແລະ ກິລາ ສົກຮຽນ 2019-2020, 15 ຄາດໝາຍສູ້​ຊົນ ​ແລະ ​ແຜນ​ຈຸດ​ສຸມສຳລັບ​ສົກຮຽນ 2019-2020, ຊຶ່ງອັດຕາເຂົ້າຮຽນຂອງເດັກ 5 ປີຈາກ 80,5% ເປັນ 81,6% (ຄາດໝາຍ 79%), ອັດຕາເຂົ້າຮຽນເດັກອາຍຸ 5 ປີສູງກວ່າ 60%, ອັດຕາລອດເຫຼືອຮອດ ປ.5 ຈາກ 91,8% ເປັນ 90,5% (ຄາດໝາຍ 84%), ອັດຕາເຂົ້າຮຽນມັດທະຍົມສຶກສາຕອນປາຍເພີ່ມຈາກ 56,8% ເປັນ 58,7% (ຄາດໝາຍ 55%), ອັດຕາປະລະມັດທະຍົມສຶກສາຕອນຕົ້ນ ຈາກ 7,7% ເປັນ 8,3% (ຄາດໝາຍ 8,5%), ອັດຕາເຂົ້າຮຽນລວມໃໝ່ ປ.5 ສູງກວ່າ 95%, ອັດຕາເຂົ້າຮຽນລວມໃໝ່ ມ.4 ຂອງນັກຮຽນຍິງສູງກວ່າ 70%, ອັດຕາເຂົ້າຮຽນສຸດທິຊັ້ນປະຖົມ 6-10 ປີ ຈາກ 97,9% ເປັນ 97,2% (ຄາດໝາຍ 98,9%), ອັດຕາຄ້າງຫ້ອງ ປ.1 ຈາກ 10,9% ເພີ່ມເປັນ 9% (ຄາດໝາຍ 8%), ນັກຮຽນຈົບມັດທະຍົມສຶກສາຕອນຕົ້ນໄດ້ເຂົ້າຮຽນຕໍ່ອາຊີວະສຶກສາ ບັນລຸໄດ້ 3,4% (ຄາດໝາຍ 4%), ອັດຕາຄ້າງຫ້ອງປະຖົມ ຈາກ 5,2% ເພີ່ມເປັນ 5,3% (ຄາດໝາຍ 3%), ອັດຕາປະລະການຮຽນມັດທະຍົມສຶກສາຕອນປາຍຈາກ 6,6% ເພີ່ມເປັນ 7,2% (ຄາດໝາຍ 6,5%), ຈົບຊັ້ນມັດທະຍົມສຶກສາຕອນປາຍເຂົ້າຮຽນຕໍ່ໃນລະດັບຕ່າງໆ ບັນລຸໄດ້ 49,9% (ຄາດໝາຍ 80%), ສົ່ງເສີມໃຫ້ມວນຊົນທຸກເພດໄວຮ່ວມຫັດກາຍຍະບໍລິຫານ, ອອກກໍາລັງກາຍ ແລະ ຫຼິ້ນກິລາ-ກາຍຍະກໍາ ບັນລຸໄດ້ 12,8% (ຄາດໝາຍ 26%) ແລະ ​ມອບ​ໃຫ້ຫ້ອງການສຶກສາທິການ ແລະ ກິລາເມືອງ ຮັບຜິດຊອບ ​ແລະ ຈັດຕັ້ງຜັນ​ຂະຫຍາຍມະຕິກອງປະຊຸມ​ເປັນ​ແຜນ​ປະຕິບັດວຽກງານ​ລະອຽດ, ຊຸກຍູ້ສົ່ງເສີມພໍ່ແມ່, ຜູ້ປົກຄອງເດັກ, ຊຸມຊົນ ແລະ ຄະນະພັດທະນາການສຶກສາຂັ້ນບ້ານ, ເປັນເຈົ້າການໃນການປັບປຸງສະພາບແວດລ້ອມ, ການພັດທະນາການຮຽນຮູ້ຂອງເດັກ ໂດຍສະເພາະເຂດຫ່າງໄກສອກຫຼີກ.

