ມສ ຊົນເຜົ່າ ເລື່ອນສະມາຊິກພັກສຳຮອງ 3 ສະຫາຍຂຶ້ນເປັນສະມາຊິກພັກປະຊາຊົນປະຕິວັດລາວ

    
     ໂຮງ​ຮຽນ ສາ​ມັນ​ກິນນອນ​ຊົນ​ເຜົ່າ ​ໄດ້​ຈັດ​ພິທີ​ເລື່ອນ​ສະ​ມາ​ຊິກ​ພັກ​ສໍາຮອງ ​ ​​ຂຶ້ນ​ເປັນ​ສະມາ​ຊິດ​ພັກ​ສົມບູນ 
  ໃນ​​ວັນ​ທີ  8  ກຸມ​ພາ  ຜ່ານ​ມາ​ທີ່​ຫ້ອງ​ປະຊຸມ​ຂອງ​​ໂຮງ​ຮຽນສາ​ມັນ​ກິນນອນ​ຊົນ​ເຜົ່າ  ​ໂດຍ​ເປັນ​ປະທານຂອງ
  ສະ​ຫາຍ​ລຳ​ແກ້ວ ເກດ​ທອງ​ດີ ​ຄະ​ນະ​ພັກ​ຮາກ​ຖານ ພະ​ແນກ​ສຶກ​ສາ​ທິ​ການ ແລະກິ​ລາ​ແຂວງ ​ຜູ້​ອຳ​ນວຍ​ການ
​  ໂຮງ​ຮຽນ ມ​ສ ສະ​ຫວັນ, ມີ​ບັນດາ​ສະ​ຫາຍ​ຄະ​ນະໜ່ວຍ​ພັກອ້ອມ​ຂ້າງ ພ້ອມ​ສະມາຊິກ​ເຂົ້າ​ຮ່ວມ.

     ​ໃນ​ພິທີ​ດັ່ງກ່າວ ສະຫາຍ ​ນາງ ພູ​ວົງ ລິດ​ດາ​ລາ ຫົວ​ໜ້າ​ຈຸຈັດ​ຕັ້ງ ​ໂຮງ​ຮຽ​ນ ມ​ສ ຊົນ​ເຜົ່າ ໄດ້​ຜ່ານ​ມະຕິ​ຕົກລົງຂອງ​ຄະນະ​ປະຈຳ​ພັກ​ແຂວງ ໂດຍ​ປະ​ຕິ​ບັດ​ຕາມ​ກົດ​ລະ​ບຽບ​ຂອງ​ພັກ​ປະ​ຊາ​ຊົນ​ປະ​ຕິ​ວັດ​ລາວ (ສະ​ໄໝ​ທີ X) ໝວດ​ທີ 1 ມາດ​ຕາ​ທີ 2 ລະ​ບຽບ​ການ​ຂະ​ຫຍາຍ​ພັກ ວ່າ​ດ້ວຍ​ການ​ອະນຸມັດ​ເລື່ອນ​ສະມາຊິກ​ພັກ​ສຳຮອງ ຂຶ້ນ​ເປັນ​ສະມາຊິກ​ພັກ​ສົມບູນ 3 ສະ​ຫາຍ ຍິງ 3 ສະ​ຫາຍ​ຄື: ສະ​ຫາຍ ນາງ ພຸດ​ທະ​ວົງ ສະ​ຫວັນ​ຈັນ​ດີ, ສະ​ຫາຍ ​ນາງ ດວງ​ດາ​ລາ ພຸ​ທະ​ວົງ ແລະ ສະ​ຫາຍ ນາງ ຈິນດີ້ ວິ​ໄລ​ວົງ

     ​​​ໂອກາດ​ດັ່ງກ່າວ​ ສະຫາຍ ​ລຳ​ແກ້ວ ເກດ​ທອງ​ດີ ກ່າວ​ວ່າ: ບັນດາ​ສະຫາຍ​ສະມາຊິກ​ພັກ​ສົມບູນ ທຸກ​ສະຫາຍ​ແມ່ນ​​ໄດ້​ຜ່ານ​ການ​ຝຶກ​ຝົນ​ຫຼໍ່​ຫຼອມ ​ໃນ​ໜ້າ​ທີ່​ວຽກ​ງານ ວິຊາ​ສະ​ເພາະ​ເປັນ​ເວລາ​ຫຼາຍ​ປີ ​ເຊິ່ງ​ໄດ້​ຮັບ​ຄວາມ​ໄວ້​ວາງ​ໃຈ​ຈາກ​ຄະນະ​ໜ່ວຍ​ພັກ ​ແລະ ສະມາຊິກ​ພັກ​ໃນ​ໜ່ວຍ ​ເປັນ​ການ​ເພີ່ມ​ທະວີ ກຳລັງ​ແຮງ​ຂອງ​ພັກ​ໃຫ້​ສູງ​ຂຶ້ນ ​ໃນ​ຂະ​ບວນການ​ຕ່າງໆ​ເຮັດ​ໃຫ້​ຄວາມ​ເປັນ​ເຈົ້າ​ການ​ປະຕິບັດ​ແນວທາງ, ມະຕິ​ຄຳ​ສັ່ງ​ຂອງ​ພັກ, ລັດຖະທຳ​ມະນູນ ​ແລະ ກົດໝາຍ​ໄດ້​ເປັນ​ຢ່າງ​ດີ, ພ້ອມ​ນີ້​ສະມາຊິກ​ໃໝ່​ນີ້ ​ແມ່ນ​ມີ​ຄຸນ​ທາດ​ການ​ເມືອງ, ມີ​ທັດສະນະ​ຫຼັກ​ໝັ້ນ​ການ​ເມືອງ, ມີ​ນ້ຳ​ໃຈ​ຮັກ​ອາຊີບ, ນຳ​ໃຊ້​ຄວາມ​ຮູ້​ຄວາມ​ສາມາດ​ເພື່ອ​ຮັບ​ໃຊ້​ຜົນ​ປະ​ໂຫຍ​ດສ່ວນ​ລວມ.

     ນອກຈາກ​ນີ້​, ​ສະ​ຫາຍ​ຄະ​ນະ​ພັກ​ຮາກ​ຖານພະ​ແນກ​ສຶກ​ສາ​ທິ​ການ ແລະ ກິ​ລາ​ແຂວງ​ສະຫວັນ​ນະ​ເຂດ ​ຍັງ​ໄດ້​ກ່າວ​​ເນັ້ນ​ໜັກ​ໃຫ້​ສະມາຊິກ​ພັກຈົ່ງສືບ​ຕໍ່​ບຸກບືນ, ອົດທົນ, ມີ​ຄວາມ​ຫ້າວຫັນ​ຕໍ່ໜ້າທີ່​ວຽກ​ງານ ​ແລະ ສືບ​ຕໍ່​ຊອກ​ຮູ້​ຮ່ຳຮຽນ​ເອົາ​ບົດຮຽນ​ທີ່​ດີ​ຈາກ​ຜູ້​ມີ​ປະສົບ​ການ ​ເພື່ອ​ພັດທະນາ​ຕົນ​ເອງ ​ ​ເປັນ​ແບບ​ຢ່າງທີ່​ດີ​ໃຫ້​ແກ່​ມະຫາຊົນຮຸ່ນ​ຕໍ່​ໄປ.

ຂຽນຂ່າວໂດຍ: ພູວອນ ດຳລົງບຸນ