ຊາວໜຸ່ມ ສສກ ທາບທາມຄະນະບໍລິຫານງານ ຮອບທີ 1

ຄະນະບໍລິຫານງານຊາວໜຸ່ມປະຊາຊົນ ປະຕິວັດລາວ ກະຊວງສຶກສາທິການ ແລະ ກິລາ (ສສກ) ໄດ້ຈັດກອງປະຊຸມທາບທາມ ຮອບທີ 1  ເພື່ອຄັດເລືອກເອົາຄະນະບໍລິຫານງານຊຸດໃໝ່ ສືບຕໍ່ຊີ້ນຳນຳພາວຽກງານໃຫ້ກ້າວໜ້າຂຶ້ນເລື້ອຍໆ.

ກອງປະຊຸມດັ່ງກ່າວ, ໄດ້ຈັດຂຶ້ນເມື່ອວັນທີ 27 ກຸມພາ ຜ່ານມາ ທີ່ສະໂມສອນວິທະຍາໄລຊັບພະວິຊາ, ໂດຍໃຫ້ກຽດເຂົ້າຮ່ວມຂອງສະຫາຍ ປອ ສຳລານ ພັນຄະວົງ ຄະນະພັກກະຊວງ, ຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ເລຂາຊາວໜຸ່ມກະຊວງສຶກສາທິການ ແລະ ກິລາ ພ້ອມດ້ວຍຮອງເລຂາ-ຄະນະຊາວໜຸ່ມກະຊວງ ແລະ ຄະນະຊາວໜຸ່ມຈາກ 4 ຮາກຖານເຂົ້າຮ່ວມ 400 ກວ່າສະຫາຍ.

ການຈັດກອງປະຊຸມໃນຄັ້ງນີ້, ແມ່ນເພື່ອເປັນການທາບທາມ ຮອບທີ 1 ຂອງຄະນະບໍລິຫານງານຊາວໜຸ່ມ ກະຊວງສຶກສາທິການ ແລະ ກິລາ ແລະ ປ່ອນບັດຄັດເລືອກເອົາຄະນະບໍລິຫານງານຊາວໜຸ່ມຊຸດໃໝ່, ໂດຍໄດ້ຄັດເອົາຈຳນວນຜູ້ທີ່ລົງສະໝັກເລືອກຕັ້ງ ທັງໝົດ 49 ສະຫາຍຈາກຄະນະບໍລິຫານງານຊາວໜຸ່ມ 4 ຮາກຖານ ຄື: ຮາກຖານຊາວໜຸ່ມ ມະຫາວິທະຍາໄລແຫ່ງຊາດ, ຮາກຖານຊາວໜຸ່ມວິທະຍາໄລພາກເອກະຊົນ, ຮາກຖານຊາວໜຸ່ມສຳນັກກະຊວງ ແລະ ຮາກຖານຊາວໜຸ່ມໂຮງຮຽນອ້ອມຂ້າງ. ສະເພາະຮອບທີ 1 ແມ່ນຄັດເລືອກເອົາ 35 ສະຫາຍ ແລະ ຮອບທີ 2 ຄັດເອົາ 25 ສະຫາຍ ເພື່ອໄປຄັດເລືອກໃນກອງປະຊຸມໃຫຍ່ ໃນທ້າຍເດືອນມີນານີ້ ແນໃສ່ເລືອກເອົາຄະນະຊຸດໃໝ່ເພື່ອສືບຕໍ່ຊີ້ນຳນຳພາວຽກງານຊາວໜຸ່ມພາຍໃນກະຊວງໃຫ້ມີການພັດທະນາ ແລະ ກ້າວໜ້າຂຶ້ນເລື້ອຍໆ.

ສຳລັບມາດຕະຖານ ແລະ ເງື່ອນໄຂຜູ້ລົງສະໝັກເປັນຄະນະບໍລິຫານງານຊາວໜຸ່ມປະຊາຊົນ ປະຕິວັດລາວ ກະຊວງສຶກສາທິການ ແລະ ກິລາ ແມ່ນຕ້ອງມີຄຸນທາດການເມືອງທີ່ໜັກແໜ້ນ, ຢຶດໝັ້ນອຸດົມການຂອງພັກ, ມີຄວາມເປັນເອກະພາບຕໍ່ແນວທາງການປ່ຽນແປງໃໝ່ຂອງພັກ, ເຄົາລົບ ແລະ ປະຕິບັດກົດໝາຍ-ລັດຖະທຳມະນູນ, ມີສະຕິຖືສາຍໄຍການຈັດຕັ້ງ, ມີຄຸນສົມບັດສິນທຳປະຕິວັດ, ມີຄວາມບໍລິສຸດ ຈິງໃຈ, ຍຸຕິທຳ, ບໍ່ສວຍໃຊ້ໜ້າທີ່ຕຳແໜ່ງ ແລະ ບໍ່ເຫັນແກ່ຜົນປະໂຫຍດສ່ວນຕົວຈຸ້ມເຈື້ອພັກພວກ, ມີຄວາມຮູ້ຄວາມສາມາດທາງດ້ານລະດັບທິດສະດີການເມືອງຂັ້ນບຳລຸງ ຫຼື ໄດ້ຜ່ານການຝຶກອົບຮົມທິດສະດີວຽກງານຊາວໜຸ່ມ, ເຄີຍເປັນເລຂາຊາວໜຸ່ມຂັ້ນຮາກຖານໃດໜຶ່ງມາແລ້ວ ແລະ ອາຍຸບໍ່ກາຍ 45 ປີ (ສຳລັບຜູ້ສະໝັກໃໝ່).

ບົວລະພາ

ນວ ສອບເສັງຄັດເລືອກນັກຮຽນເກັ່ງ ກຽມຮ່ວມລະດັບຊາດ ມີນານີ້

ພະແນກສຶກສາທິການ ແລະ ກິລາ ນະຄອນຫຼວງວຽງຈັນ (ນວ) ຈັດການສອບເສັງນັກຮຽນເກັ່ງລະດັບນະຄອນຫຼວງວຽງຈັນ ສົກຮຽນ 2019-2020 ເມື່ອວັນທີ 27 ກຸມພາ ຜ່ານມາ ທີ່ໂຮງຮຽນ ມັດທະຍົມສຶກສາຕອນປາຍ ມິດຕະພາບ ວຽງຈັນ-ໂຮ່ຈິມິນ, ໂດຍເປັນກຽດເຂົ້າຮ່ວມ ແລະ ຕັດຫົວບົດສອບເສັງຂອງທ່ານ ຊົມພູ ແກ້ວປັນຍາ ຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ, ມີທ່ານ ພູທອນ ແສງດາວົງ, ທ່ານ ນາງ ຄໍາຫວັນ ລາຊະຂັນຕີ ຮອງຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ, ທ່ານ ບຸນຈັນ ສີສຸກ ຜູ້ອໍານວຍການໂຮງຮຽນ ມັດທະຍົມສຶກສາຕອນປາຍ ມິດຕະພາບ ວຽງຈັນ-ໂຮ່ຈິມິນ, ພ້ອມດ້ວຍຕາງໜ້າຈາກຫ້ອງການສຶກສາທິການ ແລະ ກິລາເມືອງ, ຄະນະກໍາມະການ, ຄູນໍາພາ ແລະ ນ້ອງນັກສອບເສັງຢ່າງພ້ອມພຽງເຂົ້າຮ່ວມ.

ໂອກາດດັ່ງກ່າວ, ທ່ານ ບຸນທັນ ແສງມະນີ ຫົວໜ້າຂະແໜງສາມັນສຶກສາ ພະແນກສຶກສາທິການ ແລະ ກິລາ ໄດ້ກ່າວໃຫ້ຮູ້ກ່ຽວກັບການຈັດສອບເສັງໃນຄັ້ງນີ້, ແມ່ນເພື່ອເປັນການຈັດຕັ້ງປະຕິບັດແຜນພັດທະນາການສຶກສາ ແລະ ກິລາວາງອອກ ແນໃສ່ຍົກສູງຄຸນນະພາບຂອງການສຶກສາໃຫ້ເທົ່າທຽມກັບສາກົນເທື່ອລະກ້າວ, ເພື່ອສ້າງຂະບວນການໃຫ້ນັກຮຽນໄດ້ມີໂອກາດເຂົ້າຮ່ວມການສອບເສັງໃນແຕ່ລະຂັ້ນ, ສົ່ງເສີມການຮຽນການສອນຢູ່ໃນສາຍສາມັນສຶກສາ ໂດຍສະເພາະແມ່ນຊັ້ນປະຖົມສຶກສາ ແລະ ມັດທະຍົມສຶກສາທົ່ວນະຄອນຫຼວງໃຫ້ມີບັນຍາກາດຟົດຟື້ນ, ມີລັກສະນະແຂ່ງຂັນ ເຮັດໃຫ້ຂະບວນການສອນດີ-ຮຽນເກັ່ງ ທີ່ນອນຢູ່ໃນ 3 ຂໍ້ແຂງຂັນຂອງກະຊວງສຶກສາທິການ ແລະ ກິລາ ວາງອອກໃຫ້ປາກົດຜົນເປັນຈິງ, ສ້າງໂອກາດໃຫ້ນັກຮຽນທີ່ມີພອນສະຫວັນໄດ້ສະແດງອອກທາງດ້ານຄວາມຮູ້, ຄວາມສາມາດ ແລະ ຫົວຄິດປະດິດສ້າງຂອງຕົນເອງ. ທັງນີ້, ກໍເພື່ອຈັດການຍ້ອງຍໍຊົມເຊີຍຜູ້ບໍລິຫານໂຮງຮຽນທີ່ມີຄວາມຫ້າວຫັນເອົາໃຈໃສ່ປະຕິບັດໜ້າທີ່ໃນການບໍລິຫານໂຮງຮຽນ ຍ້ອງຍໍຄູອາຈານທີ່ເອົາໃຈໃສ່ໃນການສິດສອນ ແລະ ນ້ອງນັກຮຽນທີ່ເອົາໃຈໃສ່ໃນການຮໍ່າຮຽນ ພັມທັງເປັນການຄັດເລືອກເອົານັກຮຽນທີ່ໄດ້ອັນດັບທີ 1 ເປັນຕົວແທນຂອງນັກຮຽນທົ່ວນະຄອນຫຼວງວຽງຈັນເຂົ້າຮ່ວມການສອບເສັງລະດັບຊາດ (ສໍາລັບຊັ້ນມັດທະຍົມ ມ.4 ແລະ ມ.7).

      ການສອບເສັງນັກຮຽນເກັ່ງຂັ້ນນະຄອນຫຼວງວຽງຈັນ ສົກນີ້, ປ.5 ແມ່ນສອບເສັງໃນ 3 ວິຊາ ຄື: ວິຊາພາສາລາວ, ຄະນິດສາດ ແລະ ໂລກອ້ອມຕົວ. ສ່ວນ ມ.4 ແລະ ມ.7 ແມ່ນສອບເສັງ 4 ວິຊາ ຄື: ວິຊາພາສາລາວ-ວັນນະຄະດີ, ຄະນິດສາດ, ເຄມີສາດ ແລະ ຟີຊິກສາດ, ໂດຍມີນັກສອບເສັງທັງໝົດ 558 ນ້ອງ, ຍິງ 362 ນ້ອງ ຈັດເປັນ 26 ຫ້ອງສອບເສັງ ທີ່ໂຮງຮຽນ ມ.ປາຍ ມິດຕະພາບ ວຽງຈັນ-ໂຮ່ຈິມິນ. ໃນນັ້ນ, ປ.5 ມີນັກສອບເສັງ ຈໍານວນ 129 ນ້ອງ, ຍິງ 86 ນ້ອງ ຈັດເປັນ 6 ຫ້ອງສອບເສັງ; ມ.4 ມີນັກສອບເສັງ ຈໍານວນ 218 ນ້ອງ, ຍິງ 148 ນ້ອງ ຈັດເປັນ 10 ຫ້ອງສອບເສັງ ແລະ ມ.7 ມີນັກສອບເສັງ ຈໍານວນ 211 ນ້ອງ, ຍິງ 133 ນ້ອງ ຈັດເປັນ 10 ຫ້ອງສອບເສັງ.

ພາຍຫຼັງສໍາເລັດການຈັດຕັ້ງສອບເສັງຄັ້ງນີ້ແລ້ວ ຈະໄດ້ຄັດເລືອກເອົານ້ອງນັກຮຽນ ມ.4 ແລະ ມ.7 ເປັນຕົວແທນນັກຮຽນເກັ່ງຂອງນະຄອນຫຼວງວຽງຈັນ ຈໍານວນ 8 ນ້ອງ (ມ.4 ວິຊາລະ 1 ນ້ອງ ລວມ 4 ນ້ອງ ແລະ ມ.7 ວິຊາລະ 1 ນ້ອງ ລວມ 4 ນ້ອງ) ເຂົ້າຮ່ວມການແຂ່ງຂັນລະດັບຊາດ ທີ່ຈະຈັດຂຶ້ນໃນລະຫວ່າງວັນທີ 17-20 ມີນາ 2020 ທີ່ມະຫາວິທະຍາໄລແຫ່ງຊາດ.

(ບຸນທະວີ)

ພະຍາດໂຄວິດ-19 ແຜ່ລະບາດໜັກ ກະທົບຕໍ່ງານກິລາ ຊຽງຂວາງ ເກມ ຕ້ອງເລື່ອນອອກໄປແບບບໍ່ມີກຳນົດ

ນັບມາຮອດປັດຈຸບັນການແຜ່ລະບາດຂອງພະຍາດໂຄວິດ-19 ພວມແພ່ລາມໃນຫຼາຍກວ່າ 50 ປະເທດທົ່ວໂລກ ສົ່ງຜົນກະທົບຢ່າງໜັກຕໍ່ກັບທຸກຂົງເຂດວຽກງານ ທັງເສດຖະກິດ, ສັງຄົມ ແລະ ຊີວິດການເປັນຢູ່ຂອງປະຊາຊົນ ລວມເຖິງວຽກງານກິລາ-ກາຍຍະກຳ ກໍໄດ້ຮັບຜົນກະທົບເຊັ່ນກັນທັງໂອແລມປິກເກມ, ຢູໂຣ 2020 ແລະ ລາຍການ ອື່ນໆພວມຢູ່ໃນໄລຍະການທົບທວນຄືນວ່າຈະມີການເລື່ອນ ຫຼື ໂຈະການແຂ່ງຂັນໄວ້ກ່ອນ ເວົ້າລວມ, ເວົ້າສະເພາະແມ່ນ ສປປ ລາວ ຫຼ້າສຸດ ທ່ານລັດຖະມົນຕີ ກະຊວງສຶກສາທິການ ແລະ ກິລາ ໄດ້ອອກມາກ່າວຢືນຢັນແລ້ວວ່າ ສຳລັບງານມະຫະກຳກິລາແຫ່ງຊາດ ຄັ້ງທີ Xl “ຊຽງຂວາງ ເກມ” ທີ່ແຂວງຊຽງຂວາງ ຮັບກຽດເປັນເຈົ້າພາບ ລະຫວ່າງວັນທີ 22 ມີນາ ຫາ 1 ເມສາ 2020 ຈະເລື່ອນອອກໄປແບບບໍ່ມີກຳນົດ ເພື່ອຫຼີກລ້ຽງບັນຫາການແຜ່ລະບາດຂອງພະຍາດດັ່ງກ່າວ.

ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີ ກະຊວງສຶກສາທິການ ແລະ ກິລາ, ທັງເປັນປະທານຮ່ວມຈັດງານມະຫະກຳກິລາແຫ່ງຊາດ ຄັ້ງທີ XI ໃຫ້ສຳພາດຕໍ່ສື່ມວນຊົນ ເມື່ອວັນທີ 29 ກຸມພາ ຜ່ານມາ ທີ່ໂຮງແຮມແລນມາກ ນະຄອນຫຼວງວຽງຈັນ ເນື່ອງໃນໂອກາດທີ່ເຂົ້າຮ່ວມກອງປະຊຸມປະກາດແຕ່ງຕັ້ງຄະນະບໍລິຫານງານສະຫະພັນບານເຕະແຫ່ງຊາດ ຊຸດທີ 9 ໃຫ້ຮູ້ວ່າ: ລັດຖະບານ ເປັນເອກະພາບເຫັນດີໃຫ້ເລື່ອນງານກິລາ “ຊຽງຂວາງ ເກມ” ອອກໄປແບບບໍ່ມີກຳນົດ ເນື່ອງຈາກສະພາບການແຜ່ລະບາດຂອງພະຍາດໂຄວິດ-19 ຍັງໜ້າເປັນຫ່ວງ. ດັ່ງນັ້ນ, “ຄະນະຮັບຜິດຊອບຈັດງານ ໄດ້ຄົ້ນຄວ້າກັນແລ້ວ ເຫັນວ່າສະພາບການລະບາດຂອງພະຍາດໂຄວິດ-19 ຍັງມີຄວາມຮຸນແຮງ ແລະ ຄວາມສ່ຽງຫຼາຍ ຕາມການແນະນຳຂອງ ກະຊວງສາທາລະນະສຸກ ກໍຄື ຄະນະຮັບຜິດຊອບສະເພາະກິດ ກ່ຽວກັບການແກ້ໄຂພະຍາດໂຄວິດ-19 ທີ່ເຫັນວ່າ ທົ່ວໂລກກຳລັງປະສົບວິກິດດັ່ງກ່າວຢ່າງໜັກ”. ແນວໃດກໍຕາມ, ທ່ານລັດຖະມົນຕີ ກໍໄດ້ສະແດງຄວາມເຫັນໃຈຕໍ່ຄະນະກະກຽມຈັດງານກິລາແຫ່ງຊາດ ລວມທັງຄະນະຮັບຜິດຊອບທີມ ແລະ ນັກກິລາ ແຕ່ລະພາກສ່ວນ ທີ່ກຳລັງຫ້າງຫາກະກຽມເພື່ອເຂົ້າຮ່ວມ ລວມໄປເຖິງນັກທຸລະກິດ, ບໍລິສັດຫ້າງຮ້ານຕ່າງໆທີ່ໄດ້ທຸ້ມເທ ແລະ ປະກອບສ່ວນທຶນຮອນງົບປະມານເຂົ້າໃສ່ເປັນຈຳນວນຫຼວງຫຼາຍ ຊຶ່ງພວກເຮົາຈະໄດ້ຈັດກອງປະຊຸມ ເພື່ອຄົ້ນຄວ້າຫາທາງອອກນຳກັນໄວໆນີ້.

