ຂ່າວປະຈໍາວັນທີ 7 ສິງຫາ 2019
ຄະນະນຳ ສສກ ຮ່ວມຫາລືວຽກງານດ້ານການສຶກສາ ໃນ 4 ກອງປະຊຸມສຳຄັນ ທີ່ມາເລເຊຍ
ຄະນະນຳ ກະຊວງສຶກສາທິການ ແລະ ກິລາ (ສສກ) ນໍາໂດຍ ທ່ານ ຮສ.ປອ ຄຳຜາຍ ສີສະຫວັນ ຮອງລັດຖະມົນຕີ ກະຊວງສຶກສາທິການ ແລະ ກິລາ ໄດ້ເດີນທາງເຂົ້າຮ່ວມຫາລືວຽກງານການສຶກສາໃນ 4 ກອງປະຊຸມທີ່ສຳຄັນ ໃນລະຫວ່າງວັນທີ 22-26 ກໍລະກົດ ຜ່ານມາ ທີ່ນະຄອນຫຼວງກົວລາລຳເປີ ປະເທດມາເລເຊຍ, ໂດຍມີຜູ້ຕາງໜ້າຈາກປະເທດສະມາຊິກຊີແມວ 11 ປະເທດ, 3 ປະເທດສະມາຊິກສຳຮອງ, 3 ປະເທດສະມາຊິກສຳຮອງທຶນສົມທົບ, 5 ຄູ່ຮ່ວມພັດທະນາ, 25 ສູນຊີແມວພາກພື້ນ ແລະ ເຄືອຄ່າຍ ລວມທັງໝົດ 156 ຄົນເຂົ້າຮ່ວມ.
ການເດີນທາງເຂົ້າຮ່ວມກອງປະຊຸມໃນຄັ້ງນີ້, ຄະນະນຳ ກະຊວງສຶກສາທິການ ແລະ ກິລາ ສປປ ລາວ ໄດ້ເຂົ້າຮ່ວມຫາລືວຽກງານໃນ 4 ກອງປະຊຸມທີ່ສຳຄັນ ຄື: ກອງປະຊຸມພາຍໃນຂອງສະພາລັດຖະມົນຕີສຶກສາອາຊີຕາເວັນອອກສ່ຽງໃຕ້ ຄັ້ງທີ XXXXX, ກອງປະຊຸມເປີດກວ້າງ, ກອງປະຊຸມປຶກສາຫາລືກ່ຽວກັບແຜນຍຸດທະສາດການສຶກສາແຕ່ນີ້ຮອດປີ 2035 ແລະ ກອງປະຊຸມປຶກສາຫາລືກ່ຽວກັບໂຄງການນຳໃຊ້ລະບົບດີຈີຕ້ອນເຂົ້າໃນການສຶກສາໃຫ້ແກ່ເດັກນ້ອຍໃນອາຊີ-ປາຊີຟິກ ເພື່ອເປັນການປຶກສາຫາລື ແລະ ລາຍງານກ່ຽວກັບການຈັດຕັ້ງປະຕິບັດວຽກງານຂອງອົງການສະພາລັດຖະມົນຕີສຶກສາອາຊີຕາເວັນອອກສຽງໃຕ້ ກໍຄື ວຽກງານພັດທະນາການສຶກສາ ແລະ ການຈັດຕັ້ງປະຕິບັດວຽກງານຂອງບັນດາສູນຊີແມວຕ່າງໆໃນໄລຍະທີ່ຜ່ານມາ.
ນອກຈາກນັ້ນ, ບັນດາສູນຊີແມວທີ່ຖືກສ້າງຕັ້ງໃໝ່ 3 ສູນ ຄື: ສູນການສຶກສາເດັກນ້ອຍກ່ອນໄວຮຽນ ປະເທດອິນໂດເນເຊຍ, ສູນການສຶກສາເພື່ອພັດທະນາຊຸມຊົນ ສປປ ລາວ ແລະ ສູນ ພັດທະນາການສຶກສາວິຊາຊີບ ປະເທດກຳປູເຈຍ ໄດ້ລາຍງານການຈັດຕັ້ງປະຕິບັດວຽກງານສູນຂອງຕົນໃນໄລຍະທີ່ຜ່ານມາ, ລາຍງານຜົນຂອງກອງປະຊຸມເຈົ້າໜ້າທີ່ອາວຸໂສການສຶກສາຂັ້ນພື້ນຖານ ຄັ້ງທີ VII ທີ່ຈັດຂຶ້ນໃນເດືອນສິງຫາ 2018 ທີ່ນະຄອນຫຼວງວຽງຈັນ ສປປ ລາວ ເປັນເຈົ້າພາບ, ຄະນະລັດຖະມົນຕີສຶກສາ 11 ປະເທດສະມາຊິກຊີແມວ ໄດ້ເຫັນດີຕົກລົງຮ່ວມກັນໃນກອງປະຊຸມຄັ້ງນີ້ ວ່າ: ຈະໄດ້ລົງເລິກໃສ່ວຽກງານການສຶກສາຮຽນຮ່ວມ ເພື່ອນຳເອົາເຕັກໂນໂລຊີເຂົ້າໃນການສຶກສາ ແລະ ຊ່ວຍໃຫ້ການສຶກສາຮຽນຮ່ວມ ລວມທັງກາລະໂອກາດ ແລະ ອຸປະສັກຕ່າງໆໃນການນຳເອົາອຸດສາຫະກຳ 4.0 ເຂົ້າໃນການສຶກສາ, ຊຶ່ງມີ 3 ຫົວຂໍ້ຫຼັກທີ່ຕ້ອງໄດ້ເອົາໃຈໃສ່ໃນການພັດທະນາການສຶກສາໃນຕໍ່ໜ້າ ຄື: ການສຶກສາເພື່ອການພັດທະນາແບບຍືນຍົງ ລວມທັງການສຶກສາຮຽນຮ່ວມ, ຄວາມເທົ່າທຽມ ແລະ ການຮຽນຮູຕະຫຼອດຊີວິດຢູ່ໃນອາຊີຕາເວັນອອກສ່ຽງໃຕ້ ໃນ 3 ປະເທດ ຄື: ປະເທດມາເລເຊຍ, ສປປ ລາວ ແລະ ປະເທດຟີລິບປິນ.