      ໃນໂອກາດນີ້, ​ທ່ານ ບຸນ​ຍີ່ ​ແກ້ວ​ຄຸນ​ເມືອງ ແລະ ທ່ານ ປອ ມີທອງ ສຸວັນວິໄຊ ໄດ້ພ້ອມກັນປະກອບຄໍາຄິດເຫັນ ໂດຍ​ເນັ້ນໜັກ​ຫຼາຍ​ບັນຫາ ​ເພື່ອໃຫ້​ຜູ້​ບໍລິຫານ​ການ​ສຶກສາ​ ແລະ ກິລາທຸກຂັ້ນ ໄດ້​ເອົາ​ໃຈ​ໃສ່ສຶກສາອົບຮົມການເມືອງແນວຄິດ, ປະຕິບັດດ້ານນະໂຍບາຍໃຫ້ຖືກເປົ້າໝາຍ, ສ້າງ​ຄວາມ​ເປັນ​ແບບຢ່າງ​ທີ່​ດີ​, ໃຫ້​ຖື​ສຳຄັນ​ວຽກ​ງານ​ກວດກາ, ເອົາ​ໃຈ​ໃສ່​ປະຕິບັດແຜນ​ຍຸດ​ທະ​ສາດພັດທະນາ​ວຽກ​ງານ​ສຶກສາ-ກິລາຕາມ 3 ຂໍ້ແຂ່ງຂັນຂອງກະຊວງສຶກສາທິການ ແລະ ກິລາ, ຕ້ານປາກົດການຫຍໍ້ທໍ້ໃນຖັນແຖວພະນັກງານ, ຄູອາຈານ ແລະ ນັກຮຽນນັກສຶກສາໃຫ້ດີຂຶ້ນເປັນກ້າວໆ.

(ໂດຍ ນ ສົມຕຸ້ຍ)

ວຕລຢ ຕີລາຄາຄືນວຽກງານ ສົກ 2018-2019 ພ້ອມວາງແຜນການສົກຮຽນໃໝ່

ວິທະຍາ​ໄລ​ເຕັກນິກ ລາວ-​ເຢຍລະ​ມັນ (ວຕລຢ) ກົມ​ອາຊີວະ​ສຶກສາ ກະຊວງ​ສຶກສາ​ທິການ ​ແລະ ກິລາ ໄດ້ຈັດ​ພິທີ​ສະຫຼຸບການຈັດຕັ້ງປະຕິບັດການຮຽນການສອນ ສົກຮຽນ 2018-2019 ແລະ ວາງ​ທິດ​ທາງ​ແຜນການ​ແຜນ​ພັດທະນາ​ ​ສົກຮຽນ 2019-2020 ​ເມື່ອວັນ​ທີ 16 ສິງຫາ ຜ່ານ​ມາ ທີ່​ວິທະຍາ​ໄລ​ດັ່ງກ່າວ ​ເມືອງ​ສີ​ສັດຕະ​ນາກ ນະຄອນຫຼວງ​ວຽງ​ຈັນ, ​ໂດຍ​ໃຫ້​ກຽ​ດ​ເຂົ້າ​ຮ່ວມຂອງທ່ານ ໜູ​ພັນ ອຸດສາ ຫົວໜ້າ​ກົມ​ອາຊີ​ວະ​ສຶກສາ ກະຊວງສຶກສາທິການ ແລະ ກິລາ, ທ່ານ ຄຳ​ສະ​ໄຫວ ຍ່ອມ​ມີ​ລາ​ວົງ ຜູ້ອຳນວຍການ ວິທະຍາ​ໄລ​ ເຕັກນິກ ລາວ-​ເຢຍລະ​ມັນ ພ້ອມ​ດ້ວຍ​ຄະນະ ​ແລະ ບັນດາ 3 ອົງການ​ຈັດ​ຕັ້ງ​ມະຫາຊົນ​ຂອງ​ກະຊວງ ສສກ, ວິທະຍາ​ໄລ​ອ້ອມ​ຂ້າງ, ​ແຂກ​ຖືກ​ເຊີນ, ຄູ​ອາຈານ ​ແລະ ນັກ​ສຶກສາ ຕະຫຼອດ​ຮອດ​​ພໍ່​ແມ່​ ຜູ້​ປົກຄອງ​ນັກ​ສຶກສາຢ່າງ​ຫຼວງ​ຫຼາຍ.

