ຜູ້ຮັບຜິດຊອບວຽກໂຄສະນາຂ່າວສານການສຶກສາ-ກິລາ ພະແນກ ແລະ ເມືອງ 3 ສ້າງ 7 ແຂວງ ໄດ້ຍົກລະດັບ

   ພະນັກງານ-ລັດຖະກອນ ຜູ້​ທີ່​ຮັບ​ຜິດ​ຊອ​ບ​ວຽກ​ງານ​ໂຄ​ສະ​ນາ​ຂ່າວ​ສານ​ການ​ສຶກ​ສາ ແລະ ກິ​ລາ ຈາກ​ພະ​ແນກ​ສຶກ​ສາ​ທິ​ການ ແລະ ກິ​ລາ​ ແລະ ເມືອງ 3 ສ້າງ ໃນ 7 ແຂວງພາກກາງ ແລະ ພາກໃຕ້ ໄດ້ຮັບການຍົກລະດັບສ້າງຄວາມເຂັ້ມແຂງວຽກງານວິ​ຊາ​ສະ​ເພາະ ເພື່ອເປັນກະບອກສຽງສໍາຄັນ ໃນການໂຄສະນາເຜີຍແຜ່ແນວທາງນະໂຍບາຍຂອງພັກ-ລັດ ຕະຫຼອດຮອດການເຄື່ອນໄຫວຕ່າງໆ ໃນຂົງເຂດສຶກສາ ແລະ ກິລາ ໃຫ້ອອກສູ່ສັງຄົມໄດ້ຮັບຮູ້ ແລະ ເຂົ້າໃຈຢ່າງກວ້າງຂວາງ. 

  ໃນວັນທີ 25 ກຸມພາ ຜ່ານມາ, ສູນໂຄສະນາຂ່າວສານ ການສຶກສາ ແລະ ກິລາ ສະຖາບັນຄົ້ນຄວ້າວິທະຍາສາດການສຶກສາ ກະຊວງສຶກສາທະການ ແລະ ກິລາ ໄດ້ຈັດ​ພິ​ທີ​ເປີດກອງປະຊຸມ ສ້າງຄວາມເຂັ້ມແຂງວຽກງານໂຄສະນາຂ່າວສານການສຶກສາ ແລະ ກິລາ ປະຈໍາປີ 2018 ໃຫ້ພະ​ແນກ​ສຶກ​ສາ​ທິ​ການ ແລະ ກິ​ລາ ແລະ ເມືອງ 3 ສ້າງ ໃນ 7 ແຂວງພາກກາງ ແລະ ພາກໃຕ້ ຢ່າງ​ເປັນ​ທາງ​ການ ທີ່ສູນໄອຊີທີ ນະຄອນປາກເຊ ແຂວງຈໍາປາສັກ, ໂດຍ​ພາຍ​ໃ​ຕ້​ການ​ເປັນ​ປະ​ທານຂອງທ່ານ ປອ. ອ່ອນແກ້ວ ນວນນະວົງ ຜູ້ອໍານວຍການສະຖາບັນຄົ້ນຄວ້າວິທະຍາສາດການສຶກສາ ກະຊວງສຶກສາທິການ ແລະ ກິລາ, ທ່ານ ນາງ ແສງສຸວັນ ຊຸຍພະສິດ ຫົວໜ້າພະແນກສຶກສາທິການ ແລະ ກິລາ ແຂວງຈໍາປາສັກ, ທ່ານ ສຸກສາຄອນ ສີປະເສີດ ຜູ້ອໍານວຍການສູນໂຄສະນາຂ່າວສານ ການສຶກສາ ແລະ ກິລາ ກະຊວງສຶກສາທິການ ແລະ ກິລາ, ​ມີພະນັກງານຜູ້ຮັບຜິດຊອບ ວຽກງານໂຄສະນາຂ່າວສານ ການສຶກສາ ແລະ ກິລາ ທີ່ມາຈາກ​ພະ​ແນກ​ສຶກ​ສາ​ທິ​ການ ແລະ ກິ​ລາ ແລະ ເມືອງ 3 ສ້າງ ໃນ 7 ແຂວງພາກກາງ ແລະ ພາກໃຕ້, ຕະຫຼອດ​ຮອດພະນັກງານຈາກສູນໂຄສະນາຂ່າວສານການ​ສຶກ​ສາ ແລະ ກິ​ລາ ຈໍານວນ 40 ກວ່າທ່ານ​ເຂົ້າ​ຮ່ວມ.

      ​ໃນ​ພິ​ທີ​ເປີດກອງ​ປະ​ຊຸມ, ທ່ານ ນາງ ແສງສຸວັນ ຊຸຍພະສິດ ໄດ້​ກ່າວ​ຕ້ອນ​ຮັບ​ຜູ້​ແທນ​ທີ່​ເຂົ້າ​ຮ່ວມ ພ້ອມ​ທັງ​ສະ​ເໜີໃຫ້​ຮູ້​ສະ​ພາບ​ລວມ​ຂອງ​ແຂວງ ເປັນຕົ້ນແມ່ນ ດ້ານເສດຖະກິດ-ສັງຄົມຂອງແຂວງ, ສະຖານທີ່ທ່ອງທ່ຽວທີ່ສໍາຄັນທາງດ້ານປະຫວັດສາດຂອງແຂວງ. ນອກຈາກນັ້ນ, ທ່ານຍັງໄດ້ສະເໜີໃຫ້ຮູ້ເຖິງວຽກງານການສຶກສາ ແລະ ກິລາ ທີ່​ພົ້ນ​ເດັ່ນຫຼາຍ​ຢ່າງ, ຊຶ່ງໄລຍະຜ່ານມາ ເຫັນໄດ້ວ່າການສຶກສາແມ່ນໄດ້ຮັບການພັດທະນາໃຫ້ດີຂຶ້ນເລື້ອຍໆ ແຕ່​ໄປຄຽງຄູ່ກັບຈຸດດີ​ນັ້ນ, ຍັງມີຂໍ້ຄົງຄ້າງທີ່ຕ້ອງໄດ້ຮັບການແກ້ໄຂບາງດ້ານ ເປັນຕົ້ນແມ່ນ​ການແກ້ໄຂ​ອັດ​ຕາ​ເພີ່ມ​ຂຶ້ນ​ຂອງການປະລະ​ການ​ຮຽນຂອງນັກຮຽນຊັ້ນປະຖົມສຶກສາ, ສືບຕໍ່ລົງຕິດຕາມການຮຽນການສອນຂອງແຕ່ລະໂຮງຮຽນໃຫ້ຫຼາຍຂຶ້ນ ແລະ ວຽກງານອື່ນໆ ໃຫ້ໄດ້ຮັບຜົນສໍາເລັດຕາມແຜນການທີ່ວາງໄວ.

      ຂະນະດຽວກັນນັ້ນ, ທ່ານ ປອ. ອ່ອນແກ້ວ ນວນນະວົງ ໄດ້ໂອ້ລົມຕໍ່ກອງປະຊຸມ ໂດຍທ່ານໄດ້ເນັ້ນໜັກໃຫ້ສໍາມະນາກອນທີ່ມາຈາກ​ພະ​ແນກ​ສຶກ​ສາ​ທິ​ການ ແລະ ກິ​ລາ ແລະ ເມືອງ 3 ສ້າງ ໃນ 7 ແຂວງພາກກາງ ແລະ ພາກໃຕ້ ໃຫ້ກໍາໄດ້ທິດສະດີ ແລະ ຫຼັກການໃນການຂຽນຂ່າວ, ຂຽນບົດ, ການນໍາໃຊ້ພາສາລາວ ເພາະວ່າວຽກງານໂຄສະນາຂ່າວສານການສຶກສາ ແລະ ກິລາ ເປັນວຽກງານໜຶ່ງທີ່ສໍາຄັນໃນການເຜີຍ​ແຜ່​​ຜົນ​ງານ ກໍ​ຄື ແນວ​ທາງ ແລະ ນະ​ໂຍ​ບາຍ​ຂອງ​ພັກ-ລັດ​ຖະ​ບານໃຫ້ອອກສູ່ສັງຄົມ ໄດ້ຮັບຮູ້ ແລະ ເຂົ້າໃຈຢ່າງທົ່ວເຖິງ, ພ້ອມທັງໃຫ້ສໍາມະນາກອນທຸກພາກສ່ວນພ້ອມກັນຕັ້ງໃຈຮໍ່າຮຽນ ແລະ ແລກປ່ຽນບົດຮຽນ ນໍາເອົາເນື້ອໃນຄວາມຮູ້ທີ່ໄດ້ຝຶກອົບຮົມມານັ້ນ ໄປຜັນຂະຫຍາຍ​ໃນ​ທ້ອງ​ຖິ່ນ ໃຫ້ໄດ້ຮັບຜົນສໍາເລັດຕາມແຜນການທີ່ວາງໄວ.

      ສໍາລັບກອງປະຊຸມດັ່ງກ່າວ, ແມ່ນຈະໄດ້ດໍາເນີນເປັນເວລາ 7 ວັນ (ວັນທີ 25 ກຸມພາ ຫາ 3 ມີນາ 2019), ຊຶ່ງໃນກອງປະຊຸມໄດ້ຮັບຟັງການນໍາສະເໜີແນວທາງການປ່ຽນແປງໃໝ່ຂອງພັກຕໍ່ສື່ມວນຊົນ, ກົດໝາຍສື່ມວນຊົນ, ຈັນຍາບັນ ແລະ ຄຸນສົມບັດຂອງນັກຂ່າວ, ພື້ນຖານການຂຽນບົດ-ຂ່າວ. ຫຼັງຈາກນັ້ນ, ໄດ້ຈັດກຸ່ມເຮັດບົດຝຶກຫັດການຂຽນຂ່າວ, ແຕ່ລະກຸ່ມນໍາສະເໜີ ແລະ ຖອດຖອນບົດຮຽນການເຮັດບົດຝຶກຫັດການຂຽນບົດ-ຂຽນຂ່າວ, ເຕັກນິກພື້ນຖານການຖ່າຍຮູບພາບຂ່າວ ແລະ ຮູບທົ່ວໄປ, ຈັດກຸ່ມລົງພາກປະຕິບັດຕົວຈິງການຖ່າຍຮູບຂ່າວ ແລະ ຮູບພາບທົ່ວໄປ, ແຕ່ລະກຸ່ມນໍາສະເໜີ ແລະ ຖອດຖອນບົດຮຽນການຖ່າຍຮູບພາບຂ່າວ ແລະ ຮູບພາບທົ່ວໄປ, ພື້ນຖານການຕົບແຕ່ງ​ພາບນິ້ງ ເພື່ອສົ່ງອອກຂ່າວ, ການສົ່ງຂໍ້ມູນຂ່າວສານຜ່ານລະບົບອິນເຕີເນັດ, ປະຕິບັດຕົວຈິງໃນການຝຶກຫັດການສົ່ງຂໍ້ມູນຂ່າວສານຜ່ານລະບົບອິນເຕີເນັດ.

ໂດຍ: ນາງ ຕຸ່ນຄໍາ

ປິດສາກລົງຢ່າງຈົບງາມ ດອກ​ປີກ​ໄກ່ ເບຍ​ລາວ ອິນ​ເຕີເນຊັນແນວ ​ຊີຣີ 2019 ທີ່ສປປ ລາວ ເປັນເຈົ້າພາບ

   ປິດສາກລົງຢ່າງຈົບງາມ ການເເຂ່ງຂັນກິລາດອກປີກໄກ່ ລະດັບສາກົນ ຫຼື ລາຍການ ເບຍລາວ ອິນເຕີເນເຊິນນອລ ຊີຣີ 2019 (BEERLAO INTERNATIONAL SERIES 2019) ເພື່ອ​ເປັນ​ການ​ສະ​ສົມຄະ​ແນນ ຈັດອັນດັບ​ໂລກ ທີ່​ສປປ ລາວ ຮັບ​ກຽດ​ເປັນ​ເຈົ້າພາບ ລະຫວ່າງວັນທີ 19-24 ກຸມພາ ຜ່ານມາ ທີ່ສະໂມສອນດອກປີກໄກ່ ເສດຖາ ມີນັກກິລາເຂົ້າຮ່ວມທັງໝົດ 197 ຄົນ ຈາກ 14 ປະເທດ ໃນທົ່ວໂລກເຂົ້າຮ່ວມ ໂດຍໄດ້ຮັບການສະໜັບສະໜູນຫຼັກ 108 ລ້ານກີບ ຈາກບໍລິສັດ ເບຍລາວ ຈຳກັດ.  ຂະນະທີ່ແຊ໋ມດ່ຽວຊາຍ-ຍິງ ຕົກເປັນຂອງ ໂກໄດ ນາຣາໂອກະ (KODAI NARAOKA)  ແລະ ນາງ ນະຊຶກິ ໂອໄອ (NATSUKI OIE)  2 ນັກຕົບຈາກປະເທດຍີ່ປຸ່ນ ສ່ວນຜົນງານຂອງທັບນັກກິລາລາວ ເຮັດໄດ້ພຽງຜ່ານເຂົ້າຮອບ 16 ທີມສຸດທ້າຍ.