ທ່ານລັດຖະມົນຕີ ສສກ ຍັງໄດ້ເວົ້າເຖິງມາດຕາການຕ່າງໆໃນການເຝົ້າຕິດຕາມ ແລະ ປ້ອງກັນການແຜ່ລະບາດຂອງພະຍາດດັ່ງກ່າວ ໃນຂົງເຂດການສຶກສາ ຊຶ່ງກະຊວງ ສສກ ກໍກຽມພ້ອມຈະປະຕິບັດຕາມການແນະນຳ ຫຼື ແຈ້ງການຂອງກະຊວງກ່ຽວຂ້ອງ ກໍຄື ກະຊວງສາທາລະນະສຸກ ໃນການທີ່ຈະປະຕິບັດຕໍ່ຂົງເຂດການສຶກສາ. ແນວໃດກໍຕາມ, ທ່ານລັດຖະມົນຕີເນັ້ນໜັກວ່າ ສຳລັບແຈ້ງການເລື່ອນງານກິລາ “ຊຽງຂວາງ ເກມ” ຢ່າງເປັນທາງການ ແມ່ນຈະອອກມາໃນໄວໆນີ້.

      ສຳລັບງານມະຫະກຳກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງ ເປັນເຈົ້າພາບ ລະຫວ່າງວັນທີ 22 ມີນາ ຫາ 1 ເມສາ 2020 ແມ່ນຈະຊີງໄຊກັນທັງໝົດ 385 ຫຼຽນຄຳ, 385 ຫຼຽນເງິນ ແລະ 627 ຫຼຽນທອງ ໃນ 28 ປະເພດກິລາ ຄື: ແລ່ນ-ລານ, ລອຍນ້ຳ, ເຕະບານ, ດອກປີກໄກ່, ມວຍສາກົນ, ເທຄວັນໂດ, ມວຍລາວ, ຢູໂດ, ບານສົ່ງໃນຮົ່ມ-ຫາດຊາຍ, ບານບ້ວງ, ເທັນນິດ, ຍິງປືນ, ກະຕໍ້-ຊິນລອນ, ເປຕັງ, ປິ່ງປ່ອງ, ຊ່ວງເຮືອ, ຄາຣາເຕໂດ, ປັນຈັກສີລັດ, ມວຍປ້ຳ, ວູຊູ, ໜ້າເກັກ-ຍິງທະນູ, ໝາກຂ່າງ, ກັອບ, ໝາກເສິກ, ໝາກແລ້, ສະນຸກເກີ, ໂບລິ້ງ ແລະ ລົດຖີບ. ນອກນັ້ນ, ຍັງມີອີກປະເພດກິລາສາທິດ ຄືຣັກບີ້.

ຄະນະບໍລິຫານງານ ສຕລ ຊຸດໃໝ່ ພ້ອມຈະສືບຕໍ່ຈັດແຂ່ງຂັນໃຫ້ຫຼາຍຂຶ້ນ ຄົ້ນຫານັກເຕະດີເດັ່ນຕິດທີມຊາດ

 ຄະນະບໍລິຫານງານ ສະຫະພັນບານເຕະແຫ່ງຊາດລາວ ຫຼື ສຕລ ຊຸດທີ 9 ໂດຍ ທ່ານ ວີເພັດ ສີຫາຈັກ ຖືກເລືອກໃຫ້ເປັນປະທານ ສຕລ ອີກໜຶ່ງສະໄໝ ພ້ອມຮອງປະທານອີກ 4 ທ່ານ ໃນວາລະ 5 ປີ ລະຫວ່າງປີ 2020-2024 ຢືນຢັນພ້ອມຈະສືບຕໍ່ຈັດການແຂ່ງຂັນເຕະບານຊີງຂັນ ສຕລ ປະຈຳປີ ຢ່າງຕໍ່ເນື່ອງ ເພື່ອຊອກຫານັກກິລາທີມຊາດ ໃຫ້ໄດ້ຫຼາຍຂຶ້ນ ທັງປະເພດທີມຍິງ ແລະ ທີມຊາຍ ໄປຄຽງຄູ່ກັບການຈັດຝຶກອົບຮົມ ເພື່ອພັດທະນາຄູຝຶກ ແລະ ກໍາມະການຕັດສິນ ໃນທົ່ວປະເທດ.

        ເມື່ອວັນທີ 29 ກຸມພາ ຜ່ານມາ ທີ່ໂຮງແຮມແລນມາກ ນະຄອນຫຼວງວຽງຈັນ, ໄດ້ມີຈັດກອງປະຊຸມໃຫຍ່   ສະໄໝວິສາມັນຂອງສະຫະພັນບານເຕະແຫ່ງຊາດລາວ, ໂດຍໃຫ້ກຽດເຂົ້າຮ່ວມຂອງ ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ ທັງເປັນປະທານຄະນະກຳມະການໂອແລມປີກແຫ່ງຊາດລາວ (ຄອລ), ທ່ານ ບົວລານ ສິລິປັນຍາ ຮອງລັດຖະມົນຕີ ກະຊວງສຶກສາທິການ ແລະ ກິລາ, ຮອງປະທານ ຄອລ ແລະ ທ່ານ ວີເພັດ ສີຫາຈັກ ປະທານສະຫະພັນບານເຕະແຫ່ງຊາດລາວ ພ້ອມດ້ວຍຄະນະ, ມີຜູ້ຊ່ວຍລັດຖະມົນຕີ ສສກ ແລະ ຕົວແທນຈາກສະຫະພັນບານເຕະແຕ່ລະແຂວງທົ່ວປະເທດ ຕະຫຼອດຮອດບັນດາສະໂມສອນ ແລະ ສື່ມວນຊົນ.

          ໂອກາດນີ້, ທ່ານ ກະເສມ ອິນທະລາ ຮອງປະທານ ຄອລ ໄດ້ປະກາດຜົນການເລືອກຕັ້ງຄັ້ງນີ້ວ່າ: ຕາມກອງປະຊຸມໃຫຍ່ ສະໄໝວິສາມັນຂອງສະຫະພັນບານເຕະແຫ່ງຊາດລາວ ໄດ້ຕົກລົງເຫັນດີເລືອກເອົາ ທ່ານ ວີເພັດ ສີຫາຈັກ ປະທານ ສຕລ ຜູ້ເກົ່າໃຫ້ຮັບໜ້າທີ່ຕໍ່ໃນອີກໜຶ່ງສະໄໝ ໂດຍມີວາລະແຕ່ປີ 2020-2024 ໂດຍມີຮອງປະທານອີກ 4 ທ່ານຄື: ທ່ານ ປະສາດໄຊ ພິລາພັນເດຊ, ທ່ານ ຄໍາໄຜ່ ປຣະເສີດ, ທ່ານ ຄໍາແພງ ວົງຂັນຕີ ແລະ ທ່ານ ປະສິດ ສຸພາບ. ນອກນັ້ນ, ຍັງໄດ້ມີການເລືອກເອົາຕໍາແໜ່ງຄະນະກໍາມະການບໍລິຫານ ສຕລ ປະກອບມີ 6 ທ່ານຄື: ທ່ານ ດຣ.ໄຊຊະນະ ທອງຄໍາຈັນ, ທ່ານ ດຣ. ບຸນຍູ້ ສີສານ, ທ່ານ ນາງ ພູໄຊ ແພງພົງ, ທ່ານ ພັນໂທ ຖາວອນ ຫຼວງຈັນດາວົງ, ທ່ານ ພັກເອກ ທອງເພັດ ມະນີສະຫວັນ ແລະ ທ່ານ ດຣ.ຫວັນແກ້ວ ລາດສະບຸດ.

          ຂະນະດຽວກັນ, ທ່ານ ວີເພັດ ສີຫາຈັກ ໄດ້ກ່າວຮັບຕໍາແໜ່ງໃນວາລະແຕ່ປີ 2020-2024 ວ່າ: ສໍາລັບແຜນພັດທະນາກິລາບານເຕະ ສະໄໝທີ 9 ຈະມີຈຸດຫຼັກໆຄື ການພັດທະນາບານເຕະໃນຂອບເຂດທົ່ວປະເທດ ໂດຍຈະມີການຮ່ວມມືກັບບັນດາສະຫະພັນບານເຕະແຂວງ ແລະ ຈັດການແຂ່ງຂັນໃຫ້ໄດ້ທົ່ວປະເທດ ໃນຮຸ່ນອາຍຸ 12, 15, 18 ແລະ ສາຍ ກ ຊຶ່ງຜ່ານມາ ພວກເຮົາແມ່ນໄດ້ທົດລອງຢູ່ 5 ແຂວງແລ້ວ ຖືວ່າປະສົບຜົນສໍາເລັດ ແລະ ໃນປີ 2020-2024 ພວກເຮົາຈະຈັດໃຫ້ມີການຊີງຂັນເປັນປະຈໍາຂອງ ສຕລ ເພື່ອຊອກຫານັກກິລາທີມຊາດໃຫ້ໄດ້ຫຼາຍຂຶ້ນ ທັງປະເພດທີມຍິງ ແລະ ທີມຊາຍ ພ້ອມທັງຈັດຝຶກອົບຮົມ ເພື່ອພັດທະນາຄູຝຶກ ແລະ ກໍາມະການຕັດສິນ ໃນທົ່ວປະເທດໃຫ້ໄດ້ຫຼາຍຂຶ້ນ.

          ສໍາລັບຕະຫຼອດໄລຍະວາລະສະໄໝປີ 2015-2019 ພາຍໃຕ້ການເປັນປະທານ ສຕລ ຂອງ ທ່ານ ວີເພັດ ສີຫາຈັກ ແມ່ນໄດ້ຍາດແຍ່ງ ແລະ ສ້າງຜົນງານໄດ້ຫຼາຍຢ່າງເປັນຕົ້ນແມ່ນການເຮັດໃຫ້ວົງການບານເຕະລາວ ມີຫຼາຍລາຍການແຂ່ງຂັນ ແລະ ນັກເຕະລາວໄດ້ມີໂອກາດສະແດງຄວາມສາມາດຫຼາຍຂຶ້ນ ລວມເຖິງໄດ້ເປັນຕົວແທນຂອງທີມຊາດ ໂດຍສະເພາະມີການແຂ່ງຂັນ ເຕະບານ ສາຍ ກ, ຊີງຂັນ ສຕລ ຢູ-12, ຢູ-15, ຢູ-18 ແລະ ເຈະບານຕ່າງແຂວງຢ່າງຟົດຟື້ນ ເພີ່ມຂຶ້ນຕໍ່ຈາກ ລາວ ພຣີເມຍລີກ ລີກສູງສຸດຂອງປະເທດ. ນອກນັ້ນ, ກໍຍັງການສ້ອມແປງອາຄານຢູ່ສູນຝຶກບານແຫ່ງຊາດ (ຫ້ວຍຫົງ) ແລະ ໂຄງການກໍ່ສ້າງເດີ່ນຝຶກຊ້ອມ 2 ເດີ່ນ ຢູ່ສູນຝຶກເຕະບານ S5 (ຫຼັກ 16) ແລະ ອື່ນໆອີກຫຼາຍຢ່າງ.

ສສກ ເລືອກໄດ້ຄະນະບໍລິຫານງານກໍາມະບານ ສະໄໝ IX

 ສະຫະພັນກໍາມະບານ ກະຊວງສຶກສາທິການ ແລະ ກິລາ (ສສກ) ເລືອກໄດ້ຄະນະບໍລິຫານງານຊຸດໃໝ່ ສະໄໝທີ IX ເພື່ອສືບຕໍ່ຊີ້ນໍານໍາພາການເຄື່ອນໄຫວວຽກງານໃຫ້ບຸກທະລຸໄດ້ພາລະໜ້າທີ່ ຂອງສະຫະພັນກໍາມະບານວາງອອກຢ່າງຮອບດ້ານ, ບຸກທະລຸຕາມນະໂຍບາຍຂອງພັກ, ກໍ່ສ້າງສະມາຊິກກໍາມະບານໃຫ້ມີຄວາມຮູ້ຄວາມສາມາດໃນການແຂ່ງຂັນ ເປັນກໍາລັງແຮງປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາຂອງຂະແໜງການສຶກສາ ແລະ ກິລາໃຫ້ສໍາເລັດຕາມຄາດໝາຍທີ່ວາງໄວ້.

      ເມື່ອວັນທີ 25 ກຸມພາ ຜ່ານມາ ທີ່ສະໂມສອນມະຫາວິທະຍາໄລແຫ່ງຊາດ, ໄດ້ມີກອງປະຊຸມໃຫຍ່ຜູ້ແທນສະຫະພັນກໍາມະບານ ກະຊວງສຶກສາທິການ ແລະ ກິລາ ຄັ້ງທີ IX, ໂດຍເປັນກຽດເຂົ້າຮ່ວມຂອງສະຫາຍ ນາງ ແສງເດືອນ ຫຼ້າຈັນທະບູນ ກໍາມະການສູນກາງພັກ ເລຂາຄະນະພັກ ລັດຖະມົນຕີ ກະຊວງສຶກສາທິການ ແລະ ກິລາ, ສະຫາຍ ນາງ ອາລີ ວົງໜໍ່ບຸນທໍາ ຮອງປະທານສູນກາງສະຫະພັນກໍາມະບານລາວ, ສະຫາຍ ນາງ ຂັນທະລີ ສີຣິພົງພັນ ຄະນະປະຈໍາພັກກະຊວງ ຜູ້ຊີ້ນໍາວຽກງານອົງການຈັດຕັ້ງມະຫາຊົນ ຮອງລັດຖະມົນຕີ ກະຊວງສຶກສາທິການ ແລະ ກິລາ, ພ້ອມດ້ວຍປະທານສະຫະພັນກໍາມະບານກະຊວງ, ແມ່ຍິງ, ຊາວໜຸ່ມ, ຄະນະພັກ, ເລຂາຄະນະພັກຮາກຖານອ້ອມຂ້າງກະຊວງ, ຕາງໜ້າອົງການຈັດຕັ້ງມະຫາຊົນ, ຫົວໜ້າ-ຮອງຫົວໜ້າກົມ, ຄະນະບໍລິຫານງານ-ຮາກຖານສະຫະພັນກໍາມະບານທົ່ວກະຊວງສຶກສາທິການ ແລະ ກິລາຢ່າງພ້ອມພຽງ.

ໃນກອງປະຊຸມດັ່ງກ່າວ, ໄດ້ຄົ້ນຄວ້າ ແລະ ປະກອບຄໍາຄິດຄໍາເຫັນໃສ່ຮ່າງບົດລາຍງານການເມືອງ, ທິດທາງແຜນການເຄື່ອນໄຫວ 5 ປີ 2020-2025 ແລະ ບົດສໍາຫຼວດການນໍາພາລວມ ຂອງຄະນະຊຸດເກົ່າ. ໃນນັ້ນ, ໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ ແລະ ບົດຮຽນທີ່ຖອດຖອນໄດ້ໃນການຊີ້ນໍານໍາພາ, ໄດ້ມອບໃບຍ້ອງຍໍ, ໃບຊົມເຊີຍໃຫ້ແກ່ສະມາຊິກຜູ້ມີຜົນງານດີເດັ່ນ. ພ້ອມກັນນີ້, ກອງປະຊຸມຍັງໄດ້ເປັນເອກະສັນຮັບຮອງເອົາບົດລາຍງານການເມືອງ ແລະ ທິດທາງແຜນການເຄື່ອນໄຫວ 5 ປີຕໍ່ໜ້າ (2020-2025), ຮັບຟັງການລາຍງານ ແລະ ການປະກອບຄໍາຄິດຄໍາເຫັນຈາກຜູ້ຕາງໜ້າອົງການຈັດຕັ້ງສະຫະພັນແມ່ຍິງ ແລະ ອົງການຈັດຕັ້ງຊາວໜຸ່ມ ກະຊວງສຶກສາທິການ ແລະ ກິລາ. ນອກຈາກນັ້ນ, ກອງປະຊຸມໄດ້ຮັບຟັງການປະກອບຄໍາຄິດຄໍາເຫັນຈາກສະຫາຍນາງ ແສງເດືອນ ຫຼ້າຈັນທະບູນ ກໍາມະການສູນກາງພັກ, ເລຂາຄະນະພັກ, ລັດຖະມົນຕີກະຊວງສຶກສາທິການ ແລະ ກິລາ ດ້ວຍເນື້ອໃນອັນມີຄວາມໝາຍເລິກເຊິ່ງ ພ້ອມທັງກ່າວຍ້ອງຍໍຊົມເຊີຍ ແລະ ອວຍພອນກອງປະຊຸມໃຫ້ປະສົບຜົນສໍາເລັດຕາມຄາດໝາຍ, ຊຶ່ງການລາຍງານ ແລະ ການປະກອບຄໍາເຫັນຂອງພາກສ່ວນຕ່າງໆນັ້ນ ເປັນການຢັ້ງຢືນເຖິງຜົນງານ ແລະ ຜົນສໍາເລັດໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ສະໄໝທີ VII ຂອງສູນກາງສະຫະພັນກໍາມະບານລາວ ແລະ ມະຕິກອງປະຊຸມໃຫຍ່ຂັ້ນຂອງຕົນໃນໄລຍະຜ່ານມາ ແລະ ສະແດງໃຫ້ເຫັນເຖິງຄວາມເປັນເອກະພາບຕໍ່ບົດລາຍງານການເມືອງ ແລະ ທິດທາງແຜນການໃນຕໍ່ໜ້າ ອັນໄດ້ເຮັດໃຫ້ກອງປະຊຸມໃຫຍ່ຄັ້ງນີ້ມີເນື້ອໃນອຸດົມສົມບູນຂຶ້ນຕື່ມ.

      ຫຼັງຈາກນັ້ນ, ຜູ້ແທນກອງປະຊຸມໄດ້ໃຊ້ສິດປະຊາທິປະໄຕຂອງຕົນ ເລືອກຕັ້ງເອົາຄະນະບໍລິຫານງານສະຫະພັນກໍາມະບານ ກະຊວງສຶກສາທິການ ແລະ ກິລາຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ ແລະ ຖືກຕ້ອງ, ສອດຄ່ອງກັບມາດຕະຖານ, ເງື່ອນໄຂທີ່ໄດ້ກໍານົດໄວ້ໃນລະບຽບຂອງສະຫະພັນກໍາມະບານລາວ, ຊຶ່ງມີຜູ້ເຂົ້າຮັບສະໝັກເລືອກຕັ້ງທັງໝົດ 25 ສະຫາຍ ແລະ ເລືອກໄດ້ 17 ສະຫາຍ, ຍິງ 4 ສະຫາຍ ເພື່ອສືບຕໍ່ຊີ້ນໍານໍາພາການເຄື່ອນໄຫວວຽກງານຂອງສະຫະພັນກໍາມະບານ ກະຊວງສຶກສາທິການ ແລະ ກິລາ, ກອງປະຊຸມຄົບຄະນະບໍລິຫານງານສະຫະພັນກໍາມະບານ ກະຊວງສຶກສາທິການ ແລະ ກິລາຄັ້ງປະຖົມມະລຶກໄດ້ເຫັນດີເປັນເອກະພາບເລືອກເອົາ ສະຫາຍ ຮສ.ປອ ອານຸລົມ ວິໄລພອນ ເປັນປະທານຄະນະບໍລິຫານງານ ສະຫະພັນກໍາມະບານ ກະຊວງສຶກສາທິການ ແລະ ກິລາ ແລະ ເລືອກເອົາ 4 ສະຫາຍເປັນຮອງປະທານ ຄື: ສະຫາຍ ບຸນທອນ ສຸຂະວົງ, ສະຫາຍ  ນາງ ສິງທອງ ສີສະຫວັດ, ສະຫາຍ ສີສະໝຸດ ແສນບຸດຕະລາດ ແລະ ສະຫາຍ ອຸ່ນຄໍາ ອວນສະຫວັນ ແລະ ອີກ 11 ສະຫາຍ ເປັນຄະນະບໍລິຫານງານສະຫະພັນກໍາມະບານ ກະຊວງສຶກສາທິການ ແລະ ກິລາ.