      ​ໂອກ​າດນີ້, ທ່ານ ຄຳ​ສະ​ໄຫວ ຍ່ອມ​ມີ​ລາ​ວົງ ກ່າວ​ວ່າ:  ວຕລຢ ມີໜ້າ​ທີ່​​ໃນ​ການ​ພັດທະນາ​ການ​ຮຽນ​ການ​ສອນ​ດ້ານ​ວິຊາ​ຊີບ​ໃນ​ສາຂາ​ຕ່າງໆ​ໃຫ້​​ນັກ​ສຶກສາ ​ແລະ ກຸ່ມ​ເປົ້າ​ໝາຍ​ທີ່​ມາ​ຮຽນ​ທຸກໆ​ຄົນ​ໃຫ້​ມີ​ຄວາມ​ຮູ້​ຄວາມ​ສາມາດ ​ເພື່ອ​ນຳ​ໄປ​ປະກອບ​ອາຊີບ ພັດທະນາ​ຕົນ​ເອງ ​ແລະ ​ພັດທະນາ​ປະ​ເທດ​ຊາດ ຕອບ​ສະໜອງ​ຄວາມ​ຕ້ອງການ​ຂອງ​ຕະຫຼາດ​ແຮງ​ງານ ​​ປະກອບສ່ວນພັດທະນາ​ເສດຖະກິດ-​ສັງຄົມ​ຂອງ​ຊາດ​ໃຫ້​ເຕີບ​ໃຫຍ່​ຂະຫຍາຍຕົວ ​ໂດຍ​ອີງ​​ໃສ່​ແຜນ​ແມ່​ບົດ ​ແລະ ​ແຜນ​ຍຸດ​ທະ​ສາດ​ການ​ພັດທະນາ​ວຽກ​ງານ​ອາຊີວະ​ສຶກສາ ​ແລະ ຝຶກ​ອົບຮົມ​ວິຊາ​ຊີບ ທີ່ກະຊວງ ສສກ ວາງ​ອອກ ​ແລະ ຕະຫຼອດ​ໄລຍະ​ການ​ເຄື່ອນ​ໄຫວ​ທີ່​ຜ່ານ​ມາ ສາມາດ​ສ້າງ​ຜົນສຳ​ເລັດ​ໄດ້​ຫຼາຍ​ດ້ານ ​ໂດຍ​ສະ​ເພາະຜົນສຳ​ເລັດການຈັດ​ຕັ້ງ​ປະຕິບັດ​ແຜນການ​ຮຽນ​ການ​ສອນ​ຂອງ​ວິທະຍາ​ໄລ ​​ໃນສົກ​ຮຽນ 2018-2019 ​​ໃນ​ການເຜີຍ​ແຜ່​ມະຕິ​ຄຳ​ສັ່ງ, ຄຳ​ແນະນຳ, ກົດ​ລະບຽບ ​ແລະ ​ເຊື່ອມ​ຊຶມ​ເອກະສານ​ຕ່າງໆຂອງ​ພັກ-ລັດຖະບານ ​ເປັນ​ຕົ້ນ​ແມ່ນ​ວັນ​ສຳຄັນຕ່າງໆ​ຂອງ​ຊາດ ພ້ອມ​ທັງ​ໄດ້​ປຸກລະດົມດ້ານ​ການການ​ເມືອງ​ແນວ​ຄິດ​ ​ໃຫ້​ພະນັກງານ​ລັດຖະກອນ​ຢ່າງ​ມີໝາກຜົນຮອບດ້ານ. ນອກຈາກ​ນັ້ນ, ໃນ​ສົກຮຽນ​ 2018-2019​ ນັກ​ສຶກສາ​ທີ່​ຮຽນ​ຈົບ​ໃນ​ລະດັບ​ຕ່າງໆ ທີ່​ໄດ້​ຮັບ​​ປະກາສະ​ນິຍະ​ບັດ​ ມີ​ທັງ​ໝົດ 633 ຄົນ, ຍິງ 52 ຄົນ. ​ໃນນີ້, ​ລະດັບ​ຊັ້ນ​ສູງ​ຕໍ່​ເນື່ອງ 12+2+1 ມີ 136 ຄົນ, ຍິງ 7 ຄົນ, ຊັ້ນ​ສູງ ລະບົບ 12+3 ມີທັງ​ໝົດ 101 ຄົນ, ຍິງ 16 ຄົນ, ຊັ້ນ​ກາງ​ ລະບົບ 12+2 ມີ 299 ຄົນ, ຍິງ 11 ຄົນ, ຊັ້ນ​ກາງ ລະບົບ 9+3 ມີ 97 ຄົນ, ຍິງ 18 ຄົນ. ຜ່ານ​ການຈັດ​ຕັ້ງ​ການ​ຮຽນ​ການ​ສອນ​ໃນ​ສົກຮຽນ​ດັ່ງກ່າວ ມີ​ນັກຮຽນ​ດີ​ເດັ່ນ​ເຖິງ 55 ຄົນ. ​ໃນ​ນັ້ນ, ດີ​ເດັ່ນ​ຮອບ​ດ້ານ​ມີ 12 ຄົນ, ຍິງ 3 ຄົນ, ດີ​ເດັ່ນການ​ຮຽນ​ມີ 28 ຄົນ, ຍິງ 4 ຄົນ ​ແລະ ດີ​ເດັ່ນ​ດ້ານ​ການ​ເຄື່ອນ​ໄຫວ​ກິດຈະກຳ 15 ຄົນ, ຍິງ 3 ຄົນ. ຄຽງ​ຄູ່​ກັນ​ນັ້ນ, ຍັງໄດ້​ສຳ​ເລັດ​ການ​ກໍ່ສ້າງ​ປັບປຸງ ​ແລະ ຂະຫຍາຍ​ຄວາມ​ອາດ​ສາມາດ​ຂອງ​ວິທະຍ​າ​ໄລ, ການ​ກໍ່ສ້າງ​ບຳລຸງ​ຄູ, ການ​ພັດທະນາ​ບຸກຄະລາ​ກອນ ​ແລະ ຝຶກ​ອົບຮົມ​ວິຊາ​ຊີບ, ການ​ຮ່ວມ​ມື​ກັບ​ບັນດາ​ພາກສ່ວນ​ທັງ​ພາຍ​ໃນ ​ແລະ ຕ່າງປະ​ເທດ ​ແລະ ການ​ເຄື່ອນ​ໄຫວ​ນອກ​ຫຼັກສູດ​ອີກ​ດ້ວຍ.