​      ພິທີປິດການແຂ່ງຂັນລາຍການດັ່ງກ່າວ ມີຂຶ້ນເມື່ອວັນທີ 24 ກຸມພາ ຜ່ານມາ ທີ່ສະ​ໂມ​ສອນ ດອກ​ປີກ​ໄກ່ ​ເສ​ດຖາ ​ເມືອງ​ສີ​ສັດຕະ​ນາກ ນະຄອນຫຼວງ​ວຽງ​ຈັນ, ໂດຍໃຫ້ກຽດເຂົ້າຮ່ວມ ແລະ ມອບລາງວັນຂອງທ່ານ ແສງພອນ ພົນອາມາດ ຫົວໜ້າກົມກິລາລະດັບສູງ ກະຊວງສຶກສາທິການ ແລະ ກິລາ, ທ່ານ ກະເສມ ອິນທະລາ ຮອງປະທານຄະນະກຳມະການໂອແລມປິກແຫ່ງຊາດລາວ, ທ່ານ ສົມສະແຫວງ ແສງສີລາວົງ ຮັກສາການປະທານສະຫະພັນດອກປີກໄກ່ແຫ່ງຊາດລາວ ແລະ ທ່ານ ວຽງເພັດ ພັນທະວົງ ຜູ້ອຳນວຍການຝ່າຍປະຊາສຳພັນ ແລະ ບໍລິຫານ ບໍລິສັດ ເບຍລາວ ຈຳກັດ, ມີບັນດາຜູ້ຕາງໜ້າຈາກສະຫະພັນດອກປີກໄກ່ສາກົນ, ຕາງໜ້າສະຖານທູດ ແຕ່ລະປະເທດ, ຄະນະບໍລິຫານງານສະຫະພັນດອກປີກໄກ່ແຫ່ງຊາດ, ກຳມະການຕັດສິນ, ນັກກິລາ ແລະ ບັນດາກອງເຊຍເຂົ້າຮ່ວມຊົມ ແລະ ເຊຍຢ່າງຫຼວງຫຼາຍ.

      ສຳລັບການແຂ່ງຂັນລາຍການນີ້ ມີນັກ​ກິ​ລາເຂົ້າຮ່ວມທັງໝົດ 197 ຄົນ ຈາກ 14 ​ປະ​ເທດ ​ຄື: ສປປ ລາວ ​ເຈົ້າພາບ, ​ໄທ, ສສ ຫວຽດນາມ, ມາ​ເລ​ເຊຍ, ສິງກະ​ໂປ, ອົດ​ສະ​ຕຣາ​ລີ, ຍີ່ປຸ່ນ, ອິນ​ເດຍ, ສະຫະລັດອາ​ເມ​ຣິ​ກາ, ອັງກິດ, ​ການາ​ດາ, ສະ​ວີ​ເດັນ (ຊູ​ແອັດ), ​ເດັນ​ມາກ ​ແລະ ອິນ​ໂດ​ເນ​ເຊຍ ໂດຍ​ມີ​ການ​ຊີງ​ໄຊທັງ​ໝົດ 5 ລາຍການ ຄື: ປະ​ເພດ​​ດ່ຽວ​ຍິງ-​ຊາຍ, ຄູ່​ຍິງ-ຊາຍ ແລະ ຄູ່​ປະສົມ. ​ໃນ​ນັ້ນ, ສະຫະພັນ​ດອກ​ປີກ​ໄກ່​ແຫ່ງ​ຊາດ​ລາວ ​ໄດ້​ສົ່ງ​​ນັກ​ກິລາ​ເຂົ້າ​ຮ່ວມ​ຊີງ​ໄຊ ຈຳນວນ 23 ຄົນ, ຍິງ 3 ຄົນ, ໃນ​ນັ້ນ 5 ລາຍການດັ່ງກ່າວ ຄື: ປະ​ເພດ​​ດ່ຽວ​ຍິງ ມີ​ນັກ​ກິລາ​ເຂົ້າ​ຮ່ວມ 45 ຄົນ, ດ່ຽວ​ຊາຍ 60 ຄົນ, ຄູ່​ຍິງ 23 ທີ​ມ, ຄູ່ຊາຍ 40 ທີ​ມ ແລະ ທີ​ມຄູ່​ປະສົມ 32 ທີ​ມ ​ແຕ່​ລະລາຍ​ການ ມີ​ການ​ຈັບ​ສະຫຼາກ​ປະ​ກົບ​ຄູ່​ແຂ່ງຂັນ​ຄັດ​ເລືອກ​ເອົາ​ທີ​ມຊະນະ ຜ່ານ​ເຂົ້າ​ໄປ​ຫຼິ້ນ​ໃນ​ຮອບ​ຕໍ່​ໄປ ​ຊີງ​ເງິນ​ລາງວັນ​ລວມມູນ​ຄ່າ 87 ລ້ານ​ກີບ ຫຼື ປະ​ມານ 10 ພັນ​ໂດ​ລາ​ສະ​ຫະ​ລັດ ສຳລັບລາງວັນອັນດັບ 1-3 ຂອງແຕ່ລະລາຍການຈະໄດ້ຮັບດັ່ງນີ້: ​ອັນດັບ​ທີ 1 ໄດ້ຮັບຫຼຽນຄຳ ພ້ອມເງິນສົດ 7 ລ້ານກີບ, ​ອັນດັບ​ທີ 2 ໄດ້ຮັບຫຼຽນເງິນ ພ້ອມເງິນສົດ 3,5 ລ້ານກີບ ແລະ ​ອັນດັບ​ທີ 3 ຮ່ວມ ໄດ້ຮັບຫຼຽນທອງ ພ້ອມເງິນສົດ 1,8 ລ້ານກີບ. ສ່ວນຜູ້​ທີ່​ສາມາດ​ຜ່ານ​ເຂົ້າ​ຮອບ 8 ທີມ ຈະ​ໄດ້​ເງິນ​ລາງວັນ ລາຍ​ການ​ລະ 1 ລ້ານ​ກີບ.

       ຜ່ານການແຂ່ງຂັນຜົນປາກົດວ່າ: ປະເພດດ່ຽວຊາຍ ຊະນະເລີດໄດ້ເເກ່ KODAI NARAOKA ຈາກຍີ່ປຸ່ນ, ດ່ຽວຍິງ ຊະນະເລີດ ໄດ້ເເກ່ NATSUKI OIE ຈາກຍີ່ປຸ່່ນ, ຄູ່ຊາຍ ຊະນະເລີດ ໄດ້ເເກ່ CHOOI KHA MING & LOW JUAN SHEN ຈາກມາເລເຊຍ, ຄູ່ຍິງ ຊະນະເລີດ ໄດ້ເເກ່ YUJIA JIN & MING HUI LIN ຈາກສິງກະໂປ ເເລະ ຄູ່ປະສົມ ຊະນະເລີດ ໄດ້ເເກ່ WEERAPHAT PHAKJARUNG & CHAISENEE KOREPAP ຈາກປະເທດໄທ. ຂະນະທີ່ຜົນງານຂອງທັບນັກກິລາດອກປີກໄກ່ລາວ ສາມາດເຮັດໄດ້ພຽງຜ່ານເຂົ້າຮອບ 16 ທີມສຸດທ້າຍເທົ່ານັ້ນ.

 ຂ່າວໂດຍ: ສົງການ    

ສຕລ ຮ່ວມມືກັບ 17 ແຂວງ ແລະ 1 ນະຄອນຫຼວງ ສົ່ງເສີມການພັດທະນາບານເຕະລາວ ມີທ່າກ້າວທີ່ພົ້ນເດັ່ນ

   ສະຫະພັນບານເຕະແຫ່ງຊາດລາວ ຫຼື ສຕລ ຮ່ວມມືກັບບັນດາຄະນະບໍລິຫານງານ, ຜູ້ຊີ້ນຳວຽກງານກິລາ 17 ແຂວງ, 1 ນະຄອນຫຼວງວຽງຈັນ ແລະ ບັນດາສະຫະພັນກິລາບານເຕະແຕ່ລະພາກສ່ວນ ໃນຂອບເຂດທົ່ວປະເທດ ເພື່ອສົ່ງເສີມສ້າງຄວາມເຂັ້ມແຂງໃຫ້ບັນດາສະຫະພັນກິລາແຕ່ລະແຂວງ ແລະ ນະຄອນຫຼວງວຽງຈັນ ມີການເຄື່ອນໄຫວກິດຈະກຳເຕະບານຢ່າງເປັນປະຈຳ ແນໃສ່ການພັດທະນາວົງການບານເຕະລາວ ມີທ່າກ້າວທີ່ພົ້ນເດັ່ນກວ່າເກົ່າ ເວົ້າລວມ, ເວົ້າສະເພາະກໍເພື່ອສ້າງໄດ້ນັກກິລາຜູ້ທີ່ມີຄວາມສາມາດກ້າວຂຶ້ນມາເປັນນັກກິລາເຕະບານລະດັບມືອຊີບ ກໍຄື ຕິດທີມຊາດໃຫ້ເຕີບໃຫຍ່ຂະຫຍາຍຕົວຢ່າງກວ້າງຂວາງ.

        ເມື່ອວັນທີ 23 ກຸມພາ ຜ່ານມາ ທີ່ຫ້ອງປະຊຸມ ສະຫະພັນບານເຕະແຫ່ງຊາດລາວ ໄດ້ຈັດກອງປະຊຸມ ພັດທະນາກິລາບານເຕະລາວ ໃນທົ່ວປະເທດ ຄັ້ງທີ 1 ປະຈຳປີ 2019, ພາຍໃຕ້ການເປັນປະທານຂອງ ທ່ານ ບົວລານ ສິລິປັນຍາ ຮອງລັດຖະມົນຕີ ກະຊວງ ສຶກສາທິການ ແລະ ກິລາ, ຮອງປະທານຄະນະກຳມະການໂອແລມປິກແຫ່ງຊາດລາວ, ມີທ່ານ ແສງພອນ ພົນອາມາດ ຫົວໜ້າກົມກິລາລະດັບສູງ ກະຊວງສຶກສາທິການ ແລະ ກິລາ, ທ່ານ ກະເສມ ອິນທະລາ ຮອງປະທານຄະນະກຳມະການໂອແລມປິກແຫ່ງຊາດລາວ ແລະ ທ່ານ ວີເພັດ ສີຫາຈັກ ປະທານສະຫະພັນບານເຕະແຫ່ງຊາດລາວ ພ້ອມດ້ວຍຄະນະບໍລິຫານງານ, ບັນດາຮອງຫົວໜ້າພະແນກສຶກສາທິການ ແລະ ກິລາ 17 ແຂວງ, 1 ນະຄອນຫຼວງວຽງຈັນ ພ້ອມດ້ວຍຄະນະບໍລິຫານງານບັນດາພາກສ່ວນຕ່າງໆ ຕະຫຼອດຜູ້ຮັບຜິດຊອບແຕ່ລະໜ້າວຽກຂອງ ສຕລ ເຂົ້າຮ່ວມຢ່າງພ້ອມພຽງ.