ຂະນະດຽວກັນ, ສະຫາຍ ນາງ ອາລີ ວົງໜໍ່ບຸນທໍາ ໄດ້ກ່າວສະແດງຄວາມຊົມເຊີຍຜົນງານອັນໃຫຍ່ຫຼວງຂອງສະຫະພັນກໍາມະບານ ກະຊວງສຶກສາທິການ ແລະ ກິລາ ທີ່ຍາດມາໄດ້ໃນຕະຫຼອດ 5 ປີ ທີ່ຜ່ານມາ ແລະ ມີບາງດ້ານທີ່ຕ້ອງໄດ້ເອົາໃຈໃສ່ແກ້ໄຂໃນຕໍ່ໜ້າ. ພ້ອມກັນນັ້ນ, ສະຫາຍຍັງໄດ້ຮຽກຮ້ອງໃຫ້ສະຫະພັນກໍາມະບານສົມທົບກັບຄະນະພັກ, ອົງການປົກຄອງ, ອົງການຈັດຕັ້ງແມ່ຍິງ ແລະ ຊາວໜຸ່ມ ໃນການສຶກສາອົບຮົມແນວຄິດການເມືອງຂອງສະມາຊິກກໍາມະບານໃຫ້ບຸກທະລຸໄດ້ພາລະໜ້າທີ່ຂອງສະຫະພັນກໍາມະບານວາງອອກຢ່າງຮອບດ້ານ, ບຸກທະລຸຕາມນະໂຍບາຍຂອງພັກ, ກໍ່ສ້າງສະມາຊິກກໍາມະບານໃຫ້ມີຄວາມຮູ້ຄວາມສາມາດໃນການແຂ່ງຂັນ ເປັນກໍາລັງແຮງປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາຂອງຂະແໜງການສຶກສາ ແລະ ກິລາ ໃຫ້ສໍາເລັດຕາມຄາດໝາຍທີ່ວາງໄວ້. ກອງປະຊຸມໃຫຍ່ຍັງຮຽກຮ້ອງມາຍັງຄະນະນໍາຂອງສະຫະພັນກໍາມະບານທຸກຂັ້ນ, ສະມາຊິກກໍາມະບານທຸກສະຫາຍໃນທົ່ວກະຊວງສຶກສາທິການ ແລະ ກິລາ ຈົ່ງພ້ອມກັນເປັນຈິດໜຶ່ງໃຈດຽວ ເພີ່ມທະວີຄວາມສາມັກຄີເປັນປຶກແຜ່ນ, ມີຄວາມດຸໝັ່ນ, ຂະຫຍັນອົດທົນຜ່ານຜ່າທຸກຂໍ້ຫຍຸ້ງຍາກ ແລະ ພ້ອມກັນສູ້ຊົນປະຕິບັດມະຕິກອງປະຊຸມໃຫຍ່ສະໄໝທີ IX ຂອງສະຫະພັນກໍາມະບານ ກະຊວງສຶກສາທິການ ແລະ ກິລາໃຫ້ມີຜົນສໍາເລັດຢ່າງສະງ່າງາມ.

(ບຸນທະວີ)

ແມ່ຍິງ ສສກ ປັບປຸງແບບແຜນວິທີເຮັດວຽກ ວິທີນຳພາໃຫ້ແມ່ຍິງແຕ່ລະຂັ້ນ

ສະຫະພັນແມ່ຍິງ ກະຊວງສຶກສາທິການ ແລະ ກິລາ (ສສກ) ໄດ້ຈັດກອງປະຊຸມປັບປຸງແບບແຜນວິທີເຮັດວຽກ, ວິທີນຳພາໃຫ້ຄະນະສະຫະພັນແມ່ຍິງແຕ່ລະຂັ້ນທົ່ວກະຊວງ ເພື່ອສ້າງຄວາມເຂັ້ມແຂງໃຫ້ແກ່ຄະນະສະຫະພັນແມ່ຍິງແຕ່ລະຂັ້ນໃນການຈັດຕັ້ງປະຕິບັດວຽກງານຊີ້ນຳນຳພາ, ວຽກງານຂະບວນການ 3 ດີ ໃຫ້ໄດ້ຮັບປະສິດທິຜົນດີ ແລະ ສ້າງຄວາມຮັບຮູ້ຄວາມເຂົ້າໃຈຢ່າງເລິກເຊິ່ງຕໍ່ຄວາມສຳຄັນຂອງວຽກງານກວດກາ ແລະ ສາມາດນຳໄປຈັດຕັ້ງປະຕິບັດໃຫ້ມີປະສິດທິຜົນ ແລະ ມີຄວາມຍືນຍົງ.

ກອງປະຊຸມດັ່ງກ່າວ, ໄດ້ຂຶ້ນເມື່ອວັນທີ 26 ກຸມພາ ຜ່ານມາ ທີ່ຫ້ອງປະຊຸມໃຫຍ່ ຄະນະກຳມະການໂອແລັມປິກແຫ່ງຊາດລາວ ໂດຍພາຍໃຕ້ການເປັນປະທານຂອງສະຫາຍ ນາງ ຂັນທະລີ ສີຣິພົງພັນ ຄະນະປະຈຳພັກ, ຜູ້ຊີ້ນຳວຽກງານອົງການຈັດຕັ້ງມະຫາຊົນ, ຮອງລັດຖະມົນຕີ ກະຊວງສຶກສາທິການ ແລະ ກິລາ, ມີສະຫາຍ ນາງ ບົວຄຳ ດາວສະຫວັນ ຄະນະບໍລິຫານງານສູນກາງສະຫະພັນແມ່ຍິງລາວ, ປະທານສະຫະພັນແມ່ຍິງກະຊວງ, ຮອງຫົວໜ້າກົມຈັດຕັ້ງ ແລະ ພະນັກງານ ກະຊວງສຶກສາທິການ ແລະ ກິລາ, ພ້ອມດ້ວຍບັນດາຄະນະບໍລິຫານງານ ສະຫະພັນແມ່ຍິງພາຍໃນກະຊວງ, ຜູ້ຮັບຜິດຊອບວຽກງານ 3 ດີຈາກສະຫະພັນແມ່ຍິງຮາກຖານພາກລັດ ແລະ ເອກະຊົນທົ່ວກະຊວງເຂົ້າຮ່ວມ.

ໃນໂອກາດດັ່ງກ່າວ, ສະຫາຍ ນາງ ຂັນທະລີ ສີຣິພົງພັນ ໄດ້ກ່າວວ່າ: ການຈັດກອງປະຊຸມຄັ້ງນີ້ ແມ່ນມີຄວາມໝາຍຄວາມສຳຄັນຫຼາຍ ເພາະເປັນກອງປະຊຸມປັບປຸງແບບແຜນວິທີເຮັດວຽກ, ວິທີນຳພາໃຫ້ຄະນະສະຫະພັນແມ່ຍິງແຕ່ລະຂັ້ນທົ່ວກະຊວງ ເພື່ອສ້າງຄວາມເຂັ້ມແຂງໃຫ້ແກ່ຄະນະສະຫະພັນແມ່ຍິງແຕ່ລະຂັ້ນໃນການຈັດຕັ້ງປະຕິບັດວຽກງານຊີ້ນຳນຳພາ, ວຽກງານຂະບວນການ 3 ດີໃຫ້ໄດ້ຮັບປະສິດທິຜົນດີ ແລະ ສ້າງຄວາມຮັບຮູ້ຄວາມເຂົ້າໃຈຢ່າງເລິກເຊິ່ງຕໍ່ຄວາມສຳຄັນຂອງວຽກງານກວດກາ ແລະ ສາມາດນຳໄປຈັດຕັ້ງປະຕິບັດໃຫ້ມີປະສິດທິຜົນ ແລະ ມີຄວາມຍືນຍົງ. ພ້ອມກັນນັ້ນ, ຍັງຈະໄດ້ພ້ອມກັນທົບທວນຄືນມູນເຊື້ອຂອງສະຫະພັນແມ່ຍິງ, ແລກປ່ຽນທາງດ້ານທິດສະດີ ແລະ ດ້ານການປະຕິບັດຕົວຈິງ, ວຽກງານສ້າງຂະບວນການ 3 ດີ, ວຽກງານຕິດຕາມກວດກາ ແລະ ວຽກງານອື່ນໆ ທີ່ຈະໄດ້ພ້ອມກັນປຶກສາຫາລືກະກຽມເນື້ອໃນລະອຽດ.

ຂະນະດຽວກັນນັ້ນ, ສະຫາຍຍັງໄດ້ກ່າວໃຫ້ຮູ້ເຖິງທິດສະດີ ແລະ ແນວທາງໃນການຊີ້ນຳການປະຕິບັດຕົວຈິງ ແມ່ນຕ້ອງມີຄຸນທາດການເມືອງສິນທຳປະຕິວັດໜັກແໜ້ນ, ມີທັກສະຊຳນິຊຳນານວຽກງານທີ່ຕົນຮັບຜິດຊອບ, ຮູ້ຈັກວຽກງານທິດສະດີ ແລະ ການປະຕິບັດຕົວຈິງຄວບຄູ່ກັນໄປ, ມີຄວາມເປັນແບບຢ່າງນຳໜ້າ, ເປັນຜູ້ນຳທີ່ມີການປ່ຽນແປງໄປຕາມແນວທາງລະບຽບກົດໝາຍ, ຟັງຄຳເຫັນ ແລະ ກຳແໜ້ນມະຫາຊົນ ພ້ອມທັງມີມະນຸດສຳພັນດີ, ການເຮັດວຽກງານຕ້ອງມີການຕິດຕາມກວດກາໃຫ້ລະອຽດ ແລະ ມີການວາງແຜນການໜ້າວຽກໃຫ້ລະອຽດ ແລະ ໄດ້ຮຽກຮ້ອງມາຍັງຜູ້ຮັບຜິດຊອບວຽກງານ 3 ດີຈາກສະຫະພັນແມ່ຍິງຮາກຖານພາກລັດ ແລະ ເອກະຊົນທຸກຂັ້ນ ຈົ່ງພ້ອມກັນສຸມສະຕິປັນຍາເຂົ້າໃນວຽກງານທີ່ຮັບຜິດຊອບໃຫ້ເກີດດອກອອກຜົນຢ່າງສູງສຸດ.

ນອກຈາກນີ້, ກອງປະຊຸມຍັງໄດ້ລາຍງານແບບແຜນວິທີເຮັດວຽກ ແລະ ການນຳພາທາງດ້ານການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂອງຕົນ, ການສ້າງແຜນດຳເນີນງານຂອງສະຫະພັນແມ່ຍິງໄລຍະ 5 ປີ, ການຜັນຂະຫຍາຍແຜນພັດທະນາແມ່ຍິງໄລຍະ 5 ປີ, ລາຍງານວຽກງານກວດກາດ້ານເນື້ອໃນ ແລະ ເປົ້າໝາຍຂອງວຽກງານກວດກາ, ພາລະບົດບາດ, ໜ້າທີ່ ແລະ ຂອບເຂດສິດພື້ນຖານຂອງຄະນະກວດກາແຕ່ລະຂັ້ນ, ວິທີສ້າງແຜນການກວດກາແຕ່ລະຂັ້ນ, ບາດກ້າວ ແລະ ຂັ້ນຕອນການກວດກາ; ວຽກງານຂະບວນການ 3 ດີ ດ້ານການແນະນຳການຈັດຕັ້ງປະຕິບັດວຽກງານຂະບວນການ 3 ດີ, ການສ້າງແບບຟອມຄັດເລືອກບຸກຄົນດີເດັ່ນ, ບຸກຄົນຕົວແບບ ແລະ ກົມກອງດີເດັ່ນ ພ້ອມທັງສົນທະນາແລກປ່ຽນບົດຮຽນຮ່ວມກັນ.

ບົວລະພາ

ອົງຄະນະພັກ ສສກ ຜັນຂະຫຍາຍເນື້ອໃນກອງປະຊຸມວຽກງານກວດທົ່ວປະເທດ 2019

ອົງຄະນະພັກ ກະຊວງສຶກສາທິການ ແລະ ກິລາ (ສສກ) ຈັດກອງປະຊຸມຜັນຂະຫຍາຍເນື້ອໃນຈິດໃຈຂອງກອງປະຊຸມວຽກງານກວດທົ່ວປະເທດ ປະຈໍາປີ 2019 ໃນວັນທີ 27 ກຸມພາ ຜ່ານມາ ທີ່ສະໂມສອນ ມະຫາວິທະຍາໄລແຫ່ງຊາດ ໂດຍການເປັນປະທານຂອງສະຫາຍ ນາງ ແສງເດືອນ ຫຼ້າຈັນທະບູນ ກໍາມະການສູນກາງພັກ, ເລຂາຄະນະພັກກະຊວງ, ລັດຖະມົນຕີ ກະຊວງສຶກສາທິການ ແລະ ກິລາ, ສະຫາຍ ໄຊຄໍາ ອຸ່ນມີໄຊ ຮອງປະທານຄະນະກວດກາສູນກາງພັກ, ສະຫາຍ ນາງ ຂັນທະລີ ສີຣິພົງພັນ ຄະນະປະຈໍາພັກກະຊວງ, ປະທານຄະນະກວດກາພັກກະຊວງ, ຮອງລັດຖະມົນຕີ ກະຊວງສຶກສາທິການ ລະ ກິລາ, ມີບັນດາຮອງເລຂາຄະນະພັກກະຊວງ, ຄະນະປະຈໍາພັກ, ຄະນະພັກ, ຄະນະນໍາຄະນະກວດກາ, ພ້ອມດ້ວຍຜູ້ແທນຈາກພາກສ່ວນອ້ອມຂ້າງກະຊວງສຶກສາທິການ ແລະ ກິລາເຂົ້າຮ່ວມ.

ໃນກອງປະຊຸມ,  ສະຫາຍ ນາງ ແສງເດືອນ ຫຼ້າຈັນທະບູນ ໄດ້ກ່າວໃຫ້ຮູ້ວ່າ: ກອງປະຊຸມຄັ້ງນີ້, ເປັນກອງປະຊຸມທີ່ເຕັມໄປດ້ວຍຄວາມໝາຍຄວາມສໍາຄັນ, ຊຶ່ງໃນໜຶ່ງປີຜ່ານມາ ພາຍໃຕ້ການນໍາພາຂອງພັກ ໂດຍຄວາມຮັບຜິດຊອບຂອງຄະນະພັກທຸກຂັ້ນ ຈົນສາມາດບັນລຸໄດ້ບັນດາຄາດໝາຍທີ່ມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ກອງປະຊຸມໃຫຍ່ ຄັ້ງທີ VIII ຂອງອົງຄະນະພັກ ກະຊວງສຶກສາທິການ ແລະ ກິລາໄດ້ວາງອອກ ມີຜົນສໍາເລັດຕາມຄາດໝາຍ, ການຄຸ້ມຄອງບໍລິຫານໄດ້ຮັບການປັບປຸງ ແລະ ຄຸ້ມຄອງດ້ວຍກົດໝາຍ ແລະ ນິຕິກໍາ, ວຽກງານຕິດຕາມກວດກາ ໄດ້ສອດຫ້ອຍ ແລະ ດໍາເນີນໄປໃນທຸກຂົງເຂດວຽກງານ, ຄະນະພັກ ແລະ ຄະນະກວດກາແຕ່ລະຂັ້ນໄດ້ເອົາໃຈໃສ່ຫຼາຍຂຶ້ນຕໍ່ວຽກງານຕິດຕາມ-ກວດກາ ແລະ ຕ້ານການສໍ້ລາດບັງຫຼວງ ເຮັດໃຫ້ສະພາບຫຍໍ້ທໍ້ຕ່າງໆໃນກົງຈັກການຈັດຕັ້ງ ແລະ ໃນຖັນແຖວສະມາຊິກພັກໄດ້ຮັບການແກ້ໄຂເທື່ອລະກ້າວ.

ທັງນີ້, ເປັນການປະກອບສ່ວນອັນສໍາຄັນເຂົ້າໃນການພັດທະນາການສຶກສາ ແລະ ກິລາ, ທັງເປັນການປະກອບສ່ວນເຂົ້າໃນການປັບປຸງວຽກງານປ້ອງກັນພັກ-ພະນັກງານ, ການປັບປຸງ ແລະ ສ້າງໜ່ວຍພັກໃຫ້ມີຄວາມປອດໃສ, ພ້ອມທັງເປັນການສະກັດກັ້ນ ແລະ ຕ້ານປະກົດການແຕ່ຫົວທີ. ດັ່ງນັ້ນ, ຕ້ອງຮັບຮູ້ວ່າການຕິດຕາມ-ກວດກາການສະກັດກັ້ນ ແລະ ຕ້ານການສໍ້ລາດບັງຫຼວງ ແມ່ນວຽກງານໜຶ່ງສໍາຄັນ, ແມ່ນຄວາມຮັບຜິດຊອບໂດຍກົງຂອງຄະນະພັກ ແລະ ອົງການປົກຄອງແຕ່ລະຂັ້ນ ຖ້າບໍ່ມີການຕິດຕາມ-ກວດກາ ກໍໝາຍຄວາມວ່າບໍ່ມີການນໍາພາໃນເງື່ອນໄຂທີ່ທາງກະຊວງສຶກສາທິການ ແລະ ກິລາ ພວມສືບຕໍ່ປະຕິບັດແຜນພັດທະນາການສຶກສາ ແລະ ກິລາ ປະຈໍາປີ 2020, ຊຶ່ງເປັນປີມ້ວນທ້າຍຂອງການປະຕິບັດແຜນພັດທະນາການສຶກສາ 5 ປີ (2016-2020) ແລະ ຈັດຕັ້ງດໍາເນີນກອງປະຊຸມໃຫຍ່ 3 ຂັ້ນຂອງອົງຄະນະພັກກະຊວງ ຍິ່ງຕ້ອງເພີ່ມທະວີວຽກງານຕິດຕາມກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງ ເພື່ອເຮັດໃຫ້ສໍາເລັດໜ້າທີ່ວິຊາສະເພາະ ແລະ ໜ້າທີ່ການເມືອງດ້ວຍຄວາມໜັກແໜ້ນ ແລະ ເຂັ້ມແຂງ.

