• moes

ສສກ​ ທາບທາມບຸກຄະລາກອນອອກສະໝັກຮັບເລືອກຕັ້ງຄະນະບໍລິຫານງານພັກ ສະໄໝທີ IX​ ຮອບ​ II

ສສກ​ ທາບທາມບຸກຄະລາກອນອອກສະໝັກຮັບເລືອກຕັ້ງຄະນະບໍລິຫານງານພັກ ສະໄໝທີ IX​ ຮອບ​ II

118828623 956632544806015 4195096634987519426 n     ກະຊວງສຶກສາທິການ​ ແລະ​ ກິລາ​ (ສສກ)​ ໄດ້ຈັດກອງປະຊຸມທາບທາມບຸກຄະລາກອນ ອອກສະໝັກຮັບເລືອກຕັ້ງຄະນະບໍລິຫານງານພັກກະຊວງ ສະໄໝທີ IX​ ຮອບທີ II​ ໃນວັນທີ​ 3 ກັນຍາ​ ຜ່ານມາ​ ທີ່ສະໂມສອນໃຫຍ່ຄະນະເສດຖະສາດ ແລະ ບໍລິຫານທຸລະກິດ ມະຫາວິທະຍາໄລແຫ່ງຊາດ, ໂດຍພາຍໃຕ້ການເປັນປະທານຂອງ​ສະຫາຍ​ ນາງ​ ແສງ​ເດືອນ​ ຫຼ້າຈັນທະບູນ​ ກຳມະການສູນກາງພັກ,​ ເລຂາ​ຄະນະພັກ,​ ລັດຖະມົນຕີ​ ກະຊວງສຶກສາທິການ​ ແລະ ກິລາ,​

ມີຜູ້ຕາງໜ້າຈາກຄະນະກວດກາສູນກາງພັກ,​ ຄະນະຈັດຕັ້ງສູນກາງພັກ,​ ຫ້ອງວ່າການສູນກາງພັກ,​ ຄະນະປະຈຳພັກກະຊວງ,​ ຄະນະບໍລິຫານງານພັກກະຊວງ,​ ຄະນະປະຈຳພັກ ແລະ​ ຄະນະບໍລິຫານງານ ມະຫາວິທະຍາໄລແຫ່ງຊາດ,​ ຄະນະພັກຮາກຖານ,​ ຄະນະໜ່ວຍພັກຮາກຖານ ຕະຫຼອດຮອດພະນັກງານ ແລະ​ ສະມາຊິກພັກພາຍໃນເຂົ້າຮ່ວມ.

       ການຈັດກອງປະຊຸມໃນຄັ້ງນີ້,​ ແມ່ນເພື່ອເປັນການທາບທາມບຸກຄະລາກອນ ອອກສະໝັກຮັບເລືອກຕັ້ງເຂົ້າໃນຄະນະບໍລິຫານງານພັກກະຊວງ ສະໄໝທີ IX ຮອບທີ II, ທາບທາມເປົ້າໝາຍເລຂາ,​ ຮອງເລຂາ, ຄະນະປະຈຳພັກກະຊວງ,​ ປະທານ-ຮອງປະທານກວດກາພັກກະຊວງ ເພື່ອອອກສະໝັກເລືອກຕັ້ງໃນກອງປະຊຸມໃຫຍ່ ສະໄໝທີ IX ຂອງອົງຄະນະພັກກະຊວງ. ພ້ອມກັນນັ້ນ,​ ຍັງໄດ້ຜ່ານຮ່າງບົດລາຍງານການເມືອງ,​ ຜ່ານຮ່າງແຜນພັດທະນາການສຶກສາ ແລະ ກິລາ 5 ປີ​ ຄັ້ງທີ​ IX​ (2021-2025)​ ແລະ​ ຜ່ານຮ່າງບົດສຳຫຼວດການນຳພາລວມຂອງຄະນະບໍລິຫານງານພັກ ກະຊວງສຶກສາທິການ​ ແລະ ກິລາ​ ສະໄໝທີ​ VIII.​