      ໂອກາດນີ້, ທ່ານ ວີເພັດ ສີຫາຈັກ ກ່າວວ່າ: ກອງປະຊຸມໃນຄັ້ງນີ້ ແມ່ນເປັນການເຜີຍແຜ່ພາລະບົດບາດຂອງ ສຕລ ໃຫ້ແກ່ບັນດາພະແນກສຶກສາທິການ ແລະ ກິລາ, 1 ນະຄອນຫຼວງວຽງຈັນ ແລະ ສະຫະພັນບານເຕະແຂວງ ເສີມຂະຫຍາຍການປະສານງານ ແລະ ຮັດແໜ້ນສາຍສໍາພັນ ລະຫວ່າງສະຫະພັນບານເຕະແຂວງ ແລະ ສຕລ, ຊຸກຍູ້ໃຫ້ທຸກໆແຂວງ ແລະ ນະຄອນຫຼວງ ມີສະຫະພັນບານເຕະແຂວງ ເພື່ອສ້າງໃຫ້ມີການເຄື່ອນໄຫວກິດຈະກໍາບານເຕະຢ່າງເປັນປະຈໍາ, ໃນນັ້ນ, ສຕລ ຍັງໄດ້ຊຸກຍູ້ບັນດາສະຫະພັນບານເຕະແຂວງ ດ້ານອຸປະກອນ, ການຈັດການແຂ່ງຂັນ, ດ້ານຝຶກອົບຮົມ ແລະ ເຕັກນິກ, ຕະຫຼອດຮອດດ້ານງົບປະມານ ເພື່ອສົ່ງເສີມໃຫ້ມີການເຄື່ອນໄຫວກິລາບານເຕະພາຍໃນແຂວງຢ່າງເປັນປົກກະຕິ.

       ທ່ານ ບົວລານ ສິລິປັນຍາ ກ່າວວ່າ: ກອງປະຊຸມຄັ້ງນີ້ ມີຄວາມໝາຍຄວາມສຳຄັນຫຼາຍ ໃນການ ຮ່ວມມືກັນລະຫວ່າງ ສຕລ ແລະ ບັນດາແຂວງ ສາມາດສົ່ງເສີມການພັດທະນາວົງການກິລາບານເຕະລາວ ໃຫ້ມີ ທ່າກ້າວທີ່ພົ້ນເດັ່ນກວ່າເກົ່າ, ໃນນັ້ນຈະສາມາດສ້າງໄດ້ບຸຄະລາກອນ ກໍຄື ນັກກິລາຜູ້ທີ່ມີພອນສະຫວັນ ດີເດັ່ນກ້າວຂຶ້ນມາຕິດທີມຊາດ ຢ່າງເຕີບໃຫຍ່ຂະຫຍາຍຕົວກວ້າງຂວາງ ສອດຄ່ອງກັບການພັດທະນາພື້ນຖານໂຄງ ລ່າງ ເປັນຕົ້ນແມ່ນສະໜາມກິລາບານເຕະຂອງແຕ່ລະແຂວງ ທີ່ທາງລັດຖະບານສຸມໃສ່ ເພື່ອພັດທະນາເສດຖະກິດ-ສັງຄົມຂອງແຂວງ ໃຫ້ມີການພັດທະນາຢ່າງຮອບດ້ານ, ໃນນັ້ນ ກໍຍັງສາມາດຮອງຮັບຈັດແຂ່ງຂັນລີກໄດ້ຢ່າງ ມີຄຸນະພາບ ແລະ ປະສິດທິຜົນ ມີໝາກຜົນສຳເລັດຕາມການວາງແຜນໄວ້.

      ໃນການດຳເນີນກອງປະຊຸມດັ່ງກ່າວ ບັນດາຜູ້ແທນທີ່ເຂົ້າຮ່ວມຍັງໄດ້ຮັບຟັງການເຜີຍແຜ່ພາລະບົດບາດ ແຕ່ລະໜ້າທີ່ຂອງ ສຕລ ໂດຍແມ່ນຄະນະຮັບຜິດຊອບແຕ່ລະພະແນກເປັນຜູ້ອະທິບາຍໜ້າທີ່ວຽກງານຂອງຕົນ ຈາກນັ້ນ ຍັງໄດ້ຮັບຟັງການປືກສາຫາລື ແລະ ການສະເໜີແຜນການຕ່າງໆ ຂອງແຕ່ລະແຂວງ ແລະ ສຕລ ເພື່ອພ້ອມກັນຊອກ ຫາຈຸດບົກຜ່ອງມາແກ້ໄຂໃຫ້ມີໝາກຜົນສຳເລັດ ໃນການຈັດຕັ້ງປະຕິບັດຕາມແຜນຂອງກອງ ປະຊຸມທີ່ໄດ້ມະຕິຕົກ ລົງກັນ ຢ່າງມີປະສິດທິພາບ ແລະ ປະສິດທິຜົນ.

ໂດຍ ສົງການ

ຮພກ ຄອງເຈົ້າຫຼຽນຄຳ ແລ່ນ-ລານ ທົ່ວປະເທດ ຄັ້ງທີ ll ປະຈຳປີ 2019

   ນັກກິລາແລ່ນ-ລານໂຮງຮຽນພອນສະຫວັນກິລາ-ກາຍຍະກຳ (ຮພກ) ກົມກິລາລະດັບສູງ ກະຊວງສຶກສາທິການ ແລະ ກິລາ (ສສກ) ສາມາດກວາດມາໄດ້ເຖິງ 30 ຫຼຽນຄຳ, 23 ຫຼຽນເງິນ ແລະ 16 ຫຼຽນທອງ ລວມ 69 ຫຼຽນ ຄອງເຈົ້າຫຼຽນຄຳ ໃນການແຂ່ງຂັນກິລາແລ່ນ-ລານ ​ຮຸ່ນເຍົາວະ​ຊົນ ແລະ ຮຸ່ນທົ່ວໄປ ທົ່ວປະເທດ ຄັ້ງທີ ll ປະຈຳປີ 2019 ເພື່ອເປັນການຄັດເລືອກນັກກິລາ ຮຸ່ນສືບທອດພອນສະຫວັນດີເດັ່ນກ້າວສູ່ທີມຊາດ ​ງານ​ມະຫາກຳ​ກິລາຊີ​ເກ​ມ ຄັ້ງທີ 30 ທີ່ປະເທດຟີລິບປິນ ເປັນເຈົ້າພາບ ໃນທ້າຍປີນີ້ ​ແລະ ງານ​ມະຫາກຳ​ກິລາ​ແຫ່ງ​ຊາດ ຄັ້ງທີ 11 ທີ່ແຂວງຊຽງຂວາງ ​ໃນ​ທ້າຍປີ 2019.

   ເມື່ອວັນທີ 22 ກຸມພາ ຜ່ານມາ ທີ່ ຮພກ ບ້ານສີເກີດ ເມືອງນາຊາຍທອງ ນະຄອນຫຼວງວຽງຈັນ ໄດ້ມີພິທີປິດການແຂ່ງຂັນກິລາແລ່ນ-ລານ ຮຸ່ນເຍົາວະ​ຊົນ ແລະ ຮຸ່ນທົ່ວໄປ ທົ່ວປະເທດ ຄັ້ງທີ ll  ປະຈຳປີ 2019, ໂດຍໃຫ້ກຽດເຂົ້າຮ່ວມ ແລະ ມອບລາງວັນຂອງທ່ານ ບົວລານ ສິລິປັນຍາ ຮອງລັດຖະມົນຕີ ກະຊວງສຶກສາທິການ ແລະ ກິລາ, ຮອງປະທານຄະນະກຳມະການໂອແລມປິກແຫ່ງຊາດລາວ, ທ່ານ ສິງຄຳ ນາລິນ ຮອງຫົວໜ້າກົມກິລາລະດັບສູງ ກະຊວງສຶກສາທິການ ແລະ ກິລາ, ທ່ານ ສົມພອນ ສອນດາລາ ຮອງຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ, ທ່ານ ຈັນດີ ພົມມະບຸດ ປະທານສະຫະພັນແລ່ນ-ລານແຫ່ງຊາດ ແລະ ທ່ານ ນາງ ເກດສຸດາ ເລັ່ງສະຫວັດ ຜູ້ອຳນວຍການໂຮງຮຽນພອນສະຫວັນກິລາ-ກາຍຍະກຳ, ມີຄະນະບໍລິຫານງານສະຫະພັນແລ່ນ-ລານແຫ່ງຊາດລາວ, ບັນດາຄະນະນຳ, ຄູຝຶກ ແລະ ນັກກິລາແຕ່ລະພາກສ່ວນ.  

          ທ່ານ ນາງ ເກດສຸດາ ເລັ່ງສະຫວັດ ກ່າວວ່າ: ​ການແຂ່ງຂັນຄັ້ງນີ້ ແມ່ນເພື່ອ​ເປັນ​ການ​ປຸກລະດົມ​ຂະ​ບວນການ​ກິລາ​ແລ່ນ-ລານາ​ໃຫ້​ມີ​ຄວາມ​ຟົດ​ຟື້ນ, ນັກ​ກິລາ​ມີ​ໂອ​ກາດ​ໃນ​ການ​ແຂ່ງຂັນຫຼາຍ​ຂຶ້ນ ແລະ ເພື່ອເປັນ​ການທົດ​ສອບ ​ແລະ ​ເລືອກ​ເຟັ້ນ​ເອົາ​ນັກ​ກິລາ​ທີ່​ມີ​ຄວາມ​ສາມາດ​ເພື່ອ​ພັດທະນາ​ເປັນ​ນັກ​ກິລາຮຸ່ນສືບ​ທອດກ້າວສູ່ທີມຊາດ ເພື່ອເປັນການຄັດເລືອກນັກກິລາທີມຊາດ ກຽມຮ່ວມ​ງານ​ມະຫາກຳ​ກິລາຊີ​ເກ​ມ ຄັ້ງທີ 30 ທີ່ປະເທດຟີລິບປິນ ເປັນເຈົ້າພາບ ໃນທ້າຍປີນີ້ ​ແລະ ງານ​ມະຫາກຳ​ກິລາ​ແຫ່ງ​ຊາດ ຄັ້ງທີ 11 ທີ່ແຂວງຊຽງຂວາງ ​ໃນ​ທ້າຍປີ 2019​ ລາຍການ​ດັ່ງກ່າວ ມີ​ທັງ​ໝົດ 16 ພາກສ່ວນ ເຂົ້າຮ່ວມ ປະກອບມີ: ແຂວງວຽງ​ຈັນ, ແຂວງຊຽງ​ຂວາງ, ແຂວງ​ສະຫວັນ​ນະ ​ເຂດ, ແຂວງບໍລິ​ຄຳ​ໄຊ, ນະຄອນຫຼວງ​ວຽງ​ຈັນ, ກະຊວງ​ປ້ອງ​ກັນ​ປະ​ເທດ, ມະຫາວິທະຍາ​ໄລ​ແຫ່ງ​ຊາດ, ວິທະຍາ​ໄລ​ພະລະສຶກສາ, ເມືອ​ງປາກ​ງື່ມ ນະຄອນຫຼວງ​ວຽງ​ຈັນ, ໂຮງຮຽນ ມ.ປາຍ ວຽງຈັນ-ໂຮ່ຈິມິນ, ໂຮ​ງຮຽນ ນິຣະ​ດາ, ໂຮງຮຽນ ມ.ປາຍ ​ທົ່ງ​ປົ່ງ, ມສ ວຽງ​ຈັນ, ມສ ​ໂພນ​ທອງ, ມສ ນາ​ຂ່າ ແລະ ໂຮງຮຽນ​ພອນ​ສະຫວັນ​ກິລາ-ກາຍຍະກຳ ເຈົ້າພາບ ການແຂ່ງຂັນແບ່ງ​ເປັນ 2 ຮຸ່ນ ຄື​: ຮຸ່ນທົ່ວ​​ໄປ ​ແລະ ຮຸ່ນ​ເຍົາວະ​ຊົນ, ມີການຊີງໄຊທັງ​ໝົດ 50 ລາຍການ ມີ​ນັກ​ກິລາ​​ເຂົ້າ​ຮ່ວມ​ການ​ແຂ່ງຂັນ 200 ກວ່າຄົນ.