        ທ່ານ ຄຳ​ສະ​ໄຫວ ຍ່ອມ​ມີ​ລາ​ວົງ ກ່າວ​ອີກ​ວ່າ:​ ​ສົກຮຽນ 2019-2020 ວິທະຍາ​ໄລ​ ຍັງ​ໄດ້ສືບ​ຕໍ່ວາງ​ທິດ​ທາງ​ແຜນການ​ແຜນ​ພັດທະນາ ​ໂດຍ​ອີງໃສ່​ແຜນ​ພັດທະນາ​ອາຊີວະ​ສຶກສາ ​ແລະ ຝຶກ​ອົບຮົມ​ວິຊາ​ຊີບ ​ຕາມ​ແນວທາງ​ນະ​ໂຍບາຍ​ຂອງ​ກະຊວງ​ ສສກ ວາງ​ອອກໃຫ້ປາກົດ​ຜົນ​ເປັນ​ຈິງ. ​ໃນ​ນັ້ນ, ຈະ​ສົ່ງ​ເສີມທາງ​ດ້ານ​ນະ​ໂຍບາຍ​ຕ່າງໆໃຫ້​ພະນັກງານ​ຄູ​ອາຈານ ​ແລະ ນັກ​ສຶກສາ​, ຈະ​ປັບປຸງ​ກໍ່ສ້າງ ​ແລະ ຂະຫຍາຍ​ຄວາມ​ອາດ​ສາມາດ​ຂອງ​ວິທະຍາ​ໄລ, ຈະ​ສົ່ງ​ເສີມ​ສັງຄົມ ​ແລະ ພາກສ່ວນ​ທຸລະ​ກິດ​ປະກອບສ່ວນ​ເຂົ້າ​ໃນ​ການ​ພັດທະນາ​ອາຊີ​ວະ​ສຶກສາ​ຢ່າງ​ເປັນ​ຂະ​ບວນການ, ປັບປຸງ​ຮູບ​ແບບ​ລວມ ​ແລະ ຫຼັກສູ​ດອາຊີວະ​ສຶກສາ, ຈັດ​ຝຶກ​ອົບຮົມ​ວິຊາ​ຊີບ, ກໍ່ສ້າງ ບຳລຸງ​ຄູ ​ແລະ ພັດທະນາ​ບຸກຄະລາ​ກອນ​ອາຊີວະ​ສຶກສາ ​ແລະ ອົບຮົມ​ວິຊາ​ຊີບ, ສົ່ງ​ເສີມ​ແຜນ​ປະກັນ​ຄຸນ​ນະພາ​ບຂອງ​ວຽກງານ​ອາຊີວະ​ສຶກສາ, ​ແຜນ​ພັດທະນາ​ລະບົບ​ຂໍ້​ມູນ​ຂ່າວສານ ​ໄອ​ຊີ​ທີ​ຂອງ​ວິ​ທະຍາ​ໄລ, ປັບປຸງ​ກົງ​ຈັກ​ການຄຸ້ມ​ຄອງ​ຂອງ​ວິທະຍາ​ໄລ ​ແລະ ການ​ຮ່ວມ​ມື​ທັງ​ພາຍ​ໃນ ​ແລະ ພາຍ​ນອກ ​ໂດຍ​ສະ​ເພາະ​ກັບ​ສາກົນ ພ້ອມ​ທັງ​ມີ​ການ​ປະ​ເມີນ​ກົນ​ໄກ​ການຈັດ​ຕັ້ງ​ປະຕິບັດ, ຕິດຕາມ ​ແລະ ການກວດກາ ​ເພື່ອ​ປະ​ເມີນ​ຜົນສຳ​ເລັດ​ກຽມ​ສືບ​ຕໍ່​ໃນ​ສົກຮຽນ​ຕໍ່​ໄປ. ​