ນອກຈາກນັ້ນ, ໃນກອງປະຊຸມຍັງໄດ້ພ້ອມກັນຕີລາຄາການຈັດຕັ້ງປະຕິບັດວຽກງານຕິດຕາມກວດກາຂອງຄະນະກວດກາອົງຄະນະພັກກະຊວງໃນ 1 ປີຜ່ານມາ ໂດຍສະເພາະວຽກງານຕິດຕາມກວດກາພາຍໃນພັກ, ຕິດຕາມກວດກາການບໍລິຫານລັດ ແລະ ກວດກາຕ້ານການສໍ້ລາດບັງຫຼວງ, ຊອກໃຫ້ເຫັນດ້ານດີ-ດ້ານຕັ້ງໜ້າ, ດ້ານອ່ອນ-ຂໍ້ຄົງຄ້າງ, ສາເຫດ ແລະ ບົດຮຽນທີ່ຖອນຖອນໄດ້. ພ້ອມກັນນີ້, ໄດ້ກໍານົດທິດທາງການເຄື່ອນໄຫວວຽກງານຕິດຕາມກວດກາ ທີ່ຈະຕ້ອງໄດ້ສຸມໃສ່ຈັດຕັ້ງປະຕິບັດ ໃນປີ 2020 ແລະ ຍັງໄດ້ເຊື່ອມຊຶມເອກະສານທີ່ສໍາຄັນຕ່າງໆ.

ສໍາລັບກອງປະຊຸມດັ່ງກ່າວ, ແມ່ນໄດ້ດໍາເນີນເປັນເວລາ 2 ວັນ (ວັນທີ 27-28 ກຸມພາ 2020), ຊຶ່ງໄດ້ມີຮັບຟັງການສະຫຼຸບລາຍງານວຽກງານຕິດຕາມກວດກາ ປີ 2019 ແລະ ທິດທາງແຜນການວຽກງານກວດກາ ປີ 2020 ຂອງຄະນະກວດກາພັກກະຊວງ ສສກ, ເຜີຍແຜ່ບົດສະຫຼຸບຫຍໍ້ການເຄື່ອນໄຫວວຽກງານປະຈຳປີ 2019 ແລະ ທິດທາງວຽກງານກວດກາປະຈຳປີ 2020 ຂອງຄະນະກວດກາສູນກາງພັກ, ເຜີຍແຜ່ບົດໂອ້ລົມຂອງ ສະຫາຍ ປອ ບຸນທອງ ຈິດມະນີ ກໍາມະການກົມການເມືອງ, ເລຂາທິການສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ເຜີຍແຜ່ຂໍ້ກົດນົດວ່າດ້ວຍການຄົ້ນຄວ້າພິຈາລະນາແກ້ໄຂຄໍາຮ້ອງຟ້ອງ, ຮ້ອງທຸກ ແລະ ຄໍາສະເໜີ, ເຜີຍແຜ່ເອກະສານວັນຕ້ານການສໍ້ລາດບັງຫຼວງສາກົນ ຄົບຮອບ 16 ປີ, ປະກອບຄໍາເຫັນຫົວຂໍ້: ການຮັບ, ຄົ້ນຄວ້າ ແລະ ແກ້ໄຂ ກ່ຽວກັບ 3 ສາຍດ່ວນ (ກະຊວງ ສສກ, ສະພາແຫ່ງຊາດ ແລະ ຫ້ອງວ່າການລັດຖະບານ) ທີ່ສົ່ງເຖິງກະຊວງ ສສກ, ການກະກຽມ ແລະ ຊຸກຍູ້ຕິດຕາມກອງປະຊຸມ 3 ຂັ້ນຂອງອົງຄະນະພັກກະຊວງ ສສກ, ການສະກັດກັ້ນ ແລະ ແກ້ໄຂ ບັນຫາປະກົດການຫຍໍ້ທໍ້ຂອງນັກສຶກສາ ມະຫາວິທະຍາໄລແຫ່ງຊາດ, ການສະກັດກັ້ນ ແລະ ແກ້ໄຂບັນຫາ ໃນການສອບເສັງຈົບຊັ້ນສາຍສາມັນສຶກສາ, ບົດຮຽນໃນການສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ຂອງໜ່ວຍພັກວິທະຍາໄລ, ເຜີຍແຜ່ເອກະສານມູນເຊື້ອວັນສ້າງຕັ້ງອົງການກວດກາພັກ-ລັດ ແລະ ຮັບຟັງຄໍາເຫັນດ້ານວິຊາການຈາກຄະນະກວດກາສູນກາງພັກ, ພ້ອມທັງຮັບຟັງຄໍາໂອ້ລົມຈາກຂັ້ນເທິງ.

 ໂດຍ: ນາງ ຕຸ່ນຄໍາ

ບໍລິຄຳໄຊ ຈະສົ່ງທັບນັກກິລາເກືອບ 200 ຄົນ ຮ່ວມຊີງໄຊໃນ ຊຽງຂວາງ ເກມ ພ້ອມຕັ້ງເປົ້າ 5 ຫຼຽນຄຳ

ນັບມາຮອດປັດຈຸບັນ ແຂວງບໍລິຄຳໄຊ ມີຄວາມພ້ອມແລ້ວເຕັມ 100% ທີ່ຈະສົ່ງທັບນັກກິລາ ຈຳນວນ 170 ຄົນ ໃນ 7 ປະເພດກິລາ ເຂົ້າຮ່ວມຊີງໄຊໃນງານມະຫະກຳກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງ ເປັນເຈົ້າພາບ ລະຫວ່າງວັນທີ 22 ມີນາ ຫາ 1 ເມສາ 2020 ພ້ອມຕັ້ງເປົ້າຈະພະຍາຍາມສູ້ຊົນຍາດໃຫ້ໄດ້ບໍ່ຫຼຸດ 5 ຫຼຽນຄຳ.  

      ອີງຕາມການລາຍງານຂອງ ທ່ານ ຄຳມອນ ອ້ວນວິໄລ ຫົວໜ້າຂະແໜງກິລາລະດັບສູງ ພະແນກສຶກສາທິການ ແລະ ກິລາ ແຂວງບໍລິຄຳໄຊ ໃຫ້ຮູ້ວ່າ: ນັບມາຮອດປັດຈຸບັນ ແຂວງບໍລິຄຳໄຊ ມີຄວາມພ້ອມເຕັມ 100% ໃນການກຽມຄວາມພ້ອມສົ່ງຄະນະນຳ, ຄູຝຶກ ແລະ ນັກກິລາ ຈຳນວນ 170 ຄົນ ໃນ 7 ປະເພດກິລາ ຄື: ແລ່ນ-ລານ, ຊ່ວງເຮືອ, ໝາກເສິກ, ເປຕັງ, ເທຄວັນໂດ, ກັອບ ແລະ ມວຍລາວ ເຂົ້າຮ່ວມຊີງໄຊຫຼຽນຄຳ ໃນງານມະຫະກຳກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງ ເປັນເຈົ້າພາບ ລະຫວ່າງວັນທີ 22 ມີນາ ຫາ 1 ເມສາ 2020.

ສຳລັບນັກກິລາທັງ 7 ປະເພດແມ່ນເລີ່ມເຂົ້າສູນເກັບຕົວຝຶກຊ້ອມ ນັບແຕ່ວັນທີ 17 ກຸມພາ ເປັນຕົ້ນມາ ຮອດປັດຈຸບັນ ເຫັນໄດ້ວ່ານັກກິລາຂອງພວກເຮົາມີຄວາມກະຕືລືລົ້ນ ແລະ ເອົາໃຈໃສ່ມຸ່ງໝັ້ນໃນການຝຶກຊ້ອມຢ່າງຫ້າວຫັນ ຊຶ່ງໃນງານກິລາແຫ່ງຊາດຄັ້ງນີ້ ພວກເຮົາຕັ້ງເປົ້າຈະພະຍາຍາມສູ້ຊົນຍາດໃຫ້ໄດ້ບໍ່ຫຼຸດ 5 ຫຼຽນຄຳ ໂດຍກິລາປາຍແຫຼມຄວາມຫວັງຫຼຽນຄຳແມ່ນຝາກໄວ້ທີ່ກິລາແລ່ນ-ລານ, ຊ່ວງເຮືອ ແລະ ໝາກເສິກ. ການສົ່ງນັກກິລາຈຳນວນບໍ່ຫຼາຍໃນຄັ້ງນີ້ ແມ່ນໄດ້ອີງໃສ່ທ່າແຮງ ແລະ ສະພາບເງື່ອນໄຂດ້ານງົບປະມານທີ່ມີຂີດຈຳກັດ ແຕ່ຈະພະຍາຍາມສູ້ຊົນໃຫ້ບັນລຸເປົ້າໝາຍ, ຊຶ່ງນັກກິລາຈຳນວນນີ້ ແມ່ນຄັດເລືອກເອົານັກກິລາທີ່ຢູ່ພາຍໃນແຂວງເປັນຫຼັກ ແລະ ລູກຫຼານຂອງແຂວງທີ່ກຳລັງສຶກສາຢູ່ ນະຄອນຫຼວງວຽງຈັນຈຳນວນໜຶ່ງ.

      ສຳລັບຜົນງານຂອງທັບນັກກິລາແຂວງບໍລິຄຳໄຊ ໃນງານມະຫະກຳກິລາແຫ່ງຊາດ ຄັ້ງທີ X ຫຼື ອຸດົມໄຊ ເກມ ທີ່ແຂວງອຸດົມໄຊ ເປັນເຈົ້າພາບເມື່ອປີ 2014 ຜ່ານມາ ສາມາດຍາດໄດ້ເຖິງ 17 ຫຼຽນຄຳ, 9 ຫຼຽນເງິນ ແລະ 17 ຫຼຽນທອງ ລວມ 43 ຫຼຽນ ຢູ່ອັນດັບທີ 7 ຂອງຕາຕະລາງ ຈາກ 25 ພາກສ່ວນເຂົ້າຮ່ວມ.

      ຂະນະທີ່ ງານມະຫະກຳກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງ ເປັນເຈົ້າພາບ ລະຫວ່າງວັນທີ 22 ມີນາ ຫາ 1 ເມສາ 2020 ແມ່ນຈະຊີງໄຊກັນທັງໝົດ 385 ຫຼຽນຄຳ, 385 ຫຼຽນເງິນ ແລະ 627 ຫຼຽນທອງ ໃນ 28 ປະເພດກິລາ ຄື: ແລ່ນ-ລານ, ລອຍນ້ຳ, ເຕະບານ, ດອກປີກໄກ່, ມວຍສາກົນ, ເທຄວັນໂດ, ມວຍລາວ, ຢູໂດ, ບານສົ່ງໃນຮົ່ມ-ຫາດຊາຍ, ບານບ້ວງ, ເທັນນິດ, ຍິງປືນ, ກະຕໍ້-ຊິນລອນ, ເປຕັງ, ປິ່ງປ່ອງ, ຊ່ວງເຮືອ, ຄາຣາເຕໂດ, ປັນຈັກສີລັດ, ມວຍປ້ຳ, ວູຊູ, ໜ້າເກັກ-ຍິງທະນູ, ໝາກຂ່າງ, ກັອບ, ໝາກເສິກ, ໝາກແລ້, ສະນຸກເກີ, ໂບລິ້ງ ແລະ ລົດຖີບ. ນອກນັ້ນ, ຍັງມີອີກປະເພດກິລາສາທິດ ຄືຣັກບີ້.

ຈຳປາສັກ ຫາລືຄວາມພ້ອມກຽມສົ່ງທັບນັກກິລາ 14 ປະເພດ ຮ່ວມຊີງໄຊ ໃນ ຊຽງຂວາງ ເກມ

ພະແນກສຶກສາທິການ ແລະ ກິລາແຂວງຈໍາປາສັກ ໄດ້ເປີດກອງປະຊຸມກິລາ ກຽມຄວາມພ້ອມທີ່ຈະສົ່ງນັກກິລາເຂົ້າຮ່ວມງານມະຫະກຳກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງ ເປັນເຈົ້າພາບ ເມື່ອວັນທີ 27 ກຸມພາ ຜ່ານມາ ທີ່ຫ້ອງປະຊຸມພະແນກດັ່ງກ່າວ, ໂດຍການເປັນປະທານຂອງ ທ່ານ ບົວລິນ ວົງພະຈັນ ຮອງເຈົ້າແຂວງຈຳປາສັກ, ມີທ່ານ ບຸນຈັນ ບຸດຊາວດອນ ຮອງຫົວໜ້າພະແນກສຶກສາທິການ ແລະ ກິລາແຂວງຈຳປາສັກ ພ້ອມດ້ວຍບັນດາເຈົ້າເມືອງ 9 ຕົວເມືອງ 1 ນະຄອນປາກເຊ, ຫົວໜ້າພະແນກການຕ່າງໆ, ປກສ, ປກຊ, ຄູຝຶກ ແລະ ພາກສ່ວນທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

ໂອກາດນີ້, ທ່ານ ບຸນຈັນ ບຸດຊາວດອນ ໄດ້ລາຍງານກ່ຽວກັບສະພາບຄວາມພ້ອມຂອງນັກກິລາແຕ່ລະປະເພດ ຊຶ່ງໃນງານມະຫະກຳກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງ ເປັນເຈົ້າພາບ ໄດ້ກຳນົດແຂ່ງຂັນທັງໝົດ 28 ປະເພດ ສະເພາະແຂວງຈຳປາສັກ ຈະສົ່ງເຂົ້າຮ່ວມແຂ່ງຂັນ 14 ປະເພດຄື: ກິລາເຕະບານຊາຍ, ແລ່ນ-ລານຊາຍ-ຍິງ, ລອຍນໍ້າຊາຍ-ຍິງ, ມວຍສາກົນຊາຍ, ມວຍລາຍລາວຊາຍ-ຍິງ, ເທຄວັນໂດຊາຍ-ຍິງ, ບານສົ່ງຫາດຊາຍຍິງ-ຊາຍ, ບານບ້ວງຊາຍ, ເປຕັງຊາຍ-ຍິງ, ເຮືອຊ່ວງຍິງ, ໝາກຂ່າງຍິງ, ໜ້າເກັກຍິງ, ວູຊູຊາຍ ແລະ ກິລາໝາກເສິກຊາຍ-ຍິງ. ນອກນີ້ຍັງມີກິລາທີ່ເຂົ້າຮ່ວມແຂ່ງຂັນທີ່ໄປດ້ວຍທຶນຕົນເອງຄື: ກິລາກັອບ, ໂບລິ້ງ ແລະ ກິລາບານບ້ວງຍິງ. ປັດຈຸບັນກິລາແຕ່ລະປະເພດຂອງແຂວງຈຳປາສັກ ໄດ້ເຂົ້າພັກຢູ່ສູນລວມແຫ່ງຕ່າງໆເພື່ອຝຶກແອບ ໂດຍກຳນົດຈຸດຝຶກແອບກິລາແຕ່ລະປະເພດເປັນທີ່ຮຽບຮ້ອຍແລ້ວ.

ການເຂົ້າຮ່ວມງານມະຫະກຳກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງ ເປັນເຈົ້າພາບ, ແຂວງຈຳປາສັກ ມີຈຳນວນພົນເຂົ້າຮ່ວມທັງໝົດ 206 ຄົນລວມມີຄະນະນຳ, ຄູຝຶກ, ນັກກິລາ ແລະ ເຈົ້າໜ້າທີ່ຝ່າຍຕ່າງໆ ຕັ້ງເປົ້າໝາຍຈະສູ້ຊົນໃຫ້ໄດ້ 19 ຫຼຽນຄຳ, 27 ຫຼຽນເງິນ ແລະ 21 ຫຼຽນທອງ ແລະ ຄາດຫວັງຈະຍາດໃຫ້ໄດ້ອັນດັບທີ 5-8 ຂອງປະເທດ.

ສ່ວນບັນຫາດ້ານງົບປະມານທີ່ປະຊຸມໄດ້ສະເໜີຫຼາຍບັນຫາທີ່ເປັນຂໍ້ຄົງຄ້າງ ຈະເຮັດແນວໃດຈະມີງົບມານຳໃຊ້ເພື່ອໃຫ້ໄດ້ເຂົ້າຮ່ວມເຄື່ອນໄຫວໃນງານມະຫະກຳກິລາແຫ່ງຊາດ ຄັ້ງທີ XI  ແລະ ກິລາຄົນພິການໃນຕໍ່ໜ້ານີ້ ໂດຍສະເພາະອັດຕາກິນ, ອັດຕາຝຶກຊ້ອມ, ອຸປະກອນກິລາ, ເງິນບຳເນັດ, ເສື້ອ, ເກີບ, ໂສ້ງ, ຊຸດໃສ່ຝຶກຊ້ອມ, ຊຸດໃສ່ລົງແຂ່ງຂັນຕົວຈິງ ແລະ ຊຸດໃສ່ສວນສະໜາມ. ຊຶ່ງບັນຫາດັ່ງກ່າວນີ້ໄດ້ຕົກລົງເຫັນດີເປັນເອກະພາບໃຫ້ປຸກລະດົມທຶນຮອນ ນຳບັນດາຫົວໜ່ວຍທຸລະກິດ, ບໍລິສັດ, ຫ້າງຮ້ານ ທັງພາຍໃນ ແລະ ຕ່າງປະເທດ, ພະນັກງານລັດຖະກອນທົ່ວແຂວງ ທຸກພາກສ່ວນໃນສັງຄົມ ໃຫ້ມີສ່ວນຮ່ວມນຳກັນໃນການປະກອບສ່ວນຮ່ວມກັບ ອຳນາດການປົກຄອງຂັ້ນແຂວງ, ຂັ້ນເມືອງ ແລະ ນະຄອນ ເຮັດໃຫ້ໄດ້ເຂົ້າຮ່ວມງານດັ່ງກ່າວຢ່າງສົມບູນ,

ສຳລັບທັບນັກກິລາແຂວງຈຳປາສັກ ແມ່ນຈະເດີນທາງເຂົ້າຮ່ວມ ຊຽງຂວາງ ເກມ ກ່ອນວັນທີ 20 ມີນາ 2020 ມີປະເພດເຕະບານ, ບານສົ່ງ ແລະ ກະຕໍ້ ສ່ວນກິລາປະເພດອື່ນແມ່ນເດີນທາງຫຼັງວັນທີ 20 ມີນາ 2020.

ຂະນະທີ່ຜົນງານຂອງທັບນັກກິລາແຂວງຈຳປາສັກ ໃນງານມະຫະກຳກິລາແຫ່ງຊາດ ຄັ້ງທີ X ທີ່ແຂວງອຸດົມໄຊ ເປັນເຈົ້າພາບ ເມື່ອປີ 2014 ສາມາດຍາດໄດ້ 21 ຫຼຽນຄຳ, 30 ຫຼຽນເງິນ ແລະ 45 ຫຼຽນທອງ ຈັດຢູ່ອັນດັບທີ 6 ຂອງຕາຕະລາງ ຈາກ 25 ພາກສ່ວນເຂົ້າຮ່ວມ.          