          ຜ່ານ​ການ​ແຂ່ງຂັນເປັນເວລາ 3 ວັນ​ ລະຫວ່າງວັນທີ 20-22 ກຸມພາ 2019 ໃນຮຸ່ນເຍົາວະຊົນ ອັນດັບທີ 1 ໂຮງຮຽນພອນສະຫວັນກິລາ-ກາຍຍະກຳ ກວາດມາໄດ້ 22 ຫຼຽນຄຳ, 17 ຫຼຽນເງິນ ແລະ 12 ຫຼຽນທອງ, ອັນດັບທີ 2 ນະຄອນຫຼວງວຽງຈັນ ຍາດໄດ້ 5 ຫຼຽນຄຳ, 7 ຫຼຽນເງິນ ແລະ 7 ຫຼຽນທອງ ແລະ ອັນດັບທີ 3 ແຂວງວຽງຈັນ ຍາດໄດ້ 2 ຫຼຽນເງິນ ແລະ 3 ຫຼຽນທອງ. ສ່ວນຮຸ່ນທົ່ວໄປ ອັນດັບທີ 1 ໂຮງຮຽນພອນສະຫວັນກິລາ-ກາຍຍະກຳ ຍາດໄດ້ 8 ຫຼຽນຄຳ, 6 ຫຼຽນເງິນ ແລະ 4 ຫຼຽນທອງ, ອັນດັບທີ 2 ນະຄອນຫຼວງວຽງຈັນ ຍາດໄດ້ 6 ຫຼຽນຄຳ, 4 ຫຼຽນເງິນ ແລະ 9 ຫຼຽນທອງ ແລະ ອັນດັບທີ 3 ມະຫາວິທະຍາໄລແຫ່ງຊາດ ຍາດໄດ້ 5 ຫຼຽນຄຳ, 6 ຫຼຽນເງິນ ແລະ 2 ຫຼຽນທອງ.

 ໂດຍ ສົງການ

ອົງການອາຫານໂລກ ຊ່ວຍອຸປະກອນອີເລັກໂຕຣນິກແກ່ 9 ເມືອງ ໃນ 3 ແຂວງ

   ອົງການ​ອາຫານ​ໂລກ ​ໄດ້​ມອບ​ອຸປະກອນ​ອີ​ເລັກ​ໂຕຣນິກຫຼາຍ​ລາຍການ​ໃຫ້​ແກ່ກະຊວງ​ສຶກສາ​ທິການ ​ແລະ ກິລາ ກໍ​ຄື ສູນ​ການສຶກສາ​ຮຽນ​ຮ່ວມ ​ໃນ​ 9 ເມືອງ​​ຂອງແຂວງ​ຫຼວງ​ພະ​ບາງ, ຫຼວງ​ນໍ້າ​ທາ ​ແລະ ​ແຂວງ​ອຸດົມ​ໄຊ ​ເພື່ອ​ເປັນ​ການ​ສະໜັບສະໜູນ​ການ​ລາຍ​ງານ ​ແລະ ການ​ສ້າງ​ຫຼັກ​ຖານ​ດ້ານ​ຂໍ້​ມູນ​ໃຫ້​ແກ່​ວຽກ​ງານ​ອາ​ຫານ​ທ່ຽງ​ໃນ​ໂຮງຮຽນ​ຂອງ​ລັດຖະບານ. ພິທີ​ມອບ​ອຸປະກອນ​ດັ່ງກ່າວ, ​ໄດ້​ຈັດ​ຂຶ້ນ​ເມື່ອ​ວັນ​ທີ 22 ກຸມພາ ຜ່ານ​ມາ ທີ່​ໂຮງ​​ແຮມ​ຄຣາວພ​ລາຊາ ນະຄອນຫຼວງ​ວຽງ​ຈັນ, ​ໂດຍ​ໃຫ້​ກຽດ​ມອບ​ຂອງ​ທ່ານ ຢານ ​ເດ​ວບຣາ​ເຣ ຜູ້ອຳນວຍການ​ອົງການ​ອາຫານ​ໂລກ ປະຈຳ ສປປ ລາວ ​ແລະ ຕາງໜ້າ​ຮັບ​​ຂອງ​ທ່ານ ຮສ.ປອ ຄຳ​ຜາຍ ສີສະ​ຫວັນ ຮອງ​ລັດຖະມົນຕີ ​ກະຊວງ​ສຶກສາ​ທິການ ​ແລະ ກິລາ, ມີ​ຫົວໜ້າ​ກົມ​ການ​ສຶກສາກ່ອນ​ໄວ​ຮຽນ, ຫົວໜ້າ​ພະ​ແນ​ກສຶກສາ​ທິການ ​ແລະ ກິລາ ​ນະຄອນຫຼວງ​ພະ​ບາງ, ອຸດົມ​ໄຊ ​ແລະ ​ຫຼວງ​ນໍ້າ​ທາ, ຫົວໜ້າ-​ຮອງ​ຫົວໜ້າ​ຫ້ອງການ​ສຶກສາ​ທິການ ​ແລະ ກິລາ 9 ​ເມືອງ​ເປົ້າ​ໝາຍ, ພະນັກງານ ວິຊາ​ການ ​ແລະ ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ.

        ສຳລັບ​ອຸປະກອນ​ທີ່ອົງການ​ອາຫານ​ໂລກ ​ໄດ້​ນຳ​ມາ​ມອບ​ໃນ​ຄັ້ງ​ນີ້ ປະກອບ​ມີ ຄອມ​ພິວ​ເຕີ​ຕັ້ງ​ໂຕະ ຈຳນວນ 28 ໜ່ວຍ, ຄອມ​ພິວ​ເຕີ​ແລັບ​ທອບ ຈຳນວນ 14 ໜ່ວຍ, ປິ່ນ​ເຕີ 14 ໜ່ວຍ ​ແລະ ​ໂປຣ​ເຈັກ​ເຕີ 13 ໜ່ວຍ, ຊຶ່ງ​ໄດ້​ມອບ​ໃຫ້​ແດ່ ກະຊວງ​ສຶກສາ​ທິການ ​ແລະ ກິລາ ​ເປັນ​ຜູ້​ນຳ​ໄປ​ມອບ​ຕໍ່​ໃຫ້​ແກ່ສູນ​ການ​ສຶກສາ​ຮຽນ​ຮ່ວມ ​ໃນ 9 ​ເມືອງຂອງ 3 ​ແຂວງ ຄື: ​ແຂວງ​ອຸດົມ​ໄຊ ມີ​ເມືອງ​ໄຊ, ​ເມືອງ​ແບ່ງ, ​ເມືອງ​ນາ​ໝໍ້; ​ແຂວງ​ຫຼວງ​ນໍ້າ​ທາ ມີ ​ເມືອງນໍ້າ​ທາ, ນາ​ແລ, ວຽງ​ພູ​ຄາ ​ແລະ ​ເມືອງ​ສິງ; ​ແຂວງ​ຫຼວງ​ພະ​ບາງ ມີ ​ເມືອງ​ງາ, ຊຶ່ງອຸປະກອນ​ດັ່ງກ່າວ​ນີ້ ​ແມ່ນ​ຈະ​ເປັນ​ສ່ວນ​ໜຶ່ງ​ໃຫ້​ແກ່​ການ​ອຳນວຍ​ຄວາມ​ສະດວກ​​ໃນ​ການ​ສ້າງ​ຫຼັກ​ຖານ​ດ້ານ​ຂໍ້​ມູນ​ໃຫ້​ແກ່​ການຈັດ​ຕັ້ງ​ປະຕິບັດວຽກ​ງານ​ອາຫານ​ທ່ຽງ​ໃນ​ໂຮງຮຽນ​ໃຫ້​ມີ​ຜົນສຳ​ເລັດ ​ແລະ ​ເປັນ​ໄປ​ຕາມ​ເປົ້າ​ໝາຍ​ທີ່​ກຳນົດ​ໄວ້.

ບົວລະພາ

ກອງປະຊຸມທາບທາມຮ່າງດຳລັດວ່າດ້ວຍຂອບວຸດທິການສຶກສາແຫ່ງຊາດຈັດຂຶ້ນລະຫວ່າງ ວັນທີ 04-05 ທັນວາ 2018 ທີ່ມະຫາວິທະຍາໄລຈຳປາສັກ

  ສູນປະກັນຄຸນນະພາບການສຶກສາ ກະຊວງສຶກສາທິການ ແລະ ກິລາ ໄດ້ຈັດກອງປະຊຸມທາບທາມດຳລັດວ່າດ້ວຍຂອບວຸດທິການສຶກສາແຫ່ງຊາດ ລະຫວ່າງວັນທີ 04-05 ທັນວາ 2018 ຜ່ານມາ ທີ່ຫ້ອງປະຊຸມ ມະຫາວິທະຍາໄລຈຳປາສັກ ໂດຍການເປັນປະທານຂອງ ທ່ານ ປັນຍາ ຈັນທະວົງ ວ່າການຜູ້ອຳນວຍການສູນປະກັນຄຸນນະພາບການສຶກສາ ແລະ ການເປັນປະທານຮ່ວມຂອງ ທ່ານ ປອ ບຸນມີ ພອນສະຫວັນ ອະທິການບໍດີມະຫາວິທະຍາໄລຈຳປາສັກ, ໃນກອງປະຊຸມມີຜູ້ແທນທີ່ມາຈາກພາຍໃນມະຫາວິທະຍາໄລຈຳປາສັກ ແລະ ນອກຈາກນີ້ຍັງມີພາກສ່ວນອື່ນທີ່ມາຈາກ 04 ແຂວງພາກໃຕ້ເຊັ່ນ: ວິທະຍາໄລການເງິນພາກໃຕ້, ວິທະຍາໄລຄູປາກເຊ, ວິທະຍາໄລຄູສາລະວັນ, ວິທະຍາໄລເຕັກນິກແຂວງຈຳປາສັກ, ໂຮງຮຽນເຕັກນິກວິຊາຊີບແບບປະສົມແຂວງສາລະວັນ, ໂຮງຮຽນເຕັກນິກວິຊາຊີບແບບປະສົມແຂວງເຊກອງ, ໂຮງຮຽນເຕັກນິກວິຊາຊີບແບບປະສົມແຂວງອັດຕະປື, ວິທະຍາໄລພາກເອກະຊົນຈາກ 4 ແຂວງ ແລະ ວິຊາການກົມການສຶກສາຊັ້ນສູງ ກະຊວງສຶກສາທິການ ແລະ ກິລາ.

       ໂອກາດດັ່ງກ່າວ, ທ່ານ ປອ ບຸນມີ ພອນສະຫວັນ ອະທິການບໍດີມະຫາວິທະຍາໄລຈຳປາສັກ ໄດ້ໃຫ້ທິດຕໍ່ກອງປະຊຸມກ່ຽວກັບການຢັ້ງຢືນວຸດທິ, ເຊື່ອມໂຍງ, ເຊື່ອມຕໍ່ ແລະ ການທຽບໂອນໜ່ວຍກິດພາຍໃນປະເທດໃຫ້ມີຄວາມເປັນໄດ້ກ່ອນ ເພື່ອໃຫ້ການຈັດຕັ້ງປະຕິບັດໄດ້ ແລະ ຕໍ່ໄປໃຫ້ສາມາດເຊື່ອມໂຍງໄດ້ກັບບັນດາປະເທດພາກພື້ນ ແລະ ສາກົນ. ທ່ານ ປັນຍາ ຈັນທະວົງ ວ່າການຜູ້ອໍານວຍການສູນປະກັນຄຸນນະພາບການສຶກສາ ໃຫ້ຮູ້ວ່າ: ກອງປະຊຸມທາບທາມດຳລັດວ່າດ້ວຍຂອບວຸດທິການສຶກສາແຫ່ງຊາດ ແມ່ນມີຄວາມໝາຍສຳຄັນ ແລະ ເປັນອົງປະກອບ ຫຼື ຂັ້ນຕອນໜຶ່ງໃນການປະຕິຮູບລະບົບການສຶກສາແຫ່ງຊາດ ພ້ອມທັງເປັນການຮັບຮູ້ ທຽບໂອນປະສົບການ ແລະ ເຊື່ອມໂຍງລະຫວ່າງຂອບວຸດທິການສຶກສາແຫ່ງຊາດ (National Qualification Framework: NQF) ແລະ ຂອບວຸດທິອາຊຽນ (ASEAN Qualification Reference Framework: AQRF) ແລະ ການຈັດຕັ້ງການປະກັນຄຸນນະພາບການສຶກສາ ແລະ ການເຊື່ອມໂຍງກັນລະຫວ່າງບັນດາປະເທດໃນພາກພື້ນ ແລະ ສາກົນ. ສໍາລັບປະເທດລາວເຮົາເປັນປະເທດທີ່ໄດ້ຈັດຕັ້ງປະຕິບັດ ແລະ ພັັດທະນາຂອບວຸດທິການສຶກສາແຫ່ງຊາດນັບແຕ່ປີ 2012 ເປັນຕົ້ນມາ ແລະ ສະຖາບັນການສຶກສາຕ້ອງໄດ້ກຽມຄວາມພ້ອມທາງດ້ານຄຸນນະພາບ ເພື່ອປັບປຸງບັນດາຫຼັກສູດ, ການຮຽນ-ການສອນ, ບຸກຄະລາກອນຂອງຕົນເອງ ໃຫ້ສອດຄ່ອງກັບຂອບວຸດທິການສຶກສາແຫ່ງຊາດ ເພື່ອເຊື່ອມໂຍງພາຍໃນປະເທດ ແລະ ບັນດາປະເທດໃນອາຊຽນ.