      ​ນອກຈາກນີ້, ໃນ​ພິທີ​​ຍັງ​ໄດ້​​ມອບ​ໃບ​ຍ້ອງຍໍ​ຜົນງານການຮຽນ​ດີ​ຮຽນ​​ເກັ່ງຂອງນັກ​ສຶກສາ​ ແລະ ຍ້ອງຍໍຜົນງານ​ດີ​ເດັ່ນ​ຂັ້ນ​ສູນ​ກາງ​ຊາວ​ໜຸ່ມ ປະຊາຊົນ ປະຕິວັດ​ລາວ ​ໃຫ້​ແກ່​ບັນດາພະນັກງານ ​ແລະ ​ຄູ​ອາຈານ ຈຳນວນ 21 ສະຫາຍ, ຍິງ 5 ສະຫາຍ ທີ່​ມີ​ຄຸນງາມຄວາມດີ​ໃນ​ການ​ເຄື່ອນ​ໄຫວ​ນຳພາ​ຂະ​ບວນການ 4 ບຸກຂອງ​ຊາວ​ໜຸ່ມ​ອີກ​ດ້ວຍ.  ​

​ໂດຍ ສົງການ

ອັດຕະປື ຍົກລະດັບສິລະປະດົນຕີພື້ນເມືອງລາວ-ສາກົນ ໃຫ້ຄູຝຶກຂະແໜງການສຶກສາ-ກິລາທົ່ວແຂວງ ຄັ້ງທີ II

ຂະແໜງພະລະ-ສິລະປະສຶກສາ ພະແນກສຶກສາທິານ ແລະ ກິລແຂວງອັດຕະປື ຈັດຝຶກອົບຮົມວຽກງານສິລະປະດົນຕີພື້ນເມືອງ ແລະ ດົນຕີສາກົນ ຄັ້ງທີ II ປີ 2019 ໃຫ້ກັບຄູຝຶກສິລະປະ ຂະແໜງການສຶກສາ ແລະ ກິລາ 5 ຕົວເມືອງ ແລະ ໂຮງຮຽນມັດທະຍົມສຶກສາທີ່ຂຶ້ນກັບ ເພື່ອເພີ່ມຂີດຄວາມສາມາດ ແລະ ຄວາມເຂັ້ມແຂງທາງດ້ານວິຊາການ ໃຫ້ກັບຄູຝຶກ ຕາມ 3 ລັກສະນະ ແລະ 5 ຫຼັກມູນການສຶກສາ ແລະ ທັງເປັນການສືບທອດ, ຮັກສາ ແລະ ສົ່ງເສີມສິລະປະ ວັດທະນະທຳ ທີ່ສວຍງາມ-ລ້ຳຄ່າຂອງຊາດໃຫ້ຄົງຢູ່ກັບຄົນລາວ ແລະ ຊາດລາວຕະຫຼອດໄປ.