ໂດຍ: ຂາວພອນ ມ້າວຄຳຜິວ

ຮູ້ຈັກ 3 ຜົນງານເພງ ທີ່ຈະປະກອບສ່ວນໃນງານມະຫະກໍາກິລາແຫ່ງຊາດ ຄັ້ງທີ XI

ຫຍັບມໍ່ເຂົ້າມາແລ້ວ ສໍາລັບງານ​ມະຫາ​ກໍາ​ກິລາ​ແຫ່ງ​ຊາດ ຄັ້ງ​ທີ XI ທີ່​ແຂວງ​ຊຽງຂວາງ ໃນເດືອນມີນານີ້, ຫຼາຍພາກສ່ວນໄດ້ມີການກະກຽມຄວາມພ້ອມເພື່ອຮັບໃຊ້ເຂົ້າໃນການດັ່ງກາວໃຫ້ເປັນໄປຕາມຄາດໝາຍ ແລະ ພາກສ່ວນສິລະປິນ ກໍໄດ້ມີການຮ່ວມໂຕກັນ ເພື່ອສ້າງສັນຜົນງານເພງ ປະກອບສ່ວນເຂົ້າໃນງານດັ່ງກ່າວ.

ທ່ານ ບຸນ​ມະນີ ພົມມະ​ສານ ປະທານ​ສະ​ໂມ​ສອນ​ບານ​ເຕະລວມສິລະ​ປິນລາວ ແລະ ຄ້າຍ ທີເຄ ຊາວລາວ ​ໄດ້ນຳພາ​ສ້າງ​ຜົນງານ​ເພງ ຈໍານວນ 3 ເພງ ​ເພື່ອ​ເປັນ​ການ​ປະກອບສ່ວນ ​ໃນ​ງານ​ມະຫະກໍາ​ກິລາ​ແຫ່ງ​ຊາດ ຄັ້ງ​ທີ XI ທີ່​ແຂວງ​ຊຽງຂວາງ, ຊຶ່ງໃນປັດຈຸບັນ​ບົດ​ເພງດັ່ງກ່າວ ໄດ້ສໍາ​ເລັດ​ເປັນທີ່ຮຽບຮ້ອຍ ປະກອບມີ ເພງ ຊຽງຂວາງ​ເກ​ມ 2020, ທົ່ງ​ໄຫ​ຫີນມໍລະດົກ​ໂລກ ແລະ ຂອບ​ໃຈຈາກ​ເຈົ້າພາບ​ແຂວງ​ຊຽງຂວາງ.

ສໍາລັບບົດເພງ ຊຽງຂວາງ ​ເກ​ມ 2020 ປະ​ພັນ​ໂດຍ ທ່ານ ບຸນ​ພົບ ​ເພັງ​ນຸວົງ, ຮຽບຮຽງຈັ່ງ​ຫວະ​ທໍານອງ​ໂດຍ ທ່ານ ບຸ​ມມະນີ ພົມມະ​ສານ; ເພງ ທົ່ງ​ໄຫ​ຫີນມໍລະດົກ​ໂລກ ປະພັນ​ໂດຍ ທ່ານ ພອນ​ສະຫວັນ ພັນທະ​ວິຈິດ ຫົວໜ້າພະ​ແນ​ກຖະ​ແຫຼ່ງຂ່າວ ວັດທະນະ​ທໍາ ​ແລະ ທ່ອງ​ທ່ຽວ ​ແຂວງ​ອຸດົມ​ໄຊ ​ເຈົ້າ​ຂອງ​ລາງວັນ ຊິ​ລາຍ ປີ 2016, ສ້າງສັນ​ດົນຕີ​ໂດຍ ທ່ານ ສົມພົງ ສີ​ສຸວັນນະ​ວົງ, ຮຽບຮຽງສຽງປະສານ​ທໍານອງ​ໂດຍ ທ່ານ ບຸນ​ມະນີ ພົມມະ​ສານ ແລະ ຮ້ອງ​ໂດຍ ສິລະ​ປິນ ຍິງ-ຊາຍ ທີ່​ມາ​ຈາກ​ບັນດາ​ຄ້າ​ຍ​ເພງໃນ​ນະຄອນຫຼວງວຽງຈັນ ປະກອບມີ ບຸນ​ມະນີ ພົມມະ​ສານ (ເປັກ), ທະວີ​ສັກ ທຳ​ມະ​ວົງສາ (ຕົ້ນ), ຫົວໜ້າ​ຄ້າຍ​ເພງ ທີ​ເຄຊາວ​ລາວ, ອິນ​ປັນ ບໍລິຫານ (​ຕຸ້ຍ​ໂອ​ເວີ​ແດ້ນ), ພຸດທະ​ສິນ ວິ​ພົມມະ​ວົງສາ (ຕູ່​ຮີ​ໂຣ່), ​ເພັດ​ນະຄອນ ສຸດທິ​ວົງ (ຕັ້ນ), ສົງກາ​ ສາຍ​ບຸນ​ມີ, ບຸນ​ຖົມ ພັນທະ​ມາລີ, ບຸນ​ໄຊ ​ແກ້ວ​ປະ​ເສີດ (ບີ້ ​ເທຍຣີ), ສຸວັນນະ​ສອນ ສີ​ພັນ​ດອນ, ດາ​ວັນ ວິຈິດວົງ​ສາ, ປີ​ໂນ້ ວົງ​ສະຫວ່າງ, ສົມ​ເພັດ ບຸດດາ​ວົງ, ສົມ​ມາ​ລີ ຄົດ​ສີ(ມະລິ ​ແອ​ງ​ເຈີ້), ກາ ຫຼ້າ​ພາ​ວັນ, ສຸວັນ​ທິບ ​ແສງ​ເດືອນ, ຈາລະ​ວີ ສິຣິມຸງຄຸນ,  ​ພອນມະນີ ​ໄຊຊະ​ຫວັດ  ມິ​ນິ​ແອັງ​ເຈີ້ ​ແລະ  ​ ວິ​ມາລາ ວໍ​ລະ​ຈັກ (ເປັດ​ນ້ອຍ); ເພງ ຂອບ​ໃຈຈາກ​ເຈົ້າພາບ​ແຂວງ​ຊຽງຂວາງ ປະພັນ​ໂດຍ ທ່ານ ພອນ​ສະຫວັນ ພັນທະ​ວິຈິດ, ຮຽບຮຽງຈັ່ງ​ຫວະ​ທໍານອງ​ໂດຍ ທ່ານ ບຸ​ມມະນີ ພົມມະ​ສານ. ໄລຍະ​ຜ່ານ​ມາ ​ໄດ້​ນຳພາຜະລິດຜົນ​ງານ​ເພງຮັບ​ໃຊ້ງານ​ກິລາ​ສຳຄັນ​ຄື ​ເພງ ກິລາ​ມະຫາວິທະຍາ​ໄລ​ອາ​ຊຽນ ຄັ້ງ​ທີ XVI ລາວ​ເປັນ​ເຈົ້າພາບ​ຄັ້ງ​ທຳ​ອິດ ​ແລະ ​ເພງ ອຸດົມ​ໄຊ​ ເກ​ມ ປີ 2014 ຫຼື ງານ​ກິລາ​ແຫ່ງ​ຊາດ ທີ່ ​ແຂວງ​ອຸດົ​ມ​ໄຊ ​ຊຶ່ງບົດ​ເພງ​ດັ່ງກ່າວ​ໄດ້​ຮັບ​ຄວາມ​ນິຍົມ​ຈາກ​ມະຫາຊົນ ​ແລະ ​ໄດ້​ຖືກ​ຍ້ອງຍໍ​ຈາກ​ຂັ້ນ​ເທິງ​ອີກດ້ວຍ.

 ປັດຈຸບັນ​ນີ້ ບົດ​ເພັງ​ດັ່ງກ່າວ​ແມ່ນ​ໄດ້​ສຳ​ເລັດ ​ແລະ ​ໄດ້​ສົ່ງ​ໄປ​ຍັງ​ພະ​ແນ​ກຖະ​ແຫຼ​ງຂ່າວ, ວັດທະນະທຳ ​ແລະ ທ່ອງ​ທ່ຽວ ​ແຂວງ​ຊຽງ​ຂວາງ ນຳ​ໃຊ້​ເພື່ອ​ໂຄສະນາ​ງານ​ມະຫາ​ກຳ​ກິລາ​ແຫ່ງ​ຊາດ​ແລ້ວ ​ແລະ ຈະຖ່າຍ ມິວສິກ ວີດີໂອເພງ ເພື່ອ​ໂຄສະນາ​ທາງ​ໂທລະພາບ ​ແລະ ສື່​ຕ່າງ​ໆ. ພ້ອມ​ດຽວ​ກັນ​ນີ້, ກໍໄດ້​ກະກຽມ​ໄປ​ຮ້ອງ​ເພງ​ປະກອບສ່ວນ​ໃນພິທີ​​ເປີດ​ງານ​ມະຫະກຳກິລາ​ແຫ່ງ​ຊາດ ຄັ້ງທີ XI ທີ່​ແຂວງ​ຊຽງ​ຂວາງ ​ໃນ​ວັນ​ທີ 22 ມີນາ 2020 ອີກ​ດ້ວຍ. ສ່ວນການ​ກະກຽມ​ເພງ​ດັ່ງກ່າວ, ​ແມ່ນ​ເລີ່ມ​ແຕ່​ປີ 2018 ​ແຕ່​ເນື່ອງ​ຈາກ​ວ່າ ​ໄດ້​ມີ​ການ​ເລື່ອນ​ການຈັດ​ງານຈົນ​ມາ​ຮອດ ປີ 2020 ຈຶ່ງ​ໄດ້​ສຳ​ເລັດ.

ເມືອງສຳພັນ ປະກາດຈົບຊັ້ນ ມ.ຕົ້ນບຳລຸງ ເປັນອັນດັບ 7 ແຂວງຜົ້ງສາລີ

 ເມືອງສຳພັນ ແຂວງຜົ້ງສາລີ ປະກາດຈົບຊັ້ນມັດທະຍົມຕອນຕົ້ນບຳລຸງສຳລັບປະຊາຊົນທົ່ວເມືອງ ເປັນອັນດັບທີ 7 ຂອງແຂວງ (ເປັນເມືອງສຸດທ້າຍ) ແລະ ເປັນອັນດັບທີ 143 ຂອງປະເທດ ຢ່າງເປັນທາງການ ພາຍຫຼັງໄດ້ມີການຈັດຕັ້ງປະຕິບັດການຮຽນການສອນບຳລຸງໃຫ້ກຸ່ມເປົ້າໝາຍສຳເລັດ.

ພິທີປະກາດດັ່ງກ່າວ, ໄດ້ມີຂຶ້ນເມື່ອວັນທີ 13 ກຸມພາ ຜ່ານມາ ທີ່ສະໂມສອນໃຫຍ່ ແຂວງຜົ້ງສາລີ, ໂດຍເປັນກຽດເຂົ້າຮ່ວມຕັດແຖບຜ້າຂອງທ່ານ ຮສ.ປອ ພຸດ ສິມມາລາວົງ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ທອງສີ ເສົາສຸລີພົມ ຮອງເຈົ້າແຂວງຜົ້ງສາລີ ຜູ້ຊີ້ນຳວຽກງານຂົງເຂດວັດທະນະທຳສັງ-ຄົມຂັ້ນແຂວງ, ທ່ານ ສົມຈີດ ຫັບລະກອນ ເຈົ້າເມືອງສຳພັນ, ທ່ານ ພອນໄຊ ອ່ອນສາ ຫົວໜ້າພະແນກສຶກສາທິການ ແລະ ກິລາແຂວງ, ມີຜູ້ຕາງໜ້າຈາກກົມການສຶກສານອກໂຮງຮຽນ, ຮອງເຈົ້າເມືອງ, ຫົວໜ້າຫ້ອງການສຶກສາທິການ ແລະ ກິລາ ຈາກ 7 ເມືອງ, ບັນດາ ກຳມະການປະຈຳພັກເມືອງ, ກຳມະການພັກເມືອງ, ຫົວໜ້າ-ຮອງຫົວໜ້າຫ້ອງການ ຕະຫຼອດຮອດຜູ້ບໍລິຫານການສຶກສາ, ຄູອາຈານພາຍໃນເມືອງເຂົ້າຮ່ວມເປັນສັກຂີພິຍານ.

      ໃນພິທີ, ທ່ານ ແອ ຍິນທະນົງ ຫົວໜ້າຫ້ອງການສຶກສາທິການ ແລະ ກິລາເມືອງ ໄດ້ລາຍງານການຈັດຕັ້ງປະຕິບັດການຮຽນການສອນບຳລຸງຍົກລະດັບການສຶກສາຈົບຊັ້ນມັດທະຍົມຕອນຕົ້ນແລະ ທິດທາງແຜນການຂອງວຽກງານການສຶກສານອກໂຮງຮຽນ, ຊຶ່ງທົ່ວເມືອງສໍາພັນມີ 10 ກຸ່ມບ້ານພັດທະນາ, ມີ 63 ບ້ານ, ມີ 4.366 ຫຼັງຄາ, ມີ 5.289 ຄອບຄົວ. ວຽກງານການສຶກສານອກໂຮງຮຽນ ພາຍຫຼັງປະກາດຈົບຊັ້ນປະຖົມບຳລຸງປີ 2013 ເປັນຕົ້ນມາ ຊຶ່ງເປັນເມືອງທີ 7 ຂອງແຂວງ, ໄດ້ສ້າງເງືອນໄຂໃຫ້ແກ່ການສືບຕໍ່ບຳລຸງຍົກລະດັບຊັ້ນມັດທະຍົມຕອນຕົ້ນ ໂດຍໄດ້ເລີ່ມຈັດຕັ້ງການຮຽນການສອນມາແຕ່ສົກຮຽນ 2013-2014 ແລະ ຮອດສົກຮຽນ 2018-2019 ການບຳລຸງຍົກລະດັບຊັ້ນມັດທະຍົມຕອນຕົ້ນສຳລັບປະຊາຊົນ ເຫັນວ່າມີຫຼາຍດ້ານທີ່ພົ້ນເດັ່ນ ໂດຍສະເພາະ ລະດັບຄວາມຮູ້ຄວາມເຂົ້າໃຈ, ຄວາມຕື່ນຕົວ, ຄວາມເປັນເຈົ້າການ ແລະ ອື່ນໆ ລວມມີກຸ່ມເປົ້າໝາຍເຂົ້າຮຽນທັງໝົດ 7.689 ຄົນ, ຍິງ 3.708 ຄົນ. ໃນນັ້ນ, ຈົບສາມັນ 5.694 ຄົນ, ຍິງ 2.799 ຄົນ, ຈົບບຳລຸງ 1.939 ຄົນ, ຍິງ 870 ຄົນ ສະເລ່ຍບັນລຸໄດ້ 97,19%, ແລະ ຍັງເຫຼືອກຸ່ມເປົ້າໝາຍ 56 ຄົນ, ຍິງ 39 ຄົນ ທີ່ຍັງບໍ່ຈົບ ຍ້ອນປະລະການຮຽນຕາມສະພາບແວດລ້ອມອື່ນໆ ເຊັ່ນ: ການສ້າງຄອບຄົວ, ການຍົກຍ້າຍໄປຕ່າງເມືອງ, ຕ່າງແຂວງ, ການໄປຊອກວຽກເຮັດງານທຳຢູ່ບ່ອນອື່ນ ແລະ ບັນຫາດ້ານສຸຂະພາບຈຳນວນໜຶ່ງ.

ນອກຈາກນີ້, ຕາງໜ້າອົງການປົກຄອງບ້ານ, ຄູສອນບຳລຸງ ແລະ ນັກຮຽນບຳລຸງ ໄດ້ປະກອບຄຳເຫັນກ່ຽວກັບການຮຽນການສອນບໍາລຸງຍົກລະດັບການສຶກສານອກໂຮງຮຽນ ແລະ ຜ່ານຂໍ້ຕົກລົງຂອງທ່ານລັດຖະມັນຕີ ກະຊວງສຶກສາທິການ ແລະ ກິລາ ສະບັບເລກທີ 165/ສສກ ວ່າດ້ວຍການປະກາດເມືອງສໍາພັນ ແຂວງຜົ້ງສາລີ ເປັນເມືອງຈົບຊັ້ນມັດທະຍົມຕອນຕົ້ນບຳລຸງ, ພ້ອມທັງມອບໃບຢັ້ງຢືນຈົບຊັ້ນມັດທະຍົມຕອນຕົ້ນບຳລຸງໃຫ້ເມືອງສຳພັນ ຢ່າງເປັນທາງການ.

ໃນໂອກາດນີ້, ທ່ານ ຮສ.ປອ ພຸດ ສິມມາລາວົງ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ໄຊຊະນະ ທີ່ທາງອົງການປົກຄອງເມືອງ ກໍຄືຜູ້ບໍລີຫານການສຶກສາເມືອງຍາດມາໄດ້ຕະຫຼອດໄລຍະທີ່ຜ່ານມາ, ພ້ອມທັງເນັ້ນໝັກ ແລະ ຮຽກຮ້ອງໃຫ້ເອົາໃຈໃສ່ໃນການເຊື່ອມຊຶມແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະ ແຜນພັດທະນາເສດຖະກິດ-ສັງຄົມໃນແຕ່ລະໄລຍະ ໂດຍສະເພາະແມ່ນມະຕິກອງປະຊຸມໃຫຍ່ຂອງພັກ, ແຂວງ ແລະ ເມືອງໃຫ້ຖັນແຖວຄູອາຈານ ແລະ ນ້ອງນັກຮຽນ ຕະຫຼອດຮອດປະຊາຊົນບັນດາເຜົ່າ ໄດ້ຮັບຮູ້ ແລະ ເຂົ້າໃຈເປັນເອກະພາບຢ່າງທົ່ວເຖິງ, ສືບຕໍ່ຈັດຕັ້ງປະຕິບັດແຜນຍຸດທະສາດການປະຕິຮູບລະບົບການສຶກສາແຫ່ງຊາດຢ່າງມີຫຼັກການ ແລະ ໃຫ້ໄປຕາມ 3 ຫຼັກສະນະ ທັງຮັບປະກັນໃຫ້ໄປຕາມ 5 ຫຼັກມູນຂອງການສຶກສາ ແລະ ເອົາໃຈໃສ່ຍົກລະດັບຄຸນນພາບການສຶກສາໃຫ້ມີບາດກ້າວ, ຫັນປ່ຽນຢ່າງເປັນຮູບປະທຳຫຼາຍຂຶ້ນ, ສືບຕໍ່ກໍ່ສ້າງແຜນຂະຫຍາຍການຮຽນການສອນ ໂດຍສຸມໃສ່ກຸ່ມເປົ້າໝາຍຊັ້ນມັດທະຍົມຕົ້ນຕອນບຳລຸງຢູ່ໃນບາງບ້ານທີ່ຍັງຕົກຄ້າງໃຫ້ສຳເລັດຕາມຄາດໝາຍທີ່ວາງໄວ້, ສືບຕໍ່ເອົາໃຈໃສ່ປັບປຸງກົງຈັກການຈັດຕັ້ງ ກໍຄືລະບົບກົນໄກການຄຸ້ມຄອງການສຶກສາໃນທົ່ວຂັ້ນທັງພາກລັດ ແລະ ເອກະຊົນໃຫ້ມີຄວາມໝັກແໜ້ນ ແລະ ເຂັ້ມແຂງ, ເອົາໃຈໃສ່ການແບ່ງຂັ້ນຄຸ້ມຄອງຕາມຂະແໜງການສາຍຕັ້ງສາຍຂວາງໃຫ້ລະອຽດຈະແຈ້ງ ເພື່ອມອບຄວາມຮັບຜິດຊອບໃຫ້ແຕ່ລະຂັ້ນຊີ້ນຳ ແລະ ຈັດຕັ້ງປະຕິບັດຕາມພາລະບົດບາດຂອບເຂດສິດ ແລະ ໜ້າທີ່ດ້ວຍຄວາມຮັບຜິດຊອບສູງ, ຈົ່ງພ້ອມກັນສືບຕໍ່ການແຂ່ງຂັ້ນເປີດບັ້ນການຮຽນການສອນບຳລຸງຊັ້ນມັດທະຍົມຕອນປາຍໃຫ້ສຳເລັດຕາມຄາດໝາຍຂອງເມືອງ ໃນຊຸດປີ 2025 – 2030.