      ນອກຈາກນີ້, ວິຊາການ ສູນປະກັນຄຸນນະພາບການສຶກສາຍັງໄດ້ນຳສະເໜີ 3 ເອກະສານທີ່ສຳຄັນເຊັ່ນ: ດຳລັດວ່າດ້ວຍຂອບວຸດທິການສຶກສາແຫ່ງຊາດ (ສະບັບຮ່າງ), ຄໍາແນະນໍາລັດຖະມົນຕີວ່າດ້ວຍການຈັດຕັ້ງປະຕິບັດຂອບວຸດທິການສຶກສາແຫ່ງຊາດ (ສະບັບຮ່າງ) ແລະ ຂໍ້ຕົກລົງລັດຖະມົນຕີວ່າດ້ວຍການປະກັນຄຸນນະພາບການສຶກສາ ເພື່ອຜ່ານໃນກອງປະຊຸມ (ສະບັບຮ່າງ) ແລະ ໃຫ້ຜູ້ແທນປະກອບຄຳເຫັນໃສ່ 3 ເອກະສານເຮັດໃຫ້ເນື້ອໃນຄົບຖ້ວນສົມບູນ. ສຳລັບກອງປະຊຸມໃນຄັ້ງນີ້ ຖືເປັນກອງປະຊຸມທີ່ສຳຄັນ ສຳລັບການພັດທະນາຂອບວຸດທິການສຶກສາແຫ່ງຊາດ ແລະ ເຮັດໃຫ້ບັນດາສະຖາບັນການສຶກສາມີຄວາມຮັບຮູ້ເຂົ້າໃຈຕື່ມ ກ່ຽວກັບຄວາມໝາຍຄວາມສຳຄັນ, ການຈັດຕັ້ງປະຕິບັດ ແລະ ອົງການທີ່ຄຸ້ມຄອງຂອບວຸດທິການສຶກສາແຫ່ງຊາດ (National Qualification Framework: NQF) ແລະ ເຂົ້າໃຈກ່ຽວກັບກົນໄກໃນການເຊື່ອມໂຍງກັບບັນດາປະເທດໃນອາຊຽນ.

(ບົດຂ່າວໂດຍ: ຄິນນິທັກ ແສງບັນດິດ)

ສສກ ເຜີຍແຜ່ແນວຄວາມຄິດກອງທຶນສົ່ງເສີມການອົບຮົມວິຊາຊີບດ້ານການທ່ອງທ່ຽວ -ໂຮງແຮມ

     ກະຊວງ​ສຶກສາ​ທິການ ​ແລະ ກິລາ (ສສກ) ​ໄດ້​ຈັດ​ກອງ​ປະຊຸມ​ເຜີຍ​ແຜ່ແນວ​ຄວາມ​ຄິດກ່ຽວ​ກັບ​ກອງ​ທຶນ​ສົ່ງ​ເສີມ​ການ​ເຝິກອົບຮົມ​ວິຊາ​ຊີບດ້ານ​ການທ່ອງທ່ຽວ ​ແລະ ການ​ໂຮງ​ແຮມ ​ໂດຍ​ການ​ສະໜັບສະໜູນ​ຂອງ​ໂຄງການ​ທັກ​ສະສໍາລັບ​ວຽກ​ງານ​ທ່ອງ​ທ່ຽວ ​ໃນ​ວັນ​ທີ 7 ທັນວາ ຜ່ານ​ມາ ທີ່​ໂຮງ​ແຮມ ລາວພລາຊາ ນະຄອນຫຼວງວຽງ​ຈັນ, ​ໂດຍ​ໃຫ້​ກຽດ​​ເປັນ​ປະທານ​ຮ່ວມ​ຂອງທ່ານ ຮສ.ປອ ກອງ​ສີ ​ແສງ​ມະນີ ຮອງ​ລັດຖະມົນຕີ ກະຊວງ​ສຶກສາ​ທິການ ​ແລະ ກິລາ, ທ່ານ ​ແຊມ ​ໄຊ​ເນີ ອຸປະ​ທູດ ລຸກ​ຊໍາ​ບວກ ປະ​ຈໍາ ສປປ ລາວ, ທ່ານ ນາງ ບາ​ໆຣາ ​ແຢັກ​ກີ ຮາດ​ສ໌​ເລີ ຮອງ​ຫົວໜ້າ​ອົງການ ​ເພື່ອ​ການ​ພັດທະນາ ​ແລ​ະ ການ​ຮ່ວມ​ມື​ສາກົນ ​ແຫ່ງ​ປະ​ເທດ​ສະ​ວິດ​​ເຊີ​ແລນ (SDC), ມີ​ບັນດາ​ກົມ, ຫ້ອງການ, ສູນ, ສະ​ຖາ​ບັນ, ​ຄະນະ​ຮັບຜິດຊອບ​ວຽກ​ງານ​ດ້ານ​ການທ່ອງ​ທ່ຽວ ​ແລະ ການ​ໂຮງ​ແຮມ ​ແລະ ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ.

      ການ​ຈັດ​ກອງ​ປະຊຸມ​ຄັ້ງ​ນີ້, ກໍ່​ເພື່ອ​ໃຫ້ການ​ຊ່ວຍ​ເຫຼືອ​ກຸ່ມ​ຜູ້​ທີ່​ດ້ອຍ​ໂອກາດ​ສາມາດ​ເຂົ້າ​ເຖິງ, ມີ​ໂອກາດ​ເຂົ້າ​ຮ່ວມ​ການ​ເຝິກອົບຮົມ ​ແລະ ພັດທະນາ​ສີມື​ແຮງ​ງານ​ໃນ​ຂະ​ແໜງ​ການທ່ອງທ່ຽວ ​ແລະ ການ​ໂຮງ​ແຮມ, ສົ່ງ​ເສີມ​ໃຫ້​ຜູ້​ສະໜອງ​ການ​ເຝິກອົບຮົມ, ສະໜອງ​ຫຼັກສູດ​ເຝິກອົບຮົມ​ເຕັກນິກ​ວິຊາ​ຊີບ ແລະ ພັດທະນາ​ສີ​ມື​ແຮງ​ງານຕາມ​ຄວາມ​ຕ້ອງການ​ຂອງ​ຕະຫຼາດ​ແຮງ​ງານ ​ແລະ ​ໃຫ້ການ​ສະໜັບສະໜູນ​ຜູ້​ປະກອບ​ການ​ດ້ານ​ການທ່ອງທ່ຽວ ​ແລະ ​ໂຮງ​ແຮມໃຫ້​ຮັບ​ເອົາ​ນັກຮຽນ​ທີ່​ຈົບ​ໃໝ່​ເຂົ້າ​ເຮັດ​ວຽກ​ໃນ​ສະຖານ​ປະກອບ​ການ​ຂອງ​ພວກ​ເຂົາ​ເຈົ້າ.

      ​​ໂອກາດ​ດັ່ງກ່າວ, ທ່ານ ຮສ.ປອ ກອງ​ສີ ​ແສງ​ມະນີ ກ່າວ​ໃຫ້​ຮູ້​ວ່າ: ລັດຖະບານ ສປປ ລາວ ​ໄດ້​ມີ​ຄວາມ​ມຸ່ງ​ໝັ້ນ​ຕະຫຼອດ​ມາ ​ເພື່ອ​ຊ່ວຍ​ໃຫ້​ນັກຮຽນ​ທີ່​ຈົບຈາກ​ສາຍ​ອາຊີວະ​ສຶກສາ​ມີ​ຄວາມ​ຮູ້ຄວາມ​ສາມາດ, ທັກ​ສະ ​ແລະ ມີ​ທັດສະນະ​ຄຸນສົມບັດ​ທີ່​ເໝາະ​ສົມ​ກັບ​ຄວາມ​ຕ້ອງການ​ຂອງ​ຜູ້​ຈ້າງ​ງານ ​ໂດຍ​ສະ​ເພາະ​ຂະ​ແໜງ​ການ​ທ່ອງ​ທ່ຽວ ​ແລະ ການ​ໂຮງ​ແຮມ ກໍ່​ຄື​ຮັບປະກັນ​ການ​ປະກອບ​ສ່ວນ​ເຂົ້າ​ໃນ​ການ​ພັດທະນາ​ເສດຖະກິດ-ສັງຄົມຂອງ ສປປ ລາວ ​ແລະ ຍັງ​ໄດ້​ເນັ້ນ​ໜັກ​ໃສ່​ຄວາມ​ສໍາຄັນ​ໃນ​ການ​ກໍານົດ ​ແລະ ການ​ເລືອກ​ເຟັ້ນຮູບ​ແບບ ​ເພື່ອ​ສະໜອງ​ການ​ຮຽນ​ການ​ສອນ​ອາຊີວະ​ສຶກສາ ​ແລະ ພັດທະນາ​ສີມື​ແຮງ​ງານ. ພ້ອມ​ກັນນີ້, ​ສິ່ງ​ທີ່​ສໍາຄັນ​ແມ່ນ​ກອງ​ທຶນ​ສົ່ງ​ເສີມ​ການ​ເຝິກອົບຮົມ​ວິຊາ​ຊີບດ້ານ​ການທ່ອງທ່ຽວ ​ແລະ ການ​ໂຮງ​ແຮມ ຖື​ເປັນ​ກອງ​ທຶນ​ໜຶ່ງ ທີ່​ເປັນ​ພື້ນຖານ​​ສໍາຄັນ​ໃຫ້​ແກ່​ການ​ພັດທະນາ​ກອງ​ທຶນ​ເຝິກອົບຮົມ​ແຫ່ງ​ຊາດ ​ໃນ​ອະນາ​ຄົດ.

      ສໍາລັບ​ໂຄງການ​ທັກ​ສະສໍາລັບ​ວຽກ​ງານ​ທ່ອງ​ທ່ຽວ (LAO/029) ແມ່ນ​ໃຫ້ການ​ສະໜັບສະໜູນ ​ແລະ ປັບປຸງ​ການ​ຮຽນ​ການ​ສອນ​ອາຊີວະ​ສຶກສາ ​ແລະ ​ເຝິກອົບຮົມ​ວິຊາ​ຊີບ ​ໂດຍ​ສະ​ເພາະ ​ໃນ​ຂະ​ແໜງ​ການທ່ອງທ່ຽວ ​ແລະ ການ​ໂຮງ​ແຮມ ​ໃນ ສປປ ລາວ ​ແລະ ຈຸດ​ສຸມ​ຂອງ​ໂຄງການ​ດັ່ງກ່າວ ​ແມ່ນ​ເພື່ອ​ສະໜັບສະໜູນ​ກຸ່ມ​ຜູ້​ດ້ອຍ​ໂອກາດ​ໃຫ້​ໄດ້​ຮັບ​ການ​ເຝິກອົບຮົມທັກ​ສະ​ວິຊາ​ຊີບ​ທີ່​ຈໍາ​ເປັນ ​ເພື່ອ​ເຮັດ​ວຽກ​ໃນ​ຂະ​ແໜງ​ການ​ໂຮງ​ແຮມ, ຮ້ານ​ອາຫານ ກໍ່​ຄື ຂະ​ແໜງ​ເສດຖະກິດ​ການທ່ອງທ່ຽວ​ອື່ນໆ.