ນອກຈາກນັ້ນ, ຄະນະນຳ ກະຊວງສຶກສາທິການ ແລະ ກິລາ ສປປ ລາວ ຍັງໄດ້ລາຍງານກ່ຽວກັບວຽກງານການສຶກສາຮຽນຮ່ວມຂອງ ສປປ ລາວ ລວມມີການສຶກສາເດັກດ້ອຍໂອກາດ, ເດັກຊົນເຜົ່າ, ເດັກພິການ, ຊຶ່ງ ສປປ ລາວ ຈະໄດ້ຈັດຕັ້ງປະຕິບັດໂຄງການໂຮງຮຽນຊາຍແດນ ໂດຍແມ່ນ ກອງເລຂາຊີແມວ ແລະ ສູນຊີແມວ ຊີອີດີ ເປັນຜູ້ນຳພາຈັດຕັ້ງປະຕິບັດຮ່ວມກັບປະເທດສະມາຊິກຊີແມວທີ່ມີຊາຍແດນຕິດກັບ ສປປ ລາວ. ສ່ວນການສຶກສາໃນອະນາຄົດ ແມ່ນຈະໄດ້ເນັ້ນໜັກການນຳໃຊ້ເຕັກໂນໂລຊີເຂົ້າໃນການຮຽນ ເພື່ອເຮັດໃຫ້ນັກຮຽນສະຫຼາດ ທັນສະໄໝ, ຮຽນຮູ້ການນຳໃຊ້ອຸປະກອນທັນສະໄໝ ເພື່ອໃຫ້ມີການສຶກສາທີ່ມີຄຸນນະພາບ ແລະ ເທົ່າທຽມກັບສາກົນເທື່ອລະກ້າວ.
ຜ່ານການປຶກສາຫາລືໃນກອງປະຊຸມດັ່ງກ່າວນັ້ນ, ຄະນະຜູ້ແທນແຕ່ລະປະເທດ ໄດ້ຕົກລົງຮັບຮອງຮ່ວມກັນສືບຕໍ່ແຜນວຽກສະພາລັດຖະມົນຕີສຶກສາອາຊີຕາເວັນອອກສ່ຽງໃຕ້ເຂົ້າເປັນແຜນງານໃນການນຳໄປຈັດຕັ້ງປະຕິບັດ ເປັນຕົ້ນແມ່ນສ້າງນະໂຍບາຍເພື່ອໃຫ້ເປັນຂົວເຊື່ອມຕໍ່ໃນການນຳເອົາລະບົບດີຈິຕອນເຂົ້າໃນລະບົບການສຶກສາ ໂດຍຜ່ານການສ້າງນະໂຍບາຍເພື່ອເປັນຂໍ້ລິເລີ່ມໃນການພັດທະນາການຄົ້ນຄວ້າແກ່ສູນຊີແມວຕ່າງໆ; ຊຸກຍູ້ໃຫ້ມີຍຸດທະສາດໃນການຮ່ວມມືກັບຄູ່ຮ່ວມພັດທະນາໃຫ້ຫຼາຍຂຶ້ນ ແລະ ສ້າງນະວັດຕະກຳລະບົບການສຶກສາຂອງຊີແມວ ເພື່ອສາມາດສົ່ງເສີມເປັນແນວທາງອັນໃໝ່ໃນການຮຽນການສອນໃນຕໍ່ໜ້າ ໂດຍນຳໃຊ້ທັກສະການນຳໃຊ້ເຕັກໂນໂລຊີເຂົ້າໃນການສຶກສາ; ຮັບຮອງຮ່ວມກັນສືບຕໍ່ແຜນວຽກສະພາລັດຖະມົນຕີສຶກສາອາຊີຕາເວັນອອກສ່ຽງໃຕ້ ເຂົ້າເປັນແຜນງານໃນການນຳໄປຈັດຕັ້ງປະຕິບັດ ເພື່ອສ້າງນະວັດຕະກຳໃນລະບົບການສຶກສາ, ສົ່ງເສີມການສຶກສາຮຽນຮ່ວມ ແລະ ສ້າງສະມັດຕະພາບການສິດສອນ ໂດຍນຳໃຊ້ລະບົບດີຈິຕອນ ເພື່ອໃຫ້ການພັດທະນາການສຶກສາປະສົບຜົນສຳເລັດ ແລະ ແທດເໝາະກັບຄົນຍຸກໃໝ່.
ບົວລະພາ