       ໃນໂອກາດດັ່ງກ່າວ,​ ສະຫາຍ​ ນາງ​ ແສງ​ເດືອນ​ ຫຼ້າຈັນທະບູນ​ ໄດ້ກ່າວ​ວ່າ: ກອງປະຊຸມຄັ້ງນີ້, ເປັນກອງປະຊຸມທີ່ມີຄວາມສໍາຄັນຫຼາຍ, ບັນດາສະຫາຍຜູ້ເຂົ້າຮ່ວມຈະໄດ້ປະກອບຄໍາເຫັນໃສ່ຮ່າງບົດລາຍງານການເມືອງ, ຮ່າງແຜນພັດທະນາການສຶກສາ ແລະ ກິລາ 5 ປີ (2021-2025) ແລະ ຮ່າງບົດສໍາຫຼວດການນໍາພາລວມຂອງຄະນະບໍລິຫານງານພັກກະຊວງ ສະໄໝທີ VIII. ນອກຈາກທາບທາມບຸກຄະລາກອນອອກສະໝັກຮັບເລືອກຕັ້ງຄະນະບໍລິຫານງານພັກ ກະຊວງສຶກສາທິການ ແລະ ກິລາ ສະໄໝທີ IX ແລ້ວ, ຍັງຈະໄດ້ທາບທາມເອົາເລຂາ, ຮອງເລຂາ, ຄະນະປະຈໍາພັກກະຊວງ, ປະທານ ແລະ ຮອງປະທານຄະນະກວດກາພັກກະຊວງ ເພື່ອອອກສະໝັກຮັບເລືອກຕັ້ງຄະນະບໍລິຫານງານພັກ ກະຊວງສຶກສາທິການ ແລະ ກິລາ ສະໄໝທີ IX. ພ້ອມກັນນັ້ນ, ສະຫາຍຍັງໄດ້ຕີລາຄາສູງຕໍ່ການທາບທາມບຸກຄະລາກອນໃນຮອບທີ​ I ໂດຍລວມຜູ້ແທນທີ່ເຂົ້າຮ່ວມທາບທາມໄດ້ປະຕິບັດເວລາ ແລະ ລະບຽບການປ່ອນບັດຢ່າງເຂັ້ມງວດ ເຮັດໃຫ້ກອງປະຊຸມມີຄວາມເປັນລະບຽບຮຽບຮ້ອຍເປັນຢ່າງດີ, ພ້ອມທັງສະແດງຄວາມຊົມເຊີຍຕໍ່ໜ່ວຍງານຈາກສູນກາງທີ່ໄດ້ໃຫ້ການຊີ້ນໍາ ແລະ ໃຫ້ການຮ່ວມມື ແລະ ເຮັດວຽກຮ່ວມກັບອະນຸກໍາມະການເນື້ອໃນ ແລະ ອະນຸກໍາມະການກົດລະບຽບ ແລະ ບຸກຄະລາກອນດ້ວຍຄວາມຮັບຜິດຊອບສູງ ແລະ ພາຍໃຕ້ການຊີ້ນໍາຈາກຄະນະພັກທຸກຂັ້ນ ເຮັດໃຫ້ການທາບທາມບຸກຄະລາກອນໃນຮອບທີ I ແລະ ການກະກຽມເນື້ອໃນກອງປະຊຸມ ໄດ້ຮັບຜົນສໍາເລັດຕາມຈຸດປະສົງ ແລະ ຄາດໝາຍທີ່ວາງໄວ້ທຸກປະການ.​

       ຂະນະດຽວກັນນີ້, ສະຫາຍ ນາງ​ ແສງ​ເດືອນ​ ຫຼ້າຈັນທະບູນ ຍັງກ່າວອີກວ່າ: ໃນກອງປະຊຸມທາບທາມບຸກຄະລາກອນໃນຮອບທີ II ນີ້ ຮຽກຮ້ອງໃຫ້ບັນດາສະຫາຍຈົ່ງເພີ່ມທະວີເອົາໃຈໃສ່ປະກອບຄໍາຄິດ ຄໍາເຫັນຢ່າງກົງໄປກົງມາ ແລະ ສ້າງສັນຕໍ່ຮ່າງເນື້ອໃນບົດລາຍງານການເມືອງ, ຮ່າງແຜນພັດທະນາການສຶກສາ ແລະ ກິລາ 5 ປີ ແລະ ຮ່າງບົດສໍາຫຼວດການນໍາພາລວມຂອງຄະນະບໍລິຫານງານພັກກະຊວງ ສະໄໝທີ VIII, ຮຽກຮອງໃຫ້ບັນດາສະຫາຍຜູ້ແທນກອງປະຊຸມຕ້ອງຄົ້ນຄິດ ພິຈາລະນາໃຫ້ລະອຽດຖີ່ຖ້ວນກ່ອນຈະຕັດສິນໃຈຄັດເລືອກເປົ້າໝາຍ ເພື່ອສະໝັກເລືອກຕັ້ງເປັນຄະນະບໍລິຫານງານພັກກະຊວງຊຸດໃໝ່. ສໍາຄັນທີ່ສຸດ ແມ່ນໃຫ້ຄໍານຶງເຖິງມາດຖານ, ເງື່ອນໄຂ, ຄວາມຮັບຜິດຊອບຕໍ່ໜ້າທີ່ການເມືອງ ແລະ ການປະກອບຄໍາເຫັນຕໍ່ບັນດາສະຫາຍຄະນະປະຈໍາພັກກະຊວງ, ສະຫາຍເລຂາ, ຮອງເລຂາ, ປະທານ, ຮອງປະທານຄະນະກວດກາພັກກະຊວງດ້ວຍຄໍາເຫັນທີ່ມີເຫດມີຜົນ, ຄໍາເວົ້າທີ່ສ້າງສັນ ຫຼີກເວັ້ນການໃສ່ຮ້າຍປ້າຍສີ, ອະຄະຕິ ຫຼື ບໍ່ມີມູນຄວາມຈິງ ແລະ ອື່ນໆ.

      ນອກຈາກນີ້, ຜູ້ເຂົ້າຮ່ວມກອງປະຊຸມຍັງໄດ້ຮັບຟັງການສະເໜີຮ່າງບົດລາຍງານການເມືອງ,​ ສະເໜີຮ່າງແຜນພັດທະນາຂະແໜງການສຶກສາ ແລະ ກິລາ 5 ປີ (2021-2025), ສະເໜີຮ່າງບົດສໍາຫຼວດການນໍາພາລວມຂອງຄະນະພັກກະຊວງ ສະໄໝທີ VIII,​ ສະເໜີມາດຖານ ແລະ ເງື່ອນໄຂ ຜູ້ທີ່ຈະສະໝັກເຂົ້າໃນຄະນະບໍລິຫານງານພັກກະຊວງຊຸດໃໝ່,​ ແນະນໍາກົດລະບຽບການປ່ອນບັດທາບທາມ​ ແລະ​ ດຳເນີນການທາບທາມ.​

ບົວລະພາ

Print Email