​ໂດຍ: ນາງ ຕຸ່ນ​ຄໍາ

ຮອງລັດຖະມົນຕີ ສສກ ເນັ້ນໃຫ້ມີການເຝິກຄູສອນນຳໃຊ້ຫຼັກສູດ, ປຶ້ມແບບຮຽນ ແລະ ຄູ່ມືຄູແບບໃໝ່ ຮັບປະກັນຄຸນນະພາບ

      ທ່ານຮອງລັດຖະມົນຕີ ກະຊວງສຶກສາທິການ ແລະ ກິລາ (ສສກ) ໄດ້ເນັ້ນໜັກໃຫ້ສະຖາບັນຄົ້ນຄວ້າວິທະຍາສາດການສຶກສາ (ສວສ) ເອົາໃຈໃສ່ໃຫ້ມີການເຝິກແອບຄູສອນໃນການນຳໃຊ້ຫຼັກສູດ, ປຶ້ມແບບຮຽນ ແລະ ປຶ້ມຄູ່ມືຄູ ສຳລັບຊັ້ນປະຖົມສຶກສາປີທີ 1 ທັງໝົດ 9 ຫົວ ຈາກ 6 ວິຊາແບບໃໝ່  ທີ່ຖືກກວດຜ່ານ ແລະ ຮັບຮອງເປັນທີ່ຮຽບຮ້ອຍ ໂດຍຈະຜະລິດໃນເດືອນມັງກອນ 2019 ເພື່ອກຽມນຳໃຊ້ໃນສົກຮຽນໜ້ານີ້ ແນໃສ່ຮັບປະກັນທາງດ້ານຄຸນນະພາບ.

      ເມື່ອວັນທີ 6 ທັນວາ ຜ່ານມາ ທີ່ເຮືອນພັກຄູນຊັບ (ທ່າລາດ) ເມືອງແກ້ວອຸດົມ ແຂວງວຽງຈັນ ໄດ້ມີພິທີປິດກອງປະຊຸມກວດຜ່ານ ແລະ ຮັບຮອງຫຼັກສູດ, ປຶ້ມແບບຮຽນ ແລະ ປຶ້ມຄູ່ມືຄູ ສຳລັບຊັ້ນປະຖົມສຶກສາ ປີທີ 1 ພາຍຫຼັງດຳເນີນມາແຕ່ວັນທີ 4 ທັນວາ 2018, ໂດຍການເປັນປະທານຂອງທ່ານ ຮສ.ປອ ຄຳຜາຍ ສີສະຫວັນ ຮອງລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ປອ. ອ່ອນແກ້ວ ນວນນະວົງ ຜູ້ອຳນວຍການ ສະຖາບັນຄົ້ນຄວ້າວິທະຍາສາດການສຶກສາ ກະຊວງສຶກສາທິການ ແລະ ກິລາ, ມີບັນດາຄະນະສະຖາບັນ, ຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າສູນ, ຜູ້ອຳນວຍການວິທະຍາໄລ, ຊ່ຽວຊຽນຈາກປະເທດອົດສະຕຣາລີ, ຫົວໜ້າ-ຮອງຫົວໜ້າພະແນກ, ຄະນະບໍດີຈາກມະຫາວິທະຍາໄລແຫ່ງຊາດ, ຫົວໜ້າ-ຮອງຫົວໜ້າຂະແໜງ, ພະນັກງານ ແລະ ວິຊາການຈາກຂະແໜງການສຶກສາທີ່ກ່ຽວຂ້ອງເຂົ້າຮ່ວມ.

      ໂອກາດດັ່ງກ່າວ, ທ່ານ ປອ. ອ່ອນແກ້ວ ນວນນະວົງ ໄດ້ກ່າວສະຫຼຸບລາຍງານກອງປະຊຸມຄັ້ງນີ້, ໂດຍມີຫຼັກສູດ, ປື້ມແບບຮຽນ ແລະ ປຶ້ມຄູ່ມືຄູ ທັງໝົດ 9 ຫົວ ຈາກ 6 ວິຊາ ປະກອບມີ ວິຊາພາສາລາວ, ວິຊາວິທະຍາສາດ ແລະ ສິ່ງແວດລ້ອມ, ຄຸນສົມບັດສຶກສາ, ພະລະສຶກສາ, ສິລະປະກຳ ແລະ ຫັດຖະກຳ ແລະ ສິລະປະດົນຕີ ສຳລັບຊັ້ນປະຖົມສຶກສາ ປີທີ 1 ທີ່ຈະນຳໃຊ້ໃນສົກຮຽນ 2019-2020. ໂດຍຜ່ານການກວດກາ, ຄົ້ນຄວ້າ ເຫັນວ່າ ຄະນະກຳມະການ, ຜູ້ເຂົ້າຮ່ວມ, ພະນັກງານ ແລະ ວິຊາການ ທັງໝົດ ແມ່ນໄດ້ເຫັນດີຮັບຮອງເອົາໝົດ ແຕ່ຕ້ອງໄດ້ມີການແກ້ໄຂ ແລະ ປັບປຸງກັນບາງຈຸດ ເປັນຕົ້ນ ຮູບພາບປະກອບ, ເນື້ອໃນການຂຽນ, ການແກ້ໄຂຂັ້ນຕອນການພິມຈຳໜ່າຍໃຫ້ປະຫຍັດງົບປະມານ ແລະ ການປັບຕຳແໜ່ງເນື້ອໃນ ແລະ ຮູບພາບໃຫ້ສອດຄ່ອງກັນຍິ່ງຂຶ້ນ ເພື່ອຈະນຳໄປຜະລິດແບບສົມບູນ ໃນເດືອນມັງກອນ 2019, ພ້ອມກັບກຽມແຜນຈັດເຝິກອົບຮົມການນຳໃຊ້ຫຼັກສູດ, ປຶ້ມແບບຮຽນ ແລະ ປຶ້ມຄູ່ມືຄູ ທັງໝົດ 9 ຫົວຂອງ 6 ວິຊາໃຫ້ແກ່ບັນດາຄູ-ອາຈານທົ່ວປະເທດ ເພື່ອຈະໄດ້ນຳໄປເຜີຍແຜ່ ແລະ ສອນນ້ອງໆນັກຮຽນ ໃນສົກຮຽນໜ້ານີ້.

       ຂະນະດຽວກັນ, ທ່ານ ຮສ.ປອ ຄຳຜາຍ ສີສະຫວັນ ກໍ່ໄດ້ກ່າວຊົມເຊີຍຕໍ່ການພັດທະນາ ແລະ ກວດຜ່ານຫຼັກສູດ, ປຶ້ມແບບຮຽນ ແລະ ປຶ້ມຄູ່ມືຄູສຳລັບຊັ້ນປະຖົມສຶກສາ ປີທີ 1 ຂອງຄະນະກຳມະການ, ຊ່ຽວຊານ ແລະ ທຸກພາກສ່ວນ ທີ່ຜ່ານໄປດ້ວຍດີ. ແຕ່ຢ່າງໃດກໍ່ຕາມ, ທ່ານຍັງໄດ້ເນັ້ນໜັກວ່າ ຫຼັກສູດການສອນເດັກນ້ອຍປະຖົມສຶກສາປີທີ 1 ນີ້ ຖ້າບາງຢ່າງດີແລ້ວ ຈຳເປັນ ຫຼື ບໍ່ທີ່ຈະປັບປຸງ ແຕ່ໂຕໃດທີ່ຕ້ອງການປັບປຸງກໍ່ຄວນປັບປຸງໃຫ້ດີຂຶ້ນ ເພື່ອໃຫ້ແທດເໝາະແກ່ເດັກນ້ອງທຸກໆຄົນ ແຕ່ທຸກສິ່ງທຸກຢ່າງ ພໍ່ແມ່ຜູ້ປົກຄອງນັກຮຽນກໍ່ຕ້ອງເຂົ້າໃຈ ແລະ ກໍ່ຕ້ອງມີສ່ວນຮ່ວມ ຊ່ວຍສິດສອນລູກຫຼານຕົວເອງໄປນຳ ບໍ່ແມ່ນຈະອາໃສແຕ່ຄູ-ອາຈານ ເວລາເລິກຮຽນກັບໄປເຮືອນ ພໍ່ແມ່ກໍ່ຕ້ອງເບິ່ງຄືນ ເພາະການສຶກສາຂອງພວກເຮົາ ແມ່ນເອົາແບບ 3 ຫຼ່ຽມ ເປັນຮູບ 3 ແຈ ທີ່ກ່ຽວພັນກັນ ປະກອບມີ ໂຮງຮຽນ, ຄອບຄົວ ແລະ ຊຸມຊົນສັງຄົມ ຕ້ອງເອກະພາບກັນ.

        ພ້ອມດຽວກັນນີ້, ທ່ານຮອງລັດຖະມົນຕີ ກະຊວງສຶກສາທິການ ແລະ ກິລາ ຍັງໄດ້ເຫັນດີຕໍ່ການລາຍງານຂອງຫຼາຍທ່ານໃນກອງປະຊຸມ ເພື່ອຮັບປະກັນໃນດ້ານເນື້ອໃນ ແລະ ຮູບການໃຫ້ສອດຄ່ອງກັນກັນ ໂດຍສະເພາະການໃຊ້ສັບພາສາສຳລັບເດັກນ້ອຍ ກໍ່ຕ້ອງແມ່ນພາສາງ່າຍໆ ບໍ່ຕ້ອງໃຊ້ຄຳສັບພາສາທີ່ແຂງກະດ້າງ, ລັດຖະການຫຼາຍຈົນເກີນໄປ ເພື່ອການຊັກຊວນເດັກນ້ອຍໃຫ້ເຂົ້າມາຮຽນ ພ້ອມກັບໃຫ້ນ້ອງໆນັກຮຽນຮູ້ຈັກເຄົາລົບໝູ່ຄູ່, ຜູ້ໃຫຍ່, ການບໍ່ໃຊ້ຄວາມຮຸກແຮງຕໍ່ກັນ, ການປູກຟັງວັດທະນາທຳ, ການບໍ່ຈຳແນກບົດບາດຍິງຊາຍໃນການຮຽນການສອນ, ການປ້ອງກັນສິດທິເດັກ ຈົນຮອດການຕ້ານສິ່ງອື່ນໆທີ່ບໍ່ດີ ພ້ອມທັງປູກຟັງໃຫ້ເດັກນ້ອງຮູ້ຈັກອາຊີບຕ່າງໆທີ່ຢູ່ໃນສັງຄົມລາວ, ເຊິ່ງຈະເປັນການປູກຟັງເຂົາເຈົ້າແຕ່ຊັ້ນອານຸບານເປັນຕົ້ນໄປ ສະນັ້ນ ຈຶ່ງຢາກໃຫ້ເບິ່ງຄືນ ຖ້າເປັນຕາເອົາເຂົ້າກໍ່ຢາກໃຫ້ເຮັດ. ສ່ວນໂຄງປະກອບທຸກຢ່າງທີ່ຢູ່ໃນບົດ ແມ່ນໄດ້ເປັນເອກະພາບກັນແລ້ວ ເຫຼືອພຽງແຕ່ໃຫ້ເບິ່ງຄືນອີກຢ່າງໜຶ່ງ ກ່ຽວກັບຄູອາຈານທີ່ຈະນຳເອົາຫຼັກສູດໃໝ່ນີ້ໄປສິດສອນ ພວກເຮົາຕ້ອງໄດ້ເອົາໃຈໃສ່ ແລະ ເຝິກແອບຄູອາຈານໃຫ້ດີຕັ້ງແຕ່ຕອນນີ້ ເພື່ອຮັບປະກັນຄຸນນະພາບການສຶກສາໃຫ້ໄດ້ຕາມຄາດໝາຍທີ່ວາງໄວ້.