ຕອນທ້າຍພິທີ, ຄະນະປະທານຍັງໄດ້ພ້ອມກັນຕັດແຖບຜ້າ, ເປີດປ້າຍ ແລະ ລັ້ນຄ້ອງ 9 ບາດ ເພື່ອປະກາດເມືອງສຳພັນຈົບຊັ້ນມັດທະຍົມຕົ້ນຕອນບຳລຸງສຳລັບປະຊາຊົນທົ່ວເມືອງຢ່າງເປັນທາງການ.

ໂດຍ: ແສງຄຳ ສາລີວັນ

ຜູ້ບໍລິຫານການສຶກສາ-ກິລາ ທົ່ວແຂວງໄຊຍະບູລີ ຕີລາຄາຄືນວຽກງານ ພ້ອມແກ້ໄຂການປະລະການຮຽນ

 ຜູ້ບໍລິຫານການສຶກສາ ແລະ ກິລາ ທົ່ວແຂວງໄຊຍະບູລີ ໄດ້ຈັດກອງປະຊຸມ ປະຈຳປີ 2019 ແລະ ການແກ້ໄຂບັນຫາການປະລະການຮຽນ ໃນວັນທີ 12 ກຸມພາ 2020 ທີ່ຫ້ອງປະຊຸມພະແນກສຶກສາທິການ ແລະ ກິລາແຂວງ ໂດຍການເປັນປະທານຂອງທ່ານ ນາງ ບຸນພັກ ອິນທະປັນຍາ ຄະນະປະຈໍາພັກແຂວງ ຮອງເຈົ້າແຂວງ ຜູ້ຊີ້ນໍາຂົງເຂດວັດທະນະທໍາ-ສັງຄົມ, ມີບັນດາເຈົ້າເມືອງ-ຮອງເຈົ້າເມືອງ, ປະທານຄະນະກໍາມາທິການສຶກສາສົງແຂວງ, ຫົວໜ້າ-ຮອງຫົວໜ້າພະແນກການອ້ອມຂ້າງແຂວງ, ປະທານກໍາມະບານແຂວງ, ປະທານສະຫະພັນແມ່ຍິງແຂວງ ແລະ ເລຂາຄະນະບໍລິຫານງານຊາວໜຸ່ມແຂວງ, ຫ້ອງການສຶກສາທິການ ແລະ ກິລາເມືອງ, ຜູ້ອຳ​ນວຍ​ການໂຮງຮຽນອ້ອມຂ້າງ, ຫົວໜ້າ-ຮອງຫົວໜ້າຂະແໜງ-ສູນ ແລະ ວິຊາການທີ່​ກ່ຽວຂ້ອງເຂົ້າຮ່ວມ 66 ທ່ານ.

ໃນກອງປະຊຸມຄັ້ງນີ້, ໄດ້ຮັບຟັງການເຜີຍແຜ່ຜົນສໍາເລັດກອງປະຊຸມຜູ້ບໍລິຫານການສຶກສາ ແລະ ກິລາທົ່ວປະເທດ ປະຈໍາປີ 2019 ຂອງກະຊວງສຶກສາທິການ ແລະ ກິລາ, ຮັບຟັງບົດສະຫຼຸບການຈັດຕັ້ງປະຕິບັດແຜນງານຈຸດສຸມປີ 2019, ແຜນງານຈຸດສຸມປະຈໍາປີ 2020, ບົດລາຍງານສະພາບການປະລະການຮຽນສາຍມາມັນໄລຍະຜ່ານມາ. ຫຼັງຈາກນັ້ນ, ຜູ້ແທນກອງປະຊຸມຍັງໄດ້ປະກອບຄໍາຄິດ-ຄໍາເຫັນ ກ່ຽວກັບມາດຕະການແກ້ໄຂບັນຫາການປະລະການຮຽນ ແລະ ຮັບຟັງລາຍງານກ່ຽວກັບການກະກຽມຄວາມພ້ອມເຂົ້າຮ່ວມງານມະຫາກໍາກິລາແຫ່ງຊາດ ຄັັ້ງທີ XI ທີ່ແຂວງຊຽງຂວາງ, ພ້ອມທັງ​ໄດ້ສຸມໃສ່ບັນຫາ, ສາເຫດຂອງການປະລະການຮຽນຂອງນັກຮຽນສາມັນຢູ່ບັນດາເມືອງ ແລະ ຊອກວິທີແກ້ໄຂ.

 ກອງປະຊຸມໄດ້ເປັນເອກະພາບກັນຮັບຮອງເອົາບັນຫາສໍາຄັນ ຄື: ຮັບຮອງເນື້ອໃນເບື້ອຕົ້ນຂອງບົດສະຫຼຸບປີ 2019, ແຜນຈຸດສຸມປີ 2020 ແລະ ມອບໃຫ້ຄະນະຮັບຜິດຊອບກອງປະຊຸມສືບຕໍ່ປັບປຸງບາງເນື້ອໃນຕາມການສະເໜີຂອງຜູ້ແທນກອງປະຊຸມ; ຮັບຮອງບົດລາຍງານສະພາບການປະລະການຮຽນ ແລະ ມາດຕະການແກ້ໄຂບັນຫາດັ່ງກ່າວໃນໄລຍະຜ່ານ; ຜູ້ແທນກອງປະຊຸມມີຄວາມເອກະພາບກໍານົດມາດຕະການແກ້ໄຂບັນຫາການປະລະການຮຽນໃນຕໍ່ໜ້າ ໂດຍສະເພາະແມ່ນ ສືບຕໍ່ປະຕິບັດຄຳສັ່ງຂອງເຈົ້າແຂວງເລກທີ 018/ຈຂ.ຊຍ ລົງວັນທີ 07 ກຸມພາ 2018 ວ່າດ້ວຍການເພີ່ມທະວີແກ້ໄຂການປະລະການຮຽນຂອງນັກຮຽນ ແລະ ຊຸກຍູ້ການປະຕິບັດຂໍ້ແຂ່ງຂັນຂອງຂະແໜງການສຶກສາ ແລະ ກິລາ,ເອົາໃຈໃສ່ໂຄສະນາເຜີຍແຜ່ນະໂຍບາຍການສຶກສາ ແລະ ກິລາ ເປັນຕົ້ນ ກົດໝາຍການສຶກສາ ໂດຍສະເພາະແມ່ນການສຶກສາຊັ້ນປະຖົມ ແລະ ມັດທະຍົມຕົ້ນພາກບັງຄັບ, 3 ລັກສະນະ, 5 ຫຼັກມູນການສຶກສາ, 3 ຂໍ້ແຂ່ງຂັນຂະແໜງການສຶກສາ ແລະ ກິລາ, ເຜີຍແຜນນິຕິກໍາທີ່ພົວພັນເຖິງວຽກງານການສຶກສາຮັບປະກັນໃຫ້ຜູ້ປົກຄອງນັກຮຽນເຂົ້າໃຈຕໍ່ບົດບາດຄວາມສໍາຄັນຂອງວຽກງານການສຶກສາຕໍ່ກັບການດໍາລົງຊີວິດ, ການພັດທະນາຊຸມຊົນ ແລະ ປະເທດຊາດ, ຊຸກຍູ້ຊຸມຊົນ ແລະ ທຸກພາກສ່ວນເສດຖະກິດ-ສັງຄົມຕ້ອງເອົາໃຈໃສ່ປັບປຸງພື້ນຖານໂຄງລ່າງການສຶກສາ ເພື່ອຮອງຮັບນັກຮຽນໃຫ້ພຽງພໍ ແລະ ປັບປຸງສະພາບແວດລ້ອມໂຮງຮຽນໃຫ້ສະອາດສວຍງາມ ເພື່ອດຶງດູດນັກຮຽນມາຮຽນເພິ່ມຂຶ້ນ, ສໍາລັບຂະແໜງການສຶກສາ ແລະ ກິລາທຸກຂັ້ນ ຕ້ອງກວດກາຄືນການປະຕິບັດໜ້າທີ່ຂອງຄູສອນທຸກຊັ້ນ-ທຸກຂັ້ນ ໂດຍສະເພາະແມ່ນ ສິດໜ້າທີ່ຕາມ 7 ໜ້າວຽກຂອງຜູ້ອໍານວຍການໂຮງຮຽນ ແລະ ມີມາດຕະການເໝາະສົມຕໍ່ກັບຜູ້ທີ່ຖືເບົາໃນການປະຕິບັດໜ້າທີ່, ຄະນະພັກ, ອໍານາດການປົກຄອງທຸກຂັ້ນ, ພະແນກສຶກສາທິການ ແລະ ກິລາແຂວງ, ຫ້ອງການສຶກສາທິການ ແລະ ກິລາ ຕ້ອງອໍານວຍຄວາມສະດວກໃຫ້ຄະນະກໍາມາທິການສຶກສາສົງແຂວງ, ອົງການພຸດທະສາດສະໜາສໍາພັນປະຈໍາເມືອງ ລົງສິດສອນສິລະທໍາ ແລະ ສະໜອງວັດຖຸປັດໃຈແກ່ບັນດາໂຮງຮຽນ ໂດຍສຸມໃສ່ໂຮງຮຽນທີ່ມີຄວາມຫຍຸ້ງຍາກ ແລະ ນັກຮຽນຜູ້ທຸກຈົນ.

ອົງການຈັດຕັ້ງມະຫາຊົນ ໂດຍສະເພາະແມ່ນຊາວໜຸ່ມ, ແມ່ຍິງ ແລະ ກໍາມະບານ ມີມາດຕະການຊຸກຍູ້ໃຫ້ອົງການຈັດຕັ້ງມະຫາຊົນຂັ້ນທ້ອງຖິ່ນ ເພື່ອມີສ່ວນຮ່ວມໃນການສະກັດກັ້ນການປະລະການຮຽນ ແລະ ແກ້ໄຂປະກົດການຫຍໍ້ທໍ້ຕ່າງໆ; ສະເໜີໃຫ້ພະແນກການກ່ຽວຂ້ອງມີສ່ວນຮ່ວມໃນການແກ້ໄຂບັນຫາທີ່ຂົງເຂດການສຶກສາແກ້ໄຂບໍ່ໄດ້ ເປັນຕົ້ນ ຄຸ້ມຄອງການອອກໃບທະບຽນສ້າງຄອບຄົວໃຫ້ແກ່ນັກຮຽນ, ຄຸ້ມຄອງການເຄື່ອນຍ້າຍແຮງງານ ແລະ ສົມທົບຜູ້ປະກອບການບໍ່ອານຸຍາດໃຫ້ນັກຮຽນໄປອອກແຮງງານຮັບຈ້າງໃນສະຖານທີ່ຕ່າງໆ ໃນໄລຍະທີ່ພວມເປີດສົກຮຽນ.

ກອງປະຊຸມເຫັນດີເປັນຢ່າງສູງນໍາເອົາເນື້ອໃນຈິດໃຈການໂອ້ລົມທິດຊີ້ນໍາຂອງທ່ານ ນາງ ບຸນພັກ ອິນທະປັນຍາ ກໍາມະການປະຈໍາພັກແຂວງ ຮອງເຈົ້າແຂວງ ໄປຈັດຕັ້ງຜັນຂະຫຍາຍຕິດພັນກັບແຜນຈຸດສຸມປີ 2020 ແລະ ບັນດາມາດຕະການແກ້ໄຂບັນຫາການປະລະການຮຽນໃຫ້ໄດ້ຮັບຜົນດີ; ເພື່ອຮັບປະກັນການຈັດຕັ້ງປະຕິບັດ, ກອງປະຊຸມຮຽກຮ້ອງໃຫ້ຜູ້ບໍລິຫານການສຶກສາ ແລະ ກິລາທຸກຂັ້ນ, ອໍານາດການປົກຄອງເມືອງ ແລະ ພາກສ່ວນກ່ຽວຂ້ອງ ຈົ່ງພ້ອມກັນນໍາເອົາເນື້ອໃນຈິດໃຈຂອງບົດບັນທຶກກອງປະຊຸມນີ້ໄປຈັດຕັ້ງຜັນຂະຫຍາຍໃຫ້ເປັນຮູບປະທໍາ​.

ໂດຍ: ນາລີ ​ແພງ​ວິ​ໄລ

ຄະນະວິທະຍາສາດປ່າໄມ້ ມຊ - ບໍລິສັດ ບົວລະພາ ຮ່ວມມື 5 ປີ ພັດທະນາບຸກຄະລາກອນ

ຄະນະວິທະຍາສາດປ່າໄມ້ ມະຫາວິທະຍາໄລແຫ່ງຊາດ (ມຊ) ຮ່ວມມືກັບ ບໍລິສັດ ບົວລະພາ ກະສິກຳ – ປ່າໄມ້ ຈຳກັດ ໃນການສົ່ງເສີມການພັດທະນາດ້ານວິຊາການໃຫ້ແກ່ບຸກຄະລາກອນ ໃນໄລຍະ 5 ປີ ແນໃສ່ກໍ່ສ້າງນັກສຶກສາຂອງຄະນະວິທະຍາສາດປ່າໄມ້ໃຫ້ມີຄວາມຮູ້, ຄວາມສາມາດໃນການປະກອບອາຊີບ ກໍຄື ມີວຽກເຮັດງານທຳທີ່ໝັ້ນຄົງ.

ພິທີເຊັນສັນຍາບົດບັນທຶກຄວາມເຂົ້າໃຈດັ່ງກ່າວ, ໄດ້ມີຂຶ້ນໃນວັນທີ 14 ກຸມພາ ຜ່ານມາ ທີ່ຫ້ອງປະຊຸມຄະນະວິທະຍາສາດປ່າໄມ້ ມະຫາວິທະຍາໄລແຫ່ງຊາດ, ໂດຍຕາງໜ້າລົງນາມລະຫວ່າງ ທ່ານ ນາງ ລັດສະໝີ ບຸບຜາ ຄະນະບໍດີ ຄະນະວິທະຍາສາດປ່າໄມ້ ແລະ ທ່ານ ນາງ ສຸໄພວັນ ທ່ຽງຈັນໄຊ ຮອງອຳນວຍການ ບໍລິສັດ ບົວລະພາ ກະສິກຳ – ປ່າໄມ້ ຈຳກັດ, ມີ ທ່ານ ປອ ຮຸ່ງເພັດ ຈັນທະວົງ ຮອງອະທິການບໍດີ ມະຫາວິທະຍາໄລແຫ່ງຊາດ, ທ່ານ Jean – Bernard ເອກອັກຄະລັດຖະທູດອົດສະຕຣາລີ ປະຈຳ ສປປ ລາວ ພ້ອມດ້ວຍພາກສ່ວນທີ່ກ່ຽວຂ້ອງທັງພາຍໃນ ແລະ ຕ່າງປະເທດເຂົ້າຮ່ວມເປັນສັກຂີພິຍານ.

ໂອກາດນີ້, ທ່ານ ນາງ ສຸໄພວັນ ທ່ຽງຈັນໄຊ ກ່າວວ່າ: ການເຊັນສັນຍາຄັ້ງນີ້ ຈະສ້າງຜົນປະໂຫຍດໃຫ້ທັງສອງຝ່າຍ ເປັນຕົ້ນແມ່ນທາງ ບໍລິສັດ ບົວລະພາ ກະສິກຳ – ປ່າໄມ້ ຈະໄດ້ສ້າງບຸກຄະລາກອນໄປຮັບໃຊ້ໃນທຸລະກິດ ກໍຄືນັກສຶກສາທີ່ຮຽນຈົບຈາກຄະນະວິທະຍາສາດປ່າໄມ້ ຈະໄດ້ໄປເຮັດວຽກຢູ່ບໍລິສັດ ບົວລະພາ ກະສິກຳ – ປ່າໄມ້ ຈຳກັດ ໂດຍສະເພາະຢູ່ໃນໂຮງງານໄມ້ອັດທີ່ກຳລັງກໍ່ສ້າງໃນປັດຈຸບັນ ຊຶ່ງຈະສຳເລັດໃນປີ 2021 ແລະ ທາງຄະນະວິທະຍາສາດປ່າໄມ້ ຍັງຈະໄດ້ຮັບທຶນກໍ່ສ້າງບຸກຄະລາກອນພາຍໃນຄະນະໃຫ້ມີຄວາມຮູ້, ຄວາມສາມາດໃນການປະກອບສ່ວນສົ່ງເສີມບຸກຄະລາກອນໃນອາຊີບວຽກງານເມື່ອຮຽນຈົບ. ທັງນີ້, ກໍຖືເປັນການກະຕຸກຊຸກຍູ້ໃຫ້ຄະນະດັ່ງກ່າວ ໃນການສ້າງບຸກຄະລາກອນກ້າວສູ່ຜົນສຳເລັດຢ່າງຍືນຍົງ ສາມາດປະກອບສ່ວນໃນການສ້າງສາພັດທະນາເສດຖະກິດ-ສັງຄົມຂອງຊາດອີກດ້ວຍ.

