ວັນທີ 31ມັງກອນ ຫາວັນທີ 1ກຸມພາ 2019 ທີ່ສະຖາບັນພັດທະນາການບໍລິຫານການສຶກສາ ຫຼັກ8 ໄດ້ມີກອງປະຊຸມຜູ້ບໍລິຫານການສຶກສາ ແລະ ກິລາທົ່ວ  ປະເທດປະຈຳປີ 2018 ພາຍໃຕ້ການເປັນປະທານ ຂອງທ່ານນາງແສງເດືອນ ຫຼ້າຈັນທະບູນລັດຖະມົນຕີກະຊວງສຶກສາທິການ ແລະ ກິລາ, ມີຕາງໜ້າຈາກປະທານສະພານະຄອນຫຼວງວຽງຈັນ, ຜູ້ບໍລິຫານການສຶກສາ ແລະ ກິລາທຸກຂັ້ນທັງພາກລັດ ແລະ ເອກະຊົນ, ອະດີດການນຳກະຊວງສຶກສາທິການ ແລະ ກິລາ ພ້ອມດ້ວຍແຂກທີ່ຖືກເຊີນເຂົ້າຮ່ວມ



ຈຸດປະສົງຂອງກອງປະຊຸມແມ່ນເພື່ອປຶກສາຫາລື ກ່ຽວກັບການປັບແຜນງົບປະມານບໍລິຫານທີ່ໄດ້ຮັບອະນຸມັດ ໃຫ້ສອດຄ່ອງກັບແຜນວຽກຈຸດສຸມໃນປີ
2019 ເພື່ອແກ້ໄຂບັນຫາຂໍ້ຄົງຄ້າງໃນ 10 ຂະແໜງການຍ່ອຍເຊິ່ງເປັນວຽກງານບູລິມະສິດໃຫ້ສຳເລັດຕາມເປົ້າໝາຍ ເປັນຕົ້ນແມ່ນການແກ້ໄຂບັນຫາຄວາມແຕກໂຕນກັນໃນແຕ່ລະທ້ອງຖິ່ນຂອງວຽກງານການສຶກສາກ່ອນໄວຮຽນ, ການປັບປຸງຄຸນນະພາບການຮຽນຊັ້ນປະຖົມສຶກສາທີ່ຍັງອ່ານບໍອອກຂຽນບໍໄດ້, ອັດຕາຄ້າງຫ້ອງ ແລະ ປະລະການຮຽນຍັງມີສູງ, ແກ້ໄຂບັນຫາການປະລະການຮຽນໃນຊັ້ນມັດທະຍົມຕອນຕົ້ນ ແລະ ຕອນປາຍ, ຄູສອນບໍ່ພຽງພໍ ແລະ ຍັງບໍສາມາດນຳໃຊ້ເຄື່ອງທົດລອງວິທະຍາສາດເຂົ້າໃນການຮຽນ-ການສອນໄດ້, ປັບປຸງການປະຕິບັດໜ້າທີ່ຂອງສູນການສຶກສານອກໂຮງຮຽນຕ່າງໆໃຫ້ມີປະສິດຕິຜົນຂຶ້ນກ່ວາເກົ່າ, ແກ້ໄຂບັນຫານັກຮຽນຄູທີ່ຈົບ ແລະ ອາສາສະໝັກຍັງບໍໄດ້ຮັບການບັນຈຸຍັງມີຫຼາຍ, ຄຸນນະພາບຂອງຄູຍັງຕໍ່າ, ແກ້ໄຂບັນຫານັກຮຽນອາຊີວະສຶກສາບໍ່ມີບ່ອນຝຶກງານທີ່ເໝາະສົມກັບວິຊາຮຽນ, ນັກຮຽນທີ່ຈົບຊັ້ນມັດທະຍົມຕອນຕົ້ນສະໝັກເຂົ້າຮຽນສາຍອາຊີວະສຶກສາຍັງມີໜ້ອຍ, ແກ້ໄຂບັນຫາຄ່ານິຍົມຂອງນັກຮຽນທີ່ໄປສຶກສາຢູ່ຕ່າງປະເທດມີຫຼາຍເຮັດໃຫ້ບໍສາມາດຄຸ້ມຄອງໄດ້ ແລະ ການລົງທຶນໃສ່ການປັບປຸງຄຸນນະພາບການຮຽນ-ການສອນຍັງຕໍ່າ, ເລັ່ງກໍ່ສ້າງນັກກິລາອາຊີບໃນຂະແໜງກິລາ-ກາຍະກຳ ໂດຍສະເພາະຜູ້ມີຄວາມຮັກ ແລະ ມີພອນສະຫວັນດ້ານກິລາໃຫ້ເປັນລະບົບ ສ່ວນຂະແໜງການຍ່ອຍການບໍລິຫານ ປັບປຸງການຄຸ້ງຄອງ ແລະ ນຳໃຊ້ບຸຄະລາກອນໃຫ້ມີປະສິດຕິພາບ, ສ້າງພະນັກງານສືບທອດປ່ຽນແທນຢ່າງຕໍ່ເນືອ່ງ ແລະ ການນຳໃຊ້ງົບປະມານຍັງບໍມີປະສິດຕິພາບ ການຕິດຕາມ ແລະ ປະເມີນຍັງບໍເຂັ້ມແຂງ
ໃນຕອນທ້າຍພິທີຍັງໄດ້ມີການມອບທຸງໄຊຂັ້ນກະຊວງໃຫ້ແກ່ 3ພະແນກ ແລະ 22 ຫ້ອງການທີ່ມີຜົນງານດີເດັ່ນຮອບດ້ານໃນການປະຕິບັດນະໂຍບາຍການສຶກສາ ແລະ ມອບໃບຍ້ອງຍໍຂັ້ນກະຊວງໃຫ້ແກ່ 7 ພະແນກ ແລະ 30 ຫ້ອງການທີ່ມີຜົນງານດີເດັ່ນຮອບດ້ານໃນການຊີ້ນຳ-ນຳພາວຽກງານວິຊາສະເພາະ ແລະ ນະໂຍບາຍການສຶກສາ ໃນປີ 2013-2018