ອຳ​ໄພ​ວັນ

ກົມກິລາມວນຊົນ ສສກ - ເອດີດີພີ ອົບຮົມກິລາລອຍນ້ຳຄົນພິການໃຫ້ຄູເຝິກ ແລະ ນັກກິລາ 4 ແຂວງ 1 ນວ

       ກົມກິລາມວນຊົນ ກະຊວງສຶກສາທິການ ແລະ ກິລາ ຮ່ວມກັບ ອົງການຄົນພິການອາຊີ ເພື່ອການພັດທະນາ (ເອດີດີພີ) ຈັດເຝິກອົບຮົມກິລາລອຍນ້ຳຄົນພິການໃຫ້ແກ່ຄູເຝິກ ແລະ ນັກກິລາຈາກ 4 ແຂວງ ແລະ 1 ນະຄອນຫຼວງວຽງຈັນ ເມື່ອວັນທີ 10 ທັນວາ ຜ່ານມາ ທີ່ຫ້ອງປະຊຸມ ຄະນະກຳມະການໂອແລມປິກແຫ່ງຊາດ, ໂດຍໃຫ້ກຽດເປັນປະທານຂອງທ່ານ ພັດທະນາ ແກ້ວບົວລະພາ ຫົວໜ້າພະແນກກິລາຄົນພິການ ກົມກິລາມວນຊົນ ກະຊວງສຶກສາທິການ ແລະ ກິລາ, ທ່ານ ທາຄາຮິສະ ອາໄລ ຕາງໜ້າອົງການຄົນພິການອາຊີ ເພື່ອການພັດທະນາ, ທ່ານ ໂອກິໂຊ ຊ່ຽວຊານກິລາລອຍນ້ຳຄົນພິການຈາກປະເທດຍີ່ປຸ່ນ, ມີຫົວໜ້າ-ຮອງຫົວໜ້າພະແນກບໍລິຫານ, ພະນັກງານ​ວິຊາການ ກົມກິລາມວນຊົນ, ອົງການຄົນພິການອາຊີ ເພື່ອການພັດທະນາ, ຄູເຝິກ ແລະ ນັກກິລາລອຍນ້ຳຄົນພິການເຂົ້າຮ່ວມທັງໝົດ 28 ທ່ານ.

       ໂອກາດດັ່ງກ່າວ, ທ່ານ ທາຄາຮິສະ ອາໄລ ໄດ້ກ່າວຊົມເຊີຍກົມກິລາມວນຊົນ ກະຊວງສຶກສາທິການ ແລະ ກິລາ ທີ່ໄດ້ກະກຽມທຸກຢ່າງໃຫ້ພ້ອມຈົນຮອດມື້ນີ້ ແລະ ອົງການຄົນພິການອາຊີ ເພື່ອການພັດທະນາ ມີຄວາມດີໃຈທີ່ໄດ້ມີສ່ວນຮ່ວມໃນການພັດທະນາວຽກງານຄົນພິການ ແລະ ກິລາຄົນພິການ ໃນ ສປປ ລາວ. ດັ່ງທີ່ຮູ້ ກິລາຄົນພິການສ່ວນໃຫຍ່ແມ່ນຈະເຝິກຊ້ອມກັນພຽງແຕ່ພາຍໃນນະຄອນຫຼວງວຽງຈັນ ຈຶ່ງຈຳເປັນຕ້ອງໄດ້ສ້າງບຸກຄະລາກອນໃຫ້ທົ່ວເຖິງ ໂດຍໃຫ້ບັນດາສຳມະນາກອນທີ່ໄດ້ຮັບການອົບຮົມໃນຄັ້ງນີ້ ໄປສ້າງນັກກິລາ  ເພື່ອມາໄວ້ເຄື່ອນໄຫວ ແລະ ສ້າງຜົນງານໃຫ້ກັບຕົວເອງທັງພາຍໃນ ແລະ ຕ່າງປະເທດໃນອະນາຄົດ ແລະ ຫວັງຢ່າງຍິງວ່າ ການອົບຮົບຄັ້ງນີ້ ຈະສາມາດພັດທະນາບຸກຄາລາກອນໄດ້ຢ່າງມີປະສິດທິຜົນ ແລະ ສາມາດນຳຄວາມຮູ້ດັ່ງກ່າວໄປພັດທະນາຂົງເຂດຕໍ່ໄປ.

      ຂະນະດຽວກັນ, ທ່ານ ພັດທະນາ ແກ້ວບົວລະພາ ກໍ່ໄດ້ກ່າວໃຫ້ຮູ້ກ່ຽວກັບການພັດທະນາຕົນເອງມາເປັນນັກກິລາລະດັບທີມຊາດ ແລະ ສາມາດສ້າງຜົນງານຢ່າງໂດດເດັ່ນໃຫ້ກັບປະເທດລາວໄດ້, ເຊິ່ງຈຸດປະສົງຫຼັກຂອງການຈັດເຝິກອົບຮົມຄັ້ງນີ້ ກໍ່ເພື່ອສ້າງຄູເຝິກ ແລະ ນັກກິລາໃຫ້ມີຄວາມຮູ້ຄວາມສາມາດ ນຳໄປພັດທະນາຕົວເອງ ແລະ ພັດທະນານັກກິລາລອຍນ້ຳໃນອະນາຄົດ. ແຕ່ຢ່າງໃດກໍ່ຕາມ, ກໍ່ເຊື່ອວ່າໃນອະນາຄົດຈະໄດ້ເຫັນສຳມະນາກອນທັງໝົດນີ້ ກ້າວມາເປັນຄູເຝິກ ແລະ ນັກກິລາທີມຊາດລາວ ເພື່ອຍາດຫຼຽນຄຳປະຫວັດສາດໃຫ້ແກ່ປະເທດລາວໄດ້ ຄືກັບກິລາຍົກນ້ຳໜັກລາວທີ່ໄດ້ຫຼຽນຄຳ ໃນງານ ເອຊຽນ ພາຣາ ເກມ ທີ່ປະເທດອິນໂດເນເຊຍ ເມື່ອບໍ່ດົນຜ່ານມານີ້.

      ສຳລັບການເຝິກອົບຮົມຄັ້ງນີ້ ແມ່ນຈະດຳເນີນໄປເປັນເວລາ 5 ວັນ ຕັ້ງແຕ່ວັນທີ 10-14 ທັນວາ 2018, ເຊິ່ງມີຄູເຝິກ ແລະ ນັກກິລາເຂົ້າຮ່ວມທັງໝົດ 20 ທ່ານຈາກ 4 ແຂວງ ປະກອບມີ ຊຽງຂວາງ, ຈຳປາສັກ, ອຸດົມໄຊ, ສະຫວັນນະເຂດ ແລະ ນະຄອນຫຼວງວຽງຈັນ ເຂົ້າຮ່ວມ. ການອົບຮົມດັ່ງກ່າວ ແມ່ນຈະໄດ້ຮຽນຮູ້ການລອຍນ້ຳຂັ້ນພື້ນຖານ, ເຕັກນິກ ແລະ ທັກສະຕ່າງໆ ທັງພາກທິດສະດີ ແລະ ການປະຕິບັດຕົວຈິງ ໂດຍຈະມີນັກກິລາລອຍນ້ຳຄົນພິການທີມຊາດລາວມາສາທິດໃຫ້ເປັນຕົວຢ່າງນຳອີກ.

ອຳໄພວັນ

ຕາມຄາດ ກອງທັບ ຄອງແຊ໋ມບານສົ່ງທີມຍິງ-ຊາຍ ທົ່ວປະເທດ ຊີງຂັນປະທານ ສບລ

      ເປັນໄປຕາມຄາດ ທີມໜຸ່ມ-ສາວທັບນັກຕົບບານ ກະຊວງປ້ອງກັນປະເທດ ຫຼື ກອງທັບ ດີກຣີແຊ໋ມ 3 ສະໄໝບານສົ່ງຍິງ-ຊາຍ ຊີງຂັນທ່ານລັດຖະມົນຕີ ກະຊວງສຶກສາທິການ ແລະ ກິລາ (ສສກ) ສາມາດຮັກສາຄວາມເປັນເບີ 1 ຂອງວົງການກິລາບານສົ່ງລາວ ຫຼັງພ້ອມໃຈກັນສ້າງຜົນງານຄອງແຊ໋ມ ບານສົ່ງທົ່ວປະເທດ ຊີງຂັນປະທານສະຫະພັນບານສົ່ງແຫ່ງຊາດລາວ (ສບລ) ຄັ້ງທີ 1 ປະຈຳປີ 2018 ລະຫວ່າງວັນທີ 3-9 ທັນວາ 2018.

     ເມື່ອວັນທີ 9 ທັນວາ ຜ່ານມາ ທີ່ສະໜາມກິລາບານສົ່ງແຫ່ງຊາດລາວ (ຫຼັກ16) ເມືອງໄຊທານີ ນະຄອນຫຼວງວຽງຈັນ ໄດ້ມີພິທີປິດການແຂ່ງຂັນ ແລະ ມອບເງິນອຸປະຖຳຂອງບໍລິສັດ ເບຍລາວ ຈຳກັດ ລວມມູນຄ່າ 135 ລ້ານກີບ ເພື່ອສະໜັບສະໜູນຫຼັກການແຂ່ງຂັນກິລາບານສົ່ງໃນຮົ່ມ ປະເພດທີມຍິງ-ຊາຍ ທົ່ວປະເທດ ຊີງຂັນທ່ານປະທານ ສບລ ຄັ້ງທີ 1 ປະຈຳປີ 2018, ໂດຍເປັນການກ່າວມອບຂອງທ່ານ ວຽງເພັດ ພັນທະວົງ ຫົວໜ້າຝ່າຍບໍລິຫານ ແລະ ກິດຈະກຳເພື່ອສັງຄົມ ບໍລິສັດ ເບຍລາວ ຈຳກັດ ແລະ ຕາງໜ້າກ່າວຮັບຂອງທ່ານ ສົມພູ ພົງສາ ຜູ້ຊ່ວຍລັດຖະມົນຕີ ກະຊວງ ສສກ, ທັງເປັນຮອງປະທານ ແລະ ເລຂາທິການ ຄະນະກຳມະການໂອແລມປິກແຫ່ງຊາດລາວ, ມີທ່ານ ຈັນສະໝອນ ຜ່ອງຈັນທາ ປະທານສະຫະພັນບານສົ່ງແຫ່ງຊາດລາວ ພ້ອມດ້ວຍຄະນະບໍລິຫານງານ ສບລ, ຄະນະນຳ ພາກສ່ວນທີ່ກ່ຽວຂ້ອງ, ຄູເຝິກ ແລະ ນັກກິລາ ຕະຫຼອດຮອດກອງເຊຍເຂົ້າຮ່ວມເປັນສັກຂີພິຍານ.

      ໂອກາດດັ່ງກ່າວ, ທ່ານ ຈັນສະໝອນ ຜ່ອງຈັນທາ ໄດ້ກ່າວວ່າ: ການ​ແຂ່ງຂັນ​ຄັ້ງນີ້, ຈັດຂຶ້ນກໍ່ເພື່ອເປັນການສ້າງຂະບວນການສະເຫຼີມສະຫຼອງວັນຊາດ (ທີ 2 ທັນວາ) ຄົບຮອບ 43 ປີ ແລະ ເປັນການຄັດເລືອກນັກກິລາທີ່ມີພອນສະຫວັນດີເດັ່ນກ້າວຂຶ້ນຕິດທີມຊາດ ກຽມສົ່ງເຂົ້າຮ່ວມການແຂ່ງຂັນໃນລະດັບອະນຸພາກພື້ນ, ພາກພື້ນ ແລະ ສາກົນໃນຕໍ່ໜ້າ. ສຳລັບປະເພດທີມຊາຍ ມີ 10 ທີມ ແບ່ງອອກເປັນ 3 ສາຍ ຄື: ສາຍ ເອ, ສາຍ ບີ ແລະ ສາຍ ຊີ, ​ເຊິ່ງໃນ​ຮອບ​ທຳ​ອິດແຂ່ງຂັນຄັດເລືອກເອົາທີມທີ່​ມີ​ຄະ​ແນນ​ອັນ​ດັບທີ 1-2 ແຕ່ລະສາຍ ຜ່ານເຂົ້າຮອບ 8 ທີມສຸດທ້າຍ ແລະ ຄັດເອົາທີ 3 ຈຳນວນ 2 ທີມທີ່ມີຄະແນນດີທີ່ສຸດເຂົ້າຮອບຕາມຫຼັງໄປ. ໃນນັ້ນ, ສາຍ ເອ ປະກອບມີ ແຊ໋ມເກົ່າ ກອງທັບ, ທີມມິນິ ຊິກເຊັນ ວີຊີ, ກອງບັນຊາການ ປ້ອງກັນຄວາມສະຫງົບ ແຂວງວຽງຈັນ. ສ່ວນ ສາຍ ບີ ລາວເດີນອາກາດ ຫຼື ສະກາຍເວ, ແຂວງອຸດົມໄຊ, ສະໂມສອນແຂວງວຽງຈັນ ແລະ ສາຍ ຊີ ເຫຼົ່າຮົບລົດຕັງ-ຍານເກາະ, ຄະນະວິທະຍາສາດທຳມະຊາດ, ສະໂມສອນຟຣີແມນ ແລະ ກອງພົນທະຫານຮາບທີ 5. ສະເພາະປະເພດທີມຍິງມີ 6 ທີມ ແບ່ງອອກເປັນ 2 ກຸ່ມ ກຸ່ມລະ 3 ຄະນະ ແຕ່ລະກຸ່ມແຂ່ງຂັນພົບກັນໝົດ ຄັດເອົາທີ 1-2 ຜ່ານເຂົ້າຮອບ 4 ທີມສຸດທ້າຍ. ໃນນັ້ນ, ກຸ່ມ ເອ ມີແຊ໋ມເກົ່າ ກອງທັບ,  ກອງພົນທະຫານຮາບ ທີ 5, ສະໂມສອນວຽງຈັນ ແລະ ກຸ່ມ ບີ ກົມວິທະຍາສາດ-ປະຫວັດສາດການທະຫານ, ກະຊວງປ້ອງກັນຄວາມສະຫງົບ ຫຼຶ ປກສ ແລະ ສະຖາບັນຍຸດຕິທຳ.