ພິທີເປີດຊຸດຝຶກອົບຮົມດັ່ງກ່າວ, ໄດ້ຈັດຂຶ້ນໃນວັນທີ 19 ສິງຫາ 2019 ທີ່ໂຮງຮຽນມັດທະຍົມສຶກສາສົມບູນນໍ້າປາ ເມືອງຊານໄຊ ແຂວງອັດຕະປື, ໂດຍພາຍໃຕ້ການເປັນປະທານຂອງ ທ່ານ ພົງສະຫວັນ ຄຳສົງກາ ຮອງຫົວໜ້າພະແນກສຶກສາທິການ ແລະ ກິລາແຂວງ, ມີທ່ານ ນາງ ຄຳໝັ້ນ ໄຊຍະວົງສາ ຮອງຫົວໜ້າຫ້ອງການສຶກສາທິການ ແລະ ກິລາ ເມືອງ ຊານໄຊ ແລະ ທ່ານ ທອງມອນ ແກ້ວແດນນ້ອຍ ຜູ້ອຳນວຍການໂຮງຮຽນມັດທະຍົມສຶກສາສົມບູນນ້ຳປາ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ໂອກາດນີ້, ທ່ານ ພົງສະຫວັນ ຄຳສົງການ ໄດ້ກ່າວໃຫ້ຮູ້ເຖິງຈຸດປະສົງ, ຄາດໝາຍຂອງການຈັດຝຶກອົບຮົມ ແລະ ຄວາມໝາຍຄວາມສຳຄັນຂອງວຽກງານສິລະປະດົນຕີຕໍ່ກັບຂະແໜງການສຶກສາ ແລະ ສຶກສາ ກໍຄືຕໍ່ປະເທດຊາດ ວ່າ: ການຈັດຝຶກອົບຮົມວຽກງານສິລະປະດົນຕີພື້ນເມືອງ ແລະ ດົນຕີສາກົນຄັ້ງນີ້ ແມ່ນເປັນຄັ້ງທີ II, ສ່ວນຄັ້ງທີ I ແມ່ນໄດ້ຈັດຂຶ້ນໃນລະຫວ່າງກາງເດືອນກໍລະກົດ 2018 ຜ່ານມາ ແລະ ການຈັດຝຶກອົບຮົມຄັ້ງນີ້ ແມ່ນເພື່ອເພີ່ມຂີດຄວາມສາມາດ, ສ້າງຄວາມເຂັ້ມແຂງທາງດ້ານວິຊາການ ໃຫ້ກັບຄູຝຶກສິລະປະ-ດົນຕີຂະແໜງການສຶກສາ-ກິລາໃນທົ່ວແຂວງ ໂດຍໄປຕາມ 3 ລັກສະນະ ແລະ 5 ຫຼັກມູນການສຶກສາ ແລະ ກິລາ ທີ່ຂັ້ນເທິງໄດ້ວາງອອກ ທັງເປັນການສືບທອດ, ຮັກສາ ແລະ ສົ່ງເສີມສິລະປະ-ວັດທະນະທຳ ທີ່ສວຍງາມ-ລ້ຳຄ່າຂອງຊາດໃຫ້ຄົງຢູ່ກັບຄົນລາວ ແລະ ຊາດລາວຕະຫຼອດໄປ ແລະ ຄຽງຄູ່ການຮຽນຮູ້ສິລະປະດົນຕີພື້ນເມືອງລາວ ໃນຄັ້ງນີ້ ກໍຍັງໄດ້ຮຽນຮູ້ສິລະປະດົນຕີສາກົນປະຍຸກໃຊ້ເຂົ້າກັບດົນຕີພື້ນເມືອງລາວ ຕາມຮູບແບບສຳນຽງ ແລະ ທຳນອງລາວ ທີ່ເປັນເອກະລັກຂອງຊາດ. ການເຝິກອົບຮົມຄັ້ງນີ້ ແມ່ນນຳໃຊ້ຄູຝຶກຈາກກະຊວງສຶກສທິການ ແລະ ກິລາ 2 ທ່ານ, ມີສຳມະນາກອນເຂົ້າຮ່ວມທັງໝົດ 13 ທ່ານ ຈາກຫ້ອງການສຶກສາທິການ ແລະ ກິລາ ເມືອງ 5 ເມືອງ 7 ທ່ານ, ໂຮງຮຽນ ມສ ຈັນທາ 1 ທ່ານ, ໂຮງຮຽນ ສາມັນກິນນອນຊົນເຜົ່າ 1 ທ່ານ, ໂຮງຮຽນ ມສ ເສດຖາ 1 ທ່ານ, ໂຮງຮຽນ ມສ ຈະເລີນສຸກ 1 ທ່ານ, ໂຮງຮຽນ ມສ ນໍ້າປາ 1 ທ່ານ ແລະ ສູນນິເທດການສຶກສາແຂວງ 1 ທ່ານ. ປະເພດດົນຕີພື້ນເມືອງທີ່ຝຶກອົບຮົມຄັ້ງນີ້ ແມ່ນແຄນ ແລະ ດົນຕີສາກົນ ແມ່ນເປຍໂນ (Piano), ຊຶ່ງສຳມະນາກອນທີ່ເຂົ້າຮ່ວມໃນຄັ້ງນີ້ ຈະໄດ້ຮຽນຮູ້ ເຖິງປະຫວັດຄວາມເປັນມາຂອງແຄນລາວທີ່ຖືກຂຶ້ນທະບຽນເປັນມໍລະດົກໂລກທາງດ້ານວັດທະນະທະ ແລະ ນາມມະທຳຂອງອົງການ ອຸຍແນັດໂກ ໃນວັນທີ 7 ທັນວາ 2017 ແລະ ຈະຮຽນຮູ້, ສໍາຜັດກັບຮູບຮ່າງ, ລັກສະນະ, ສ່ວນປະກອບ, ລູກຫຼິ້ນ ແລະ ຫຼັກການ ແລະ ວິທີຫຼິ້ນໂນດ ຫຼື ຄີສຽງຕ່າງໆ ຂອງເຄື່ອງດົນຕີທັງສອງປະເພດ ຕາມຈັງຫວະ ທຳນອງເພງ 6 ບົດເພງຄື: ເພງ ລາວກະແຊະ, ຈຳປາເມືອງລາວ, ດອກໄມ້, ກິນນາລີ, ດອກບົວທອງ ແລະ ສາຍລົມເຢັນ. ຊຶ່ງສຳມະນາກອນ ທີ່ໄດ້ຮັບການຝຶກຄັ້ງນີ້ ແມ່ນຈະໄດ້ນໍາເອົາຄວາມຮູ້ ຄວາມສາມາດ ໄປພັດທະນາຕໍ່ຫັດແອບໃຫ້ມີຄວາມຊຳນິຊຳນານ ເພື່ອນຳໃຊ້ເຂົ້າໃນການຮຽນການສອນ ແລະ ຝຶກອົບຮົມໃຫ້ຄູສອນສິລະປະດົນຕີຢູ່ທ້ອງຖິ່ນຕໍ່ໄປໃນອະນາຄົດ.