ທ່ານຮອງອຳນວຍການ ບໍລິສັດ ບົວລະພາ ກະສິກຳ – ປ່າໄມ້ ຈຳກັດ ກ່າວຕື່ມອີກວ່າ: ໃນໄລຍະຜ່ານມາ ບໍລິສັດ ບົວລະພາ ໄດ້ຮ່ວມມືກັບຄະນະປ່າໄມ້ມາຫຼາຍປີແລ້ວ ເປັນຕົ້ນແມ່ນໄດ້ຮັບນັກສຶກສາລົງຝຶກງານຢູ່ໃນສວນກ້າເບ້ຍໄມ້, ໂຮງງານປຸງແຕ່ງໄມ້. ສຳລັບໂຄງການຮ່ວມມືຄັ້ງນີ້ ມີໄລຍະເວລາຈັດຕັ້ງປະຕິບັດ 5 ປີ  ຊຶ່ງບໍລິສັດ ບົວລະພາ ມີຄວາມຍິນດີທີ່ຈະນຳໃຊ້ໂອກາດນີ້ ເພື່ອເຮັດໜ້າທີ່ໃຫ້ດີທີ່ສຸດໃນການສະໜັບສະໜູນຄະນະວິທະຍາສາດປ່າໄມ້ ບໍ່ພຽງແຕ່ໄລຍະເລີ່ມຕົ້ນຂອງອຸດສາຫະກຳອັນໃໝ່ ເທົ່ານັ້ນ ແຕ່ຍັງຈະສືບຕໍ່ໃຫ້ການສະໜັບສະໜູນຄະນະວິທະຍາສາດປ່າໄມ້ ພາຍຫຼັງທີ່ໂຮງງານໄມ້ອັດໄດ້ສືບຕໍ່ພັດທະນາຢ່າງເຕັມຮູບແບບໃນອະນາຄົດ.

ກົມກິລາລະດັບສູງ ສສກ ຝຶກການລົງທະບຽນ ໄອທີ ໃຫ້ 6 ພາກສ່ວນ ກຽມຮ່ວມ ຊຽງຂວາງ ເກມ

ກົມກິລາລະດັບສູງ ກະຊວງສຶກສາທິການ ແລະ ກິລາ (ສສກ) ຈັດຝຶກອົບຮົບແນະນຳການລົງທະບຽບ ໄອທີ ຫຼື IT ໃຫ້ແກ່ 6 ພາກສ່ວນ ກ່ອນເຂົ້າຮ່ວມງານມະຫະກຳກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງ ເມື່ອອາທິດ ຜ່ານມາ ທີ່ຫ້ອງປະຊຸມກົມກິລາລະດັບສູງ ກະຊວງສຶກສາທິການ ແລະ ກິລາ (ເຂດສະໜາມກິລາເຈົ້າອານຸວົງ), ໂດຍພາຍໃຕ້ການເປັນປະທານຂອງ ທ່ານ ສິງຄຳ ນາລິນ ຮອງຫົວໜ້າກົມກິລາລະດັບສູງ ກະຊວງສຶກສາທິການ ແລະ ກິລາ, ມີ ທ່ານ ປອ ສອນເພັດ ຈັນດານຸວົງ ຫົວໜ້າພະແນກຄຸ້ມຄອງຂໍ້ມູນ ກົມກິລາລະດັບສູງ ກະຊວງສຶກສາທິການ ແລະ ກິລາ ທັງເປັນວິທະຍາກອນ ພ້ອມດ້ວຍທີມງານຂອງພະແນກ, ມີສຳມະນາກອນທີ່ມາຈາກ 6 ພາກສ່ວນ ຄື: ກະຊວງປ້ອງກັນຄວາມສະຫງົບ, ກະຊວງປ້ອງກັນປະເທດ, ກະຊວງພະລັງງານ ແລະ ບໍ່ແຮ່, ກະຊວງສາທາລະນະສຸກ, ກະຊວງວິທະຍາສາດ ແລະ ເຕັກໂນໂລຊີ ແລະ ສູນກາງສະຫະພັນກຳມະບານລາວ 14 ທ່ານ, ຍິງ 2 ທ່ານເຂົ້າຮ່ວມ.

     ໂອກາດນີ້, ທ່ານ ສິງຄຳ ນາລິນ ໄດ້ກ່າວຕ້ອນຮັບບັນດາສຳມະນາກອນທີ່ມາຈາກ 6 ພາກສ່ວນຢ່າງອົບອຸ່ນ ແລະ ຫວັງວ່າ ການອົບຮົບດັ່ງກ່າວ ຈະເຮັດໃຫ້ບັນດາທ່ານເຂົ້າໃຈໄດ້ດີ ໃນການລົງທະບຽບຕ່າງໆ ເພື່ອເຂົ້າຮ່ວມງານມະຫະກຳກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງ ເປັນເຈົ້າພາບ ລະຫວ່າງວັນທີ 22 ມີນາ ຫາ 1 ເມສາ 2020. ສຳລັບການຝຶກອົບຮົບແນະນຳການລົງທະບຽນລະບົບ ໄອທີ ໃນຄັ້ງນີ້ ແມ່ນດຳເນີນເປັນເວລາ 1 ວັນ ໂດຍສຳມະນາກອນທີ່ເຂົ້າຮ່ວມ ແມ່ນໄດ້ຮຽນຮູ້ການລົງທະບຽບຕ່າງໆ ທັງການອອກບັດ, ແຈ້ງຈຳນວນກິລາເຂົ້າຮ່ວມ ແບບອອນລາຍ. ຊຶ່ງລະບົບນີ້ ແມ່ນສ້າງຂຶ້ນເພື່ອຮອງຮັບການລົງທະບຽນລາຍການແຂ່ງຂັນ, ລາຍຊື່ຜູ້ເຂົ້າຮ່ວມງານມະຫະກໍາກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງ. ນອກຈາກນ້ັນໃນລະບົບດັ່ງກ່າວ ຍັງເປັນລະບົບທີ່ສ້າງຂຶ້ນເພື່ອລາຍງານຜົນການແຂ່ງຂັນ, ຕາຕະລາງແຂ່ງຂັນຂອງກິລາປະເພດຕ່າງໆ, ສະຖານທີ່ແຂ່ງຂັນ ແລະ ອື່ນໆ ເພື່ອອຳນວຍຄວາມສະດວກໃຫ້ແກ່ງານມະຫະກຳກິລາແຫ່ງຊາດ ຄັ້ງທີ XI ເປັນຄັ້ງທຳອິດ.

ອຳໄພວັນ

ຄະນະສຶກສາສາດ ມຊ ສົ່ງນັກສຶກສາລົງຝຶກຫັດ 21 ຂະບວນ ໃນ 4 ແຂວງ ສົກນີ້

ຄະນະສຶກສາສາດ ມະຫາວິທະຍາໄລແຫ່ງຊາດ (ມຊ) ໄດ້ຈັດສົ່ງນັກສຶກສາປີສຸດທ້າຍ (ປີ 4) ຈໍານວນ 21 ຂະບວນ ລົງຝຶກຫັດວິຊາຊີບໃນບັນດາໂຮງຮຽນມັດທະຍົມສົມບູນ ໃນນະຄອນຫຼວງວຽງຈັນ, ແຂວງວຽງຈັນ, ແຂວງບໍລິຄຳໄຊ, ແຂວງໄຊຍະບູລີ, ວິທະຍາໄລຄູດົງຄຳຊ້າງ ແລະ ສູນພັດທະນາການສຶກສານອກໂຮງຮຽນ ກົມການສຶກສານອກໂຮງຮຽນ ກະຊວງສຶກສາທິການ ແລະ ກິລາ.

ພິທີຈັດສົ່ງຂະບວນນັກສຶກສາດັ່ງກ່າວ, ໄດ້ຈັດຂຶ້ນໃນອາທິດຜ່ານມາ ທີ່ຄະນະສຶກສາສາດ ມຊ ໂດຍເປັນກຽດນໍາພາຂະບວນຂອງທ່ານ ແສງສຸລິສັກ ຊື່ນຊົມ ຮອງຫົວໜ້າພະແນກບໍລິຫານວິຊາການ ຄະນະສຶກສາສາດ ມະຫາວິທະຍາໄລແຫ່ງຊາດ, ພ້ອມດ້ວຍນັກສຶກສາປີສຸດທ້າຍ ຈໍານວນ 348 ຄົນ ຮ່ວມເດີນທາງລົງຝຶກຫັດຢ່າງເປັນຂະບວນຟົດຟື້ນ.

     ການລົງຝຶກຫັດໃນຄັ້ງນີ້, ມີນັກສຶກສາທັງໝົດ 348 ຄົນ ຍິງ 191 ຄົນ ທີ່ກໍາລັງສຶກສາຢູ່ໃນ 12 ສາຂາຂອງຄະນະສຶກສາສາດ ມະຫາວິທະຍາໄລແຫ່ງຊາດ ທີ່ລົງຝຶກຫັດວິຊາຊີບໃນບັນດາໂຮງຮຽນມັດທະຍົມສົມບູນໃນ 4 ແຂວງ, 1 ວິທະຍາໄລ ແລະ 1 ສູນ ຄື: ນະຄອນຫຼວງວຽງຈັນ, ແຂວງວຽງຈັນ, ແຂວງບໍລິຄຳໄຊ, ແຂວງໄຊຍະບູລີ, ວິທະຍາໄລຄູດົງຄຳຊ້າງ (ສະເພາະສາຂາຄູຈິດຕະວິທະຍາ) ແລະ ສູນພັດທະນາການສຶກສານອກໂຮງຮຽນ ກົມການສຶກສານອກໂຮງຮຽນ ກະຊວງສຶກສາທິການ ແລະ ກິລາ (ສາຂາບໍລິຫານການສຶກສາ ແລະ ສາຂາຄູຈິດຕະວິທະຍາ).

ສໍາລັບການລົງຝຶກຫັດຂອງນັກສຶກສາປີສຸດທ້າຍ ເປັນການປະຕິບັດຕາມແຜນການຮຽນການສອນຂອງຄະນະສຶກສາສາດ ແລະ ເພື່ອເປັນການຝຶກທັກສະໃນວຽກງານທຸກໆດ້ານເພື່ອກຽມຄວາມພ້ອມໃນການອອກຮັບໃຊ້ສັງຄົມໃຫ້ມີປະສິດທິພາບເວົ້າລວມ ເວົ້າສະເພາະກໍເພື່ອໃຫ້ນັກສຶກສາໄດ້ຝຶກຝົນຄວາມຮູ້ຄວາມສາມາດໃນການສິດສອນຕົວຈິງໃຫ້ມີຄວາມຊຳນິຊຳນານໃນວຽກງານວິຊາສະເພາະຂອງຕົນ ເປັນຕົ້ນແມ່ນ ການແຕ່ງບົດສອນ, ການສິດສອນ, ການເປັນຄູປະຈຳຫ້ອງ, ການວ່າງແຜນວຽກງານຕ່າງໆ ແລະ ລົງປະຕິບັດວຽກງານພົວພັນສັງຄົມ-ຊ່ວຍເຫຼືອຊຸມຊົນຕົວຈິງ.

ນອກຈາກນັ້ນ, ຍັງມີວຽກງານນອກຫຼັກສູດ ເປັນຕົ້ນແມ່ນ ການຈັດກິດຈະກຳການສະແດງສິລະປະ-ວັນນະຄະດີ, ກິດຈະກຳການແຂ່ງຂັນກິລາ, ຖາມ-ຕອບວິທະຍາສາດ ເປັນຕົ້ນ. ສຳລັບການລົງຝຶກຫັດໃນຄັ້ງນີ້ ແມ່ນຈະໃຊ້ເວລາທັງໝົດ 100 ວັນ (3 ເດືອນ) ຈຶ່ງຈະສໍາເລັດ.

(ບຸນທະວີ)

ມສ ວຽງຈັນ ປາບແຊ໋ມເກົ່າ ສກມ ຫາດຊາຍຟອງ 2-0 ເຊັດ ຄວ້າແຊ໋ມບານສົ່ງຍິງ ງານກິລານັກຮຽນທົ່ວນະຄອນຫຼວງວຽງຈັນ 2020

 ທັບນັກກິລາບານ​ສົ່ງ​ຍິງໂຮງຮຽນມັດທະຍົມສຶກສາສົມບູນວຽງຈັນ ຫຼື ມສ ວຽງຈັນ ໂຊຟອມເກັ່ງໄລ່ປາບແຊ໋ມເກົ່າ ຫ້ອງການສຶກສາທິການ ແລະ ກິລາເມືອງ (ສກມ) ຫາດຊາຍຟອງ ໄປແບບໝົດສະພາບ 2-0 ເຊັດ ​ໃນຮອບຊີງຊະນະເລີດ ຄວ້າແຊ໋ມໄປຄອງໄດ້ສຳເລັດ ໃນການ​ແຂ່ງຂັນ​ກິລານັກຮຽນມັດທະຍົມສຶກສາ ທົ່ວນະຄອນຫຼວງວຽງຈັນ ປະຈຳປີ 2020. ຂະນະທີ່ປະເພດທີມຊາຍ ແຊ໋ມຕົກເປັນຂອງ ຫ້ອງການ​ສຶກສາ​ທິການ ​ແລະ ກິລາເມືອງ​ໄຊ​ເຊດ​ຖາ.

      ການແຂ່ງຂັນກິລາບານ​ສົ່ງທີມຍິງ-ທີມຊາຍ ໃນງານກິລາຄັ້ງນີ້ ໄດ້ມີຂຶ້ນເມື່ອວັນທີ 11-13 ກຸມພາ ຜ່ານມາ ທີ່ສະໜາມກິລາໃນ​ຮົ່ມໂຮງຮຽນມັດທະຍົມສຶກສາສົມ​ບູນ​ວຽງ​ຈັນ ນະຄອນຫຼວງວຽງຈັນ, ໂດຍໃຫ້ກຽດຮ່ວມຊົມ ແລະ ມອບລາງວັນຂອງ ທ່ານ ສົມ​ພອນ ສອນ​ດາ​ລາ ຮອງ​ຫົວ​ໜ້າ​ພະ​ແນກ​ສຶກ​ສາ​ທິ​ການ ແລະ ກິ​ລາ ນະ​ຄອນຫຼວງວຽງ​ຈັນ, ທ່ານ ຫົງ​ແກ້ວ ທຳ​ມະ​ວົງ ຫົວ​ໜ້າ​ຂະ​ແໜງ​ພະ​ລະ-ສິ​ລະ​ປະ​ສຶກ​ສາ ພະ​ແນກ​ສຶກ​ສາ​ທິ​ການ ແລະ ກິ​ລາ ນະ​ຄອນຫຼວງວຽງ​ຈັນ ແລະ ທ່ານ ນາງ ປະ​ທຸມ​ພອນ ພິມ​ປະ​ໄພ ຮອງ​ຜູ້​ອຳ​ນວຍ​ການ​​ໂຮງ​ຮຽນສຶກ​ສາ​ສົມ​ບູນ​ວຽງ​ຈັນ, ມີ​ພະ​ນັກງານວິ​ຊາ​ການ, ຄູ​ຝຶກ ແລະ ນັກ​ກິ​ລາເຂົ້າ​ຮ່ວມຢ່າງພ້ອມພຽງ.

 ການ​ແຂ່ງ​ຂັນກິລາບານ​ສົ່ງໃນຄັ້ງນີ້ ດຳເນີນເປັນເວລາ 3 ວັນ ລະຫວ່າງວັນທີ 11-13 ກຸມພາ 2020 ມີທັງໝົດ 20 ທີມ, ຍິງ 10 ທີມ ທີ່ມາຈາກ ສກມ ຈັນທະ​ບູລີ, ຫາດ​ຊາຍ​ຟອງ, ນາ​ຊາຍ​ທອງ, ​ໄຊ​ເຊດ​ຖາ , ​ສີໂຄດຕະບອງ, ສີສັດຕະນາກ  ແລະ ສກມ ໄຊທານີ,  3  ​ໂຮງຮຽນ​ຄື: ​ໂຮງຮຽນ ມັດທະຍົມ​ສຶກສາສົມ​ບູນວຽງຈັນ, ມສ ມິດຕະພາບລາວ-ຫວຽດນາມ ແລະ ມ.ປາຍ ນະຄອນຫຼວງວຽງຈັນ-ນະຄອນໂຮ່ຈິມິນ. ຊຶ່ງຮູບແບບການແຂ່ງຂັນແມ່ນຈັບສະຫຼາກປະກົບຄູ່ ເສຍຄັດອອກເລີຍ ທີມຊະນະແມ່ນຜ່ານເຂົ້າສູ່ຮອບຕໍ່ໄປ.

ສຳລັບຄູ່ຊີງຊະນະເລີດ ປະເພດທີມຍິງ ເປັນການໂຄຈອນມາພົບກັນລະຫວ່າງ ທີມຫ້ອງການ​ສຶກສາ​ທິການ ​ແລະ ກິລາ ​ເມືອງຫາດ​ຊາຍ​ຟອງ ດີກຣີແຊ໋ມເກົ່າປີ 2019 ພົບກັບ ທີມໂຮງ​ຮຽນ​ມັດ​ທະ​ຍົມສຶກສາ​ສົມ​ບູນ​ວຽງ​ຈັນ. ຜ່ານການແຂ່ງຂັນຜົນປະກົດວ່າ ມສ ວຽງຈັນ ໂຊຟອມເກັ່ງໄລ່ປາບແຊ໋ມເກົ່າ ສກມ ຫາດຊາຍຟອງ ໄປແບບໝົດສະພາບ 2-0 ເຊັດ ​25-15 ແລະ 25-19 ຄະແນນ ຄວ້າແຊ໋ມໄປຄອງໄດ້​ສຳເລັດ ໄດ້ຮັບຂັນ 1 ໜ່ວຍ ພ້ອມເງິນສົດ 1 ລ​້ານກີບ, ອັນດັບ 2 ສກມ ຫາດ​ຊາຍ​ຟອງ ໄດ້ຮັບຂັນ 1 ໜ່ວຍ ພ້ອມເງິນສົດ ​8 ແສນກີບ, ​ອັນດັບ 3  ສກມ ໄຊເຊດ​ຖາ ໄດ້ຮັບຂັນ 1 ໜ່ວຍ ພ້ອມເງິນສົດ ​7 ແສນກີບ ແລະ ອັນດັບ 4 ສກມ ສີ​ໂຄດ​ຕະ​ບອງ ໄດ້ຮັບເງິນສົດ​ 6 ແສນກີບ.  ສ່ວນປະເພດທີມຊາຍ ອັນດັບ 1  ຫ້ອງການ​ສຶກສາ​ທິການ ​ແລະ ກິລາເມືອງ​ໄຊ​ເຊດ​ຖາ ໄດ້ຮັບຂັນ 1 ໜ່ວຍ ພ້ອມເງິນສົດ 1 ລ້ານກີບ, ອັນດັບ 2 ຫ້ອງການ​ສຶກສາ​ທິການ ​ແລະ ກິລາ​ເມືອງ​ນາ​ຊາຍ​ທອງ ໄດ້​ຮັບຂັນ 1 ໜ່ວຍ ພ້ອມເງິນສົດ ​8 ແສນກີບ, ອັນດັບ 3 ຫ້ອງການ​ສຶກສາ​ທິການ ​ແລະ ກິລາເມືອງສີ​ໂຄດ​ຕະ​ບອງ ໄດ້ຮັບຂັນ 1 ໜ່ວຍ ພ້ອມເງິນສົດ ​7 ແສນກີບ.