       ນອກຈາກນີ້, ໃນພິທີຍັງໄດ້ມີການແຂ່ງຂັນບານສົ່ງໃນຮົ່ມທີມຍິງ-ຊາຍ ນັດຊີງຊະນະເລີດ ແລະ ຊີງອັນດັບທີ 3. ໃນນີ້, ຄູ່ຊີງຊະນະເລີດປະເພດທີມຊາຍ ເປັນການພົບກັນລະຫວ່າງ ສະໂມສອນ ລາວເດີນອາກາດ ຫຼື ທະຫານອາກາດ ພົບກັບ ກອງທັບ  ດີກຣີແຊ໋ມຂັນທ່ານລັດຖະມົນຕີ ສສກ 3 ສະໄໝຊ້ອນ ສ່ວນປະເພດທີມຍິງ ກອງທັບ ດີກຣີແຊ໋ມຂັນທ່ານລັດຖະມົນຕີ ສສກ 3 ສະໄໝເຊັ່ນກັນ ພົບກັບ ທີມກົມວິທະຍາສາດ-ປະຫວັດສາດການທະຫານ, ເຊິ່ງຜົນປາກົດວ່າ: ໜຸ່ມນັກຕົບບານ ກອງທັບ ສາມາດເອົາຊະນະ ລາວເດີນອາກາດ ໄປແບບຂາດຮອຍ 3-0 ເຊັດ ດ້ວຍຄະແນນ 28-26, 25-22 ແລະ 25-22 ຄະແນນ. ສ່ວນຊີງທີ 3 ກອງພົນທະຫານຮາບທີ 5 ແຂວງຈຳປາສັກ ຊະນະ ເຫຼົ່າຮົບລົດຕັງ-ຍານເກາະ 3-2 ເຊັດ ດ້ວຍຄະແນນ 25-22, 25-21, 22-25, 26-28 ແລະ 15-11 ຄະແນນ.

      ຂະນະທີ່, ນັດຊີງຊະນະເລີດທີມຍິງ ກອງທັບ ກໍ່ບໍ່ນ້ອຍໜ້າທີມຊາຍເຊັ່ນກັນ ໄລ່ຊະນະ ກົມວິທະຍາສາດ-ປະຫວັດສາດ ໄປແບບຫວຸດຫວິດ 3-2 ເຊັດ ດ້ວຍຄະແນນ 21-25, 25-21, 25-16, 11-25 ແລະ 15-8 ຄະແນນ. ສ່ວນຊີງທີ 3 ກອງພົນທະຫານຮາບທີ 5 ຊະນະ ກະຊວງປ້ອງກັນຄວາມສະຫງົບ ຫຼື ປກສ 3-1 ເຊັດ ດ້ວຍຄະແນນ 25-14, 20-25, 18-25 ແລະ 13-25 ຄະແນນ. ສຳລັບລາງວັນຊະນະເລີດຂອງທັງ 2 ລາຍການດັ່ງກ່າວ, ແມ່ນໄດ້ເທົ່າກັນ ຄື: ອັນດັບທີ 1 ໄດ້ຮັບຂັນແຊ໋ມ ພ້ອມເງິນສົດ 8 ລ້ານກີບ, ທີ 2 ໄດ້ຮັບລາງວັນເງິນສົດ 5 ລ້ານກີບ, ທີ 3 ໄດ້ຮັບລາງວັນເງິນສົດ 3 ລ້ານກີບ ແລະ ອັນດັບທີ 4 ໄດ້ຮັບລາງວັນເງິນສົດ 1,5 ລ້ານກີບ. ຕອນທ້າຍພິທີ, ທາງຄະນະບໍລິຫານງານ ສບລ ຍັງໄດ້ມອບໃບກຽດຕິຄຸນໃຫ້ບໍລິສັດ ເບຍລາວ ຈຳກັດ ແລະ ບັນດາບໍລິສັດ ຕະຫຼອດຮອດທີມຍິງ-ຊາຍເຂົ້າຮ່ວມແຂ່ງຂັນ ເພື່ອສະແດງຄວາມຮູ້ບຸນຄຸນຕໍ່ການສະໜັບສະໜູນການແຂ່ງຂັນໃນຄັ້ງນີ້.

ໂດຍ ສົງການ

ໄດ້ແລ້ວ 4 ທີມສຸດທ້າຍ ເຕະບານ ຢູ-15 ຊີງຂັນ ສຕລ

      ໄດ້ແລ້ວ 4 ທີມສຸດທ້າຍທີ່ຜ່ານເຂົ້າຮອບຮອງຊະນະເລີດ ໃນການແຂ່ງຂັນເຕະບານເຍົາວະຊົນຊີງຂັນສະຫະພັນບານເຕະແຫ່ງຊາດລາວ (ສຕລ) ຮຸ່ນອາຍຸບໍ່ເກີນ 15 ປີ (ຢູ-15) ປະຈໍາປີ 2018 (LFF U-15 Boy's Tournament 2018) ປະກອບມີ ສະ​ໂມ​ສອນ ນະ​ຄອນ​ຫຼວງວຽງ​ຈັນ ເອັບຊີ, ສະ​ໂມ​ສອນ ລ໋ອບ​ສະ​ເຕ​ດ້ຽ​ມ ອະ​ຄາ​ເດີ​ມີ, ສະ​ໂມ​ສອນ ເອັ​ສ​ຣາ ເອັບຊີ ແລະ  ສະ​ໂມ​ສອນ ລາວ​ໂຕ​ໂຢ​ຕ້າ ເອັບຊີ.

      ເມື່ອວັນທີ 9 ທັນວາ ຜ່ານມາ ທີ່ສະໜາມກິລາບານເຕະຫຍ້າທຽມ ສະຫະພັນກິລາບານເຕະແຫ່ງຊາດລາວ ໄດ້ມີການແຂ່ງຂັນເຕະບານເຍົາວະຊົນ ຊີງຂັນສະຫະພັນບານເຕະແຫ່ງຊາດລາວ ຮຸ່ນອາຍຸບໍ່ເກີນ 15 ປີ ປະຈໍາປີ 2018 ນັດສຸດທ້າຍຂອງຮອບແບ່ງກຸ່ມ, ເຊິ່ງ​ແຂ່ງ​ຂັນກັນທັງໝົດ 5 ຄູ່ ໂດຍຄູ່ທີ່ໜ້າສົນໃຈ ແມ່ນເປັນການລົງສະໜາມຂອງກຸ່ມ ບີ ລະຫວ່າງ ສະໂມສອນ ທະ​ເວັນ​ຕີຊິກ ຢູ​ໄນ​ເຕັດ ທີມອັນດັບ 3 ຂອງຕາຕະລາງ ທີ່ລົງສະໜາມນັດສຸດທ້າຍ ແລະ ຕ້ອງການເອົາຊະ​ນະ ສະ​ໂມ​ສອນ ມີ​ໂດ ອະ​ຄາ​ເດ​ມີ ທີ່ເປັນອັນດັບທ້າຍຕາຕະລາງ ດ້ວຍການຍິງໃຫ້ໄດ້ 14 ປະຕູຂຶ້ນໄປ ເພື່ອໃຫ້ມີປະຕູສະເລ່ຍ 22 ປະຕູ ຈຶ່ງຈະເຂົ້າຮອບຮອງຊະນະເລີດໄດ້ ເພາະປະຕູໄດ້ເສຍຂອງສະໂມສອນ ລາວ ໂຕໂຢຕ້າ ເອັບຊີ ຕອນນີ້ ດີກວ່າ ແລະ ມີ 11 ຄະແນນ ເທົ່າກັນ. ​ຜ່ານການແຂ່ງຂັນ ຜົນປາກົດວ່າ ທະເວັນຕີຊິກ ຢູໄນເຕັດ ຖະຫຼົ່ມ ມີໂດ້ ໄປ 13-0 ປະຕູ ບໍ່ພຽງພໍທີ່ຈະເຂົ້າຮອບຕໍ່ໄປ ສົ່ງຜົນໃຫ້ສະໂມສອນ ລາວ ໂຕໂຢຕ້າ ເອັບຊີ ທີ່ມີ 11 ຄະແນນ ເທົ່າກັນ ແຕ່ມີປະຕູໄດ້ດີກວ່າ 1 ປະຕູ ຜ່ານເຂົ້າຮອບຕໍ່ໄປແທນ ພ້ອມກັບ ອັນດັບ 1 ສະໂມສອນ ເອັສຣາ ເອັບຊີ ທີ່ມີ 11 ຄະແນນ ແຕ່ມີປະຕູໄດ້ເສຍດີກວ່າ 29 ປະຕູ.

       ຂະນະທີ່ ຜົນການແຂ່ງຂັນອີກ 4 ຄູ່ປະກອບມີ ກຸ່ມ ບີ ສະ​ໂມ​ສອນ ແບ​ລາວ ອະ​ຄາ​ເດ​ມີ ເສຍ​ໃຫ້ສະ​ໂມ​ສອນ ດີ​ເຄ ເອັ​ບ​ຊີ 2-3 ປະຕູ ແລະ ກຸ່ມ ເອ ສະ​ໂມ​ສອນ ນະ​ຄອນ​ຫຼວງວຽງ​ຈັນ ເອັ​ບ​ຊີ ສະ​ເໝີ ສະ​ໂມ​ສອນ ລ໋ອບ​ສະ​ເຕ​ດ້ຽມ ອະ​ຄາ​ເດ​ມີ 1-1 ປະຕູ ກອດຄໍກັນເຂົ້າຮອບຮອງຊະນະເລີດ ໂດຍ ນະຄອນຫຼວງວຽງຈັນ ເອັບຊີ ເປັນທີມອັນດັບ 1 ຂອງກຸ່ມ, ສະໂມສອນ ມາ​ສ​ເຕີ​ ເຊ​ເວັ້ນ ເອັ​ບ​ຊີ ຊະ​ນະ ສະ​ໂມ​ສອນ ທ​ຣີ​ນີ​ຕີ ເອັ​ບ​ຊີ 12-4 ປະຕູ ແລະ ສະ​ໂມ​ສອນ ປກ​ສ ເອັ​ບ​ຊີ ຊະ​ນະ ສະ​ໂມ​ສອນ ເຄ​ພີ​ເອັ​ສ ເອັ​ບ​ຊີ 5-0 ປະຕູ. ສຳລັບ ຕາ​ຕ​ະ​ລາງ​ການ​ແຂ່ງ​ຂັນຮອບ​ຮອງ​ຊະ​ນະ​ເລີດ ແມ່ນຈະມີຂຶ້ນໃນວັນທີ 16 ທັນ​ວາ 2018, ເຊິ່ງສະໜາມທີ 1 ເວ​ລາ 9:30 ໂມງ ສະ​ໂມ​ສອນ ນະ​ຄອນຫຼ​ວງວຽງຈັນ ເອັ​ບ​ຊີ ພົບ ສະ​ໂມ​ສອນ ລາວ​ໂຕ​ໂຢ​ຕ້າ ເອັ​ບ​ຊີ​ ແລະ ສະໜາມທີ 2 ເວ​ລາ 9:30 ໂມງ ສະ​ໂມ​ສອນ ເອັ​ສ​ຣາ ເອັບຊີ ພົບ ສະ​ໂມ​ສອນ ລ໋ອບ​ສະ​ເຕ​ດ້ຽມ ອະ​ຄາ​ເດ​ມີ.

ອຳໄພວັນ