ຂ່າວໂດຍ: ພົມວິຫານ (ຂ.ອັດຕະປື)

ບຸກຄະລາກອນ 26 ຄົນ ສຳເລັດການຍົກລະດັບຄວາມສາມາດດ້ານຄູຝຶກ ແລະ ນັກກິລາຄົນພິການ

ສຳມະນາກອນ ຈຳນວນ 26 ຄົນ ສຳເລັດການຍົກລະດັບຄວາມສາມາດດ້ານຄູຝຶກ ແລະ ນັກກິລາຄົນພິການ ເປັນທີ່ຮຽບຮ້ອຍແລ້ວ ພ້ອມທີ່ຈະພັດທະນາວຽກງານກິລາ-ກາຍຍະກຳ ແລະ ຮັບໃຊ້ສັງຄົມ ໃນຕໍ່ໜ້າ ພາຍໃຕ້ໂຄງການພັດທະນາຄວາມສາມາດດ້ານຄູຝຶກ ແລະ ນັກກິລາຄົນພິການ ຈາກການຊ່ວຍເຫຼືອຂອງອົງການໄຈກາ ປະເທດຍີ່ປຸ່ນ.

ພິທີປິດການຝຶກອົບຮົມໃນຄັ້ງນີ້ ໄດ້ຈັດຂຶ້ນເມື່ອວັນທີ 18 ສິງຫາ ຜ່ານມາ ທີ່ຫ້ອງປະຊຸມສູນຟື້ນຟູໜ້າທີ່ການ ນະຄອນຫຼວງວຽງຈັນ, ໂດຍໃຫ້ກຽດເຂົ້າຮ່ວມ ແລະ ມອບໃບຢັ້ງຢືນຂອງ ທ່ານ ໄຊຊະນະ ສະຫວັດດີ ຮອງຫົວໜ້າກົມກິລາມວນຊົນ ກະຊວງສຶກສາທິການ ແລະ ກິລາ, ທ່ານ ນາງ ໂທມິໂກະ ມາເອະຈິມະ ປະທານອົງການຄົນພິການອາຊີ ເພື່ອການພັດທະນາ ແລະ ທ່ານ ນາໂອມິດສຸ ຮັດໂຕລີ ຜູ້ຊ່ຽວຊານກິລາຄົນພິການ ປະເທດຍີ່ປຸ່ນ, ມີບັນດາພະນັກງານ-ວິຊາການ, ຄະນະຮັບຜິດຊອບຈັດກອງປະຊຸມ, ຄູຝຶກ, ນັກກິລາ ແລະ ພາກສ່ວນທີ່ກ່ຽວຂ້ອງ.

      ໂອກາດນີ້, ທ່ານ ໄຊຊະນະ ສະຫວັດດີ ກ່າວວ່າ: ການຝຶກອົບຮົມຄັ້ງນີ້ ແມ່ນເພື່ອເປັນການຍົກລະດັບຄວາມສາມາດດ້ານຄູຝຶກ ແລະ ນັກກິລາຄົນພິການໃຫ້ກັບບຸກຄະລາກອນລາວ ຊຶ່ງຖືວ່າເປັນໂຄງການທີ່ດີ ແລະ ໄດ້ເຮັດໃຫ້ພວກເຮົາທຸກຄົນເຂົ້າໃຈໃນການພັດທະນາວຽກງານກິລາ-ກາຍຍະກຳຄົນພິການຫຼາຍຂຶ້ນ ແລະ ເຊື່ອວ່າ ໃນຕໍ່ໜ້າ ບັນດາຄູຝຶກ ແລະ ນັກກິລາ ທີ່ເຂົ້າຮ່ວມ ຈະນຳຄວາມຮູ້ ແລະ ສິ່ງຕ່າງໆທີ່ໄດ້ຮຽນມາ ໄປຈັດຕັ້ງຜັນຂະຫຍາຍໃນທ້ອງຖິ່ນຂອງຕົນຢ່າງເປັນຂະບວນການຟົດຟື້ນ.

      ສຳລັບກອງປະຊຸມຝຶກອົບຮົມໃນຄັ້ງນີ້ ແມ່ນຈັດຂຶ້ນເປັນເວລາ 4 ວັນ ລະຫວ່າງວັນທີ 15-18 ສິງຫາ 2019 ໂດຍສຳມະນາກອນເຂົ້າຮ່ວມທັງໝົດ 26 ທ່ານ, ເປັນຍິງ 7 ທ່ານ. ການຝຶກອົບຮົມນັ້ນ ບັນດາສຳມະນາກອນ ທີ່ເຂົ້າຮ່ວມ ແມ່ນໄດ້ຮຽນຮູ້ກ່ຽວກັບການຫຼິ້ນກິລາກັບຄົນພິການ ທັງພາກທິດສະດີ ແລະ ການປະຕິບັດຕົວຈິງ, ວິທີຊ່ວຍເຫຼືອຄົນພິການ, ຮຽນຮູ້ວິທີການຫຼິ້ນ, ທັກສະ ແລະ ກະຕິກາຕ່າງໆຂອງກິລາທັກຄິວບາເລ, ກິລາຈານບິນ, ກິລາຕີບານປຸ່ມເປົ້າຄົນພິການ.

ອຳໄພວັນ