ສຳລັບ​ກິ​ລາ​ບານ​ສົ່ງ​ຫາດ​ຊາຍ ​ທີມ​ຊາຍ ອັນດັບ 1 ສກມ ຈັນ​ທະ​ບູ​ລີ ​ໄດ້​​ຮັບຂັນ 1 ໜ່ວຍ ​ພ້ອມ​ເງິນ​ສົດ  7 ແສນ​ກີບ, ອັນດັບ 2 ສກມ ນາ​ຊາຍ​ທອງ ໄດ້​​ຮັບຂັນ 1 ໜ່ວຍ ​ພ້ອມ​ເງິນ​ສົດ  6 ແສນ​ກີບ, ອັນດັບ 3  ສກມ ໄຊ​ເສດ​ຖາ ໄດ້​​ຮັບຂັນ 1 ໜ່ວຍ ພ້ອມ​ເງິນ​ສົດ  6 ແສນ​ກີບ ແລະ ອັນດັບ 4 ມ​.ປາຍ ວຽງ​ຈັນ-ໂຮ່​ຈິ​ມິນ ໄດ້​ຮັບ​ເງິນ​ສົດ 3 ແສນ​ກີບ; ປະ​ເພດ​ທີມ​ຍິງ ອັນດັບ 1 ສກມ ສີ​ໂຄດ​ຕະ​ບອງ ​ໄດ້​​ຮັບຂັນ 1 ໜ່ວຍ ພ້ອມ​ເງິນ​ສົດ  7 ແສນ​ກີບ, ອັນດັບ 2 ມ.​ປາຍ ວຽງ​ຈັນ-ໂຮ່​ຈິ​ມິນ ໄດ້​​ຮັບຂັນ 1 ໜ່ວຍ ​ພ້ອມ​ເງິນ​ສົດ  6 ແສນ​ກີບ, ອັນດັບ 3   ມ​ສ ວຽງ​ຈັນ ໄດ້​​ຮັບຂັນ 1 ໜ່ວຍ ​ພ້ອມ​ເງິນ​ສົດ  6 ແສນ​ກີບ ແລະ ອັນດັບທີ 4 ສກມ ນາ​ຊາຍ​ທອງ ໄດ້​ຮັບ​ເງິນ​ສົດ 3 ແສນ​ກີບ.

                                                           ໂດຍ: ສີວອນ ( ສຶກສາ-ກິລາ ນວ )

ຮອງປະທານປະເທດ ເນັ້ນໃຫ້ຄະນະບໍລິຫານງານສູນກາງພັກ-ລັດຖະບານ ຍົກສູງຄວາມຮັບຜິດຊອບດ້ານການເມືອງ

ທ່ານຮອງປະທານປະເທດ ຮຽກຮ້ອງໃຫ້ຄະນະບໍລິຫານງານສູນກາງພັກ ແລະ ລັດຖະບານ ຍົກສູງຄວາມຮັບຜິດຊອບດ້ານການເມືອງ ໃນການສືບຕໍ່ນໍາໄປຄົ້ນຄວ້າເຊື່ອມຊຶມ ແລະ ຈັດຕັ້ງຜັນຂະຫຍາຍ ເຂົ້າໃນແຕ່ລະຂົງເຂດວຽກງານທີ່ຕົນຮັບຜິດຊອບຢ່າງເປັນເຈົ້າການ.

ເມື່ອວັນທີ 14 ກຸມພາ ຜ່ານມາ ທີ່ນະຄອນຫຼວງວຽງຈັນ ໄດ້ມີກອງປະຊຸມເຜີຍແຜ່, ເຊື່ອມຊຶມເອກະສານສໍາຄັນຂອງພັກ-ລັດ ພາຍໃຕ້ການເປັນປະທານຂອງທ່ານ ພັນຄໍາ ວິພາວັນ ກໍາມະການກົມການເມືອງສູນກາງພັກ, ຜູ້ປະຈໍາການ ຄະນະເລຂາທິການສູນາກາງພັກ, ຮອງປະທານປະເທດແຫ່ງ ສປປ ລາວ, ມີບັນດາກໍາມະການກົມການເມືອງ, ເລຂາທິການສູນກາງພັກ, ຜູ້ແທນທີ່ມາຈາກກະຊວງ, ອົງການ ແລະ ທ້ອງຖິ່ນເຂົ້າຮ່ວມ.

       ໃນກອງປະຊຸມ, ໄດ້ຮັບຟັງການເຜີຍແຜ່ກ່ຽວກັບຜົນການເຄື່ອນໄຫວວຽກງານຕ່າງປະເທດຂອງການນໍາພັກ-ລັດ ໃນປີ 2019 ແລະ ຕົ້ນປີ 2020 ເປັນຕົ້ນແມ່ນຜົນສໍາເລັດຂອງການຢ້ຽມຢາມ ແລະ ເຮັດວຽກຢູ່ ສສ ຫວຽດນາມ, ສປ ຈີນ ແລະ ຣາຊະອານາຈັກກໍາປູເຈຍ ຂອງສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ, ສະຫາຍ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ກ່ຽວກັບການກະກຽມສະເຫຼີມສະຫຼອງວັນປະຫວັດສາດສໍາຄັນຂອງຊາດ-ຂອງພັກ ໃນປີ 2020 ເພື່ອໃຫ້ຄະນະພັກ, ກະຊວງ, ອົງການ ແລະ ທ້ອງຖິ່ນໄດ້ເຊື່ອມຊຶມ, ກໍາແໜ້ນ ແລະ ພ້ອມກັນຈັດຕັ້ງຜັນຂະຫຍາຍບັນດາຂໍ້ຕົກລົງການພົວພັນຮ່ວມມືໃນແຕ່ລະຄົງເຂດວຽກງານ ກໍຄືໂຄງການຕ່າງໆກັບປະເທດເພື່ອນມິດໃຫ້ເຂົ້າສູ່ຕົວຈິງ ແລະ ມີປະສິດທິຜົນສູງ. ພ້ອມກັນນັ້ນ, ຍັງເຮັດໃຫ້ການກະກຽມສະເຫຼີມສະຫຼອງວັນສໍາຄັນປະຫວັດສາດ ໂດຍສະເພາະແມ່ນວັນສ້າງຕັ້ງພັກ ປະຊາຊົນ ປະຕິວັດລາວ ຄົບຮອບ 65 ປີ, ວັນຊາດ ທີ 2 ທັນວາ ຄົບຮອບ 45 ປີ, ວັນເກີດປະທານໄກສອນ ພົມວິຫານ ຜູ້ນໍາທີ່ແສນເຄົາລົບຮັກ ຄົບຮອບ 100 ປີ ແລະ ວັນສໍາຄັນອື່ນໆ ເຕັມໄປດ້ວຍຄວາມເບີກບານມ່ວນຊື່ນ, ມີຄວາມເອກອ້າງພາກພູມໃຈຕໍ່ໝາກຜົນໃນການປົກປັກຮັກສາ ແລະ ສ້າງສາພັດທະນາປະເທດຊາດ.

ໂອກາດດັ່ງກ່າວ, ທ່ານ ພັນຄໍາ ວິພາວັນ ໄດ້ເນັ້ນໜັກໃຫ້ຜູ້ແທນເຂົ້າຮ່ວມກອງປະຊຸມ ຈົ່ງໄດ້ຍົກສູງຄວາມຮັບຜິດຊອບດ້ານການເມືອງ ໃນການສືບຕໍ່ນໍາໄປຄົ້ນຄວ້າເຊື່ອມຊຶມ ແລະ ຈັດຕັ້ງຜັນຂະຫຍາຍ ເຂົ້າໃນແຕ່ລະຂົງເຂດວຽກງານທີ່ຕົນຮັບຜິດຊອບຢ່າງເປັນເຈົ້າການ, ຖືເອົາໝາກຜົນຂອງການພົວພັນຮ່ວມມືກັບບັນດາປະເທດເພື່ອນມິດ ກໍຄືການສະເຫຼີມສະເຫຼອງວັນສໍາຄັນທາງປະຫວັດສາດຂອງຊາດ, ຂອງພັກ ໃນປີ 2020 ເປັນຂະບວນການທີ່ແຂງແຮງ, ຟົດຟື້ນຕໍ່ເນື່ອງໃນຂອບເຂດທົ່ວປະເທດ ເພື່ອສືບຕໍ່ຍູ້ແຮງການຈັດຕັ້ງປະຕິບັດກອງປະຊຸມໃຫຍ່ ຄັ້ງທີ X ຂອງພັກ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ໃຫ້ມີຜົນສໍາເລັດຕາມລະດັບຄາດໝາຍ ແລະ ມີດ້ານລື່ນຄາດໝາຍ, ຕິດພັນກັບການກະກຽມ ແລະດໍາເນີນກອງປະຊຸມໃຫຍ່ ຄັ້ງທີ XI ຂອງພັກ ໃນຕົ້ນປີ 2021 ດ້ວຍຖ່ວງທ່າທີ່ໜັກແໜ້ນ ແລະ ໃຫ້ເປັນຂະບວນການກວ້າງຂວາງທົ່ວປວງຊົນລາວບັນດາເຜົ່າ.

ໂດຍ: ມະນີວົງ

ສຶກສາ-ກິລາ ນວ ຖອດຖອນບົດຮຽນວຽກຕິດຕາມກວດກາປະເມີນຜົນ ແລະ ປະກັນຄຸນນະພາບ

 ພະແນກສຶກສາທິການ ແລະ ກິລາ ນະຄອນຫຼວງວຽງຈັນ (ນວ) ຈັດກອງປະຊຸມສະຫຼຸບຖອດຖອນບົດຮຽນວຽກງານ​ຕິດ​ຕາມກວດກາປະເມີນຜົນ ແລະ ປະ​ກັນ​ຄຸນ​ນະ​ພາບ ປະຈໍາປີ 201​9 ໃນລະຫວ່າງວັນທີ 13-14 ກຸມພາ ຜ່ານມາ ທີ່ຫ້ອງປະຊຸມສູນພັດທະນາເດັກ ພະແນກສຶກສາທິການ ແລະ ກິລາ ນະຄອນຫຼວງວຽງຈັນ, ໂດຍພາຍໃຕ້ການເປັນປະທານຂອງທ່ານ ບຸນ​ມີ ຈັນ​ທະ​ອຸ​ດົມ ຮອງ​ຫົວ​ໜ້າ​ກົມ​ກວດ​ກາ ກະ​ຊວງ​ສຶກ​ສາ​ທິ​ການ ແລະ ກິ​ລາ, ທ່ານ ພູ​ທອນ ແສງ​ດາ​ວົງ ຮອງຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ, ທ່ານ ນາງ ຈັນສຸກ ທຳມະວົງສາ ຫົວໜ້າຂະແໜງກວດກາ ປະເມີນຜົນ ແລະ ປະ​ກັນ​ຄຸນ​ນະ​ພາບ ພະແນກສຶກສາທິການ ແລະ ກິລາ ນວ, ມີຫົວໜ້າຫ້ອງການສຶກສາທິການ ແລະ ກິລາ 9 ເມືອງ, ​ຜູ້ອຳນວຍການໂຮງຮຽນທີ່ຂຶ້ນກັບ, ຂະແໜງການຕ່າງໆ, ຫົວ​ໜ້າ​ໝ່ວຍ​ງານກວດ​ກາ​ປະ​ເມີນ​ຜົນ ແລະ ປະ​ກັນ​ຄຸນ​ນະ​ພາບ ຈາກ 9 ເມືອງ ຕະຫຼອດຮອດພະນັກງານວິຊາການເຂົ້າຮ່ວມ.

      ​ໂອກາດ​ດັ່ງກ່າວ, ທ່ານ ນາງ ຈັນສຸກ ທຳມະວົງສາ ໄດ້ກ່າວໃຫ້ຮູ້ວ່າ: ການຈັດກອງປະຊຸມຄັ້ງນີ້ ແມ່ນເພື່ອເປົ້າໝາຍແບບແຜນວິທີເຮັດວຽກຂອງຜູ້ບໍລິຫານຂັ້ນຕ່າງໆໃຫ້ມີການປັບປຸງດີຂຶ້ນ, ເຮັດວຽກມີແຜນການ, ມີການແບ່ງວຽກໃຫ້ບຸກຄົນຮັບຜິດຊອບຢ່າງຈະແຈ້ງ, ກຳນົດລະບອບປະຊຸມ, ລະບອບສ່ອງແສງ, ການລາຍງານສາຍຕັ້ງ ແລະ ສາຍຂວາງ, ການປະຕິບັດພາລະບົດບາດໜ້າທີ່ ແລະ ຂອບເຂດສິດແຕ່ລະຂັ້ນຕາມລະດັບຄາດໝາຍ, ເປັນເຈົ້າການນຳພາຄົ້ນຄວ້າ, ເຊື່ອມຊຶມ ແລະ ຜັນຂະຫຍາຍແຜນພັດທະນາການສຶກສາປະຈຳປີ, ປະຕິບັດຕາມມະຕິກອງປະຊຸມຜູ້ບໍລິຫານການສຶກສາຂັ້ນເມືອງ, ຂັ້ນພະແນກສຶກສາທິການ ແລະ ກິລາ ທົ່ວນະຄອນຫຼວງວຽງຈັນ, ຜັນຂະຫຍາຍມາເປັນແຜນ, ໂຄງການ ແລະ ກິດຈະກຳເຄື່ອນໄຫວລາຍລະອຽດໃນຄວາມຮັບຜິດຊອບຂອງຕົນ, ສູ້ຊົນຈັດຕັ້ງປະຕິບັດບັນດາຄາດໝາຍວຽກທີ່ເປັນບຸລິມະສິດທີ່ກະຊວງສຶກສາທິການ ແລະ ກິລາວາງອອກ ເຮັດໃຫ້ການສຶກສາໄດ້ຂະຫຍາຍຕົວທາງດ້ານປະລິມານ ແລະ ຄຸນນະພາບ ທັງເປັນການແກ້ໄຂສິ່ງຫຍໍ້ທໍ່ຕ່າງໆໃນຂະແໜງການສຶກສາ ບໍ່ວ່າຢູ່ໃນຫ້ອງການ ແລະ ໂຮງຮຽນແຫ່ງຕ່າງໆໃຫ້ນັບມື້ນັບໜ້ອຍລົງເທື່ອລະກ້າວ.

      ກອງປະຊຸມຖອດຖອນບົດຮຽນວຽກງານກວດກາ ແລະ ປະເມີນຜົນຄັ້ງນີ້, ໄດ້ເອົາໃຈໃສ່ເນື້ອໃນຄາດໝາຍ ຄື: ວຽກງານກວດກາການສຶກສາຮອບດ້ານ, ວຽກງານຕິດຕາມ ແລະ ປະເມີນຜົນ, ວຽກງານກວດກາສະເພາະກິດ, ວຽກງານກວດກາຄຳຮ້ອງ ແລະ ຄຳສະເໜີ, ວຽກງານຕ້ານການສໍ້ລາດບັງຫຼວງ ແລະ ສະກັດກັ້ນປະກົດການຫຍໍ້ທໍ່ຕ່າງໆ ແລະ ສາເຫດທີ່ພາໃຫ້ມີດ້ານດີ ແລະ ດ້ານອ່ອນ.

     ຂະນະດຽວກັນນີ້, ທ່ານ ບຸນ​ມີ ຈັນ​ທະ​ອຸ​ດົມ ໄດ້​ມີ​ຄຳ​ຄິດ​ຄຳ​ເຫັນ​ວ່າ: ໃຫ້​ບັນ​ດາ​ຜູ້​ບໍ​ລິ​ຫານ​ມີ​ຄວາມ​ຮັບ​ຮູ້​ເຂົ້າ​ໃຈ​ຕໍ່​ວຽກ​ງານກວດ​ກາ​ປະ​ເມີນ​ຜົນ ແລະ ປະ​ກັນ​ຄຸນ​ນະ​ພາບ, ກຳ​ໄດ້​ພາ​ລະ​ໜ້າ​ທີ່​ວຽກ​ງານກວດ​ກາຕິດ​ຕາມ​ຢຸດ​ທະ​ສາດ​, ຈຸດ​ສຸມ​ຕ້ານ​ການ​ສະ​ກັດ​ກັ້ນ​ປະ​ກົດ​ການ​ຫຍໍ້​ທໍ່, ເພີ່ມ​ທະ​ວີ​ຕິດ​ຕາມກວດ​ກາ​ລັດ​ໃຫ້​ຮັດ​ກຸມ ແລະ ໃຫ້​ມີ​ປະ​ສິດ​ທິ​ພາບ, ກຳ​ໄດ້​ນິ​ຕິ​ກຳ​ພາ​ລະ​ບົດ​ບາດ​​ ເພີ່ມ​ຄວາມ​ຮັບ​ຮູ້, ຈຳ​ແນກ​ນິ​ຕິ​ກຳ​ໃຫ້​ໄດ້, ປັບ​ປຸງ​ກົງ​ຈັກ​ໃຫ້​ເຂັ້ມ​ແຂງ​ ຕ້ອງ​ໄປ​ຕາມ​ຄູ່​ມື​ເຮັດ​ວຽກ​ຂອງ​ລັດ​ວາງ​ອອກ​ໃຫ້​ເຂັ້ມ​ງວດ, ເອື້ອ​ອຳ​ນວຍ​ຄວາມ​ສະ​ດວກ​ໃນ​ການ​ເຄື່ອນ​ໄຫວ​ວຽກ​ງານກວດ​ກາ​ໃຫ້​ທັນ​ສະ​ໄໝ ແລະ ມີ​ປະ​ສິດ​ທິ​ພາບ, ເອົາ​ໃຈ​ໃສ່​ໃນ​ການ​ສ້າງ​ແຜນ​ຕິດ​ຕາມກວດ​ກາ​ໃນ​ການ​ໃຊ້​ງົບ​ປະ​ມານ​ອັນ​ໃດ​ເປັນຫຼັກ, ອັນ​ໃດ​ເປັນ​ສຳ​ຮອງ​. ພ້ອມ​ກັນ​ນັ້ນ, ການ​ນຳ​ແຕ່​ລະ​ຂັ້ນ​ຕ້ອງ​ເປັນ​ຜູ້​ພິ​ຈາ​ລະ​ນາ​ແກ້​ໄຂ​ປະ​ກົດ​ການ​ຫຍໍ້​ທໍ່​ແຕ່​ລະ​ຂັ້ນ​ແຕ່​ລະ​ເປົ້າ​ໝາຍ, ຕ້ອງ​ຮັບ​ຜິດ​ຊອບ​ແຕ່​ລະ​ພາກ​ສ່ວນ​ຂອງ​ໃຜ​ລາວ​ຢ່າງ​ເຂັ້ມ​ງວດ, ຂາດ​ຕົວ ແລະ ເດັດ​ຂາດ​ໃຫ້​ໄດ້.

                                                      ໂດຍ: ສີວອນ (ສຶກສາ-ກິລາ ນວ)